ਆਪ ਪਹੁੰਚੀ ਕੈਨੇਡਾ ਧੀ ਤੇ ਪਤੀ ਨੂੰ ਮਾਰਿਆ ਠੇਡਾ…

ਮੋਗਾ : ਪਿੰਡ ਰਾਮੂਵਾਲਾ ਕਲਾਂ ਨਿਵਾਸੀ ਗੁਰਪ੍ਰੀਤ ਸਿੰਘ ਨੇ ਆਪਣੀ ਪਤਨੀ ਅਤੇ ਸਹੁਰੇ ਪਰਿਵਾਰ ’ਤੇ ਉਸ ਨਾਲ 26 ਲੱਖ ਰੁਪਏ ਦੀ ਠੱਗੀ ਮਾਰਨ ਦਾ ਦੋਸ਼ ਲਾਇਆ ਹੈ। ਜਿਸ ’ਤੇ ਪੁਲਿਸ ਨੇ ਸ਼ਿਕਾਇਤਕਰਤਾ ਵੱਲੋਂ ਦੋਸ਼ ਸਹੀ ਹੋਣ ਤੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਦੋਸ਼ੀਆਂ ਦੀ ਕਾਬੂ ਕਰਨ ਲਈ ਛਾਪੇਮਾਰੀ ਸ਼ੁਰੂ ਕਰ ਦਿੱਤੀ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਗੁਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਉਸਦਾ ਵਿਆਹ 26 ਅਕਤੂਬਰ 2006 ਨੂੰ ਜਗਰਾਉਂ ਨਿਵਾਸੀ ਪਿੰਡ ਸ਼ੇਰਪੁਰ ਕਲਾਂ ਵਿੱਚ ਪਟੇਲ ਸਿੰਘ ਦੀ ਪੁੱਤਰੀ ਗੁਰਪ੍ਰੀਤ ਕੌਰ ਨਾਲ ਧਾਰਮਿਕ ਰੀਤੀ ਰਿਵਾਜਾਂ ਮੁਤਾਬਿਕ ਹੋਇਆ ਸੀ।

Read Also ਕੈਨੇਡਾ ‘ਚ ਬਣਾਇਆ ਰਿਕਾਰਡ, 14 ਹਜ਼ਾਰ ਫੁੱਟ ਤੋਂ ਪੱਗ ਬੰਨ੍ਹ ਕੇ ਮਾਰੀ ਛਾਲ

ਉਸ ਤੋਂ ਬਾਅਦ ਉਸਦੀ ਪਤਨੀ ਨੇ ਚੰਡੀਗੜ੍ਹ ਤੋਂ ਨੈਨੀ ਕੇਅਰ ਦਾ ਕੋਰਸ ਕੀਤਾ। ਬਾਅਦ ਵਿੱਚ ਉਨ੍ਹਾਂ ਘਰ ਇੱਕ ਬੱਚੀ ਨੇ ਜਨਮ ਲਿਆ। ਪਤਨੀ ਨੇ ਨੈਨੀ ਕੇਅਰ ਦਾ ਕੋਰਸ ਕਰਕੇ ਕੈਨੇਡਾ ਜਾ ਕੇ ਨੌਕਰੀ ਕਰਨ ਦੀ ਖੁਹਾਇਸ਼ ਰੱਖੀ। ਮੇਰੇ ਸਹੁਰਾ ਪਟੇਲ ਸਿੰਘ, ਸੱਸ ਕੁਲਦੀਪ ਕੌਰ, ਪਤਨੀ ਦੀ ਭਰਜਾਈ ਕਮਲਪ੍ਰੀਤ ਕੌਰ ਦੇ ਵਾਰ ਵਾਰ ਕਹਿਣ ਤੇ ਮੈਂ 14 ਲੱਖ ਰੁਪਏ ਖਰਚ ਕਰਕੇ ਆਪਣੀ ਪਤਨੀ ਨੂੰ ਕੈਨੇਡਾ ਭੇਜ ਦਿੱਤਾ। ਉਸ ਸਮੇਂ ਸਾਡੀ ਬੱਚੀ ਦੀ ਉਮਰ ਡੇਢ ਸਾਲ ਦੀ ਸੀ। ਕੈਨੇਡਾ ਪਹੁੰਚਣ ਤੋਂ ਬਾਅਦ ਉਹ ਅਕਸਰ ਸਾਡੇ ਦੋਹਾਂ ਨਾਲ ਫੋਨ ’ਤੇ ਗੱਲਬਾਤ ਕਰਦੀ ਰਹੀ। ਉਸਨੇ ਕਿਹਾ ਕਿ ਜਦੋਂ ਉਹ ਕੈਨੇਡਾ ਪੱਕੀ ਹੋ ਜਾਵੇਗੀ ਤਾਂ ਮੈਨੂੰ ਅਤੇ ਬੱਚੀ ਨੂੰ ਉੱਥੇ ਬੁਲਾ ਲਵੇਗੀ। ਪਰ ਉਸਨੇ ਨਹੀਂ ਬੁਲਾਇਆ ਅਤੇ ਨਾ ਹੀ ਅੰਬੈਸੀ ਵਿੱਚ ਕੋਈ ਦਸਤਾਵੇਜ਼ ਭੇਜੇ। ਫਿਰ 29 ਅਪ੍ਰੈਲ 2016 ਨੂੰ ਉਹ ਵਾਪਸ ਇੰਡੀਆ ਆਈ ਅਤੇ ਮੇਰੇ ਘਰ ਵਿੱਚ ਪਏ 16 ਤੋਲੇ ਸੋਨੇ ਗਹਿਣੇ ਆਪਣੇ ਨਾਲ ਲੈ ਗਈ।

