ਅਮਰੀਕਾ ‘ਚ ਹੈਲੀਕਾਪਟਰ ਕ੍ਰੈਸ਼, ਦੋਵੇਂ ਪਾਇਲਟਾਂ ਦੀ ਮੌਤ

ਅਮਰੀਕਾ ਦੇ ਯੋਸੇਮਿਟੀ ਨੈਸ਼ਨਲ ਪਾਰਕ ‘ਚ ਜੰਗਲ ਦੀ ਅੱਗ ਬੁਝਾਉਣ ਦੇ ਅਭਿਆਨ ਦੌਰਾਨ ਇੱਕ ਅੱਗ ਬੁਝਾਊ ਹੈਲੀਕਾਪਟਰ ਹਾਦਸਾਗ੍ਰਸਤ ਹੋ ਗਿਆ। ਹਾਦਸੇ ‘ਚ ਹੈਲੀਕਾਪਟਰ ‘ਚ ਸਵਾਰ ਦੋਵੇਂ ਪਾਇਲਟਾਂ ਦੀ ਮੌਤ ਹੋ ਗਈ। ਅਧਿਕਾਰੀਆਂ ਅਨੁਸਾਰ, ਇਹ ਹਾਦਸਾ ਐਤਵਾਰ ਦੁਪਹਿਰ ਉਸ ਸਮੇਂ ਵਾਪਰਿਆ, ਜਦੋਂ ਹੈਲੀਕਾਪਟਰ ਅੱਗ ‘ਤੇ ਪਾਣੀ ਸੁੱਟਣ ਦੇ ਅਭਿਆਨ ‘ਚ ਲੱਗਾ ਹੋਇਆ ਸੀ। ਹੈਲੀਕਾਪਟਰ ‘ਚ ਪਾਇਲਟਾਂ ਤੋਂ ਇਲਾਵਾ ਹੋਰ ਕੋਈ ਵਿਅਕਤੀ ਸਵਾਰ ਨਹੀਂ ਸੀ। ਦੋਵੇਂ ਪਾਇਲਟ ਠੇਕੇ ‘ਤੇ ਕੰਮ ਕਰਨ ਵਾਲੀ ਹਵਾਈ ਕੰਪਨੀ ‘ਪ੍ਰਿਸੀਜ਼ਨ’ ਲਈ ਕੰਮ ਕਰਦੇ ਸਨ।
ਹਾਦਸੇ ‘ਚ ਮਾਰੇ ਗਏ ਇੱਕ ਪਾਇਲਟ ਦੀ ਪਛਾਣ ਹੋਈ
ਹਾਦਸੇ ‘ਚ ਮਾਰੇ ਗਏ ਪਾਇਲਟਾਂ ‘ਚੋਂ ਇੱਕ ਦੀ ਪਛਾਣ ਗ੍ਰੇਗ ਕਿੰਗ ਵਜੋਂ ਹੋਈ ਹੈ। ਉਹ ਪਹਿਲਾਂ ਅਲਾਸਕਾ ਡਿਵੀਜ਼ਨ ਆਫ਼ ਫੋਰੈਸਟਰੀ ਐਂਡ ਫਾਇਰ ਪ੍ਰੋਟੈਕਸ਼ਨ ਨਾਲ ਕੰਮ ਕਰ ਚੁੱਕੇ ਸਨ ਅਤੇ ਅਲਾਸਕਾ ‘ਚ ਜੰਗਲ ਦੀ ਅੱਗ ਬੁਝਾਉਣ ਦੇ ਕਈ ਅਭਿਆਨਾਂ ‘ਚ ਹਿੱਸਾ ਲੈ ਚੁੱਕੇ ਸਨ। ਬਾਅਦ ‘ਚ ਉਹ ‘ਪ੍ਰਿਸੀਜ਼ਨ’ ਕੰਪਨੀ ਨਾਲ ਜੁੜ ਗਏ। ਅਲਾਸਕਾ ਦੀ ਏਜੰਸੀ ਦੇ ਬੁਲਾਰੇ ਐਮਰੀ ਜੌਨਸਨ ਨੇ ਦੱਸਿਆ ਕਿ ਕਿੰਗ ਦੇ ਕਰੀਬੀ ਰਿਸ਼ਤੇਦਾਰ ਅਜੇ ਵੀ ਏਜੰਸੀ ‘ਚ ਕੰਮ ਕਰਦੇ ਹਨ। ਪਰਿਵਾਰ ਦੀ ਇਜਾਜ਼ਤ ਮਿਲਣ ਤੋਂ ਬਾਅਦ ਹੀ ਉਨ੍ਹਾਂ ਦਾ ਨਾਮ ਜਨਤਕ ਕੀਤਾ ਗਿਆ। ਦੂਜੇ ਪਾਇਲਟ ਦੀ ਪਛਾਣ ਫਿਲਹਾਲ ਜਨਤਕ ਨਹੀਂ ਕੀਤੀ ਗਈ ਹੈ।
