ਯਮਨ ਜੇਲ੍ਹ ਵਿੱਚ ਮੌਤ ਦੀ ਸਜ਼ਾ ਕੱਟ ਰਹੀ ਕੇਰਲ ਦੀ ਨਰਸ ਨਿਮਿਸ਼ਾ ਪ੍ਰਿਆ ਦੀ ਫਾਂਸੀ ਨੂੰ ਗਿਆ ਟਾਲਿਆ

ਯਮਨ ਜੇਲ੍ਹ ਵਿੱਚ ਮੌਤ ਦੀ ਸਜ਼ਾ ਕੱਟ ਰਹੀ ਕੇਰਲ ਦੀ ਨਰਸ ਨਿਮਿਸ਼ਾ ਪ੍ਰਿਆ ਦੀ ਫਾਂਸੀ ਨੂੰ ਟਾਲ ਦਿੱਤਾ ਗਿਆ ਹੈ। 37 ਸਾਲਾ ਨਿਮਿਸ਼ਾ ਨੂੰ 16 ਜੁਲਾਈ 2025 ਨੂੰ ਫਾਂਸੀ ਦਿੱਤੀ ਜਾਣੀ ਸੀ, ਪਰ ਆਖਰੀ ਸਮੇਂ ‘ਤੇ ਭਾਰਤ ਸਰਕਾਰ, ਸਮਾਜ ਸੇਵਕਾਂ ਅਤੇ ਉਸਦੇ ਪਰਿਵਾਰ ਦੇ ਯਤਨਾਂ ਕਾਰਨ ਇਹ ਸਜ਼ਾ ਟਾਲ ਦਿੱਤੀ ਗਈ ਹੈ।

ਨਿਮਿਸ਼ਾ ‘ਤੇ 2017 ਵਿੱਚ ਆਪਣੇ ਯਮਨੀ ਕਾਰੋਬਾਰੀ ਸਾਥੀ ਤਲਾਲ ਅਬਦੋ ਮੇਹਦੀ ਦੀ ਹੱਤਿਆ ਦਾ ਦੋਸ਼ ਹੈ। ਇਸ ਘਟਨਾ ਤੋਂ ਬਾਅਦ, ਉਹ ਸਨਾ ਦੀ ਜੇਲ੍ਹ ਵਿੱਚ ਕੈਦ ਹੈ। ਭਾਰਤ ਸਰਕਾਰ ਨੇ ਯਮਨ ਦੇ ਅਧਿਕਾਰੀਆਂ ਅਤੇ ਜੇਲ੍ਹ ਪ੍ਰਸ਼ਾਸਨ ਨਾਲ ਲਗਾਤਾਰ ਗੱਲ ਕਰਕੇ ਇਸ ਫਾਂਸੀ ਨੂੰ ਰੋਕ ਦਿੱਤਾ ਹੈ। ਫਿਲਹਾਲ, ਨਿਮਿਸ਼ਾ ਦੇ ਪਰਿਵਾਰ ਨੂੰ ਇਸ ਗੱਲ ਤੋਂ ਰਾਹਤ ਮਿਲੀ ਹੈ ਕਿ ਫਾਂਸੀ ਟਾਲ ਦਿੱਤੀ ਗਈ ਹੈ, ਪਰ ਉਸਦੀ ਰਿਹਾਈ ਤਲਾਲ ਦੇ ਪਰਿਵਾਰ ਦੀ ਮਨਜ਼ੂਰੀ ਅਤੇ ਬਲੱਡ ਮਨੀ ਦੀ ਰਕਮ ‘ਤੇ ਨਿਰਭਰ ਕਰਦੀ ਹੈ। ਭਾਰਤ ਸਰਕਾਰ ਈਰਾਨ ਰਾਹੀਂ ਹੂਤੀ ਬਾਗੀਆਂ ਨਾਲ ਵੀ ਸੰਪਰਕ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ, ਕਿਉਂਕਿ ਉਨ੍ਹਾਂ ਦਾ ਸਨਾ ‘ਤੇ ਕੰਟਰੋਲ ਹੈ। ਇਸ ਦੌਰਾਨ, ਸੁਪਰੀਮ ਕੋਰਟ ਵਿੱਚ ਅਗਲੀ ਸੁਣਵਾਈ 18 ਜੁਲਾਈ ਨੂੰ ਹੋਵੇਗੀ, ਜਿੱਥੇ ਨਵੇਂ ਅਪਡੇਟਸ ਸਾਹਮਣੇ ਆਉਣਗੇ। ਨਿਮਿਸ਼ਾ ਦੀ ਜ਼ਿੰਦਗੀ ਹੁਣ ਮੁਆਫ਼ੀ ਅਤੇ ਕੂਟਨੀਤਕ ਯਤਨਾਂ ‘ਤੇ ਨਿਰਭਰ ਕਰਦੀ ਹੈ। ਮੀਡੀਆ ਰਿਪੋਰਟਾਂ ਅਨੁਸਾਰ, ਯਮਨ ਦੇ ਸ਼ਰੀਆ ਕਾਨੂੰਨ ਵਿੱਚ ‘ਬਲੱਡ ਮਨੀ’ (ਦੀਆ) ਦਾ ਨਿਯਮ ਹੈ, ਜਿਸ ਦੇ ਤਹਿਤ ਪੀੜਤ ਪਰਿਵਾਰ ਮੁਆਵਜ਼ਾ ਲੈ ਕੇ ਦੋਸ਼ੀ ਨੂੰ ਮਾਫ਼ ਕਰ ਸਕਦਾ ਹੈ। ਨਿਮਿਸ਼ਾ ਦਾ ਪਰਿਵਾਰ ਅਤੇ ‘ਸੇਵ ਨਿਮਿਸ਼ਾ ਪ੍ਰਿਆ ਇੰਟਰਨੈਸ਼ਨਲ ਐਕਸ਼ਨ ਕੌਂਸਲ’ ਤਲਾਲ ਦੇ ਪਰਿਵਾਰ ਨਾਲ ਗੱਲ ਕਰ ਰਹੇ ਹਨ। ਭਾਰਤ ਸਰਕਾਰ ਨੇ ਯਮਨ ਦੇ ਅਧਿਕਾਰੀਆਂ ਅਤੇ ਪ੍ਰਭਾਵਸ਼ਾਲੀ ਲੋਕਾਂ ਨਾਲ ਵੀ ਸੰਪਰਕ ਕੀਤਾ ਹੈ। 14 ਜੁਲਾਈ ਨੂੰ ਸੁਪਰੀਮ ਕੋਰਟ ਵਿੱਚ ਸੁਣਵਾਈ ਦੌਰਾਨ, ਸਰਕਾਰ ਨੇ ਕਿਹਾ ਕਿ ਉਹ ਹਰ ਸੰਭਵ ਕੋਸ਼ਿਸ਼ ਕਰ ਰਹੀ ਹੈ। ਕੇਰਲ ਦੇ ਸੁੰਨੀ ਨੇਤਾ ਕਾਂਥਾਪੁਰਮ ਏ.ਪੀ. ਅਬੂਬਕਰ ਮੁਸਲੀਅਰ ਨੇ ਤਲਾਲ ਦੇ ਭਰਾ ਨਾਲ ਗੱਲ ਕੀਤੀ, ਜਿਸ ਤੋਂ ਬਾਅਦ ਮੁਆਫ਼ੀ ਦੀ ਉਮੀਦ ਵਧ ਗਈ ਹੈ। ਸਮਾਜਿਕ ਕਾਰਕੁਨ ਸੈਮੂਅਲ ਜੇਰੋਮ ਨੇ ਕਿਹਾ ਕਿ ਤਲਾਲ ਦਾ ਪਰਿਵਾਰ ਮੁਆਵਜ਼ੇ ‘ਤੇ ਵਿਚਾਰ ਕਰ ਰਿਹਾ ਹੈ, ਜਿਸ ਕਾਰਨ ਫਾਂਸੀ ਨੂੰ ਮੁਲਤਵੀ ਕਰ ਦਿੱਤਾ ਗਿਆ ਹੈ।