ਹਲਵਾਰਾ ਏਅਰਪੋਰਟ ਤੋਂ ਨਵੀਂਆਂ ਉਡਾਣਾਂ ਦੀ ਆਸ ‘ਤੇ ਫਿਰਿਆ ਪਾਣੀ, ਕੇਂਦਰ ਵੱਲੋਂ ਕੋਈ ਰੋਡਮੈਪ ਨਹੀਂ; ਫ਼ੈਸਲਾ ਹੁਣ ਏਅਰਲਾਈਨਜ਼ ਦੇ ਹੱਥ!

ਪੰਜਾਬ ਦੇ ਹਲਵਾਰਾ ਏਅਰਪੋਰਟ ਤੋਂ ਘਰੇਲੂ ਅਤੇ ਅੰਤਰਰਾਸ਼ਟਰੀ ਉਡਾਣਾਂ ਦੇ ਵਿਸਤਾਰ ਨੂੰ ਲੈ ਕੇ ਕੇਂਦਰ ਸਰਕਾਰ ਨੇ ਫ਼ਿਲਹਾਲ ਕੋਈ ਸਪੱਸ਼ਟ ਰੋਡਮੈਪ ਦੇਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਸਰਕਾਰ ਨੇ ਰਾਜ ਸਭਾ ‘ਚ ਸਪੱਸ਼ਟ ਕੀਤਾ ਕਿ ਕਿਸੇ ਵੀ ਨਵੇਂ ਰੂਟ ‘ਤੇ ਉਡਾਣ ਸ਼ੁਰੂ ਕਰਨ ਦਾ ਫ਼ੈਸਲਾ ਪੂਰੀ ਤਰ੍ਹਾਂ ਸਬੰਧਤ ਏਅਰਲਾਈਨਜ਼ ਦੀ ਕਾਰੋਬਾਰੀ ਸੁਖਾਲਤਾ ‘ਤੇ ਨਿਰਭਰ ਕਰਦਾ ਹੈ। ਅਜਿਹੇ ‘ਚ ਲੁਧਿਆਣਾ ਅਤੇ ਆਸ-ਪਾਸ ਦੇ ਲੋਕਾਂ ਨੂੰ ਮੁੰਬਈ, ਬੈਂਗਲੁਰੂ, ਹੈਦਰਾਬਾਦ, ਪੁਣੇ ਅਤੇ ਅਹਿਮਦਾਬਾਦ ਵਰਗੇ ਮੁੱਖ ਸ਼ਹਿਰਾਂ ਲਈ ਸਿੱਧੀਆਂ ਉਡਾਣਾਂ ਲਈ ਅਜੇ ਹੋਰ ਇੰਤਜ਼ਾਰ ਕਰਨਾ ਪੈ ਸਕਦਾ ਹੈ।
ਰਾਜ ਸਭਾ ਮੈਂਬਰ ਡਾ. ਵਿਕਰਮਜੀਤ ਸਿੰਘ ਸਾਹਨੀ ਦੇ ਸਵਾਲ ਦੇ ਲਿਖਤੀ ਜਵਾਬ ‘ਚ ਨਾਗਰਿਕ ਉੱਡਣ ਰਾਜ ਮੰਤਰੀ ਮੁਰਲੀਧਰ ਮੋਹੋਲ ਨੇ ਦੱਸਿਆ ਕਿ ਹਲਵਾਰਾ ਏਅਰਪੋਰਟ ਤੋਂ ਫ਼ਿਲਹਾਲ ਏਅਰ ਇੰਡੀਆ ਹੀ ਸੇਵਾਵਾਂ ਚਲਾ ਰਹੀ ਹੈ। ਏਅਰ ਇੰਡੀਆ ਵੱਲੋਂ ਦਿੱਲੀ-ਹਲਵਾਰਾ ਰੂਟ ‘ਤੇ ਹਫ਼ਤੇ ‘ਚ 28 ਘਰੇਲੂ ਉਡਾਣਾਂ ਦਾ ਸੰਚਾਲਨ ਕੀਤਾ ਜਾ ਰਿਹਾ ਹੈ। ਹਾਲਾਂਕਿ ਸਰਕਾਰ ਨੇ ਅਗਲੇ ਦੋ ਸਾਲਾਂ ‘ਚ ਨਵੇਂ ਘਰੇਲੂ ਜਾਂ ਅੰਤਰਰਾਸ਼ਟਰੀ ਰੂਟ ਸ਼ੁਰੂ ਕਰਨ ਸਬੰਧੀ ਕਿਸੇ ਯੋਜਨਾ ਦੀ ਜਾਣਕਾਰੀ ਨਹੀਂ ਦਿੱਤੀ।ਮੰਤਰੀ ਨੇ ਕਿਹਾ ਕਿ ਸਾਲ 1994 ‘ਚ ‘ਏਅਰ ਕਾਰਪੋਰੇਸ਼ਨ ਐਕਟ’ ਖ਼ਤਮ ਹੋਣ ਤੋਂ ਬਾਅਦ ਦੇਸ਼ ਦਾ ਘਰੇਲੂ ਹਵਾਨਬਾਜ਼ੀ ਖੇਤਰ ਪੂਰੀ ਤਰ੍ਹਾਂ ਉਦਾਰੀਕ੍ਰਿਤ ਹੈ। ਮੌਜੂਦਾ ਵਿਵਸਥਾ ਤਹਿਤ ਏਅਰਲਾਈਨਜ਼ ਖ਼ੁਦ ਤੈਅ ਕਰਦੀਆਂ ਹਨ ਕਿ ਉਨ੍ਹਾਂ ਨੇ ਕਿਸ ਰੂਟ ‘ਤੇ ਉਡਾਣ ਚਲਾਉਣੀ ਹੈ, ਕਿਹੜਾ ਜਹਾਜ਼ ਲਗਾਉਣਾ ਹੈ ਅਤੇ ਕਿਸ ਮਾਰਕੀਟ ‘ਚ ਸੇਵਾਵਾਂ ਦੇਣਾ ਵਪਾਰਕ ਤੌਰ ‘ਤੇ ਲਾਹੇਵੰਦ ਰਹੇਗਾ। ਇਸ ਲਈ ਹਲਵਾਰਾ ਸਮੇਤ ਕਿਸੇ ਵੀ ਏਅਰਪੋਰਟ ਤੋਂ ਨਵੀਂਆਂ ਉਡਾਣਾਂ ਸ਼ੁਰੂ ਕਰਨ ਦਾ ਫ਼ੈਸਲਾ ਸਬੰਧਤ ਏਅਰਲਾਈਨ ਹੀ ਲੈਂਦੀ ਹੈ।
ਸਰਕਾਰ ਨੇ ਇਹ ਵੀ ਸਪੱਸ਼ਟ ਨਹੀਂ ਕੀਤਾ ਕਿ ਹਲਵਾਰਾ ਏਅਰਪੋਰਟ ਤੋਂ ਨਵੀਂਆਂ ਉਡਾਣਾਂ ਸ਼ੁਰੂ ਕਰਨ ਲਈ ਵੱਖ-ਵੱਖ ਏਅਰਲਾਈਨਜ਼ ਨਾਲ ਕੋਈ ਚਰਚਾ ਕੀਤੀ ਗਈ ਹੈ ਜਾਂ ਨਹੀਂ। ਨਾਲ ਹੀ ਮੁੱਖ ਮਹਾਨਗਰਾਂ ਲਈ ਸਿੱਧੀਆਂ ਉਡਾਣਾਂ ਸ਼ੁਰੂ ਕਰਨ ਦੀ ਕੋਈ ਸਮਾਂ-ਸੀਮਾ ਵੀ ਨਹੀਂ ਦੱਸੀ ਗਈ। ਇਸ ਤੋਂ ਸਾਫ਼ ਹੈ ਕਿ ਹਲਵਾਰਾ ਏਅਰਪੋਰਟ ਦੇ ਵਿਸਤਾਰ ਦੀ ਦਿਸ਼ਾ ਫ਼ਿਲਹਾਲ ਏਅਰਲਾਈਨਜ਼ ਦੀ ਕਾਰੋਬਾਰੀ ਰਣਨੀਤੀ ‘ਤੇ ਹੀ ਨਿਰਭਰ ਰਹੇਗੀ।