ਦਿਲਜੀਤ ਦੋਸਾਂਝ ਦਾ ਕ੍ਰੇਜ਼! ਸ਼ੋਅ ਦੀਆਂ 95% ਤੋਂ ਵੱਧ ਟਿਕਟਾਂ ਹੋਈਆਂ ਬੁੱਕ

ਮੁੱਲਾਂਪੁਰ ਸਟੇਡੀਅਮ ’ਚ 12 ਦਸੰਬਰ ਨੂੰ ਪੰਜਾਬੀ ਗਾਇਕ ਦਿਲਜੀਤ ਦੋਸਾਂਝ ਦੇ ਮਿਊਜ਼ਿਕ ਕੰਸਰਟ ਨੂੰ ਲੈ ਕੇ ਆਏ ਦਿਨ ਧਮਕੀ ਭਰੇ ਈਮੇਲ ਮਿਲ ਰਹੇ ਹਨ। ਇਸ ਦੇ ਬਾਵਜੂਦ ਸ਼ੋਅ ਨੂੰ ਲੈ ਕੇ ਪ੍ਰਸ਼ੰਸਕਾਂ ’ਚ ਜ਼ਬਰਦਸਤ ਉਤਸ਼ਾਹ ਹੈ। ਵੀਰਵਾਰ ਨੂੰ ਟਿਕਟ ਬੁਕਿੰਗ ਸ਼ੁਰੂ ਹੋਣ ਦੇ ਸਿਰਫ਼ ਦੋ ਘੰਟੇ ਅੰਦਰ ਹੀ 95 ਫ਼ੀਸਦੀ ਤੋਂ ਵੱਧ ਟਿਕਟਾਂ ਵਿਕ ਗਈਆਂ। ਕਰੀਬ 38 ਹਜ਼ਾਰ ਦਰਸ਼ਕਾਂ ਦੀ ਸਮਰੱਥਾ ਵਾਲੇ ਸਟੇਡੀਅਮ ਦੀਆਂ 30 ਹਜ਼ਾਰ ਤੋਂ ਜ਼ਿਆਦਾ ਟਿਕਟਾਂ ਬੁੱਕ ਹੋ ਚੁੱਕੀਆਂ ਹਨ। ਸ਼ੋਅ ਦੀਆਂ ਟਿਕਟਾਂ ਦੀ ਆਨਲਾਈਨ ਬੁਕਿੰਗ ਸ਼ੁਰੂ ਹੋਈ ਸੀ।
ਸ਼ੁਰੂਆਤੀ ਪੰਜ ਤੋਂ ਦੱਸ ਮਿੰਟ ’ਚ ਹੀ 999 ਰੁਪਏ ਵਾਲੀਆਂ ਟਿਕਟਾਂ ਵਿਕ ਗਈਆਂ। ਇਸ ਤੋਂ ਬਾਅਦ ਸ਼ੁਰੂਆਤੀ ਕੈਟੇਗਰੀ ਦੀਆਂ ਟਿਕਟਾਂ ਚਾਹੁਣ ਵਾਲੇ ਪ੍ਰਸ਼ੰਸਕਾਂ ਦੇ ਨਿਰਾਸ਼ਾ ਹੱਥ ਲੱਗੀ। ਕੁਝ ਮਹਿੰਗੀ ਕੈਟੇਗਰੀ ਦੀਆਂ ਟਿਕਟਾਂ ਹੀ ਉਪਲਬਧ ਰਹਿ ਗਈਆਂ। ਸਟੇਡੀਅਮ ’ਚ ਸਟੇਜ ਦੇ ਪਿੱਛੇ ਦੀਆਂ ਸੀਟਾਂ ਨੂੰ ਛੱਡ ਕੇ ਵੱਖ-ਵੱਖ ਕੈਟੇਗਰੀਆਂ ’ਚ ਟਿਕਟਾਂ ਰੱਖੀਆਂ ਗਈਆਂ ਸਨ। ਇਨ੍ਹਾਂ ਦੀ ਕੀਮਤ 999 ਰੁਪਏ ਤੋਂ ਲੈ ਕੇ 13 