ਸਾਬਕਾ ਖੇਡ ਮੰਤਰੀ ਖ਼ਿਲਾਫ਼ ਕੇਸ ਲੜ ਰਹੀ ