ਐਡੀਲੇਡ ‘ਚ ਮੰਦਭਾਗੀ ਘਟਨਾ: ਨੁਕਸਾਨੇ ਗਏ ਗੁਰੂ ਸਾਹਿਬ ਦੇ ਸਰੂਪਾਂ ਦਾ ਮਰਿਆਦਾ ਅਨੁਸਾਰ ਕੀਤਾ ਗਿਆ ਅੰਤਿਮ ਸੰਸਕਾਰ; ਜਾਂਚ ਰਿਪੋਰਟ ਸ੍ਰੀ ਅਕਾਲ ਤਖ਼ਤ ਸਾਹਿਬ ਭੇਜੀ

ਐਡੀਲੇਡ ਦੀ ਸਿੱਖ ਸੰਗਤ ਲਈ ਅੱਜ ਦਾ ਦਿਨ ਬਹੁਤ ਹੀ ਤਕਲੀਫ਼ ਅਤੇ ਦੁੱਖ ਭਰਿਆ ਰਿਹਾ। ਬੀਤੇ ਦਿਨੀਂ ਦਸ਼ਮੇਸ਼ ਦਰਬਾਰ, ਵਰਜੀਨੀਆ (ਐਡੀਲੇਡ) ਵਿਖੇ ਵਾਪਰੀ ਦਰਦਨਾਕ ਦੁਰਘਟਨਾ ਵਿੱਚ ਨੁਕਸਾਨੇ ਗਏ ਗੁਰੂ ਸਾਹਿਬ ਦੇ 4 ਸਰੂਪਾਂ, 12 ਪੋਥੀ ਸਾਹਿਬਾਨ, 70 ਦੇ ਕਰੀਬ ਗੁਟਕਾ ਸਾਹਿਬਾਨ, ਹੋਰ ਧਾਰਮਿਕ ਸਮੱਗਰੀ ਅਤੇ ਸ਼ਸਤਰਾਂ ਦਾ ਅੱਜ ਪੂਰੀ ਰਹਿਤ ਮਰਿਆਦਾ ਅਨੁਸਾਰ ਅੰਗੀਠਾ ਤਿਆਰ ਕਰਕੇ ਅੰਤਿਮ ਸੰਸਕਾਰ ਕੀਤਾ ਗਿਆ। ਇਸ ਦੁਖਦਾਈ ਮੌਕੇ ਪਹੁੰਚੀ ਹਰ ਇੱਕ ਪ੍ਰਾਣੀ ਦੀ ਅੱਖ ਨਮ ਸੀ। ਸੰਗਤ ਵੱਲੋਂ ਅਕਾਲ ਪੁਰਖ ਅੱਗੇ ਅਰਦਾਸ ਕੀਤੀ ਗਈ ਕਿ ਅੱਗੇ ਤੋਂ ਅਜਿਹੇ ਦੁਖਦਾਈ ਦਿਨ ਦੇਖਣ ਨੂੰ ਨਾ ਮਿਲਣ।
ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ ਬਣਾਈ ਕਮੇਟੀ ਦੀ ਦੇਖ-ਰੇਖ ਹੇਠ ਹੋਈ ਕਾਰਵਾਈ
ਇਸ ਪੂਰੇ ਕਾਰਜ ਨੂੰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ ਸਥਾਪਿਤ ਜਾਂਚ ਕਮੇਟੀ ਦੀ ਦੇਖ-ਰੇਖ ਹੇਠ ਸੰਪੂਰਨ ਕੀਤਾ ਗਿਆ। ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੇ ਵਿਸ਼ੇਸ਼ ਤੌਰ ‘ਤੇ ਆਦੇਸ਼ ਦਿੱਤਾ ਹੈ ਕਿ ਇਹ ਸਪੈਸ਼ਲ ਪ੍ਰਵਾਨਗੀ ਸਿਰਫ਼ ਇੱਕ ਵਾਰ ਲਈ ਸੀ ਅਤੇ ਭਵਿੱਖ ਵਿੱਚ ਕੋਈ ਵੀ ਇਸ ਨੂੰ ਦੁਹਰਾਉਣ ਦਾ ਯਤਨ ਨਾ ਕਰੇ।
