ਇਮੀਗ੍ਰੇਸ਼ਨ ਅਰਜ਼ੀਆਂ ਦੀ ਤੇਜ਼ ਕਾਰਵਾਈ ਲਈ ਉਡੀਕ ਵਧਾਉਣ ਬਾਰੇ ਸੋਚ ਰਿਹੈ ਅਮਰੀਕੀ ਵਿਭਾਗ

ਅਮਰੀਕਾ ਦਾ ਗ੍ਰਹਿ ਸੁਰੱਖਿਆ ਵਿਭਾਗ ਕੁਝ ਇਮੀਗ੍ਰੇਸ਼ਨ ਅਰਜ਼ੀਆਂ ਦੀ ਫੀਸ ਦੇ ਕੇ ਤੇਜ਼ ਕਾਰਵਾਈ ਕਰਵਾਉਣ ਵਾਲੀ ਸੇਵਾ ਦੀ ਮਿਆਦ ਬਦਲਣ ਬਾਰੇ ਵਿਚਾਰ ਕਰ ਰਿਹਾ ਹੈ। ਜੇ ਪ੍ਰਸਤਾਵ ਮਨਜ਼ੂਰ ਹੋਇਆ, ਤਾਂ ਕੁਝ ਬਿਨੈਕਾਰਾਂ ਨੂੰ ਫ਼ੈਸਲੇ ਲਈ ਮੌਜੂਦਾ ਸਮੇਂ ਨਾਲੋਂ ਵੱਧ ਉਡੀਕ ਕਰਨੀ ਪੈ ਸਕਦੀ ਹੈ।ਇਸ ਪ੍ਰਸਤਾਵ ਦਾ ਨਾਂ ”ਤੇਜ਼ ਕਾਰਵਾਈ ਦੀ ਮਿਆਦ ਵਿਚ ਸੋਧ” ਹੈ। ਇਹ 13 ਅਕਤੂਬਰ ਨੂੰ ਸਰਕਾਰੀ ਨਿਯਮਾਂ ਦੀ ਸਮੀਖਿਆ ਲਈ ਭੇਜਿਆ ਗਿਆ ਸੀ ਅਤੇ ਇਸ ਵੇਲੇ ਪ੍ਰਬੰਧਨ ਅਤੇ ਬਜਟ ਦਫ਼ਤਰ ਕੋਲ ਵਿਚਾਰ ਅਧੀਨ ਹੈ। ਪ੍ਰਸਤਾਵ ਦਾ ਪੂਰਾ ਵੇਰਵਾ ਹਾਲੇ ਜਨਤਕ ਨਹੀਂ ਕੀਤਾ ਗਿਆ। ਇਸ ਲਈ ਇਹ ਸਪੱਸ਼ਟ ਨਹੀਂ ਕਿ ਕਿਹੜੀਆਂ ਅਰਜ਼ੀਆਂ ਪ੍ਰਭਾਵਿਤ ਹੋਣਗੀਆਂ ਜਾਂ ਉਡੀਕ ਦੀ ਮਿਆਦ ਕਿੰਨੀ ਵਧ ਸਕਦੀ ਹੈ।
ਮੌਜੂਦਾ ਨਿਯਮਾਂ ਅਨੁਸਾਰ, ਅਰਜ਼ੀ ਦੀ ਕਿਸਮ ਦੇ ਮੁਤਾਬਕ ਤੇਜ਼ ਕਾਰਵਾਈ ਲਈ 15, 30 ਜਾਂ 45 ਕਾਰੋਬਾਰੀ ਦਿਨਾਂ ਦੀ ਮਿਆਦ ਹੈ। ਇਹ ਸੇਵਾ ਵਾਧੂ ਫੀਸ ਦੇ ਕੇ ਲਈ ਜਾਂਦੀ ਹੈ। ਇਹ ਕੁਝ ਰੁਜ਼ਗਾਰ-ਆਧਾਰਿਤ ਗ੍ਰੀਨ ਕਾਰਡ ਅਰਜ਼ੀਆਂ, ਆਰਜ਼ੀ ਕੰਮ ਵਾਲੇ ਵੀਜ਼ਿਆਂ ਅਤੇ ਕੁਝ ਕੰਮ ਕਰਨ ਦੀ ਇਜਾਜ਼ਤ ਜਾਂ ਵੀਜ਼ਾ ਮਿਆਦ ਵਧਾਉਣ ਦੀਆਂ ਅਰਜ਼ੀਆਂ ਲਈ ਉਪਲਬਧ ਹੈ। ਇਸ ਮਿਆਦ ਵਿਚ ਅਧਿਕਾਰੀ ਫ਼ੈਸਲਾ, ਹੋਰ ਸਬੂਤ ਮੰਗਣ ਦਾ ਪੱਤਰ ਜਾਂ ਇਨਕਾਰ ਕਰਨ ਦੇ ਇਰਾਦੇ ਬਾਰੇ ਸੂਚਨਾ ਦੇ ਸਕਦੇ ਹਨ।
ਪ੍ਰਸਤਾਵ ਦੀ ਸਮੀਖਿਆ ਪੂਰੀ ਹੋਣ ਮਗਰੋਂ ਸਰਕਾਰ ਇਸ ਨੂੰ ਫੈਡਰਲ ਰਜਿਸਟਰ ਵਿਚ ਛਾਪ ਸਕਦੀ ਹੈ। ਉਸ ਤੋਂ ਬਾਅਦ ਆਮ ਤੌਰ ‘ਤੇ ਲੋਕਾਂ ਨੂੰ ਆਪਣੀ ਰਾਇ ਦੇਣ ਲਈ 30 ਤੋਂ 60 ਦਿਨ ਮਿਲਦੇ ਹਨ। ਨਿਯਮ ਨੂੰ ਅੰਤਿਮ ਰੂਪ ਦੇਣ ਵਿਚ ਕਈ ਮਹੀਨੇ ਲੱਗ ਸਕਦੇ ਹਨ। ਇਸ ਦੌਰਾਨ ਮੌਜੂਦਾ ਨਿਯਮ ਲਾਗੂ ਹਨ; ਅਰਜ਼ੀਆਂ ਦੇਣ ਵਾਲਿਆਂ ਨੂੰ ਆਪਣੀ ਯੋਗਤਾ ਅਤੇ ਸਮਾਂ-ਸੀਮਾ ਬਾਰੇ ਨਵੀਂ ਸਰਕਾਰੀ ਜਾਣਕਾਰੀ ਦੇਖਦੇ ਰਹਿਣਾ ਚਾਹੀਦਾ ਹੈ।