ਐਵਰੇਸਟ ਦੀ ਹੀੰਗ ’ਤੇ ਬੈਨ, ਲੈਬ ਟੈਸਟ ‘ਚ ਘਟੀਆ ਕੁਆਲਿਟੀ ਦੇ ਸੈਂਪਲ ਮਿਲੇ; FSSAI ਨੇ ਦਿੱਤੀ ਚੇਤਾਵਨੀ

ਭਾਰਤੀ ਖੁਰਾਕ ਸੁਰੱਖਿਆ ਅਤੇ ਮਿਆਰ ਅਥਾਰਟੀ (FSSAI) ਨੇ ਐਵਰੇਸਟ ਫੂਡ ਪ੍ਰੋਡਕਟਸ ਪ੍ਰਾਈਵੇਟ ਲਿਮਟਿਡ ਅਤੇ ਲਾਲਜੀ ਗੋਢੂ ਨੂੰ ਹੀੰਗ ਪਾਊਡਰ ਵੇਚਣ ਤੋਂ ਰੋਕ ਦਿੱਤਾ ਹੈ। ਲੈਬ ਜਾਂਚ ਵਿੱਚ ਦੋਵਾਂ ਕੰਪਨੀਆਂ ਦੇ ਹੀੰਗ ਪਾਊਡਰ ਦੇ ਸੈਂਪਲ ਮਿਆਰਾਂ ਮੁਤਾਬਕ ਨਹੀਂ ਪਾਏ ਗਏ। ਇਸ ਤੋਂ ਬਾਅਦ ਖੁਰਾਕ ਨਿਯਾਮਕ ਨੇ ਇਹ ਕਾਰਵਾਈ ਕੀਤੀ। FSSAI ਨੇ ਸ਼ਨੀਵਾਰ ਨੂੰ ਸੋਸ਼ਲ ਮੀਡੀਆ ਪੋਸਟ ਰਾਹੀਂ ਦੱਸਿਆ ਕਿ ਐਵਰੇਸਟ ਫੂਡ ਪ੍ਰੋਡਕਟਸ ਅਤੇ ਲਾਲਜੀ ਗੋਢੂ ਐਂਡ ਕੰਪਨੀ ਖ਼ਿਲਾਫ਼ ਪਾਬੰਦੀ ਦੇ ਹੁਕਮ ਜਾਰੀ ਕੀਤੇ ਗਏ ਹਨ।
FSSAI ਨੇ ਐਵਰੇਸਟ ਦੇ ਮਾਮਲੇ ਵਿੱਚ ਹੀੰਗ ਪਾਊਡਰ ਦੀਆਂ ਸਾਰੀਆਂ ਕਿਸਮਾਂ ਦੀ ਵਿਕਰੀ ’ਤੇ ਤੁਰੰਤ ਪ੍ਰਭਾਵ ਨਾਲ ਰੋਕ ਲਗਾ ਦਿੱਤੀ ਹੈ। ਪ੍ਰਾਇਮਰੀ ਫੂਡ ਲੈਬਾਰਟਰੀ ਦੇ ਫੂਡ ਐਨਾਲਿਸਟ ਨੇ ਹੀੰਗ ਪਾਊਡਰ (ਮਿਸ਼ਰਤ ਹੀੰਗ) ਦੇ ਸੈਂਪਲਾਂ ਨੂੰ ਨਿਰਧਾਰਤ ਮਿਆਰਾਂ ਦੇ ਅਨੁਕੂਲ ਨਹੀਂ ਪਾਇਆ ਅਤੇ ਗਲਤ ਬ੍ਰਾਂਡਿੰਗ ਵੀ ਸਾਹਮਣੇ ਆਈ
ਸੈਂਪਲ ਵਿੱਚ ਅਲਕੋਹਲ ਵਿੱਚ ਘੁਲਣਸ਼ੀਲ ਐਕਸਟ੍ਰੈਕਟ ਦੀ ਮਾਤਰਾ ਨਿਰਧਾਰਤ ਘੱਟੋ-ਘੱਟ 5% ਦੇ ਮੁਕਾਬਲੇ 0% ਪਾਈ ਗਈ। ਇਸ ਤੋਂ ਇਲਾਵਾ ਪੀਲੀ ਹੀੰਗ ਪਾਊਡਰ ਅਤੇ ਕਾਲੀ ਹੀੰਗ ਪਾਊਡਰ ਦੇ ਸੈਂਪਲ ਵੀ ਮਿਆਰਾਂ ਮੁਤਾਬਕ ਨਹੀਂ ਮਿਲੇ।
ਪੀਲੀ ਅਤੇ ਕਾਲੀ ਹੀੰਗ ਦੇ ਸੈਂਪਲਾਂ ਵਿੱਚ ਅਲਕੋਹਲ ਵਿੱਚ ਘੁਲਣਸ਼ੀਲ ਐਕਸਟ੍ਰੈਕਟ ਕ੍ਰਮਵਾਰ 3.29% ਅਤੇ 4.4% ਪਾਇਆ ਗਿਆ। FSSAI ਨੇ ਐਵਰੇਸਟ ਨੂੰ ਚੰਗੀ ਗੁਣਵੱਤਾ ਵਾਲੇ ਉਤਪਾਦਾਂ ਦੀ ਵਿਕਰੀ ਯਕੀਨੀ ਬਣਾਉਣ ਲਈ ਕਾਰਜ ਯੋਜਨਾ ਪੇਸ਼ ਕਰਨ ਲਈ ਕਿਹਾ ਹੈ।
ਨਾਲ ਹੀ ਚੇਤਾਵਨੀ ਦਿੱਤੀ ਗਈ ਹੈ ਕਿ ਜੇਕਰ ਕੰਪਨੀ ਆਪਣੀਆਂ ਗਲਤੀਆਂ ਨੂੰ ਠੀਕ ਕਰਨ ਵਿੱਚ ਅਸਫਲ ਰਹਿੰਦੀ ਹੈ ਤਾਂ ਅੱਗੇ ਵੀ ਕਾਰਵਾਈ ਕੀਤੀ ਜਾ ਸਕਦੀ ਹੈ।