ਆਨਲਾਈਨ ਸੋਨੇ ਦੇ ਗਹਿਣੇ ਦਿਖਾਉਣਾ ਯੂ-ਟਿਊਬਰ ਨੂੰ ਪਿਆ ਭਾਰੀ, ਚੋਰਾਂ ਨੇ ਕੀਤਾ ਹੱਥ ਸਾਫ਼

 ਤਾਮਿਲਨਾਡੂ ਵਿਚ ਇਕ ਮਹਿਲਾ ਯੂ-ਟਿਊਬਰ ਲਈ ਆਪਣੇ ਸੋਨੇ ਦੇ ਗਹਿਣਿਆਂ ਨੂੰ ਆਨਲਾਈਨ ਦਿਖਾਉਣਾ ਮਹਿੰਗਾ ਪੈ ਗਿਆ। ਪਰਿਵਾਰ ਦੇ ਨਾ ਹੋਣ ’ਤੇ ਚੋਰਾਂ ਨੇ ਘਰ ਦੇ ਪਿਛਲੇ ਦਰਵਾਜ਼ੇ ਨੂੰ ਤੋੜ ਕੇ ਅਲਮਾਰੀ ਵਿਚ ਰੱਖੇ ਗਹਿਣੇ ਚੋਰੀ ਕਰ ਲਏ। ਪੁਲਿਸ ਅਨੁਸਾਰ, ਅੰਥਾਨਾ ਨਾਦਰ ਕੁਦੀਯਿਰੁੱਪੂ ਦੇ ਨੇੜੇ ਵੀਆਈਪੀ ਗਾਰਡਨ ਵਿਚ ਰਹਿਣ ਵਾਲੇ ਵਿਨੋਦ ਕੁਮਾਰ ਵੀਰਵਾਰ ਨੂੰ ਆਪਣੇ ਪਰਿਵਾਰ ਨਾਲ ਆਪਣੇ ਬੱਚੇ ਦੇ ਜਨਮ ਦਿਨ ਲਈ ਕੱਪੜੇ ਖ਼ਰੀਦਣ ਤਿਰੁਨੇਲਵੈਲੀ ਗਏ ਸਨ। ਦੇਰ ਰਾਤ ਵਾਪਸ ਆਉਣ ’ਤੇ ਉਨ੍ਹਾਂ ਦੇਖਿਆ ਕਿ ਘਰ ਦਾ ਪਿਛਲਾ ਦਰਵਾਜ਼ਾ ਟੁੱਟਿਆ ਹੋਇਆ ਸੀ। ਪਹਿਲੀ ਮੰਜ਼ਿਲ ’ਤੇ ਬੈੱਡਰੂਮ ਦੀ ਜਾਂਚ ਕਰਨ ’ਤੇ ਉਨ੍ਹਾਂ ਨੂੰ ਅਲਮਾਰੀ ਟੁੱਟੀ ਹੋਈ ਅਤੇ ਸੋਨੇ ਦੇ ਗਹਿਣੇ ਗਾਇਬ ਮਿਲੇ। ਸ਼ਿਕਾਇਤ ਮਿਲਣ ’ਤੇ ਪੁਲਿਸ ਨੇ ਜਾਂਚ ਸ਼ੁਰੂ ਕੀਤੀ ਅਤੇ ਪਤਾ ਲਗਾਇਆ ਕਿ ਬਦਮਾਸ਼ਾਂ ਨੇ ਘਰ ਵਿਚ ਦਾਖ਼ਲ ਹੋਣ ਲਈ ਗੈਸ ਕਟਰ ਨਾਲ ਪਿਛਲੇ ਦਰਵਾਜ਼ੇ ਦਾ ਫਰੇਮ ਕੱਟਿਆ ਸੀ। ਪੁਲਿਸ ਹੁਣ ਸ਼ੱਕੀ ਵਿਅਕਤੀਆਂ ਦਾ ਪਤਾ ਲਗਾਉਣ ਲਈ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕਰ ਰਹੀ ਹੈ। ਵਿਨੋਦ ਕੁਮਾਰ ਦੀ ਪਤਨੀ ਮਧੂਮਿਤਾ ਯੂ-ਟਿਊਬਰ ਹੈ। ਸ਼ੱਕ ਹੈ ਕਿ ਇੰਟਰਨੈੱਟ ਮੀਡੀਆ ’ਤੇ ਉਨ੍ਹਾਂ ਦੇ ਨਿਰੰਤਰ ਪੋਸਟ ਕਰਨ ਕਾਰਨ ਇਹ ਚੋਰੀ ਦੀ ਵਾਰਦਾਤ ਹੋਈ। ਇੰਟਰਨੈੱਟ ਮੀਡੀਆ ’ਤੇ ਉਹ ਅਕਸਰ ਆਪਣੇ ਗਹਿਣਿਆਂ ਨੂੰ ਦਿਖਾਉਂਦੀ ਰਹਿੰਦੀ ਸੀ।