ਸੈਲਮਾ ਦੇ 73 ਸਾਲਾ ਵਿਅਕਤੀ ’ਤੇ ਚਾਰ ਔਰਤਾਂ ਨਾਲ ਜਿਨਸੀ ਛੇੜਛਾੜ ਦੇ ਦੋਸ਼

 ਸੈਲਮਾ ਪੁਲਿਸ ਨੇ 73 ਸਾਲਾ ਪਾਲ ਸਿੰਘ ਨੂੰ ਬਿਨਾਂ AUOTHORIZATION DE ਘਰ ਵਿੱਚ ਇਲਾਜ ਕਰਨ ਅਤੇ ਇਲਾਜ ਦੌਰਾਨ ਔਰਤਾਂ ਨਾਲ ਕਥਿਤ ਜਿਨਸੀ ਛੇੜਛਾੜ ਕਰਨ ਦੇ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤਾ ਹੈ। ਅਦਾਲਤੀ ਰਿਕਾਰਡ ਅਨੁਸਾਰ ਚਾਰ ਵੱਖ-ਵੱਖ ਔਰਤਾਂ ਨੇ ਉਸ ਖ਼ਿਲਾਫ਼ ਸ਼ਿਕਾਇਤ ਕੀਤੀ ਹੈ। ਇਨ੍ਹਾਂ ਸ਼ਿਕਾਇਤਾਂ ਦੇ ਆਧਾਰ ’ਤੇ ਉਸ ਉੱਤੇ ਜਿਨਸੀ ਹਮਲੇ ਨਾਲ ਸਬੰਧਤ ਚਾਰ ਗੰਭੀਰ ਅਪਰਾਧਿਕ ਦੋਸ਼ ਲਗਾਏ ਗਏ ਹਨ।
ਪੁਲਿਸ ਅਨੁਸਾਰ ਕਥਿਤ ਘਟਨਾਵਾਂ ਜੂਨ 2023 ਤੋਂ ਜੁਲਾਈ 2025 ਵਿਚਕਾਰ ਵਾਪਰੀਆਂ। ਪਾਲ ਸਿੰਘ 8 ਸਤੰਬਰ ਨੂੰ ਗ੍ਰਿਫ਼ਤਾਰ ਹੋਇਆ ਸੀ। ਉਸ ਦੀ ਜ਼ਮਾਨਤ ਦੋ ਲੱਖ ਡਾਲਰ ਰੱਖੀ ਗਈ ਅਤੇ 10 ਸਤੰਬਰ ਨੂੰ ਜ਼ਮਾਨਤ ਭਰਨ ਤੋਂ ਬਾਅਦ ਉਸ ਨੂੰ ਜੇਲ੍ਹ ਵਿੱਚੋਂ ਰਿਹਾਅ ਕਰ ਦਿੱਤਾ ਗਿਆ। ਉਸ ਨੇ ਅਦਾਲਤ ਵਿੱਚ ਆਪਣੇ ਉੱਤੇ ਲੱਗੇ ਸਾਰੇ ਦੋਸ਼ਾਂ ਤੋਂ ਇਨਕਾਰ ਕਰਦਿਆਂ ਖ਼ੁਦ ਨੂੰ ਬੇਕਸੂਰ ਦੱਸਿਆ ਹੈ। ਮਾਮਲੇ ਦੀ ਅਗਲੀ ਸੁਣਵਾਈ 27 ਅਕਤੂਬਰ ਨੂੰ ਹੋਣੀ ਹੈ। ⁠
ਜਾਂਚ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪਾਲ ਸਿੰਘ ਆਪਣੇ ਸੈਲਮਾ ਸਥਿਤ ਘਰ ਤੋਂ ਲੋਕਾਂ ਦਾ ਇਲਾਜ ਕਰਦਾ ਸੀ। ਪੁਲਿਸ ਮੁਤਾਬਕ ਉਸ ਕੋਲ ਕਾਇਰੋਪ੍ਰੈਕਟਿਕ ਇਲਾਜ ਕਰਨ ਦਾ ਪਰਵਾਨਾ ਨਹੀਂ ਸੀ। ਉਹ ਭਾਈਚਾਰੇ ਵਿੱਚ ਆਪਣੇ ਆਪ ਨੂੰ ਇਲਾਜ ਕਰਨ ਵਾਲੇ ਵਿਅਕਤੀ ਵਜੋਂ ਪੇਸ਼ ਕਰਦਾ ਸੀ ਅਤੇ ਕੈਲੀਫੋਰਨੀਆ ਦੇ ਵੱਖ-ਵੱਖ ਇਲਾਕਿਆਂ ਤੋਂ ਲੋਕ ਉਸ ਕੋਲ ਆਉਂਦੇ ਸਨ। ਇੱਕ ਅੰਤਰਜਾਲੀ ਟਿੱਪਣੀ ਵਿੱਚ ਕੈਨੇਡਾ ਤੋਂ ਇਲਾਜ ਲਈ ਆਉਣ ਦਾ ਦਾਅਵਾ ਵੀ ਕੀਤਾ ਗਿਆ ਸੀ।ਬਚਾਅ ਪੱਖ ਦੇ ਵਕੀਲ ਐਡੀ ਰੂਈਜ਼ ਨੇ ਅਦਾਲਤ ਨੂੰ ਦੱਸਿਆ ਕਿ ਪਾਲ ਸਿੰਘ ਦਾ ਪਹਿਲਾਂ ਕੋਈ ਅਪਰਾਧਿਕ ਰਿਕਾਰਡ ਨਹੀਂ ਹੈ। ਵਕੀਲ ਅਨੁਸਾਰ ਉਸ ਨੇ ਭਾਰਤ ਵਿੱਚ ਦਬਾਅ ਰਾਹੀਂ ਇਲਾਜ ਦੀ ਸਿਖਲਾਈ ਲਈ ਸੀ ਅਤੇ ਬਾਅਦ ਵਿੱਚ ਅੰਤਰਜਾਲ ਰਾਹੀਂ ਹੋਰ ਸਿਖਲਾਈ ਪੂਰੀ ਕੀਤੀ। ਅਦਾਲਤੀ ਪੱਤਰ ਮੁਤਾਬਕ ਉਹ 2010 ਤੋਂ 2016 ਤੱਕ ਸੈਲਮਾ ਦੇ ਸਿੱਖ ਸੈਂਟਰ ਆਫ਼ ਦ ਪੈਸਿਫਿਕ ਕੋਸਟ ਵਿੱਚ ਧਾਰਮਿਕ ਸੇਵਾ ਵੀ ਕਰਦਾ ਰਿਹਾ।⁠
ਇਹ ਸਾਰੇ ਦੋਸ਼ ਅਜੇ ਅਦਾਲਤ ਵਿੱਚ ਸਾਬਤ ਨਹੀਂ ਹੋਏ। ਕਾਨੂੰਨ ਅਨੁਸਾਰ ਅੰਤਿਮ ਫ਼ੈਸਲਾ ਹੋਣ ਤੱਕ ਮੁਲਜ਼ਮ ਨੂੰ ਬੇਕਸੂਰ ਮੰਨਿਆ ਜਾਂਦਾ ਹੈ।