ਮਾਈਕ੍ਰੋਸਾਫਟ ਦੀਆਂ ਸੇਵਾਵਾਂ 16 ਘੰਟਿਆਂ ਤੋਂ ਵੱਧ ਸਮੇਂ ਤੱਕ ਰਹੀਆਂ ਠੱਪ

ਦੁਨੀਆ ਭਰ ਵਿੱਚ ਮਚੀ ਹਫੜਾ-ਦਫੜੀ ਦੌਰਾਨ ਅਮਰੀਕੀ ਸ਼ੇਅਰ ਬਾਜ਼ਾਰ ਵਿੱਚ ਕੰਪਨੀ ਦੇ ਸ਼ੇਅਰਾਂ ਵਿੱਚ ਕਰੀਬ 2 ਫ਼ੀਸਦੀ ਦੀ ਗਿਰਾਵਟ ਦੇਖੀ ਗਈ। ਇਸ ਗਲੋਬਲ ਆਊਟੇਜ ਕਾਰਨ ਲਗਭਗ 10 ਅਰਬ ਡਾਲਰ  93 ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਦੇ ਨੁਕਸਾਨ ਦਾ ਖ਼ਦਸ਼ਾ ਜਤਾਇਆ ਗਿਆ ਹੈ।
ਏਪੀ ਨੇ ਆਊਟੇਜ ਟ੍ਰੈਕਰ ਡਾਊਨਡਿਟੈਕਟਰ ਦੇ ਹਵਾਲੇ ਨਾਲ ਦੱਸਿਆ ਕਿ ਭਾਰਤ ਸਮੇਤ 74 ਦੇਸ਼ਾਂ ਵਿੱਚ ਕਰੀਬ 43 ਕਰੋੜ ਯੂਜ਼ਰ ਇਸ ਸਮੱਸਿਆ ਤੋਂ ਪ੍ਰਭਾਵਿਤ ਹੋਏ। ਦਰਜਨਾਂ ਦੇਸ਼ਾਂ ਦੇ ਲਗਭਗ 1.30 ਲੱਖ ਯੂਜ਼ਰਾਂ ਨੇ ਆਉਟਲੁੱਕ ਤੱਕ ਪਹੁੰਚਣ ਵਿੱਚ ਮੁਸ਼ਕਲ ਆਉਣ ਦੀ ਸ਼ਿਕਾਇਤ ਕੀਤੀ।
ਮਾਈਕ੍ਰੋਸਾਫਟ ਨੇ ਸਪੱਸ਼ਟ ਕੀਤਾ ਕਿ ਇਹ ਸੰਕਟ ਸਾਈਬਰ ਸੁਰੱਖਿਆ ਵਿੱਚ ਸੰਨ੍ਹ ਲੱਗਣ ਜਾਂ ਏਆਈ ਹਮਲੇ ਕਾਰਨ ਪੈਦਾ ਨਹੀਂ ਹੋਇਆ। ਨਿਊਯਾਰਕ ਟਾਈਮਜ਼ ਮੁਤਾਬਕ, ਸ਼ੁੱਕਰਵਾਰ ਨੂੰ ਮਾਈਕ੍ਰੋਸਾਫਟ ਨੇ ਦੱਸਿਆ ਕਿ ਉਸ ਨੇ ਏਸ਼ੀਆ-ਪ੍ਰਸ਼ਾਂਤ ਖੇਤਰ ਵਿੱਚ ਸੇਵਾਵਾਂ ਬਹਾਲ ਕਰਨ ਦੀਆਂ ਕੋਸ਼ਿਸ਼ਾਂ ਪੂਰੀਆਂ ਕਰ ਲਈਆਂ ਹਨ ਅਤੇ ਈਮੇਲ ਸੇਵਾਵਾਂ ਵਿੱਚ ਸੁਧਾਰ ਦਿਖਾਈ ਦੇਣ ਲੱਗਾ ਹੈ।
ਕੰਪਨੀ ਨੇ ਚਿਤਾਵਨੀ ਦਿੱਤੀ ਹੈ ਕਿ ਕੁਝ ਯੂਜ਼ਰਾਂ ਨੂੰ ਰੁਕ-ਰੁਕ ਕੇ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਉਮੀਦ ਹੈ ਕਿ 48 ਘੰਟਿਆਂ ਵਿੱਚ ਸੇਵਾਵਾਂ ਪੂਰੀ ਤਰ੍ਹਾਂ ਆਮ ਹੋ ਜਾਣਗੀਆਂ।