ਹਜ਼ਾਰ 999 ਰੁਪਏ ਤੱਕ ਸੀ। ਲਗਾਤਾਰ ਮਿਲ ਰਹੀਆਂ ਧਮਕੀ ਭਰੀਆਂ ਈਮੇਲਾਂ ਨੂੰ ਦੇਖਦਿਆਂ ਸ਼ੋਅ ਦੌਰਾਨ ਸੁਰੱਖਿਆ ਦੇ ਪੁਖ਼ਤਾ ਇੰਤਜ਼ਾਮ ਕੀਤੇ ਜਾਣ ਦੀ ਸੰਭਾਵਨਾ ਹੈ।
ਪੰਜਾਬੀ ਗਾਇਕ ਸ਼ੈਰੀ ਮਾਨ ਦਾ ਮਿਊਜ਼ਿਕ ਕੰਸਰਟ 28 ਨਵੰਬਰ ਨੂੰ ਚੰਡੀਗੜ੍ਹ ਦੇ ਨੇੜੇ ਓਮੈਕਸ ਵਰਲਡ ਸਟ੍ਰੀਟ ’ਚ ਹੋਵੇਗਾ। ਇਸ ਸ਼ੋਅ ਦੀਆਂ ਟਿਕਟਾਂ ਦੀ ਕੀਮਤ 1,999 ਰੁਪਏ ਤੋਂ ਸ਼ੁਰੂ ਹੋਵੇਗੀ। ਟਿਕਟਾਂ ਦੀ ਵਿਕਰੀ ਜਲਦੀ ਸ਼ੁਰੂ ਹੋਣ ਵਾਲੀ ਹੈ।
ਬਾਲੀਵੁੱਡ ਗਾਇਕ ਅਰਿਜੀਤ ਸਿੰਘ ਦਾ ਕੰਸਰਟ ਵੀ 23 ਜਨਵਰੀ ਨੂੰ ਚੰਡੀਗੜ੍ਹ ’ਚ ਪ੍ਰਸਤਾਵਿਤ ਹੈ। ਫਿਲਹਾਲ ਇਸ ਦੀ ਟਿਕਟ ਬੁਕਿੰਗ ਸ਼ੁਰੂ ਨਹੀਂ ਹੋਈ ਹੈ। ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਨੂੰ ਟਿਕਟਾਂ ਦੀ ਵਿਕਰੀ ਸ਼ੁਰੂ ਹੋਣ ਦਾ ਇੰਤਜ਼ਾਰ ਹੈ। ਇਹ ਕੰਸਰਟ ਵੀ ਮੁੱਲਾਂਪੁਰ ਸਟੇਡੀਅਮ ’ਚ ਹੋ ਸਕਦਾ ਹੈ।
ਦਿਲਜੀਤ ਦੋਸਾਂਝ ਦਾ ਇਸ ਤੋਂ ਪਹਿਲਾਂ ਦਸੰਬਰ 2024 ’ਚ ਚੰਡੀਗੜ੍ਹ ਸੈਕਟਰ-34 ਸਥਿਤ ਐਗਜ਼ੀਬਿਸ਼ਨ ਗਰਾਊਂਡ ’ਚ ”ਦਿਲ-ਲੁਮਿਨਾਟੀ ਟੂਰ” ਤਹਿਤ ਕੰਸਰਟ ਹੋਇਆ ਸੀ। ਉਸ ਦੌਰਾਨ ਉਨ੍ਹਾਂ ਨੇ ਮਨਜ਼ੂਰੀ ਮਿਲਣ ’ਚ ਦੇਰੀ ਤੇ ਅਵਿਵਸਥਾ ਨੂੰ ਲੈ ਕੇ ਮੰਚ ਤੋਂ ਯੂ.ਟੀ. ਪ੍ਰਸ਼ਾਸਨ ’ਤੇ ਨਾਰਾਜ਼ਗੀ ਪ੍ਰਗਟਾਈ ਸੀ। ਉੱਥੇ ਹੀ, ਸਥਾਨਕ ਲੋਕਾਂ ਨੇ ਵੀ ਸੈਕਟਰ-34 ’ਚ ਵੱਡੇ ਕੰਸਰਟ ਆਯੋਜਿਤ ਕਰਨ ’ਤੇ ਸਵਾਲ ਉਠਾਏ ਸਨ। ਲੋਕਾਂ ਨੇ ਸ਼ੋਰ ਪ੍ਰਦੂਸ਼ਣ, ਪਾਰਕਿੰਗ ਦੀ ਅਵਿਵਸਥਾ ਤੇ ਟ੍ਰੈਫਿਕ ਜਾਮ ਵਰਗੀਆਂ ਸਮੱਸਿਆਵਾਂ ਦੀ ਸ਼ਿਕਾਇਤ ਕੀਤੀ ਸੀ। ਇਸ ਤੋਂ ਬਾਅਦ ਪ੍ਰਸ਼ਾਸਨ ਨੇ ਸੈਕਟਰ-34 ’ਚ ਅਜਿਹੇ ਕੰਸਰਟ ਆਯੋਜਿਤ ਕਰਨ ’ਤੇ ਰੋਕ ਲਾ ਦਿੱਤੀ ਸੀ। ਇਸ ਦੇ ਕਰੀਬ ਦੋ ਹਫ਼ਤੇ ਬਾਅਦ ਹੋਣ ਵਾਲਾ ਏ.ਪੀ. ਢਿੱਲੋਂ ਦਾ ਕੰਸਰਟ ਸੈਕਟਰ-25 ਸਥਿਤ ਰੈਲੀ ਗਰਾਊਂਡ ’ਚ ਸ਼ਿਫਟ ਕੀਤਾ ਗਿਆ ਸੀ। ਕਰਨ ਔਜਲਾ ਦਾ ਸ਼ੋਅ ਵੀ ਚੰਡੀਗੜ੍ਹ ’ਚ ਹੋ ਚੁੱਕਾ ਹੈ।
ਨਿਊ ਚੰਡੀਗੜ੍ਹ ’ਚ ਬਣੇ ਇਸ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ਦੀ ਸ਼ੁਰੂਆਤ 2024 ’ਚ ਹੋਈ ਸੀ। ਇੱਥੇ ਆਈ.ਪੀ.ਐੱਲ. ਦਾ ਪਹਿਲਾ ਮੈਚ ਖੇਡਿਆ ਗਿਆ ਸੀ। ਇਸ ਤੋਂ ਬਾਅਦ ਕਈ ਅੰਤਰਰਾਸ਼ਟਰੀ ਕ੍ਰਿਕਟ ਮੈਚ ਵੀ ਹੋ ਚੁੱਕੇ ਹਨ। ਹਾਲਾਂਕਿ ਹੁਣ ਤੱਕ ਇਸ ਸਟੇਡੀਅਮ ’ਚ ਕੋਈ ਮਿਊਜ਼ਿਕ ਕੰਸਰਟ ਨਹੀਂ ਹੋਇਆ ਹੈ। ਦਿਲਜੀਤ ਦੋਸਾਂਝ ਦੇ ਸ਼ੋਅ ਦੇ ਨਾਲ ਇੱਥੇ ਪਹਿਲੀ ਵਾਰ ਸੰਗੀਤ ਪ੍ਰੋਗਰਾਮ ਆਯੋਜਿਤ ਹੋਵੇਗਾ। ਜਨਵਰੀ ’ਚ ਅਰਿਜੀਤ ਸਿੰਘ ਦਾ ਕੰਸਰਟ ਵੀ ਇੱਥੇ ਹੋਣ ਦੀ ਸੰਭਾਵਨਾ ਹੈ।