18 ਹਜ਼ਾਰ ਲੋਕ ਹੋਣਗੇ ਡਿਪੋਰਟ :- ਟਰੰਪ

ਟਰੰਪ ਨੇ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਗੈਰ ਕਾਨੂੰਨੀ ਤਰੀਕੇ ਨਾਲ ਅਮਰੀਕਾ ਵਿੱਚ ਆਏ ਲੋਕਾਂ ਨੂੰ ਦੇਸ਼ ਵਿੱਚੋਂ ਕੱਢਣਾ ਸ਼ੁਰੂ ਕਰ ਦਿੱਤਾ ਹੈ। ਅਮਰੀਕੀ ਫੌਜ ਇਸ ਦੇ ਲਈ ਸਪੈਸ਼ਲ ਅਭਿਆਨ ਚਲਾ ਰਹੀ ਹੈ। ਰਿਪੋਰਟਾਂ ਅਨੁਸਾਰ, ਕੁੱਲ 18,000 ਗੈਰ-ਕਾਨੂੰਨੀ ਭਾਰਤੀ ਪ੍ਰਵਾਸੀਆਂ ਨੂੰ ਦੇਸ਼ ਨਿਕਾਲਾ ਦਿੱਤਾ ਜਾਵੇਗਾ। ਹਾਲਾਂਕਿ ਫਿਲਹਾਲ 205 ਨੂੰ ਡਿਪੋਰਟ ਕੀਤਾ ਗਿਆ ਹੈ।

ਟਰੰਪ ਸਰਕਾਰ ਨੇ ਅਮਰੀਕਾ ਤੋਂ ਗੈਰ-ਕਾਨੂੰਨੀ ਭਾਰਤੀਆਂ ਦੇ ਪਹਿਲੇ ਗਰੁੱਪ ਨੂੰ ਦੇਸ਼ ਨਿਕਾਲਾ ਦਿੱਤਾ ਹੈ। ਅੱਜ 104 ਭਾਰਤੀ ਅਮਰੀਕਾ ਤੋਂ ਅੰਮ੍ਰਿਤਸਰ ਦੇ ਸ੍ਰੀ ਗੁਰੂ ਰਾਮਦਾਸ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਪਹੁੰਚਣਗੇ। ਵਾਪਸ ਆਉਣ ਵਾਲਿਆਂ ਵਿੱਚ 33 ਲੋਕ ਗੁਜਰਾਤ ਤੋਂ, 30 ਲੋਕ ਪੰਜਾਬ ਤੋਂ, 3 ਲੋਕ ਯੂਪੀ ਤੋਂ, 33 ਲੋਕ ਹਰਿਆਣਾ ਤੋਂ, 2 ਲੋਕ ਛੱਤੀਸਗੜ੍ਹ ਤੋਂ, 3 ਲੋਕ ਮਹਾਰਾਸ਼ਟਰ ਤੋਂ ਹਨ। ਪਿਛਲੇ ਸਾਲ, ਬਾਈਡੇਨ ਸਰਕਾਰ ਨੇ 1,100 ਗੈਰ-ਕਾਨੂੰਨੀ ਪ੍ਰਵਾਸੀਆਂ ਨੂੰ ਇੱਕ ਚਾਰਟਰਡ ਉਡਾਣ ਰਾਹੀਂ ਭਾਰਤ ਡਿਪੋਰਟ ਕੀਤਾ ਸੀ।

ਜਿਨ੍ਹਾਂ ਨੂੰ ਅਮਰੀਕਾ ਸਰਕਾਰ ਨੇ ਡਿਪੋਰਟ ਕੀਤਾ ਹੈ ਉਹਨਾਂ ਵਿੱਚ 12 ਬੱਚੇ ਅਜਿਹੇ ਹਨ ਜ਼ਿਨ੍ਹਾਂ ਦੀ ਉਮਰ 18 ਸਾਲ ਤੋਂ ਘੱਟ ਹੈ ਭਾਵ ਉਹ ਨਾਬਾਲਿਗ ਹਨ। ਇਸ ਤੋਂ ਇਲਾਵਾ 24 ਮਹਿਲਾਵਾਂ ਨੂੰ ਵੀ ਡਿਪੋਰਟ ਕੀਤਾ ਗਿਆ ਹੈ। ਸਭ ਤੋਂ ਪਹਿਲਾਂ, ਅਮਰੀਕਾ ਤੋਂ ਵਾਪਸ ਆਉਣ ਵਾਲੇ ਭਾਰਤੀਆਂ ਦੇ ਦਸਤਾਵੇਜ਼ਾਂ ਦੀ ਜਾਂਚ ਕੀਤੀ ਜਾਵੇਗੀ ਅਤੇ ਇਮੀਗ੍ਰੇਸ਼ਨ ਤੋਂ ਬਾਅਦ, ਸੁਰੱਖਿਆ ਏਜੰਸੀਆਂ ਦੁਆਰਾ ਉਨ੍ਹਾਂ ਤੋਂ ਵਿਅਕਤੀਗਤ ਤੌਰ ‘ਤੇ ਪੂਰੀ ਤਰ੍ਹਾਂ ਪੁੱਛਗਿੱਛ ਕੀਤੀ ਜਾਵੇਗੀ ਕਿ ਉਹ ਅਮਰੀਕਾ ਕਦੋਂ ਗਏ ਸਨ, ਉਨ੍ਹਾਂ ਨੇ ਕਿਹੜਾ ਰਸਤਾ ਅਪਣਾਇਆ ਸੀ, ਉਹ ਕਿਸ ਰਾਹੀਂ ਗਏ ਸਨ, ਉਨ੍ਹਾਂ ਨੇ ਕਿੰਨੇ ਪੈਸੇ ਦਿੱਤੇ ਸਨ ਅਤੇ ਉਹ ਉੱਥੇ ਕਿੰਨੇ ਸਮੇਂ ਤੋਂ ਰਹੇ ਸਨ।