ਭਾਰਤ ਵਿੱਚ ਇੰਡੀਗੋ, ਸਪਾਈਸਜੈੱਟ ਅਤੇ ਅਕਾਸਾ ਏਅਰ ਦੀਆਂ ਈਮੇਲ ਸੇਵਾਵਾਂ ਪ੍ਰਭਾਵਿਤ ਹੋਈਆਂ। ਇੰਡੀਗੋ ਨੇ ਐਡਵਾਈਜ਼ਰੀ ਜਾਰੀ ਕਰਦਿਆਂ ਦੱਸਿਆ ਕਿ ਉਹ ਗਾਹਕਾਂ ਦੀਆਂ ਈਮੇਲਾਂ ਪ੍ਰਾਪਤ ਨਹੀਂ ਕਰ ਪਾ ਰਹੀ। ਕੰਪਨੀ ਨੇ ਯਾਤਰੀਆਂ ਨੂੰ ਆਪਣੀਆਂ ਉਡਾਣਾਂ ਨਾਲ ਜੁੜੀਆਂ ਅਪਡੇਟਾਂ ’ਤੇ ਨਜ਼ਰ ਰੱਖਣ ਦੀ ਸਲਾਹ ਦਿੱਤੀ।
ਸਪਾਈਸਜੈੱਟ ਨੇ ਸ਼ੁੱਕਰਵਾਰ ਸਵੇਰੇ ਦਿੱਲੀ ਤੋਂ ਪੁਣੇ, ਲੇਹ ਅਤੇ ਮੁੰਬਈ ਜਾਣ ਵਾਲੀਆਂ ਤਿੰਨ ਉਡਾਣਾਂ ਰੱਦ ਕਰ ਦਿੱਤੀਆਂ। ਦਰਭੰਗਾ ਅਤੇ ਮੁੰਬਈ ਜਾਣ ਵਾਲੀਆਂ ਦੋ ਹੋਰ ਉਡਾਣਾਂ ਵਿੱਚ ਵੀ ਦੇਰੀ ਹੋਈ। ਉੱਧਰ, ਏਅਰ ਇੰਡੀਆ ਨੇ ਕਿਹਾ ਕਿ ਉਸ ਦੇ ਉਡਾਣ ਸੰਚਾਲਨ ’ਤੇ ਕੋਈ ਅਸਰ ਨਹੀਂ ਪਿਆ।
ਯਾਤਰੀਆਂ ਨਾਲ ਸੰਪਰਕ ਬਣਾਈ ਰੱਖਣ ਲਈ ਈਮੇਲ ਟ੍ਰੈਫਿਕ ਨੂੰ ਅਸਥਾਈ ਤੌਰ ’ਤੇ ਦੂਜੇ ਰਸਤੇ ਰਾਹੀਂ ਭੇਜਣ ਦਾ ਪ੍ਰਬੰਧ ਕੀਤਾ ਗਿਆ। ਦਿੱਲੀ ਹਵਾਈ ਅੱਡੇ ਨੇ ਵੀ ਯਾਤਰੀਆਂ ਨੂੰ ਘਰੋਂ ਨਿਕਲਣ ਤੋਂ ਪਹਿਲਾਂ ਆਪਣੀ ਉਡਾਣ ਦਾ ਸਟੇਟਸ ਜਾਂਚਣ ਲਈ ਕਿਹਾ।
ਨਿਊਯਾਰਕ ਟਾਈਮਜ਼ ਮੁਤਾਬਕ, ਇਸ ਤਕਨੀਕੀ ਗੜਬੜ ਦਾ ਅਸਰ ਕਈ ਦੇਸ਼ਾਂ ਦੀਆਂ ਜ਼ਰੂਰੀ ਸੇਵਾਵਾਂ ’ਤੇ ਵੀ ਪਿਆ। ਬ੍ਰਿਟੇਨ ਵਿੱਚ ਨੈਸ਼ਨਲ ਹੈਲਥ ਸਰਵਿਸ (ਐੱਨਐੱਚਐੱਸ) ਦੇ ਈਮੇਲ ਸਿਸਟਮ ਵਿੱਚ ਰੁਕਾਵਟ ਆਉਣ ਕਾਰਨ ਕੁਝ ਮਰੀਜ਼ਾਂ ਨੂੰ ਦਵਾਈਆਂ ਦੇ ਪਰਚੇ ਮਿਲਣ ਵਿੱਚ ਮੁਸ਼ਕਲ ਆਈ।
ਸਰਜਰੀ ਕਰਵਾਉਣ ਵਾਲੇ ਮਰੀਜ਼ਾਂ ਨੂੰ ਈਮੇਲ ਦੀ ਵਰਤੋਂ ਨਾ ਕਰਨ ਦੀ ਸਲਾਹ ਦਿੱਤੀ ਗਈ। ਐਂਬੂਲੈਂਸ ਅਤੇ ਪੁਲਿਸ ਸੇਵਾਵਾਂ ਨਾਲ ਈਮੇਲ ਰਾਹੀਂ ਸੰਪਰਕ ਕਰਨ ਵਿੱਚ ਵੀ ਦਿੱਕਤ ਆਈ। ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਲੋੜ ਪੈਣ ’ਤੇ ਫ਼ੋਨ ਰਾਹੀਂ ਸੰਪਰਕ ਕਰਨ ਲਈ ਕਿਹਾ।
ਸਕਾਟਲੈਂਡ ਵਿੱਚ ਸਿਵਲ ਅਤੇ ਅਪਰਾਧਿਕ ਅਦਾਲਤਾਂ ਦੀ ਕਾਰਵਾਈ ਦੇਰ ਨਾਲ ਸ਼ੁਰੂ ਹੋਈ। ਕੁਝ ਮਾਮਲਿਆਂ ਦੀ ਸੁਣਵਾਈ ਵੀ ਪ੍ਰਭਾਵਿਤ ਹੋਈ। ਲੋਕਾਂ ਨੂੰ ਆਪਣੀਆਂ ਸਥਾਨਕ ਅਦਾਲਤਾਂ ਨਾਲ ਸੰਪਰਕ ਕਰਨ ਦੀ ਸਲਾਹ ਦਿੱਤੀ ਗਈ।
ਅਲ ਜਜ਼ੀਰਾ ਮੁਤਾਬਕ, ਸਿੰਗਾਪੁਰ ਅਤੇ ਜਾਪਾਨ ਵਿੱਚ ਸਰਕਾਰੀ ਪ੍ਰਣਾਲੀਆਂ ਦਾ ਕੰਮਕਾਜ ਪ੍ਰਭਾਵਿਤ ਹੋਇਆ, ਜਦਕਿ ਫਿਲੀਪੀਨਜ਼ ਦੀ ਸੁਪਰੀਮ ਕੋਰਟ ਦੀ ਸੰਚਾਰ ਪ੍ਰਣਾਲੀ ’ਤੇ ਵੀ ਅਸਰ ਪਿਆ। ਆਸਟ੍ਰੇਲੀਆ ਵਿੱਚ ਦੇਸ਼ ਦੀ ਖੁਫੀਆ ਏਜੰਸੀ ਅਤੇ ਸੰਘੀ ਪੁਲਿਸ ਵੀ ਪ੍ਰਭਾਵਿਤ ਸੰਸਥਾਵਾਂ ਵਿੱਚ ਸ਼ਾਮਲ ਰਹੀਆਂ।
ਇਹ ਰੁਕਾਵਟ ਸਿਰਫ਼ ਮਾਈਕ੍ਰੋਸਾਫਟ ਦੀਆਂ ਆਪਣੀਆਂ ਐਪਲੀਕੇਸ਼ਨਾਂ ਤੱਕ ਹੀ ਸੀਮਤ ਨਹੀਂ ਰਹੀ। ਓਪਨਏਆਈ ਅਤੇ ਐਂਥਰੋਪਿਕ ਨੇ ਵੀ ਆਪਣੇ ਮਾਈਕ੍ਰੋਸਾਫਟ 365 ਕਨੈਕਟਰਾਂ ਨਾਲ ਜੁੜੀਆਂ ਸਮੱਸਿਆਵਾਂ ਦੀ ਜਾਣਕਾਰੀ ਦਿੱਤੀ।
ਰਾਇਟਰਜ਼ ਮੁਤਾਬਕ, ਮਾਈਕ੍ਰੋਸਾਫਟ ਦੀ ਈਮੇਲ ਸੇਵਾ ਵਿੱਚ ਆਈ ਖ਼ਰਾਬੀ ਦਾ ਅਸਰ ਵੱਡੇ ਵਿੱਤੀ ਅਦਾਰਿਆਂ ਤੱਕ ਪਹੁੰਚਿਆ। ਸ਼ੁੱਕਰਵਾਰ ਸਵੇਰੇ ਹਾਂਗਕਾਂਗ ਦੇ ਬੈਂਕਿੰਗ ਖੇਤਰ ਵਿੱਚ ਕੰਮਕਾਜ ਪ੍ਰਭਾਵਿਤ ਹੋਇਆ। ਤਾਈਵਾਨ ਵਿੱਚ ਈਮੇਲ ਸੇਵਾਵਾਂ ਬੰਦ ਹੋਣ ਕਾਰਨ ਫੈਕਸ ਦੀ ਵਰਤੋਂ ਕਰਨੀ ਪਈ। ਗੋਲਡਮੈਨ ਸੈਕਸ ਅਤੇ ਨੋਮੁਰਾ ਵਰਗੇ ਵੱਡੇ ਨਿਵੇਸ਼ ਬੈਂਕਾਂ ਦੇ ਕਰਮਚਾਰੀ ਵੀ ਇਸ ਤੋਂ ਪ੍ਰਭਾਵਿਤ ਹੋਏ।
