ਮੈਨਕਾਉ ‘ਪੈਕ ਐਂਡ ਸੇਵ’ ਦੇ ਸੁਰੱਖਿਆ ਗਾਰਡ ਨੂੰ ਚੋਰੀ ਦੇ ਮੁਲਜ਼ਮ ਗਾਹਕਾਂ ਤੋਂ ਉਗਰਾਹੀ ਕਰਨ ਦੇ ਦੋਸ਼ ’ਚ 6 ਮਹੀਨੇ ਦੀ ਘਰੇਲੂ ਕੈਦ
ਨਿਊਜ਼ੀਲੈਂਡ ਦੇ ਔਕਲੈਂਡ ਸ਼ਹਿਰ ਤੋਂ ਇੱਕ ਬਹੁਤ ਹੀ ਹੈਰਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਮੈਨੁਰਾਓ ਸ਼ਹਿਰ ਦੇ ‘ਪੈਕ ਐਂਡ ਸੇਵ’ ਸੁਪਰਮਾਰਕੀਟ ਵਿੱਚ ਤਾਇਨਾਤ ਇੱਕ ਸਾਬਕਾ ਸੁਰੱਖਿਆ ਗਾਰਡ ਨੂੰ ਗਾਹਕਾਂ ਉੱਤੇ ਚੋਰੀ ਦਾ ਦੋਸ਼ ਲਗਾ ਕੇ ਉਨ੍ਹਾਂ ਤੋਂ ਪੈਸੇ ਉਗਰਾਹੁਣ ਅਤੇ ਉਨ੍ਹਾਂ ਦੀ ਘੋਰ ਬੇਇੱਜ਼ਤੀ ਕਰਨ ਦੇ ਮਾਮਲੇ ਵਿੱਚ ਅਦਾਲਤ ਨੇ 6 ਮਹੀਨੇ ਦੀ ਘਰੇਲੂ ਕੈਦ ਦੀ ਸਜ਼ਾ ਸੁਣਾਈ ਹੈ।
24 ਸਾਲਾ ਲਾਕੀ ਸਾਵੈਲੀਓ ਨੇ ਆਪਣੇ ਸਾਥੀ ਨਾਲ ਮਿਲ ਕੇ ਕਈ ਲੋਕਾਂ ਨੂੰ ਆਪਣਾ ਨਿਸ਼ਾਨਾ ਬਣਾਇਆ ਸੀ। ਅਦਾਲਤੀ ਕਾਰਵਾਈ ਅਤੇ ਪੁਲਿਸ ਰਿਪੋਰਟਾਂ ਅਨੁਸਾਰ ਇਹ ਘਟਨਾ ਜਨਵਰੀ 2025 ਦੀ ਹੈ। ਇੱਕ ਵਿਅਕਤੀ ਜਦੋਂ ਸੁਪਰਮਾਰਕੀਟ ਦੇ ਸੈਲਫ ਚੈੱਕਆਊਟ ਤੋਂ ਕੁੱਝ ਸਾਮਾਨ ਦੇ ਪੈਸੇ ਦਿੱਤੇ ਬਿਨਾਂ ਬਾਹਰ ਨਿਕਲਿਆ, ਤਾਂ ਸਾਵੈਲੀਓ ਅਤੇ ਉਸ ਦੀ ਮਹਿਲਾ ਸਾਥੀ ਟੀਆਰੇ ਬਿਸ਼ਪ ਨੇ ਉਸ ਨੂੰ ਰੋਕ ਲਿਆ। ਉਹ ਉਸ ਵਿਅਕਤੀ ਨੂੰ ਆਪਣੇ ਛੋਟੇ ਅਤੇ ਬਿਨਾਂ ਖਿੜਕੀ ਵਾਲੇ ਦਫ਼ਤਰ ਵਿੱਚ ਲੈ ਗਏ, ਜਿੱਥੇ ਉਸ ਨਾਲ ਬਹੁਤ ਹੀ ਸ਼ਰਮਨਾਕ ਵਿਵਹਾਰ ਕੀਤਾ ਗਿਆ।
ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋਈ ਪੂਰੀ ਘਟਨਾ ਵਿੱਚ ਦੇਖਿਆ ਗਿਆ ਕਿ ਸਾਵੈਲੀਓ ਨੇ ਪਹਿਲਾਂ ਇੱਕ ਨਕਲੀ ਰਾਈਫਲ ਉਸ ਵਿਅਕਤੀ ਵੱਲ ਤਾਣੀ ਅਤੇ ਫਿਰ ਉਸ ਤੋਂ 200 ਡਾਲਰ ਜ਼ਬਰਦਸਤੀ ਖੋਹ ਲਏ। ਇਸ ਤੋਂ ਬਾਅਦ ਉਸ ਨੇ ਲਾਈਟਾਂ ਬੰਦ ਕਰਕੇ ਇੱਕ ਖੀਰੇ ਨਾਲ ਗਾਹਕ ਦੀ ਬੇਇੱਜ਼ਤੀ ਕੀਤੀ ਅਤੇ ਉਸ ਦੇ ਮੂੰਹ ਵਿੱਚ ਜ਼ਬਰਦਸਤੀ ਖੀਰਾ ਠੋਸਣ ਦੀ ਕੋਸ਼ਿਸ਼ ਕੀਤੀ।
