ਹੁਣ ਗੱਡੀਆਂ ਵੀ ਆਪਸ ‘ਚ ਗੱਲਾਂ ਕਰਨਗੀਆਂ

ਸੜਕੀ ਦੁਰਘਟਨਾਵਾਂ ਭਾਰਤ ਲਈ ਇੱਕ ਵੱਡੀ ਚੁਣੌਤੀ ਹਨ। ਭਾਰਤ ਵਿੱਚ ਹਰ ਘੰਟੇ ਲਗਭਗ 20 ਲੋਕ ਆਪਣੀ ਜਾਨ ਗਵਾਉਂਦੇ ਹਨ ਅਤੇ ਪੰਜਾਬ ਵਿੱਚ ਰੋਜ਼ਾਨਾ ਔਸਤਨ 13 ਲੋਕ ਸੜਕ ਹਾਦਸਿਆਂ ਦਾ ਸ਼ਿਕਾਰ ਬਣਦੇ ਹਨ। ਇਸ ਗੰਭੀਰ ਸਮੱਸਿਆ ਨੂੰ ਹੱਲ ਕਰਨ ਲਈ ਭਾਰਤ ਸਰਕਾਰ ਇੱਕ ਮਹੱਤਵਪੂਰਨ ਤਕਨੀਕ ਲਾਗੂ ਕਰਨ ਜਾ ਰਹੀ ਹੈ, ਜਿਸ ਨਾਲ ਸੜਕ ਦੁਰਘਟਨਾਵਾਂ ਵਿੱਚ ਲਗਭਗ 40 ਫੀਸਦੀ ਤੱਕ ਕਮੀ ਆ ਸਕਦੀ ਹੈ। ਇਹ ਤਕਨੀਕ ਵਾਹਨਾਂ ਲਈ ਇੱਕ ਜੀਵਨਦਾਨ ਵਾਂਗ ਸਾਬਤ ਹੋਵੇਗੀ। ਕੇਂਦਰੀ ਸੜਕ ਅਤੇ ਟਰਾਂਸਪੋਰਟ ਮੰਤਰਾਲੇ ਨੇ ਮੋਟਰ ਵਾਹਨ ਨਿਯਮ 1989 ਵਿੱਚ ਸੋਧ ਕਰਕੇ ਇੱਕ ਡਰਾਫਟ ਤਿਆਰ ਕੀਤਾ ਹੈ, ਜਿਸ ਵਿੱਚ ਵਾਹਨਾਂ ਵਿੱਚ V2V (ਵਹੀਕਲ ਟੂ ਵਹੀਕਲ) ਕਮਿਊਨੀਕੇਸ਼ਨ ਸਿਸਟਮ ਨੂੰ ਲਾਜ਼ਮੀ ਬਣਾਉਣ ਦਾ ਫੈਸਲਾ ਲਿਆ ਗਿਆ ਹੈ।
ਇਸ ਤਕਨੀਕ ਤਹਿਤ 1 ਅਕਤੂਬਰ 2027 ਤੋਂ ਨਵੀਆਂ ਗੱਡੀਆਂ ਵਿੱਚ V2V ਸਿਸਟਮ ਲਾਗੂ ਕੀਤਾ ਜਾਵੇਗਾ ਅਤੇ ਉਨ੍ਹਾਂ ਨੂੰ AIS-230 ਮਾਨਕ ਦਾ ਪਾਲਣ ਕਰਨਾ ਪਵੇਗਾ। ਇਹ ਸਿਸਟਮ ਟੂ-ਵ੍ਹੀਲਰ, ਈ-ਸਕੂਟਰ, ਆਟੋ ਰਿਕਸ਼ਾ, ਬੱਸ ਅਤੇ ਟਰੱਕ ਵਰਗੀਆਂ ਸਾਰੀਆਂ ਸ਼੍ਰੇਣੀਆਂ ਦੀਆਂ ਗੱਡੀਆਂ ਵਿੱਚ ਲਾਗੂ ਹੋਵੇਗਾ। V2V ਤਕਨੀਕ ਇੱਕ ਵਾਇਰਲੈੱਸ ਤਕਨਾਲੋਜੀ ਹੈ, ਜਿਸ ਰਾਹੀਂ ਗੱਡੀਆਂ ਆਪਸ ਵਿੱਚ ਆਪਣੀ ਲੋਕੇਸ਼ਨ, ਰਫ਼ਤਾਰ, ਦਿਸ਼ਾ ਅਤੇ ਬ੍ਰੇਕ ਲੱਗਣ ਵਰਗੀ ਰੀਅਲ ਟਾਈਮ ਜਾਣਕਾਰੀ ਸਾਂਝੀ ਕਰ ਸਕਦੀਆਂ ਹਨ। ਇਸ ਲਈ ਇੰਟਰਨੈੱਟ ਦੀ ਲੋੜ ਨਹੀਂ ਪੈਂਦੀ। ਇਸ ਤਕਨੀਕ ਨਾਲ ਗੱਡੀਆਂ ਇੱਕ ਦੂਜੇ ਦੀ ਮੌਜੂਦਗੀ ਬਾਰੇ ਪਹਿਲਾਂ ਹੀ ਜਾਣਕਾਰੀ ਪ੍ਰਾਪਤ ਕਰ ਲੈਂਦੀਆਂ ਹਨ।
ਹਰ V2V ਯੁਕਤ ਵਾਹਨ ਲਗਾਤਾਰ ਬੇਸਿਕ ਸੇਫਟੀ ਮੈਸੇਜ (BSM) ਭੇਜਦਾ ਰਹਿੰਦਾ ਹੈ। ਆਸ-ਪਾਸ ਦੀਆਂ ਗੱਡੀਆਂ ਇਸ ਨੂੰ ਰਿਸੀਵ ਕਰਕੇ ਸੰਭਾਵਿਤ ਟੱਕਰ ਦਾ ਅੰਦਾਜ਼ਾ ਲਗਾਉਂਦੀਆਂ ਹਨ ਅਤੇ ਖ਼ਤਰਾ ਮਹਿਸੂਸ ਹੋਣ ‘ਤੇ ਡਰਾਈਵਰ ਨੂੰ ਤੁਰੰਤ ਅਲਰਟ ਜਾਰੀ ਕਰਦੀਆਂ ਹਨ। ਇਸ ਲਈ ਗੱਡੀਆਂ ਵਿੱਚ ਸੈਂਸਰ, GPS, ਰਾਡਾਰ ਅਤੇ ਕੈਮਰੇ ਵਰਗੀਆਂ ਉਪਕਰਣਾਂ ਦੀ ਲੋੜ ਹੁੰਦੀ ਹੈ। ਇਹ ਉਪਕਰਣ ਵਾਹਨ ਦੀ ਰਫ਼ਤਾਰ, ਦਿਸ਼ਾ ਅਤੇ ਸਥਿਤੀ ਬਾਰੇ ਡਾਟਾ ਇਕੱਠਾ ਕਰਦੇ ਹਨ। ਗੱਡੀ ਹਰ ਸਕਿੰਟ ਵਿੱਚ ਕਈ ਵਾਰ ਆਪਣੀ ਜਾਣਕਾਰੀ ਨੇੜੇ ਚੱਲ ਰਹੀਆਂ ਹੋਰ ਗੱਡੀਆਂ ਨੂੰ ਵਾਇਰਲੈੱਸ ਸਿਗਨਲ ਰਾਹੀਂ ਭੇਜਦੀ ਹੈ। ਰਿਸੀਵਰ ਗੱਡੀਆਂ ਇਸ ਡਾਟਾ ਦਾ ਵਿਸ਼ਲੇਸ਼ਣ ਕਰਕੇ ਖ਼ਤਰੇ ਬਾਰੇ ਫੈਸਲਾ ਲੈਂਦੀਆਂ ਹਨ।