ਉਸ ਨੇ ਦੁਬਾਰਾ ਕੈਨੇਡਾ ਪਹੁੰਚਣ ਤੋਂ ਬਾਅਦ ਮੇਰੇ ਨਾਲ ਅਤੇ ਛੋਟੀ ਬੱਚੀ ਨਾਲ ਫੋਨ ਤੇ ਗੱਲਬਾਤ ਕਰਨੀ ਬੰਦ ਕਰ ਦਿੱਤੀ ਅਤੇ ਮੈਨੂੰ ਅਤੇ ਬੱਚੀ ਨੂੰ ਕੈਨੇਡਾ ਬੁਲਾਉਣ ਤੋਂ ਵੀ ਸਾਫ਼ ਇਨਕਾਰ ਦਿੱਤਾ। ਮੈਂ ਕਈ ਵਾਰ ਪੰਚਾਇਤੀ ਤੌਰ ਤੇ ਆਪਣੇ ਸਹੁਰੇ ਘਰ ਜਾ ਕੇ ਆਪਣੇ ਸਹੁਰਾ ਪਰਿਵਾਰ ਨਾਲ ਇਸ ਸਬੰਧੀ ਗੱਲਬਾਤ ਕੀਤੀ ਪਰ ਉਨ੍ਹਾਂ ਆਪਣੀ ਲੜਕੀ ਦਾ ਹੀ ਪੱਖ ਪੂਰਿਆ। ਮੇਰੀ ਛੋਟੀ ਬੱਚੀ ਜਿਸ ਦੀ ਉਮਰ ਹੁਣ 10 ਸਾਲ ਦੀ ਹੋ ਗਈ ਹੈ ਉਸਦੇ ਮਨ ’ਤੇ ਇਸ ਕਰਕੇ ਡੂੰਘੀ ਸੱਟ ਵੱਜੀ ਹੈ। ਇਸ ਤਰ੍ਹਾਂ ਮੇਰੀ ਪਤਨੀ ਅਤੇ ਸਹੁਰੇ ਪਰਿਵਾਰ ਨੇ ਮਿਲੀਭੁਗਤ ਕਰਕੇ ਮੇਰੇ ਨਾਲ 26 ਲੱਖ ਰੁਪਏ ਦੀ ਠੱਗੀ ਮਾਰੀ ਹੈ। ਇਸ ਸਬੰਧੀ ਪੁਲਿਸ ਥਾਣੇ ਵਿੱਚ ਸ਼ਿਕਾਇਤ ਕੀਤੀ ਗਈ। ਪੁਲਿਸ ਨੇ ਵੀ ਦੋਵਾਂ ਪਰਿਵਾਰਾਂ ਨੂੰ ਬੁਲਾ ਕੇ ਮਾਮਲਾ ਹੱਲ ਕਰਨਾ ਚਾਹਿਆ। ਪਰ ਸਹੁਰਾ ਪਰਿਵਾਰ ਨੇ ਕੋਈ ਫੈਸਲਾ ਨਹੀਂ ਕੀਤਾ। ਹੁਣ ਪੁਲਿਸ ਨੇ ਮੇਰੇ ਵੱਲੋਂ ਲਗਾਏ ਦੋਸ਼ਾਂ ਦੀ ਪੜਤਾਲ ਕਰਕੇ ਮੇਰੀ ਪਤਨੀ ਗੁਰਪ੍ਰੀਤ ਕੌਰ ਅਤੇ ਸਹੁਰੇ ਪਰਿਵਾਰ ਖਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਦੋਸ਼ੀਆਂ ਦੀ ਭਾਲ ਕੀਤੀ ਜਾ ਰਹੀ ਹੈ।