ਹਿਮਾਚਲ ਪ੍ਰਦੇਸ਼ ਅਤੇ ਪੰਜਾਬ ਦੇ ਹਜ਼ਾਰਾਂ ਨਿਵੇਸ਼ਕਾਂ ਨੂੰ ਕ੍ਰਿਪਟੋਕਰੰਸੀ ਵਿਚ ਕਮਾਈ ਦਾ ਲਾਲਚ ਦੇ ਕੇ 2,000 ਕਰੋੜ ਰੁਪਏ ਤੋਂ ਵੱਧ ਦੀ ਠੱਗੀ ਕਰਨ ਦੇ ਮਾਮਲੇ ਵਿਚ ਈਡੀ ਨੇ ਚੰਡੀਗੜ੍ਹ, ਮੋਹਾਲੀ ਅਤੇ ਜ਼ੀਰਕਪੁਰ ਵਿਚ ਛਾਪੇਮਾਰੀ ਕੀਤੀ। ਇਸ ਕਾਰਵਾਈ ਦੌਰਾਨ 72 ਲੱਖ ਰੁਪਏ ਨਕਦ, ਜਾਇਦਾਦਾਂ ਦੇ ਦਸਤਾਵੇਜ਼, ਡਿਜੀਟਲ ਉਪਕਰਣ ਅਤੇ ਬੈਂਕ ਖਾਤਿਆਂ ਦੇ ਰਿਕਾਰਡ ਜ਼ਬਤ ਕੀਤੇ ਗਏ। ਮੁੱਖ ਮੁਲਜ਼ਮ ਸੁਭਾਸ਼ ਸ਼ਰਮਾ ਦੇ ਕਰੀਬੀ ਅਤੁਲ ਸੂਦ ਨੂੰ ਗ੍ਰਿਫ਼ਤਾਰ ਕਰਕੇ ਸ਼ਿਮਲਾ ਦੀ ਵਿਸ਼ੇਸ਼ ਪੀਐਮਐਲਏ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ। ਅਦਾਲਤ ਨੇ ਉਸ ਨੂੰ 5 ਨਵੰਬਰ ਤੱਕ ਈਡੀ ਦੀ ਹਿਰਾਸਤ ਵਿਚ ਭੇਜ ਦਿੱਤਾ।ਈਡੀ ਮੁਤਾਬਕ ਸੂਦ ਦੁਬਈ ਜਾ ਕੇ ਸੁਭਾਸ਼ ਸ਼ਰਮਾ ਨੂੰ ਮਿਲਿਆ ਸੀ ਅਤੇ ਉਸ ਲਈ ਸੰਮੇਲਨ ਤੇ ਹੋਰ ਸਮਾਗਮ ਕਰਵਾਉਣ ਵਿਚ ਸ਼ਾਮਲ ਸੀ। ਐੱਫਆਈਆਰ ਦਰਜ ਹੋਣ ਤੋਂ ਬਾਅਦ ਵੀ ਇਹ ਸਰਗਰਮੀਆਂ ਜਾਰੀ ਰਹੀਆਂ। ਇਹ ਕਾਰਵਾਈ ਧਨ-ਸ਼ੋਧਨ ਰੋਕਥਾਮ ਕਾਨੂੰਨ, 2002 ਦੀ ਧਾਰਾ 17(1) ਤਹਿਤ ਕੀਤੀ ਗਈ। ਈਡੀ ਅਨੁਸਾਰ ਪੋਂਜ਼ੀ ਮਾਡਲ ’ਤੇ ਚੱਲ ਰਹੀ ਇਸ ਯੋਜਨਾ ਵਿਚ ਨਵੇਂ ਨਿਵੇਸ਼ਕਾਂ ਤੋਂ ਮਿਲੀ ਰਕਮ ਨਾਲ ਪੁਰਾਣੇ ਨਿਵੇਸ਼ਕਾਂ ਨੂੰ ਭੁਗਤਾਨ ਕੀਤਾ ਜਾਂਦਾ ਸੀ। ਡਿਜੀਟਲ ਰਿਕਾਰਡਾਂ ਮੁਤਾਬਕ, 2.48 ਲੱਖ ਤੋਂ ਵੱਧ ਵਰਤੋਂਕਾਰ ਪ੍ਰਭਾਵਿਤ ਹੋਏ ਅਤੇ 219 ਮਿਲੀਅਨ ਅਮਰੀਕੀ ਡਾਲਰ ਤੋਂ ਵੱਧ ਦੇ ਲੈਣ-ਦੇਣ ਹੋਏ।ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਨਕਦੀ ਰਾਹੀਂ ਇਕੱਠੀ ਕੀਤੀ ਰਕਮ ਟੀਮ ਮੁਖੀਆਂ ਰਾਹੀਂ ਸੁਭਾਸ਼ ਸ਼ਰਮਾ ਅਤੇ ਉਸ ਦੇ ਸਾਥੀਆਂ ਤੱਕ ਪਹੁੰਚਾਈ ਜਾਂਦੀ ਸੀ। ਇਸ ਮਾਮਲੇ ਵਿਚ ਵਿਜੇ ਕੁਮਾਰ ਜੁਨੇਜਾ ਅਤੇ ਮਾਸੂਮ ਜੁਨੇਜਾ ਦੇ ਨਾਂ ਵੀ ਸਾਹਮਣੇ ਆਏ ਹਨ। ਰਕਮ ਦਾ ਇਕ ਹਿੱਸਾ ਅਚੱਲ ਜਾਇਦਾਦਾਂ ਵਿਚ ਲਾਇਆ ਗਿਆ, ਜਦਕਿ ਕੁਝ ਪੈਸਾ ਬੈਂਕ ਖਾਤਿਆਂ, ਫਰਜ਼ੀ ਕੰਪਨੀਆਂ ਅਤੇ ਵਿਚੋਲਿਆਂ ਰਾਹੀਂ ਭੇਜ ਕੇ ਕ੍ਰਿਪਟੋ ਕਰੰਸੀ ਵਿਚ ਬਦਲਿਆ ਗਿਆ।ਈਡੀ ਨੇ 13 ਦਸੰਬਰ 2025 ਅਤੇ 15 ਜੂਨ 2026 ਨੂੰ ਵੀ ਛਾਪੇਮਾਰੀ ਕੀਤੀ ਸੀ। ਉਸ ਵੇਲੇ ਕਰੀਬ 1.5 ਕਰੋੜ ਰੁਪਏ ਦੀਆਂ ਚੱਲ ਜਾਇਦਾਦਾਂ ਜ਼ਬਤ ਕੀਤੀਆਂ ਗਈਆਂ ਸਨ। ਹੇਮਰਾਜ, ਸੁਖਦੇਵ ਠਾਕੁਰ, ਅਭਿਸ਼ੇਕ ਸ਼ਰਮਾ, ਮਿਲਨ ਗਰਗ ਅਤੇ ਮਾਸੂਮ ਜੁਨੇਜਾ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਈਡੀ ਮੁਤਾਬਕ, ਸੁਭਾਸ਼ ਸ਼ਰਮਾ ਦੁਬਈ ਫ਼ਰਾਰ ਹੋ ਗਿਆ ਸੀ।
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.