ਪੂਰੀ ਛਾਣਬੀਣ: ਜਾਂਚ ਕਮੇਟੀ ਨੇ ਰਾਤ-ਰਾਤ ਭਰ ਬੈਠ ਕੇ ਫਾਇਰ ਬ੍ਰਿਗੇਡ, ਪ੍ਰਬੰਧਕਾਂ, ਸੇਵਾਦਾਰਾਂ ਅਤੇ ਸੰਗਤਾਂ ਦੇ ਬਿਆਨ ਦਰਜ ਕੀਤੇ ਹਨ ਅਤੇ ਘਟਨਾ ਸਥਾਨ ਦਾ ਕਈ ਵਾਰ ਮੁਆਇਨਾ ਕਰਕੇ ਵਿਸਥਾਰਤ ਰਿਪੋਰਟ ਤਿਆਰ ਕੀਤੀ ਹੈ।
ਕੋਈ ਬਾਹਰੀ ਦਖ਼ਲ ਨਹੀਂ: ਜਾਂਚ ਮੁਤਾਬਕ ਅੱਗ ਲੱਗਣ ਦੀ ਇਸ ਘਟਨਾ ਵਿੱਚ ਕਿਸੇ ਵੀ ਬਾਹਰੀ ਦਖ਼ਲ ਦਾ ਸੰਕੇਤ ਨਹੀਂ ਮਿਲਿਆ ਹੈ। ਅੱਗ ਲੱਗਣ ਦੇ ਸੰਭਾਵਿਤ ਕਾਰਨਾਂ ਨੂੰ ਰਿਪੋਰਟ ਵਿੱਚ ਸ਼ਾਮਲ ਕਰ ਲਿਆ ਗਿਆ ਹੈ।
ਅਗਲੇਰੀ ਕਾਰਵਾਈ: ਰਿਪੋਰਟ ਅੱਜ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵਿਖੇ ਭੇਜ ਦਿੱਤੀ ਗਈ ਹੈ। ਹੁਣ ਅਗਲਾ ਫ਼ੈਸਲਾ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਹੱਥ ਹੈ।
ਐਤਵਾਰ ਨੂੰ ਸੰਗਤ ਲਈ ਜਾਰੀ ਹੋਵੇਗੀ ਰਿਪੋਰਟ: ਐਤਵਾਰ ਨੂੰ ਭੋਗ ਉਪਰੰਤ ਇਹ ਜਾਂਚ ਰਿਪੋਰਟ ਸੰਗਤ ਦੇ ਸਾਹਮਣੇ ਪੜ੍ਹ ਕੇ ਸੁਣਾਈ ਜਾਵੇਗੀ।
ਕਮੇਟੀ ਵੱਲੋਂ ਸੰਗਤ ਨੂੰ ਆਪਸੀ ਪਿਆਰ ਅਤੇ ਸਤਿਕਾਰ ਬਣਾਈ ਰੱਖਣ ਦੀ ਬੇਨਤੀ ਕੀਤੀ ਗਈ ਹੈ। ਇਸ ਸੰਕਟ ਦੀ ਘੜੀ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਸਿਆਸਤ ਨਾ ਕਰਨ ਦੀ ਅਪੀਲ ਦਾ ਸੰਗਤ ‘ਤੇ ਚੰਗਾ ਅਸਰ ਦੇਖਣ ਨੂੰ ਮਿਲਿਆ।
ਦਲਜੀਤ ਸਿੰਘ (ਨਿਊਜ਼ੀਲੈਂਡ), ਮਨਦੀਪ ਸਿੰਘ (ਪਰਥ), ਰਵੀਇੰਦਰ ਸਿੰਘ (ਮੈਲਬੌਰਨ), ਪ੍ਰੀਤਮ ਸਿੰਘ (ਮੈਲਬੌਰਨ), ਕਰਮਜੀਤ ਸਿੰਘ (ਨਿਊਜ਼ੀਲੈਂਡ), ਗੁਰਿੰਦਰਜੀਤ ਸਿੰਘ (ਐਡੀਲੇਡ), ਅਤੇ ਜਗਦੀਪ ਸਿੰਘ (ਮੈਲਬੌਰਨ)।