ਫੈਡਰਲ ਕੰਪਲੈਕਸ ਇਨਸਿਡੈਂਟ ਮੈਨੇਜਮੈਂਟ ਟੀਮ ਦੇ ਬੁਲਾਰੇ ਬੈਂਜਾਮਿਨ ਕੋਸਲ ਦੇ ਅਨੁਸਾਰ, ‘ਸੁਪਰ ਪਿਊਮਾ’ ਹੈਲੀਕਾਪਟਰ ਅੱਗ ਬੁਝਾਉਣ ਲਈ ‘ਵਾਟਰ ਬਕੇਟ’ ਦੀ ਵਰਤੋਂ ਕਰ ਰਿਹਾ ਸੀ। ਇਸੇ ਦੌਰਾਨ ਇਹ ਝੀਲ ਨੇੜੇ ਹਾਦਸਾਗ੍ਰਸਤ ਹੋ ਗਿਆ। ਹਾਦਸੇ ਦੇ ਹਾਲਾਤ ਬਾਰੇ ਫਿਲਹਾਲ ਕੋਈ ਵਿਸਥਾਰਪੂਰਵਕ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ। ਹਾਦਸੇ ਦੀ ਜਾਂਚ ਫੈਡਰਲ ਏਵੀਏਸ਼ਨ ਐਡਮਿਨਿਸਟ੍ਰੇਸ਼ਨ (FAA) ਅਤੇ ਨੈਸ਼ਨਲ ਟਰਾਂਸਪੋਰਟੇਸ਼ਨ ਸੇਫਟੀ ਬੋਰਡ (NTSB) ਵੱਲੋਂ ਕੀਤੀ ਜਾਵੇਗੀ। ਅਧਿਕਾਰੀਆਂ ਨੇ ਅਜੇ ਇਹ ਨਹੀਂ ਦੱਸਿਆ ਕਿ ਹੈਲੀਕਾਪਟਰ ਕਿਸ ਕਾਰਨ ਹਾਦਸਾਗ੍ਰਸਤ ਹੋਇਆ।
ਸਰਕਾਰੀ ਰਿਪੋਰਟ ਅਨੁਸਾਰ, ਇਸ ਸਾਲ ਅਮਰੀਕਾ ‘ਚ ਜੰਗਲ ਦੀ ਅੱਗ ਨਾਲ ਜੁੜੇ ਅਭਿਆਨਾਂ ਦੌਰਾਨ ਘੱਟੋ-ਘੱਟ 14 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਇਹ ਗਿਣਤੀ ਸਾਲ 2022 ਤੋਂ ਬਾਅਦ ਸਭ ਤੋਂ ਵੱਧ ਹੈ। ਸਾਲ 2022 ‘ਚ ਜੰਗਲ ਦੀ ਅੱਗ ਨਾਲ ਸਬੰਧਤ ਅਭਿਆਨਾਂ ‘ਚ 25 ਲੋਕਾਂ ਦੀ ਜਾਨ ਗਈ ਸੀ। ਅਗਸਤ ‘ਚ ਵੀ ਅਮਰੀਕਾ ‘ਚ ਅਜਿਹੇ ਦੋ ਵੱਡੇ ਹੈਲੀਕਾਪਟਰ ਹਾਦਸੇ ਹੋਏ ਸਨ। ਯੂਟਾ ‘ਚ ਅੱਗ ਬੁਝਾਉਣ ‘ਚ ਮਦਦ ਕਰ ਰਹੇ ਦੋ ਹੈਲੀਕਾਪਟਰ ਪਾਇਲਟਾਂ ਦੀ ਮੌਤ ਹੋ ਗਈ ਸੀ, ਜਦਕਿ ਕੋਲੋਰਾਡੋ ‘ਚ ਇੱਕ ਹੈਲੀਕਾਪਟਰ ਜਲ ਭੰਡਾਰ ‘ਚ ਹਾਦਸਾਗ੍ਰਸਤ ਹੋ ਗਿਆ ਸੀ।
ਅਲਾਸਕਾ ਦੀ ਜੰਗਲਾਤ ਅਤੇ ਅੱਗ ਬੁਝਾਊ ਏਜੰਸੀ ਨੇ ਦੋਵੇਂ ਪਾਇਲਟਾਂ ਦੀ ਮੌਤ ਨੂੰ ਜੰਗਲ ਦੀ ਅੱਗ ਬੁਝਾਉਣ ਵਾਲੇ ਪੂਰੇ ਭਾਈਚਾਰੇ ਲਈ ਬੇਹੱਦ ਦੁਖਦਾਈ ਨੁਕਸਾਨ ਦੱਸਿਆ। ਏਜੰਸੀ ਨੇ ਆਪਣੇ ਬਿਆਨ ‘ਚ ਕਿਹਾ, “ਗ੍ਰੇਗ ਇੱਕ ਸਮਰਪਿਤ ਪਾਇਲਟ ਅਤੇ ਸਾਡੇ ‘ਚੋਂ ਕਈ ਲੋਕਾਂ ਦੇ ਬਹੁਤ ਕਰੀਬੀ ਦੋਸਤ ਸਨ। ਅਸੀਂ ਦੋਵੇਂ ਪਾਇਲਟਾਂ ਦੇ ਦੇਹਾਂਤ ‘ਤੇ ਸੋਗ ਪ੍ਰਗਟ ਕਰ ਰਹੇ ਹਾਂ, ਜਿਨ੍ਹਾਂ ਨੇ ਬਹਾਦਰੀ ਨਾਲ ਅੱਗ ਬੁਝਾਉਣ ਦੇ ਯਤਨਾਂ ‘ਚ ਮਦਦ ਕੀਤੀ। ਸਾਡੀਆਂ ਸੰਵੇਦਨਾਵਾਂ ਉਨ੍ਹਾਂ ਦੇ ਪਰਿਵਾਰਾਂ ਨਾਲ ਹਨ।” ਉੱਥੇ ਹੀ ਪ੍ਰਿਸੀਜ਼ਨ ਕੰਪਨੀ ਨੇ ਸੋਸ਼ਲ ਮੀਡੀਆ ‘ਤੇ ਜਾਰੀ ਬਿਆਨ ‘ਚ ਕਿਹਾ ਕਿ ਕੰਪਨੀ ਕੋਲ ਇਸ ਦੁੱਖ ਨੂੰ ਪ੍ਰਗਟ ਕਰਨ ਲਈ ਸ਼ਬਦ ਨਹੀਂ ਹਨ।
ਯੋਸੇਮਿਟੀ ਨੈਸ਼ਨਲ ਪਾਰਕ ‘ਚ ਜਿਸ ਅੱਗ ਨੂੰ ਬੁਝਾਉਣ ਲਈ ਹੈਲੀਕਾਪਟਰ ਅਭਿਆਨ ‘ਚ ਸ਼ਾਮਲ ਸੀ, ਉਸ ਨੂੰ ‘ਡੋਮ ਫਾਇਰ’ ਨਾਮ ਦਿੱਤਾ ਗਿਆ ਹੈ। ਨੈਸ਼ਨਲ ਇੰਟਰਏਜੰਸੀ ਫਾਇਰ ਸੈਂਟਰ ਦੇ ਅਨੁਸਾਰ, ਇਹ ਅੱਗ 15 ਸਤੰਬਰ ਨੂੰ ਕੈਲੀਫੋਰਨੀਆ ਦੇ ਵਾਵੋਨਾ ਨੇੜੇ ਸ਼ੁਰੂ ਹੋਈ ਸੀ। ਲਗਪਗ 580 ਲੋਕ ਇਸ ਅੱਗ ਨੂੰ ਬੁਝਾਉਣ ‘ਚ ਜੁਟੇ ਹੋਏ ਹਨ। ਅੱਗ ਕਰੀਬ 4.7 ਵਰਗ ਮੀਲ ਖੇਤਰ ‘ਚ ਫੈਲ ਚੁੱਕੀ ਹੈ ਅਤੇ ਹੁਣ ਤੱਕ ਲਗਪਗ 15 ਫ਼ੀਸਦੀ ਹਿੱਸੇ ‘ਤੇ ਹੀ ਕਾਬੂ ਪਾਇਆ ਜਾ ਸਕਿਆ ਹੈ। ਹੈਲੀਕਾਪਟਰ ਦੇ ਹਾਦਸਾਗ੍ਰਸਤ ਹੋਣ ਦੀ ਥਾਂ ‘ਆਸਟ੍ਰੈਂਡਰ ਲੇਕ’ ਦੇ ਦੱਖਣ-ਪੂਰਬ ‘ਚ ਦੱਸੀ ਗਈ ਹੈ।
ਸਤੰਬਰ ‘ਚ ਅਮਰੀਕਾ ‘ਚ ਜੰਗਲ ਦੀ ਅੱਗ ਬੁਝਾਉਣ ਦੌਰਾਨ ਕਈ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਓਕਲਾਹੋਮਾ ‘ਚ ਇੱਕ ਫਾਇਰਫਾਈਟਰ ਦੀ ਅੱਗ ਨਾਲ ਲੜਦੇ ਸਮੇਂ ਮੈਡੀਕਲ ਐਮਰਜੈਂਸੀ ਕਾਰਨ ਮੌਤ ਹੋ ਗਈ। ਓਰੇਗਨ ਦੇ ਮਾਊਂਟ ਹੁੱਡ ਨੈਸ਼ਨਲ ਫੋਰੈਸਟ ‘ਚ ਅੱਗ ਬੁਝਾਉਣ ਦੌਰਾਨ ਦਰੱਖਤ ਕੱਟ ਰਹੇ ਇੱਕ ਫਾਇਰਫਾਈਟਰ ‘ਤੇ ਦਰੱਖਤ ਡਿੱਗ ਗਿਆ। ਅਗਸਤ ‘ਚ ਓਕਲਾਹੋਮਾ ‘ਚ ਇੱਕ ਜੰਗਲ ਦੀ ਅੱਗ ਨਾਲ ਸਬੰਧਤ ਅਧਿਕਾਰੀ ਸੜ ਰਹੀ ਇਮਾਰਤ ਨੂੰ ਖਾਲੀ ਕਰਵਾਉਂਦੇ ਸਮੇਂ ਫਸ ਗਏ ਅਤੇ ਉਨ੍ਹਾਂ ਦੀ ਮੌਤ ਹੋ ਗਈ। ਮਿਨੇਸੋਟਾ ‘ਚ ਮੈਡੀਕਲ ਐਮਰਜੈਂਸੀ ਕਾਰਨ ਇੱਕ ਫਾਇਰਫਾਈਟਰ ਦੀ ਜਾਨ ਚਲੀ ਗਈ। ਓਰੇਗਨ ‘ਚ ਇੱਕ ਬੁਲਡੋਜ਼ਰ ਆਪਰੇਟਰ ਅੱਗ ਦੀ ਲਪੇਟ ‘ਚ ਆ ਗਿਆ। ਜੂਨ ‘ਚ ਪੱਛਮੀ ਕੋਲੋਰਾਡੋ ‘ਚ ਚਾਰ ਫਾਇਰਫਾਈਟਰਾਂ ਦੀ ਮੌਤ ਹੋ ਗਈ ਸੀ।