ਸਾਵੈਲੀਓ ਅਤੇ ਬਿਸ਼ਪ ਦਾ ਇਹ ਸਿਲਸਿਲਾ ਇੱਥੇ ਹੀ ਨਹੀਂ ਰੁਕਿਆ। ਉਨ੍ਹਾਂ ਨੇ ਉਸੇ ਮਹੀਨੇ ਕਈ ਹੋਰ ਗਾਹਕਾਂ ਨੂੰ ਵੀ ਆਪਣੀ ਠੱਗੀ ਅਤੇ ਧਮਕੀਆਂ ਦਾ ਸ਼ਿਕਾਰ ਬਣਾਇਆ। ਇੱਕ ਹੋਰ ਮਾਮਲੇ ਵਿੱਚ ਬੱਚੇ ਦਾ ਦੁੱਧ ਖਰੀਦਣ ਆਏ ਵਿਅਕਤੀ ਤੋਂ 400 ਡਾਲਰ ਲਏ ਗਏ, ਜਦੋਂ ਕਿ ਰੈਜ਼ੀਡੈਂਸੀ ਵੀਜ਼ਾ ਖਰਾਬ ਹੋਣ ਦੇ ਡਰੋਂ ਇੱਕ ਹੋਰ ਗਾਹਕ ਤੋਂ 300 ਡਾਲਰ ਉਗਰਾਹੇ ਗਏ।
ਇੱਕ ਹੋਰ ਵਿਅਕਤੀ ਕੋਲੋਂ ਰਸੀਦ ਹੋਣ ਦੇ ਬਾਵਜੂਦ ਉਸ ਤੋਂ 100 ਡਾਲਰ ਵਸੂਲੇ ਗਏ।
ਮੈਨੁਕਾਓ ਜ਼ਿਲ੍ਹਾ ਅਦਾਲਤ ਦੇ ਜੱਜ ਗਸ ਐਂਡਰੀ ਵਿਲਟਨਜ਼ ਨੇ ਇਸ ਮਾਮਲੇ ਦੀ ਸੁਣਵਾਈ ਕਰਦਿਆਂ ਸਾਵੈਲੀਓ ਦੇ ਰਵੱਈਏ ਨੂੰ ਬਹੁਤ ਹੀ ਗੰਭੀਰ ਅਤੇ ਸ਼ਰਮਨਾਕ ਦੱਸਿਆ। ਜੱਜ ਨੇ ਕਿਹਾ ਕਿ ਸਾਵੈਲੀਓ ਨੇ ਆਪਣੇ ਅਹੁਦੇ ਦਾ ਗਲਤ ਫਾਇਦਾ ਉਠਾਇਆ ਅਤੇ ਲੋਕਾਂ ਦੇ ਅਧਿਕਾਰਾਂ ਦਾ ਘਾਨ ਕੀਤਾ ਹੈ। ਅਦਾਲਤ ਨੇ ਸਾਵੈਲੀਓ ਨੂੰ ਛੇ ਮਹੀਨੇ ਦੀ ਘਰੇਲੂ ਕੈਦ (ਹੋਮ ਡਿਟੈਂਸ਼ਨ) ਦੀ ਸਜ਼ਾ ਸੁਣਾਈ ਹੈ ਅਤੇ 12 ਮਹੀਨਿਆਂ ਦੀਆਂ ਹੋਰ ਸ਼ਰਤਾਂ ਲਗਾਈਆਂ ਹਨ। ਇਸ ਦੇ ਨਾਲ ਹੀ ਉਸ ਨੂੰ ਪੀੜਤਾਂ ਨੂੰ 750 ਡਾਲਰ ਦਾ ਮੁਆਵਜ਼ਾ ਦੇਣ ਦਾ ਹੁਕਮ ਵੀ ਦਿੱਤਾ ਗਿਆ ਹੈ। ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਸਾਵੈਲੀਓ ਦਾ ਸੁਰੱਖਿਆ ਖੇਤਰ ਵਿੱਚ ਕਰੀਅਰ ਹੁਣ ਖਤਮ ਹੋ ਚੁੱਕਾ ਹੈ। ਇਸ ਘਟਨਾ ਨੇ ਸੁਪਰਮਾਰਕੀਟਾਂ ਵਿੱਚ ਤਾਇਨਾਤ ਸੁਰੱਖਿਆ ਗਾਰਡਾਂ ਦੇ ਕੰਮਕਾਜ ਅਤੇ ਉਨ੍ਹਾਂ ਦੀ ਨਿਗਰਾਨੀ ਉੱਤੇ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.
