ਦੱਖਣ ਭਾਰਤੀ ਅਭਿਨੇਤਰੀ ਨੂੰ ਹਿੰਦੂ ਮੰਦਰ ‘ਚ ਨਹੀਂ ਮਿਲੀ ਐਂਟਰੀ

 ਜੇਕਰ ਦੱਖਣ ਭਾਰਤੀ ਅਭਿਨੇਤਰੀ ਅਮਲਾ ਪਾਲ ਦੀ ਮੰਨੀਏ ਤਾਂ ਉਸ ਨੂੰ ਹਾਲ ਹੀ ਵਿੱਚ ਕੇਰਲ ਦੇ ਏਰਨਾਕੁਲਮ ਸਥਿਤ ਤਿਰੂਵਾਰੀਕੁਲਮ ਮਹਾਦੇਵ ਮੰਦਰ ਵਿੱਚ ਦਾਖਲ ਹੋਣ ਦੀ ਇਜਾਜ਼ਤ ਨਹੀਂ ਦਿੱਤੀ ਗਈ ਸੀ।ਉਸ ਨੇ ਮੰਦਰ ਪ੍ਰਬੰਧਨ ‘ਤੇ ਆਪਣੇ ਨਾਲ ਧਾਰਮਿਕ ਵਿਤਕਰੇ ਦਾ ਦੋਸ਼ ਲਗਾਇਆ ਹੈ। ਦੱਸਿਆ ਜਾਂਦਾ ਹੈ ਕਿ ਅਦਾਕਾਰਾ ਸੋਮਵਾਰ ਨੂੰ ਮੰਦਰ ਪਹੁੰਚੀ ਸੀ। ਉਸ ਅਨੁਸਾਰ ਮੰਦਰ ਪ੍ਰਬੰਧਕਾਂ ਨੇ ਉਸ ਨੂੰ ਦਰਸ਼ਨ ਕਰਨ ਤੋਂ ਰੋਕ ਦਿੱਤਾ। ਉਸ ਨੂੰ ਰੀਤੀ-ਰਿਵਾਜਾਂ ਦਾ ਹਵਾਲਾ ਦਿੱਤਾ ਗਿਆ ਅਤੇ ਕਿਹਾ ਗਿਆ ਕਿ ਮੰਦਰ ਦੇ ਅੰਦਰ ਸਿਰਫ਼ ਹਿੰਦੂਆਂ ਨੂੰ ਹੀ ਜਾਣ ਦੀ ਇਜਾਜ਼ਤ ਹੈ। ਉਸ ਅਨੁਸਾਰ ਇਸ ਸਥਿਤੀ ਵਿਚ ਉਸ ਕੋਲ ਮੰਦਰ ਦੇ ਬਾਹਰ ਸੜਕ ‘ਤੇ ਖੜ੍ਹੇ ਹੋ ਕੇ ਭਗਵਾਨ ਦੇ ਦਰਸ਼ਨ ਕਰਨ ਤੋਂ ਇਲਾਵਾ ਹੋਰ ਕੋਈ ਚਾਰਾ ਨਹੀਂ ਬਚਿਆ।

ਇਸਾਈ ਧਰਮ ਨਾਲ ਸਬੰਧਤ ਅਮਲਾ ਪਾਲ ਨੇ ਮੰਦਰ ‘ਚ ਸ਼ਰਧਾਲੂਆਂ ਲਈ ਰੱਖੇ ਗਏ ਰਜਿਸਟਰ ‘ਚ ਆਪਣੇ ਅਨੁਭਵ ਦਾ ਜ਼ਿਕਰ ਕੀਤਾ ਹੈ। ਉਸਨੇ ਲਿਖਿਆ, ”ਇਹ ਦੇਖ ਕੇ ਦੁੱਖ ਹੋਇਆ ਕਿ 2023 ‘ਚ ਵੀ ਧਾਰਮਿਕ ਵਿਤਕਰਾ ਹੁੰਦਾ ਹੈ। ਮੈਂ ਦੇਵੀ ਦੇ ਨੇੜੇ ਨਹੀਂ ਜਾ ਸਕੀ ਪਰ ਦੂਰੋਂ ਆਤਮਾ ਨੂੰ ਮਹਿਸੂਸ ਕੀਤਾ। ਉਮੀਦ ਹੈ ਕਿ ਧਾਰਮਿਕ ਭੇਦਭਾਵ ਜਲਦੀ ਹੀ ਬਦਲ ਜਾਵੇਗਾ। ਉਹ ਸਮਾਂ ਆਵੇਗਾ, ਜਦੋਂ ਸਾਰਿਆਂ ਨੂੰ ਬਰਾਬਰਤਾ ਨਾਲ ਦੇਖਿਆ ਜਾਵੇਗਾ। ਧਰਮ ਦੇ ਆਧਾਰ ‘ਤੇ ਨਹੀਂ। ਇਸ ਦੌਰਾਨ ਤਿਰੂਵਾਰੀਕੁਲਮ ਮਹਾਦੇਵਾ ਮੰਦਰ ਟਰੱਸਟ ਨੂੰ ਚਲਾਉਣ ਵਾਲੇ ਅਧਿਕਾਰੀਆਂ ਨੇ ਇਕ ਨਿਊਜ਼ ਚੈਨਲ ਨਾਲ ਗੱਲਬਾਤ ‘ਚ ਇਸ ਮਾਮਲੇ ‘ਤੇ ਸਫਾਈ ਦਿੰਦੇ ਹੋਏ ਕਿਹਾ ਕਿ ਉਹ ਸਿਰਫ ਮੌਜੂਦਾ ਪ੍ਰੋਟੋਕੋਲ ਦੀ ਪਾਲਣਾ ਕਰ ਰਹੇ ਹਨ। ਟਰੱਸਟ ਦੇ ਸਕੱਤਰ ਪ੍ਰਸੂਨ ਕੁਮਾਰ ਨੇ ਕਿਹਾ, “ਦੂਜੇ ਧਰਮਾਂ ਦੇ ਬਹੁਤ ਸਾਰੇ ਸ਼ਰਧਾਲੂ ਮੰਦਰ ਆਉਂਦੇ ਹਨ। ਪਰ ਇਸ ਬਾਰੇ ਕਿਸੇ ਨੂੰ ਪਤਾ ਨਹੀਂ ਹੁੰਦਾ। ਪਰ ਜਦੋਂ ਕੋਈ ਮਸ਼ਹੂਰ ਵਿਅਕਤੀ ਆਉਂਦਾ ਹੈ ਤਾਂ ਇਹ ਵਿਵਾਦਗ੍ਰਸਤ ਹੋ ਜਾਂਦਾ ਹੈ।” 31 ਸਾਲਾ ਅਮਲਾ ਪਾਲ ਤਾਮਿਲ, ਮਲਿਆਲਮ ਅਤੇ ਤੇਲਗੂ ਫਿਲਮਾਂ ਦੀ ਹੀਰੋਇਨ ਹੈ। ਉਸਨੇ 2009 ਵਿੱਚ ਮਲਿਆਲਮ ਫਿਲਮ ‘ਨੀਲਥਮਾਰਾ’ ਨਾਲ ਆਪਣੀ ਅਦਾਕਾਰੀ ਦੀ ਸ਼ੁਰੂਆਤ ਕੀਤੀ। ਤਾਮਿਲ ਸਿਨੇਮਾ ਵਿੱਚ ਉਸਦੀ ਪਹਿਲੀ ਫਿਲਮ 2020 ਵਿੱਚ ‘ਵੀਰਸੇਕਰਨ’ ਸੀ ਅਤੇ 2013 ਵਿੱਚ ਉਸਨੇ ‘ਨਾਇਕ’ ਨਾਲ ਤੇਲਗੂ ਫਿਲਮ ਇੰਡਸਟਰੀ ਵਿੱਚ ਪ੍ਰਵੇਸ਼ ਕੀਤਾ। ਅਮਲਾ, ਜੋ ਆਖਰੀ ਵਾਰ ਮਲਿਆਲਮ ਫਿਲਮ ‘ਦਿ ਟੀਚਰ’ (2022) ਵਿੱਚ ਨਜ਼ਰ ਆਈ ਸੀ, ਅਜੇ ਦੇਵਗਨ ਸਟਾਰਰ ਫਿਲਮ ‘ਭੋਲਾ’ ਨਾਲ ਆਪਣਾ ਬਾਲੀਵੁੱਡ ਡੈਬਿਊ ਕਰ ਰਹੀ ਹੈ।