ਧਰਮ ਪਰਿਵਰਤਨ ਕਰਵਾਈਆਂ ਗਈਆਂ ਦੋ ਹਿੰਦੂ ਭੈਣਾਂ ਨੂੰ ਮਿਲੀ ਘਰ ਜਾਣ ਦੀ ਆਗਿਆ, ਸਿੰਧ ਹਾਈ ਕੋਰਟ ਦਾ ਫ਼ੈਸਲਾ

ਸਿੰਧ ਹਾਈ ਕੋਰਟ ਨੇ ਦੋ ਨਾਬਾਲਗ ਹਿੰਦੂ ਭੈਣਾਂ, ਜਿਨ੍ਹਾਂ ਨੂੰ ਪਾਕਿਸਤਾਨ ਵਿੱਚ ਅਗਵਾ ਕਰਕੇ ਜ਼ਬਰਦਸਤੀ ਇਸਲਾਮ ਕਬੂਲ ਕਰਵਾਇਆ ਗਿਆ ਸੀ ਅਤੇ ਉਨ੍ਹਾਂ ਦਾ ਵਿਆਹ ਬਹੁਤ ਵੱਡੀ ਉਮਰ ਦੇ ਮੁਸਲਿਮ ਮਰਦਾਂ ਨਾਲ ਕਰਵਾਇਆ ਗਿਆ ਸੀ, ਨੂੰ ਆਪਣੇ ਮਾਪਿਆਂ ਕੋਲ ਘਰ ਵਾਪਸ ਜਾਣ ਦੀ ਇਜਾਜ਼ਤ ਦੇ ਦਿੱਤੀ ਹੈ।14 ਅਤੇ 13 ਸਾਲ ਦੀਆਂ ਦੋ ਹਿੰਦੂ ਕੁੜੀਆਂ ਨੂੰ 29 ਅਗਸਤ ਨੂੰ ਸਿੰਧ ਸੂਬੇ ਦੇ ਟੰਡੋ ਅੱਲ੍ਹਾਯਾਰ ਦੇ ਇਬਰਾਹਿਮ ਕਲੋਨੀ ਵਿੱਚ ਉਨ੍ਹਾਂ ਦੇ ਘਰ ਦੇ ਨੇੜੇ ਤੋਂ ਅਗਵਾ ਕਰ ਲਿਆ ਗਿਆ ਸੀ।
ਦੋਸ਼ ਹਨ ਕਿ ਉਨ੍ਹਾਂ ਦਾ ਜ਼ਬਰਦਸਤੀ ਧਰਮ ਪਰਿਵਰਤਨ ਕੀਤਾ ਗਿਆ ਸੀ ਅਤੇ ਫਿਰ ਉਨ੍ਹਾਂ ਦਾ ਵਿਆਹ ਬਹੁਤ ਵੱਡੀ ਉਮਰ ਦੇ ਮੁਸਲਿਮ ਮਰਦਾਂ ਨਾਲ ਕਰ ਦਿੱਤਾ ਗਿਆ ਸੀ। ਸਿੰਧ ਹਾਈ ਕੋਰਟ ਦੀ ਹੈਦਰਾਬਾਦ ਬੈਂਚ ਨੇ ਸੋਮਵਾਰ ਨੂੰ ਉਨ੍ਹਾਂ ਨੂੰ ਆਪਣੇ ਮਾਪਿਆਂ ਕੋਲ ਘਰ ਵਾਪਸ ਜਾਣ ਦੀ ਇਜਾਜ਼ਤ ਦੇ ਦਿੱਤੀ।ਇਸ ਮਾਮਲੇ ਵਿੱਚ ਦੋ ਮੁਲਜ਼ਮਾਂ ਖ਼ਿਲਾਫ਼ ਐਫਆਈਆਰ ਦਰਜ ਕੀਤੀ ਗਈ ਹੈ। ਸਤੰਬਰ ਵਿੱਚ ਛੁਡਾਈਆਂ ਗਈਆਂ ਭੈਣਾਂ ਨੂੰ ਤਿੰਨ ਵਾਰ ਟਾਂਡੋ ਅੱਲ੍ਹਾਯਾਰ ਸੈਸ਼ਨ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ।
ਹਿੰਦੂ ਭਾਈਚਾਰੇ ਦੀ ਭਲਾਈ ਲਈ ਕੰਮ ਕਰਨ ਵਾਲੀ ਇੱਕ ਗੈਰ-ਸਰਕਾਰੀ ਸੰਸਥਾ, ਪਾਕਿਸਤਾਨ ਦਰਵਾਰ ਇੱਤੇਹਾਦ ਦੇ ਮੁਖੀ ਸ਼ਿਵਾ ਕਾਚੀ ਨੇ ਕਿਹਾ ਕਿ ਬਹੁਤ ਕੋਸ਼ਿਸ਼ਾਂ ਤੋਂ ਬਾਅਦ, ਅੰਤ ਵਿੱਚ ਸਿੰਧ ਹਾਈ ਕੋਰਟ ਵਿੱਚ ਕੇਸ ਦੀ ਸੁਣਵਾਈ ਹੋਈ ਅਤੇ ਅਦਾਲਤ ਨੇ ਕੁੜੀਆਂ ਨੂੰ ਉਨ੍ਹਾਂ ਦੇ ਮਾਪਿਆਂ ਨਾਲ ਜਾਣ ਦੀ ਇਜਾਜ਼ਤ ਦੇ ਦਿੱਤੀ।