ਘਰਾਂ ‘ਚ ਸੁਰੱਖਿਆ ਲਈ ਰੱਖੀਆਂ ਬੰਦੂਕਾਂ ਬਣ ਰਹੀਆਂ ਬਜ਼ੁਰਗਾਂ ਦੀ ਖ਼ੁਦਕੁਸ਼ੀ ਦਾ ਕਾਰਨ

ਅਮਰੀਕਾ ਵਿੱਚ ਘਰਾਂ ਦੀ ਸੁਰੱਖਿਆ ਲਈ ਖ਼ਰੀਦੀਆਂ ਗਈਆਂ ਬੰਦੂਕਾਂ ਹੁਣ ਉੱਥੋਂ ਦੇ ਬਜ਼ੁਰਗਾਂ ਦੀ ਜ਼ਿੰਦਗੀ ਲਈ ਗੰਭੀਰ ਖ਼ਤਰਾ ਸਾਬਤ ਹੋ ਰਹੀਆਂ ਹਨ। ਮਾਨਸਿਕ ਤਣਾਅ ਅਤੇ ਭੁੱਲਣ ਦੀ ਬਿਮਾਰੀ ਨਾਲ ਜੂਝ ਰਹੇ ਬਜ਼ੁਰਗਾਂ ਵਿੱਚ ਇਨ੍ਹਾਂ ਹਥਿਆਰਾਂ ਕਾਰਨ ਖ਼ੁਦਕੁਸ਼ੀ ਦੇ ਮਾਮਲੇ ਤੇਜ਼ੀ ਨਾਲ ਵਧੇ ਹਨ।ਅਮਰੀਕੀ ਸਿਹਤ ਏਜੰਸੀ ਸੀਡੀਸੀ (CDC) ਮੁਤਾਬਕ, 2024 ਵਿੱਚ 65 ਤੋਂ 85 ਸਾਲ ਦੀ ਉਮਰ ਦੇ 8,226 ਬਜ਼ੁਰਗਾਂ ਦੀ ਮੌਤ ਗੋਲੀ ਲੱਗਣ ਕਾਰਨ ਹੋਈ। ਇਸ ਦਾ ਮਤਲਬ ਹੈ ਕਿ ਹਰ ਰੋਜ਼ ਔਸਤਨ ਲਗਭਗ 23 ਬਜ਼ੁਰਗਾਂ ਨੇ ਗੋਲੀ ਲੱਗਣ ਕਾਰਨ ਆਪਣੀ ਜਾਨ ਗੁਆਈ। ਇਨ੍ਹਾਂ ਵਿੱਚੋਂ 90 ਫ਼ੀਸਦੀ ਤੋਂ ਵੱਧ ਮਾਮਲੇ ਖ਼ੁਦਕੁਸ਼ੀ ਦੇ ਸਨ
ਖੋਜ ਅਧਿਐਨਾਂ ਤੋਂ ਸਾਹਮਣੇ ਆਇਆ ਹੈ ਕਿ ਡਿਮੈਂਸ਼ੀਆ ਤੋਂ ਪੀੜਤ ਲਗਭਗ ਹਰ ਤਿੰਨ ਵਿੱਚੋਂ ਇੱਕ ਵਿਅਕਤੀ ਦੀ ਪਹੁੰਚ ਵਿੱਚ ਬੰਦੂਕ ਮੌਜੂਦ ਹੁੰਦੀ ਹੈ। ਸੱਤ ਸੂਬਿਆਂ ਵਿੱਚ ਕੀਤੇ ਗਏ ਇੱਕ ਵਿਸਤ੍ਰਿਤ ਸਰਵੇਖਣ ਮੁਤਾਬਕ, ਡਿਪਰੈਸ਼ਨ ਅਤੇ ਯਾਦਦਾਸ਼ਤ ਗੁਆਉਣ ਦੀ ਸਮੱਸਿਆ ਨਾਲ ਜੂਝ ਰਹੇ 33 ਫ਼ੀਸਦੀ ਬਜ਼ੁਰਗਾਂ ਦੇ ਘਰਾਂ ਵਿੱਚ ਬੰਦੂਕਾਂ ਮੌਜੂਦ ਸਨ।
ਖੋਜਕਰਤਾ ਲੌਰਾ ਪ੍ਰੇਟਰ ਨਾਲ ਗੱਲਬਾਤ ਦੌਰਾਨ ਇੱਕ 72 ਸਾਲਾ ਬਜ਼ੁਰਗ ਨੇ ਦੱਸਿਆ ਕਿ ਉਹ ਆਪਣੇ ਬਿਸਤਰੇ ਦੇ ਬਿਲਕੁਲ ਕੋਲ ਦੋ ਹਥਿਆਰ ਰੱਖਦੇ ਹਨ, ਜਦਕਿ ਉਹ ਗੰਭੀਰ ਡਿਪਰੈਸ਼ਨ ਅਤੇ ਭੁੱਲਣ ਦੀ ਬਿਮਾਰੀ ਤੋਂ ਪੀੜਤ ਸਨ।
ਵਾਸ਼ਿੰਗਟਨ ਯੂਨੀਵਰਸਿਟੀ ਦੀ ਮਾਹਰ ਕੇਲਸੀ ਕੌਨਰਿਕ ਦਾ ਮੰਨਣਾ ਹੈ ਕਿ ਬਿਮਾਰੀ ਦੇ ਸ਼ੁਰੂਆਤੀ ਲੱਛਣ ਸਾਹਮਣੇ ਆਉਂਦਿਆਂ ਹੀ ਪਰਿਵਾਰਕ ਮੈਂਬਰਾਂ ਨੂੰ ਇਸ ਵਿਸ਼ੇ ’ਤੇ ਖੁੱਲ੍ਹ ਕੇ ਗੱਲ ਕਰਨੀ ਚਾਹੀਦੀ ਹੈ, ਤਾਂ ਜੋ ਬਜ਼ੁਰਗ ਖ਼ੁਦ ਆਪਣੇ ਹਥਿਆਰਾਂ ਨੂੰ ਸੁਰੱਖਿਅਤ ਕਰਨ ਜਾਂ ਉਨ੍ਹਾਂ ਨੂੰ ਘਰ ਤੋਂ ਹਟਾਉਣ ਦਾ ਫ਼ੈਸਲਾ ਲੈ ਸਕਣ।
ਉੱਥੇ ਹੀ, ਕੋਲੋਰਾਡੋ ਯੂਨੀਵਰਸਿਟੀ ਦੇ ਮਾਹਰ ਕ੍ਰਿਸ ਨੋਪਕੇ ਅਨੁਸਾਰ, ਅਕਸਰ ਪਰਿਵਾਰਕ ਮੈਂਬਰ ਬਜ਼ੁਰਗਾਂ ਦੀ ਨਾਰਾਜ਼ਗੀ ਜਾਂ ਆਪਸੀ ਰਿਸ਼ਤਿਆਂ ਵਿੱਚ ਖਟਾਸ ਪੈਦਾ ਹੋਣ ਦੇ ਡਰ ਕਾਰਨ ਇਸ ਸੰਵੇਦਨਸ਼ੀਲ ਵਿਸ਼ੇ ’ਤੇ ਚਰਚਾ ਕਰਨ ਤੋਂ ਬਚਦੇ ਹਨ। ਅੱਗੇ ਚੱਲ ਕੇ ਇਹ ਚੁੱਪ ਜਾਨਲੇਵਾ ਸਾਬਤ ਹੋ ਸਕਦੀ ਹੈ।