ਸਮੁੰਦਰ ‘ਚ ਤਣਾਅ ਵਧਿਆ! ਕੂਵੈਤੀ ਟੈਂਕਰ ਨੂੰ ਬਣਾਇਆ ਗਿਆ ਨਿਸ਼ਾਨਾ, ਵਾਲ-ਵਾਲ ਬਚੇ 5 ਭਾਰਤੀ ਨਾਗਰਿਕ

ਮਿਡਲ ਈਸਟ ‘ਚ ਤਣਾਅ ਅਜੇ ਵੀ ਜਾਰੀ ਹੈ। ਇਸ ਦੌਰਾਨ ਸ਼ੁੱਕਰਵਾਰ ਨੂੰ ਹੁਰਮੁਜ਼ ਜਲਡਮਰੂਮੱਧ ‘ਚ ਕੂਵੈਤ ਦੇ ਝੰਡੇ ਵਾਲੇ ਕੱਚੇ ਤੇਲ ਦੇ ਟੈਂਕਰ ’ਤੇ ਹਮਲਾ ਕੀਤਾ ਗਿਆ। ਇਸ ਟੈਂਕਰ ’ਤੇ ਪੰਜ ਭਾਰਤੀ ਨਾਗਰਿਕ ਸਵਾਰ ਸਨ। ਓਮਾਨ ਸਥਿਤ ਭਾਰਤੀ ਦੂਤਾਵਾਸ ਨੇ ਜਾਣਕਾਰੀ ਦਿੱਤੀ ਹੈ ਕਿ ਇਹ ਭਾਰਤੀ ਨਾਗਰਿਕ MT ਕਾਜ਼ਿਮਾਹ III ’ਤੇ ਸਵਾਰ ਸਨ। ਇਹ ਜਹਾਜ਼ ਇਸ ਮਹੱਤਵਪੂਰਨ ਸਮੁੰਦਰੀ ਰਸਤੇ ਤੋਂ ਲੰਘਦੇ ਸਮੇਂ ਹਮਲੇ ਦਾ ਸ਼ਿਕਾਰ ਹੋਇਆ। ਸਾਰੇ ਪੰਜਾਂ ਵਿਅਕਤੀਆਂ ਨੂੰ ਸੁਰੱਖਿਅਤ ਤੌਰ ’ਤੇ ਕਿਨਾਰੇ ’ਤੇ ਪਹੁੰਚਾ ਦਿੱਤਾ ਗਿਆ ਹੈ।
ਪੰਜਾਂ ਭਾਰਤੀਆਂ ਨੂੰ ਸੁਰੱਖਿਅਤ ਬਚਾਇਆ ਗਿਆ
ਓਮਾਨ ਸਥਿਤ ਭਾਰਤੀ ਦੂਤਾਵਾਸ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਐਕਸ’ ’ਤੇ ਪੋਸਟ ਸਾਂਝੀ ਕਰਦਿਆਂ ਦੱਸਿਆ, “ਮਿਸ਼ਨ ਨੇ ਹੁਰਮੁਜ਼ ਜਲਡਮਰੂਮੱਧ ‘ਚ ਪ੍ਰੋਜੈਕਟਾਈਲ ਦੀ ਚਪੇਟ ‘ਚ ਆਏ ਕੂਵੈਤ ਦੇ ਝੰਡੇ ਵਾਲੇ ਟੈਂਕਰ MT ਕਾਜ਼ਿਮਾਹ III ’ਤੇ ਸਵਾਰ ਪੰਜ ਭਾਰਤੀ ਨਾਗਰਿਕਾਂ ਦੇ ਬਚਾਅ ਕਾਰਜ ‘ਚ ਤਾਲਮੇਲ ਕੀਤਾ। ਸਾਰੇ 5 ਭਾਰਤੀ ਨਾਗਰਿਕਾਂ ਨੂੰ ਸੁਰੱਖਿਅਤ ਤੌਰ ’ਤੇ ਕਿਨਾਰੇ ’ਤੇ ਪਹੁੰਚਾ ਦਿੱਤਾ ਗਿਆ ਹੈ।” ਭਾਰਤੀ ਦੂਤਾਵਾਸ ਨੇ ਇਸ ਮਿਸ਼ਨ ‘ਚ ਸਹਿਯੋਗ ਲਈ ਓਮਾਨ ਦੇ ਅਧਿਕਾਰੀਆਂ ਦਾ ਧੰਨਵਾਦ ਕੀਤਾ। ਦੂਤਾਵਾਸ ਨੇ ਕਿਹਾ, “ਅਸੀਂ ਓਮਾਨ ਦੇ ਅਧਿਕਾਰੀਆਂ ਦਾ ਉਨ੍ਹਾਂ ਦੇ ਲਗਾਤਾਰ ਸਹਿਯੋਗ ਅਤੇ ਮਦਦ ਲਈ ਧੰਨਵਾਦ ਕਰਦੇ ਹਾਂ।” MT ਕਾਜ਼ਿਮਾਹ III ਕੂਵੈਤ ਦੇ ਝੰਡੇ ਵਾਲਾ ਕੱਚੇ ਤੇਲ ਦਾ ਟੈਂਕਰ ਹੈ ਅਤੇ ਹਮਲੇ ਦੇ ਸਮੇਂ ਇਹ ਟੋਗੋ ਦੇ ਲੋਮੇ ਬੰਦਰਗਾਹ ਵੱਲ ਜਾ ਰਿਹਾ ਸੀ।