
ਪੰਜਾਬ ਦੇ ਜਲਾਲਾਬਾਦ ਵਿੱਚ ਇੱਕ ਵਿਅਕਤੀ ਦੀ ਕਿਸਮਤ ਚਮਕ ਗਈ ਹੈ। ਉਸ ਦੀ ਲਾਟਰੀ ਟਿਕਟ ਨੇ 10 ਲੱਖ ਰੁਪਏ ਦਾ ਇਨਾਮ ਜਿੱਤਿਆ ਹੈ, ਪਰ ਹੈਰਾਨੀ ਦੀ ਗੱਲ ਇਹ ਹੈ ਕਿ ਇੰਨੀ ਵੱਡੀ ਰਕਮ ਜਿੱਤਣ ਵਾਲੇ ਵਿਅਕਤੀ ਦਾ ਅਜੇ ਤੱਕ ਕੋਈ ਪਤਾ ਨਹੀਂ ਲੱਗ ਸਕਿਆ। ਲਾਟਰੀ ਏਜੰਸੀ ਵੱਲੋਂ ਪਿਛਲੇ 24 ਘੰਟਿਆਂ ਤੋਂ ਜੇਤੂ ਦੀ ਭਾਲ ਕੀਤੀ ਜਾ ਰਹੀ ਹੈ।
ਜਾਣਕਾਰੀ ਮੁਤਾਬਕ, ਜਲਾਲਾਬਾਦ ਵਿੱਚ ਸ਼ਹੀਦ ਊਧਮ ਸਿੰਘ ਪਾਰਕ ਨੇੜੇ ਸਥਿਤ ਸ਼ਾਹ ਜੀ ਲਾਟਰੀ ਏਜੰਸੀ ਤੋਂ ਵਿਕੀ ਇੱਕ ਟਿਕਟ ਉੱਤੇ ਇਹ 10 ਲੱਖ ਰੁਪਏ ਦਾ ਇਨਾਮ ਨਿਕਲਿਆ ਹੈ। ਇਨਾਮ ਨਿਕਲਣ ਦੀ ਖੁਸ਼ੀ ਵਿੱਚ ਏਜੰਸੀ ‘ਤੇ ਜਸ਼ਨ ਮਨਾਇਆ ਜਾ ਰਿਹਾ ਹੈ। ਦੁਕਾਨਦਾਰਾਂ ਵੱਲੋਂ ਭੰਗੜੇ ਪਾਏ ਜਾ ਰਹੇ ਹਨ ਅਤੇ ਲੋਕਾਂ ਨੂੰ ਲੱਡੂ ਵੀ ਵੰਡੇ ਜਾ ਰਹੇ ਹਨ।
ਏਜੰਸੀ ਦੇ ਸੰਚਾਲਕ ਮੁਕੇਸ਼ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਦੀ ਦੁਕਾਨ ਤੋਂ ਵਿਕੀ ਟਿਕਟ ‘ਤੇ ਇੰਨਾ ਵੱਡਾ ਇਨਾਮ ਆਉਣ ਦੀ ਖੁਸ਼ੀ ਤਾਂ ਬਹੁਤ ਹੈ, ਪਰ ਜੇਤੂ ਦੇ ਸਾਹਮਣੇ ਨਾ ਆਉਣ ਕਾਰਨ ਉਨ੍ਹਾਂ ਨੂੰ ਚਿੰਤਾ ਵੀ ਹੈ।
ਉਨ੍ਹਾਂ ਮੁਤਾਬਕ ਦੀਵਾਲੀ ਬੰਪਰ ਦੌਰਾਨ ਦੁਕਾਨ ‘ਤੇ ਕਾਫੀ ਭੀੜ ਸੀ। ਇਸ ਕਰਕੇ ਇਹ ਪਤਾ ਨਹੀਂ ਲੱਗ ਸਕਿਆ ਕਿ ਟਿਕਟ ਕਿਸ ਵਿਅਕਤੀ ਨੇ ਖਰੀਦੀ ਸੀ। ਟਿਕਟ ਖਰੀਦਣ ਵਾਲੇ ਨੇ ਆਪਣਾ ਮੋਬਾਈਲ ਨੰਬਰ ਜਾਂ ਪਤਾ ਵੀ ਦਰਜ ਨਹੀਂ ਕਰਵਾਇਆ ਸੀ।ਏਜੰਸੀ ਵੱਲੋਂ ਅਪੀਲ ਕੀਤੀ ਗਈ ਹੈ ਕਿ ਲਾਟਰੀ ਟਿਕਟ ਨੰਬਰ 62745 ਆਪਣੇ ਕੋਲ ਰੱਖਣ ਵਾਲੇ ਵਿਅਕਤੀ ਤੁਰੰਤ ਆਪਣੀ ਟਿਕਟ ਦੀ ਜਾਂਚ ਕਰਨ ਅਤੇ ਇਨਾਮ ਸਬੰਧੀ ਏਜੰਸੀ ਨਾਲ ਸੰਪਰਕ ਕਰਨ।
ਹੁਣ ਦੇਖਣਾ ਹੋਵੇਗਾ ਕਿ 10 ਲੱਖ ਰੁਪਏ ਦਾ ਇਹ ਖੁਸ਼ਕਿਸਮਤ ਜੇਤੂ ਕਦੋਂ ਸਾਹਮਣੇ ਆਉਂਦਾ ਹੈ।
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.




