ਟੈਕਸਸ ਦੇ ਬਿਗ ਬੈਂਡ ਇਲਾਕੇ ਵਿੱਚ ਨਵੀਂ ਸਰਹੱਦੀ ਕੰਧ ਦਾ ਕੰਮ ਸ਼ੁਰੂ

ਟਰੰਪ ਪ੍ਰਸ਼ਾਸਨ ਨੇ ਮੈਕਸੀਕੋ ਨਾਲ ਲੱਗਦੀ ਅਮਰੀਕੀ ਸਰਹੱਦ ਉੱਤੇ ਕੰਧ ਬਣਾਉਣ ਦੀ ਮੁਹਿੰਮ ਨੂੰ ਹੋਰ ਤੇਜ਼ ਕਰਦਿਆਂ ਪੱਛਮੀ ਟੈਕਸਸ ਦੇ ਬਿਗ ਬੈਂਡ ਇਲਾਕੇ ਵਿੱਚ ਨਵੇਂ ਹਿੱਸੇ ਦੀ ਉਸਾਰੀ ਸ਼ੁਰੂ ਕਰ ਦਿੱਤੀ ਹੈ। ਅਮਰੀਕੀ ਕਸਟਮਜ਼ ਐਂਡ ਬਾਰਡਰ ਪ੍ਰੋਟੈਕਸ਼ਨ ਮੁਤਾਬਕ 15 ਸਤੰਬਰ ਤੋਂ ਹਡਸਪੈਥ ਕਾਊਂਟੀ ਵਿੱਚ ਲਗਭਗ 47 ਮੀਲ ਲੰਬੇ “ਬਿਗ ਬੈਂਡ-1” ਪ੍ਰੋਜੈਕਟ ਉੱਤੇ ਕੰਧ ਦੇ ਪੈਨਲ ਲਗਾਉਣ ਦਾ ਕੰਮ ਸ਼ੁਰੂ ਹੋ ਗਿਆ ਹੈ।
ਇਸ ਯੋਜਨਾ ਵਿੱਚ ਲਗਭਗ 30 ਫੁੱਟ ਉੱਚੇ ਸਟੀਲ ਦੇ ਬੈਰੀਅਰ, ਸਰਹੱਦੀ ਗਸ਼ਤ ਲਈ ਸੜਕਾਂ ਅਤੇ ਨਿਗਰਾਨੀ ਨਾਲ ਜੁੜੀ ਤਕਨਾਲੋਜੀ ਸ਼ਾਮਲ ਹੈ। ਇਹ ਕੰਮ ਟਰੰਪ ਪ੍ਰਸ਼ਾਸਨ ਦੇ ਲਗਭਗ 46 ਅਰਬ ਡਾਲਰ ਦੇ ਵੱਡੇ ਸਰਹੱਦੀ ਸੁਰੱਖਿਆ ਪ੍ਰੋਗਰਾਮ ਦਾ ਹਿੱਸਾ ਹੈ। ਸਰਕਾਰ ਦਾ ਕਹਿਣਾ ਹੈ ਕਿ ਕੰਧ ਅਤੇ ਹੋਰ ਢਾਂਚੇ ਗੈਰਕਾਨੂੰਨੀ ਸਰਹੱਦੀ ਦਾਖ਼ਲੇ ਅਤੇ ਤਸਕਰੀ ਨੂੰ ਰੋਕਣ ਵਿੱਚ ਮਦਦ ਕਰਨਗੇ।
ਬਿਗ ਬੈਂਡ ਖੇਤਰ ਲਗਭਗ 500 ਮੀਲ ਤੱਕ ਫੈਲਿਆ ਹੋਇਆ ਹੈ ਅਤੇ ਇੱਥੇ ਸਰਹੱਦੀ ਕੰਧ ਨਾਲ ਜੁੜੇ ਕਈ ਪ੍ਰੋਜੈਕਟ ਯੋਜਨਾ ਵਿੱਚ ਹਨ। ਪਰ ਇਸ ਉਸਾਰੀ ਦਾ ਸਥਾਨਕ ਪੱਧਰ ਉੱਤੇ ਵਿਰੋਧ ਵੀ ਹੋ ਰਿਹਾ ਹੈ। ਕਈ ਜ਼ਮੀਨ ਮਾਲਕਾਂ, ਪਸ਼ੂ ਪਾਲਕਾਂ, ਵਾਤਾਵਰਣ ਸਮੂਹਾਂ ਅਤੇ ਕਾਰੋਬਾਰੀ ਲੋਕਾਂ ਨੇ ਅਦਾਲਤ ਵਿੱਚ ਕੇਸ ਕੀਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਦੂਰਦਰਾਜ਼ ਖੇਤਰ ਵਿੱਚ ਸਰਹੱਦੀ ਗ੍ਰਿਫ਼ਤਾਰੀਆਂ ਦਾ ਹਿੱਸਾ ਬਹੁਤ ਘੱਟ ਹੈ ਅਤੇ ਕੰਧ ਨਾਲ ਨਿੱਜੀ ਜ਼ਮੀਨ, ਵਾਤਾਵਰਣ, ਸੈਰ-ਸਪਾਟੇ ਅਤੇ ਧਾਰਮਿਕ ਜਾਂ ਸੱਭਿਆਚਾਰਕ ਥਾਵਾਂ ਨੂੰ ਨੁਕਸਾਨ ਹੋ ਸਕਦਾ ਹੈ।
ਸੀਬੀਪੀ ਦਾ ਕਹਿਣਾ ਹੈ ਕਿ ਹੁਣ ਸਰਹੱਦ ਉੱਤੇ ਲਗਭਗ 12 ਮੀਲ ਪ੍ਰਤੀ ਹਫ਼ਤਾ ਦੀ ਰਫ਼ਤਾਰ ਨਾਲ ਨਵੇਂ ਬੈਰੀਅਰ ਬਣਾਏ ਜਾ ਰਹੇ ਹਨ ਅਤੇ ਟਰੰਪ ਦੇ ਦੁਬਾਰਾ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਲਗਭਗ 200 ਮੀਲ ਨਵੀਂ ਉਸਾਰੀ ਕੀਤੀ ਜਾ ਚੁੱਕੀ ਹੈ।
ਇਹ ਮਾਮਲਾ ਹੁਣ ਸਿਰਫ਼ ਸਰਹੱਦੀ ਸੁਰੱਖਿਆ ਦਾ ਨਹੀਂ ਰਹਿ ਗਿਆ। ਇੱਕ ਪਾਸੇ ਸਰਕਾਰ ਇਸਨੂੰ ਇਮੀਗ੍ਰੇਸ਼ਨ ਕਾਨੂੰਨਾਂ ਦੀ ਸਖ਼ਤ ਲਾਗੂਅਤ ਦਾ ਹਿੱਸਾ ਦੱਸ ਰਹੀ ਹੈ, ਦੂਜੇ ਪਾਸੇ ਵਿਰੋਧੀ ਸਮੂਹ ਅਦਾਲਤੀ ਲੜਾਈ ਜਾਰੀ ਰੱਖ ਰਹੇ ਹਨ। ਇਸ ਲਈ ਬਿਗ ਬੈਂਡ ਦੀ ਕੰਧ ਉੱਤੇ ਆਉਣ ਵਾਲੇ ਅਦਾਲਤੀ ਫ਼ੈਸਲੇ ਵੀ ਮਹੱਤਵਪੂਰਨ ਰਹਿਣਗੇ।