ਜੱਥੇਦਾਰਾਂ ਨੇ ਗਿਆਨੀ ਗੁਰਬਚਨ ਸਿੰਘ ਲਾਏ ਥੱਲੇ
ਪਟਿਆਲਾ : ਪੰਜਾਬੀ ਦੀ ਇੱਕ ਕਹਾਵਤ ਹੈ ‘ਤਿੱਖੀ ਘੁੱਗੀ ਕਾਂ ਬਦਨਾਮ’। ਇਹੋ ਕੁਝ ਹੋ ਰਿਹਾ ਹੈ ਅਕਾਲ ਤਖਤ ਸਾਹਿਬ ਦੇ ਜੱਥੇਦਾਰ ਗਿਆਨੀ ਗੁਰਬਚਨ ਸਿੰਘ ਨਾਲ। ਜਿਨ੍ਹਾਂ ਨੂੰ ਜਿੰਨਾ ਸਤਿਕਾਰ ਸਿੱਖ ਪੰਥ ਨੇ ਸ੍ਰੀ ਅਕਾਲ ਤਖਤ ਸਾਹਿਬ ਦਾ ਜੱਥੇਦਾਰ ਹੋਣ ਦੇ ਨਾਤੇ ਦਿੱਤਾ ਸੀ ਉਸ ਤੋਂ ਵੱਧ ਹੁਣ ਸੌਦਾ ਸਾਧ ਨੂੰ ਮਾਫ਼ੀ ਦੇ ਕੇ ਵਾਪਸ ਮੋੜ ਲੈਣ ਦੇ ਮੁੱਦੇ ਤੇ ਦੁਰਕਾਰਿਆ ਜਾ ਰਿਹਾ ਹੈ। ਭਾਵੇਂ ਕਿ ਜਿਸ ਮਾਫ਼ੀਨਾਮੇ ਨੂੰ ਲੈ ਕੇ ਗਿਆਨੀ ਗੁਰਬਚਨ ਸਿੰਘ ਇਸ ਵੇਲੇ ਸਿੱਖ ਪੰਥ ਦੇ ਨਿਸ਼ਾਨੇ ’ਤੇ ਹਨ ਉਸ ਬਾਰੇ ਅਸਿੱਧੇ ਤੌਰ ਤੇ ਸਾਰਿਆਂ ਨੂੰ ਪਤਾ ਹੈ ਕਿ ਉਸ ਮਾਫ਼ੀਨਾਮੇ ਦਾ ਖਰੜਾ ਕਿਸ ਨੇ ਕਿਵੇਂ ਅਤੇ ਕਿਨ੍ਹਾਂ ਹਾਲਾਤਾਂ ਵਿੱਚ ਤਿਆਰ ਕੀਤਾ ਸੀ ਤੇ ਇਸ ਮਾਫ਼ੀ ਨਾਲ ਕਿਸਨੂੰ ਕਿੰਨਾ ਅਤੇ ਕਿਸ ਤਰੀਕੇ ਨਾਲ ਫਾਇਦਾ ਹੋਣਾ ਸੀ।
Read Also ਗਿਆਨੀ ਗੁਰਬਚਨ ਸਿੰਘ ਦੇ ਮੁੰਡੇ ਨੂੰ ਨਹੀਂ ਮਿਲਿਆ ਪਸ਼ੂ ਮੇਲਿਆਂ ਦਾ ਠੇਕਾ
ਪਰ ਫਿਰ ਕਹਿੰਨੇ ਆਂ ਕਿ ਤਿੱਖੀ ਘੁੱਗੀ ਕਾਂ ਬਦਨਾਮ ਕਿਉਂਕਿ ਗਿਆਨੀ ਗੁਰਬਚਨ ਸਿੰਘ ਨਾਲ ਉਸ ਕਾਂ ਵਾਂਗ ਹੋਈ ਹੈ ਜੋ ਉਸ ਘੁੱਗੀ ਦੀਆਂ ਕਰਨੀਆਂ ਦੀ ਸਜ਼ਾ ਭੁਗਤਣ ਨੂੰ ਮਜਬੂਰ ਹਨ ਜੋ ਖਰਾਬੀਆਂ ਤਾਂ ਆਪ ਕਰਦੀ ਰਹੀ ਤੇ ਬਦਨਾਮੀ ਵਿਚਾਰੇ ਕਾਂ ਦੇ ਮੱਥੇ ਲੱਗ ਗਈ। ਕਹਿਣ ਤੋਂ ਭਾਵ ਇਹ ਹੈ ਕਿ ਮਾਫ਼ੀਨਾਮੇ ਦਾ ਫਾਇਦਾ ਕੋਈ ਚੁੱਕ ਗਿਆ ਤੇ ਪੰਜਾ ਤਖਤਾਂ ਦੇ ਜੱਥੇਦਾਰਾਂ ਵਲੋਂ ਉਸ ਮਾਫ਼ੀਨਾਮੇ ਤੇ ਹਸਤਾਖਰ ਕੀਤੇ ਜਾਣ ਦੇ ਬਾਵਜੂਦ ਅੱਜ ਨਿਸ਼ਾਨੇ ’ਤੇ ਸਿਰਫ਼ ਗਿਆਨੀ ਗੁਰਬਚਨ ਸਿੰਘ ਹਨ। ਅਸੂਲ ਤਾਂ ਇਹ ਕਹਿੰਦਾ ਹੈ ਕਿ ਜੇਕਰ ਮਾਫ਼ੀਨਾਮਾ ਦੇ ਕੇ ਵਾਪਸ ਲੈਣਾ ਗਲਤ ਹੈ ਤਾਂ ਉਸ ਮਾਫ਼ੀਨਾਮੇ ਤੇ ਹਸਤਾਖਰ ਕਰਕੇ ਜਾਰੀ ਕਰਨ ਵਾਲੇ ਪੰਜਾਂ ਤਖਤਾਂ ਦੇ ਜੱਥੇਦਾਰਾਂ ਨੂੰ ਵੀ ਬਰਾਬਰ ਦਾ ਕਸੂਰਵਾਰ ਮੰਨਿਆ ਜਾਣਾ ਚਾਹੀਦਾ ਸੀ ਪਰ ਕਿਹਾ ਜਾ ਸਕਦਾ ਹੈ ਕਿ ਮਾੜਾ ਸਮਾਂ ਇਸ ਵੇਲੇ ਗਿਆਨੀ ਗੁਰਬਚਨ ਸਿੰਘ ਦਾ ਹੀ ਚੱਲ ਰਿਹਾ ਹੈ ਜਿਨ੍ਹਾਂ ਨੂੰ ਹਰ ਕੋਈ ਸ਼ਬਦਾਂ ਰਾਹੀਂ ਵੱਢਣ ਖਾਣ ਨੂੰ ਪੈ ਰਿਹਾ ਹੈ।
ਤਾਜ਼ਾ ਬਦਲੇ ਹਾਲਾਤਾਂ ਵਿੱਚ ਤਿੰਨ ਤਖਤਾਂ ਦੇ ਜੱਥੇਦਾਰਾਂ ਵਲੋਂ ਗਿਆਨੀ ਗੁਰਬਚਨ ਸਿੰਘ ਵੱਲੋਂ ਬੁਲਾਈ ਗਈ ਕਿਸੇ ਵੀ ਬੈਠਕ ਵਿੱਚ ਨਾ ਜਾਣ ਦਾ ਐਲਾਨ ਕੀਤਾ ਹੈ। ਜਿਨ੍ਹਾਂ ਜੱਥੇਦਾਰਾਂ ਨੇ ਗਿਆਨੀ ਗੁਰਬਚਨ ਸਿੰਘ ਦਾ ਬਾਈਕਾਟ ਹੈ ਉਨ੍ਹਾਂ ਵਿੱਚ ਤਖਤ ਸ੍ਰੀ ਕੇਸਗੜ੍ਹ ਸਾਹਿਬ ਦੇ ਜੱਥੇਦਾਰ ਗਿਆਨੀ ਰਘੁਬੀਰ ਸਿੰਘ, ਤਖਤ ਸ੍ਰੀ ਪਟਨਾ ਸਾਹਿਬ ਦੇ ਜੱਥੇਦਾਰ ਗਿਆਨੀ ਇਕਬਾਲ ਸਿੰਘ ਅਤੇ ਤਖਤ ਸ੍ਰੀ ਦਮਦਮਾ ਸਾਹਿਬ ਦੇ ਜੱਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਦੇ ਨਾਮ ਉਭਰ ਕੇ ਸਾਹਮਣੇ ਆਏ ਹਨ। ਹਾਲਾਂਕਿ ਇਸ ਮਾਮਲੇ ਵਿੱਚ ਬਾਈਕਾਟ ਕਰਨ ਵਾਲੇ ਕਿਸੇ ਵੀ ਤਖਤ ਦੇ ਜੱਥੇਦਾਰ ਨੇ ਖੁੱਲ ਕੇ ਕੋਈ ਬਿਆਨ ਨਹੀਂ ਦਿੱਤਾ ਪਰ ਸੂਤਰਾਂ ਅਨੁਸਾਰ ਇਨ੍ਹਾਂ ਜੱਥੇਦਾਰਾਂ ਨੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਭਾਈ ਗੋਬਿੰਦ ਸਿੰਘ ਲੌਂਗੋਵਾਲ ਨੂੰ ਇਸ ਬਾਬਤ ਸੂਚਿਤ ਕਰ ਦਿੱਤਾ ਹੈ।
ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਤਖਤ ਸ੍ਰੀ ਦਮਦਮਾ ਸਾਹਿਬ ਦੇ ਜੱਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਨੇ ਸਿਰਫ਼ ਇੰਨਾ ਕਿਹਾ ਹੈ ਕਿ ਹਲੇ ਤੱਕ ਪੰਜ ਸਿੰਘ ਸਾਹਿਬਾਨਾਂ ਦੀ ਬੈਠਕ ਕੀਤੇ ਜਾਣ ਸਬੰਧੀ ਕੋਈ ਸੁਨੇਹਾ ਨਹੀਂ ਆਇਆ ਤੇ ਜਦੋਂ ਇਹ ਸੁਨੇਹਾ ਆਵੇਗਾ ਤਾਂ ਉਹ ਉਸ ਵੇਲੇ ਉੱਥੇ ਜਾਣ ਜਾਂ ਨਾ ਜਾਣ ਬਾਰੇ ਵਿਚਾਰ ਕਰਨਗੇ। ਇਸ ਤੋਂ ਇਲਾਵਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਕਿਸੇ ਅਹੁਦੇਦਾਰ ਨੇ ਤਖਤਾਂ ਦੇ ਜੱਥੇਦਾਰਾਂ ਵਲੋਂ ਲਏ ਗਏ ਕਿਸੇ ਫੈਸਲੇ ਤੇ ਕਿਸ ਕਿਸਮ ਦੀ ਕੋਈ ਟੀਕਾ ਟਿੱਪਣੀ ਨਹੀਂ ਕੀਤੀ ਹੈ ਇੱਥੋਂ ਤੱਕ ਕਿ ਐਸਜੀਪੀਸੀ ਦੇ ਪ੍ਰਧਾਨ ਭਾਈ ਗੋਬਿੰਘ ਸਿੰਘ ਲੌਂਗੋਵਾਲ ਨੇ ਵੀ ਇਸ ਪ੍ਰਤੀ ਚੁੱਪੀ ਸਾਧ ਰੱਖੀ ਹੈ।
ਇੱਥੇ ਦੱਸਣਯੋਗ ਹੈ ਕਿ ਸੌਦਾ ਸਾਧ ਨੂੰ ਮਾਫ਼ੀ ਦੇ ਕੇ ਵਾਪਸ ਲੈਣ ਦਾ ਮੁੱਦਾ ਬੇਸ਼ੱਕ ਅੰਦਰੋਂ ਅੰਦਰੀ ਸੁਲਗਦਾ ਰਿਹਾ ਪਰ ਬਾਹਰੀ ਤੌਰ ਤੇ ਇਹ ਦੱਬ ਚੁੱਕਿਆ ਸੀ। ਪਰ ਬੇਅਦਬੀ ਮਾਮਲਿਆਂ ਨੂੰ ਲੈ ਕੇ ਆਈ ਜਸਟਿਸ ਰਣਜੀਤ ਸਿੰਘ ਰਿਪੋਰਟ ਪੰਜਾਬ ਵਿਧਾਨ ਸਭਾ ਵਿੱਚ ਪੇਸ਼ ਕਰਨ ਮੌਕੇ ਪੱਟੀ ਦੇ ਵਿਧਾਇਕ ਹਰਮਿੰਦਰ ਸਿੰਘ ਗਿੱਲ ਵਲੋਂ ਗਿਆਨੀ ਗੁਰਬਚਨ ਸਿੰਘ ਅਤੇ ਉਨ੍ਹਾਂ ਦੇ ਸਪੁੱਤਰ ਮਨਜਿੰਦਰ ਪਾਲ ਸਿੰਘ ਬਿੱਟੂ ਦੇ ਬਾਰੇ ਜਿਸ ਤਰ੍ਹਾਂ ਦੇ ਖੁਲਾਸੇ ਕੀਤੇ ਗਏ ਸਨ ਅਤੇ ਉਸ ਰਿਪੋਰਟ ਵਿਚ ਜਿਸ ਤਰ੍ਹਾਂ ਅਕਾਲ ਤਖਤ ਸਾਹਿਬ ਦੇ ਜੱਥੇਦਾਰ ਬਾਰੇ ਜ਼ਿਕਰ ਕੀਤਾ ਗਿਆ ਉਸ ਤੋਂ ਬਾਅਦ ਗਿਆਨੀ ਗੁਰਬਚਨ ਸਿੰਘ ਲਗਭਗ 10 ਦਿਨ ਰੂਪੋਸ਼ ਰਹੇ ਤੇ ਵਾਪਸ ਆ ਕੇ ਵੀ ਉਨ੍ਹਾਂ ਨੇ ਕਈ ਦਿਨ ਚੁੱਪ ਰਹਿਣ ਤੋਂ ਬਾਅਦ ਸਤੰਬਰ 2018 ਦੇ ਅਖੀਰਲੇ ਹਫਤੇ ਵਿਚ ਹਰਮਿੰਦਰ ਸਿੰਘ ਗਿੱਲ ਦੇ ਖਿਲਾਫ਼ ਭੜਾਸ ਕੱਢੀ ਤੇ ਇੱਥੋਂ ਤੱਕ ਧਮਕੀ ਦਿੱਤੀ ਕਿ ਗਿੱਲ ਦੇ ਖਿਲਾਫ਼ ਉਨ੍ਹਾਂ ਦਾ ਸਪੁੱਤਰ ਬਿੱਟੂ ਕਾਨੂੰਨੀ ਕਾਰਵਾਈ ਕਰੇਗਾ।
ਪਰ ਜਿਸ ਤਰ੍ਹਾਂ ਹੁਣ ਤਿੰਨ ਤਖਤਾਂ ਦੇ ਜੱਥੇਦਾਰਾਂ ਨੇ ਗਿਆਨੀ ਹੋਰਾਂ ਦੇ ਖਿਲਾਫ਼ ਮੋਰਚਾ ਖੋਲ੍ਹ ਦਿੱਤਾ ਹੈ ਤੇ ਸੁਖਦੇਵ ਸਿੰਘ ਢੀਂਡਸਾ ਤੇ ਉਹ ਲੋਕ ਜਿਨ੍ਹਾਂ ਨੇ ਗਿਆਨੀ ਗੁਰਬਚਨ ਸਿੰਘ ਨੂੰ ਕਸੂਰਵਾਰ ਠਹਿਰਾਉਂਦਿਆਂ ਉਨ੍ਹਾਂ ਦੇ ਅਸਤੀਫੇ ਦੀ ਮੰਗ ਕੀਤੀ ਸੀ ਉਨ੍ਹਾਂ ਨੇ ਅਕਾਲੀ ਦਲ ਦੇ ਵਿਰੁੱਧ ਬਗਾਵਤੀ ਸੁਰ ਅਪਣਾ ਲਏ ਨੇ ਤੇ ਉਸ ਨੂੰ ਦੇਖਦਿਆਂ ਹੁਣ ਅਕਾਲ ਤਖਤ ਸਾਹਿਬ ਦੇ ਜੱਥੇਦਾਰ ਦਾ ਇਸ ਅਹੁਦੇ ਤੋਂ ਹਟਾਇਆ ਜਾਣਾ ਪੱਕਾ ਹੈ। ਪਰ ਸਵਾਲ ਇਹ ਹੈ ਕਿ ਜੇਕਰ ਕਸੂਰਵਾਰ ਪੰਜਾਂ ਤਖਤਾਂ ਦੇ ਜੱਥੇਦਾਰ ਹਨ, ਜੇਕਰ ਕਸੂਰਵਾਰ ਉਹ ਲੋਕ ਹਨ ਜਿਨ੍ਹਾਂ ਨੂੰ ਇਸ ਮੁਆਫ਼ੀਨਾਮੇ ਨਾਲ ਫਾਇਦਾ ਹੋਣਾ ਸੀ ਤਾਂ ਫਿਰ ਨਿਸ਼ਾਨੇ ਤੇ ਸਿਰਫ਼ ਅਕਾਲ ਤਖਤ ਸਾਹਿਬ ਦੇ ਜੱਥੇਦਾਰ ਹੀ ਕਿਉਂ?
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.
