ਇਜ਼ਰਾਈਲ ਅਤੇ ਹਮਾਸ ਵਿਚਾਲੇ ਚੱਲ ਰਹੀ ਜੰਗ ਦਾ ਅੱਜ 22ਵਾਂ ਦਿਨ

ਇਜ਼ਰਾਈਲ ਅਤੇ ਹਮਾਸ ਵਿਚਾਲੇ ਚੱਲ ਰਹੀ ਜੰਗ ਦਾ ਅੱਜ 22ਵਾਂ ਦਿਨ ਹੈ। ਇਸ ਦੌਰਾਨ ਇਜ਼ਰਾਈਲ ਆਰਮੀ (ਆਈਡੀਐਫ) ਨੇ ਦਾਅਵਾ ਕੀਤਾ ਹੈ ਕਿ ਉਸ ਨੇ ਹਮਾਸ ਏਅਰ ਫੋਰਸ ਦੇ ਮੁਖੀ ਇਸਮ ਅਬੂ ਰੁਕਬੇਹ ਨੂੰ ਮਾਰ ਦਿੱਤਾ ਹੈ। ਆਈਡੀਐਫ ਦੇ ਅਨੁਸਾਰ, ਰੁਕਬੇਹ 7 ਅਕਤੂਬਰ ਨੂੰ ਇਜ਼ਰਾਈਲ ‘ਤੇ ਪੈਰਾਗਲਾਈਡਿੰਗ ਹਮਲੇ ਲਈ ਜ਼ਿੰਮੇਵਾਰ ਸੀ। ਦੂਜੇ ਪਾਸੇ, ਸ਼ੁੱਕਰਵਾਰ ਨੂੰ ਲਗਾਤਾਰ ਤੀਜੇ ਦਿਨ, ਇਹ ਟੈਂਕਾਂ ਨਾਲ ਗਾਜ਼ਾ ਪੱਟੀ ਵਿੱਚ ਦਾਖਲ ਹੋਇਆ ਅਤੇ ਹਮਾਸ ਦੇ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਇਆ। ਆਈਡੀਐਫ ਨੇ ਕਿਹਾ ਕਿ ਇਸ ਦੌਰਾਨ ਉਨ੍ਹਾਂ ਦੇ ਸੈਨਿਕਾਂ ਦਾ ਹਮਾਸ ਲੜਾਕਿਆਂ ਨਾਲ ਮੁਕਾਬਲਾ ਵੀ ਹੋਇਆ। ਟੈਂਕਾਂ ਵਾਲੇ ਬਹੁਤ ਸਾਰੇ ਇਜ਼ਰਾਈਲੀ ਸੈਨਿਕ ਅਜੇ ਵੀ ਇੱਕ ਅਪਰੇਸ਼ਨ ਦੇ ਹਿੱਸੇ ਵਜੋਂ ਗਾਜ਼ਾ ਵਿੱਚ ਮੌਜੂਦ ਹਨ।ਆਈਡੀਐਫ ਨੇ ਕਿਹਾ ਹੈ ਕਿ ਉਹ ਗਾਜ਼ਾ ਵਿੱਚ ਜ਼ਮੀਨੀ ਹਮਲੇ ਵਧਾ ਰਹੇ ਹਨ। ਹਵਾਈ ਹਮਲਿਆਂ ਦੌਰਾਨ ਵੀ ਹਮਾਸ ਦੇ ਭੂਮੀਗਤ ਠਿਕਾਣਿਆਂ ਨੂੰ ਵਿਸ਼ੇਸ਼ ਤੌਰ ‘ਤੇ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ। ਸ਼ੁੱਕਰਵਾਰ ਰਾਤ ਨੂੰ ਹਮਾਸ ਦੇ ਅਜਿਹੇ 150 ਟਿਕਾਣਿਆਂ ‘ਤੇ ਹਮਲੇ ਕੀਤੇ ਗਏ। ਇਸ ਕਾਰਨ ਗਾਜ਼ਾ ਖੇਤਰ ਵਿੱਚ ਸੰਚਾਰ ਟੁੱਟ ਗਿਆ ਹੈ ਅਤੇ ਇੰਟਰਨੈੱਟ ਬੰਦ ਕਰ ਦਿੱਤਾ ਗਿਆ ਹੈ। ਲਗਭਗ 23 ਲੱਖ ਲੋਕ ਦੁਨੀਆ ਤੋਂ ਕੱਟੇ ਜਾ ਚੁੱਕੇ ਹਨ।