ਕੈਨੇਡਾ, ਜਰਮਨੀ ਅਤੇ ਅਮਰੀਕਾ ਵਿੱਚ ਰੇਲ ਸੇਵਾਵਾਂ ’ਤੇ ਵੀ ਅਸਰ ਪਿਆ। ਕੈਨੇਡਾ ਦੀ ਵੀਆਈਏ ਰੇਲ ਨੇ ਦੱਸਿਆ ਕਿ ਯਾਤਰੀਆਂ ਨੂੰ ਟ੍ਰੇਨ ਟ੍ਰੈਕਰ, ਈਮੇਲ ਅਤੇ ਐੱਸਐੱਮਐੱਸ ਰਾਹੀਂ ਸੂਚਨਾਵਾਂ ਨਹੀਂ ਮਿਲ ਰਹੀਆਂ।
ਬ੍ਰਿਟੇਨ ਦੀ ਨੈਸ਼ਨਲ ਰੇਲ ਨੇ ਵੀ ਈਮੇਲ ਰਾਹੀਂ ਟਿਕਟਾਂ ਪ੍ਰਾਪਤ ਕਰਨ ਵਿੱਚ ਮੁਸ਼ਕਲ ਆਉਣ ਦੀ ਗੱਲ ਕਹੀ। ਦੱਖਣੀ ਅਫ਼ਰੀਕਾ ਦੀ ਸੇਮਏਅਰ ਨੇ ਸਿਸਟਮ ਵਿੱਚ ਰੁਕਾਵਟਾਂ ਦੀ ਜਾਣਕਾਰੀ ਦਿੱਤੀ। ਅਮਰੀਕਾ ਦੀ ਇਲੈਕਟ੍ਰਿਕ ਟਰੱਕ ਨਿਰਮਾਤਾ ਕੰਪਨੀ ਵਰਕ ਹੌਰਸ ਨੂੰ ਤਾਂ ਆਪਣੇ ਕੰਪਨੀ ਨਤੀਜਿਆਂ ਦਾ ਐਲਾਨ ਵੀ ਟਾਲਣਾ ਪਿਆ।
2024 ਵਿੱਚ ਕਰਾਊਡਸਟ੍ਰਾਈਕ ਦੇ ਗ਼ਲਤ ਅਪਡੇਟ ਕਾਰਨ ਕਰੋੜਾਂ ਕੰਪਿਊਟਰ ਠੱਪ ਹੋ ਗਏ ਸਨ। ਜਨਵਰੀ ਅਤੇ ਅਗਸਤ ਵਿੱਚ ਵੀ ਸੇਵਾਵਾਂ ਵਿੱਚ ਰੁਕਾਵਟ ਆਈ ਸੀ।
ਮਾਈਕ੍ਰੋਸਾਫਟ ਦੀਆਂ ਸੇਵਾਵਾਂ ਦਾ ਠੱਪ ਹੋਣਾ ਕੋਈ ਨਵੀਂ ਗੱਲ ਨਹੀਂ ਹੈ। 19 ਜੁਲਾਈ 2024 ਨੂੰ ਕੰਪਨੀ ਦੀਆਂ ਸੇਵਾਵਾਂ ਨਾਲ ਜੁੜਿਆ ਇੱਕ ਵੱਡਾ ਤਕਨੀਕੀ ਸੰਕਟ ਸਾਹਮਣੇ ਆਇਆ ਸੀ, ਜਿਸ ਨੇ ਪੂਰੀ ਦੁਨੀਆ ਵਿੱਚ ਹਫੜਾ-ਦਫੜੀ ਮਚਾ ਦਿੱਤੀ ਸੀ। ਉਸ ਘਟਨਾ ਵਿੱਚ 50 ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਦੇ ਨੁਕਸਾਨ ਦਾ ਅਨੁਮਾਨ ਲਗਾਇਆ ਗਿਆ ਸੀ।