ਹਲਵਾਰਾ ਏਅਰਪੋਰਟ ਤੋਂ 15 ਮਈ 2026 ਨੂੰ ਵਪਾਰਕ ਉਡਾਣਾਂ ਦਾ ਸੰਚਾਲਨ ਸ਼ੁਰੂ ਹੋਇਆ ਸੀ। ਏਅਰ ਇੰਡੀਆ ਇਸ ਏਅਰਪੋਰਟ ਤੋਂ ਸੇਵਾ ਸ਼ੁਰੂ ਕਰਨ ਵਾਲੀ ਪਹਿਲੀ ਏਅਰਲਾਈਨ ਬਣੀ। ਦਿੱਲੀ-ਹਲਵਾਰਾ ਰੂਟ ‘ਤੇ A320 ਸ਼੍ਰੇਣੀ ਦੇ ਜਹਾਜ਼ਾਂ ਨਾਲ ਰੋਜ਼ਾਨਾ ਚਾਰ ਉਡਾਣਾਂ ਦਾ ਸੰਚਾਲਨ ਕੀਤਾ ਜਾ ਰਿਹਾ ਹੈ, ਜਿਸ ਨਾਲ ਹਫ਼ਤੇ ‘ਚ ਕੁੱਲ 28 ਉਡਾਣਾਂ ਉਪਲਬਧ ਹਨ।
ਇਨ੍ਹਾਂ ਉਡਾਣਾਂ ਦਾ ਸਮਾਂ ਇਸ ਤਰ੍ਹਾਂ ਨਿਰਧਾਰਿਤ ਕੀਤਾ ਗਿਆ ਹੈ ਕਿ ਲੁਧਿਆਣਾ ਅਤੇ ਆਸ-ਪਾਸ ਦੇ ਉਦਯੋਗਿਕ ਖੇਤਰ ਦੇ ਕਾਰੋਬਾਰੀ ਯਾਤਰੀਆਂ ਨੂੰ ਦਿੱਲੀ ਰਾਹੀਂ ਵਿਦੇਸ਼ ਜਾਣ ‘ਚ ਸਹੂਲਤ ਮਿਲੇ। ਯਾਤਰੀ ਇੱਕੋ ਟਿਕਟ ‘ਤੇ ਲੰਡਨ, ਬਰਮਿੰਘਮ, ਪੈਰਿਸ, ਰੋਮ ਅਤੇ ਮਿਲਾਨ ਵਰਗੇ ਅੰਤਰਰਾਸ਼ਟਰੀ ਸ਼ਹਿਰਾਂ ਤੱਕ ਯਾਤਰਾ ਕਰ ਸਕਦੇ ਹਨ। ਨਾਲ ਹੀ ਦਿੱਲੀ ‘ਚ ਸਮਾਨ ਦੁਬਾਰਾ ਚੈੱਕ-ਇਨ ਕਰਵਾਉਣ ਦੀ ਲੋੜ ਨਹੀਂ ਪੈਂਦੀ, ਜਿਸ ਨਾਲ ਯਾਤਰਾ ਦਾ ਸਮਾਂ ਵੀ ਘੱਟਦਾ ਹੈ। ਹਾਲਾਂਕਿ ਪੰਜਾਬ ਦੇ ਉਦਯੋਗ ਅਤੇ ਕਾਰੋਬਾਰ ਜਗਤ ਦੀ ਲੰਬੇ ਸਮੇਂ ਤੋਂ ਮੰਗ ਹੈ ਕਿ ਹਲਵਾਰਾ ਏਅਰਪੋਰਟ ਤੋਂ ਦੇਸ਼ ਦੇ ਮੁੱਖ ਮਹਾਨਗਰਾਂ ਲਈ ਵੀ ਸਿੱਧੀਆਂ ਉਡਾਣਾਂ ਜਲਦ ਸ਼ੁਰੂ ਕੀਤੀਆਂ ਜਾਣ।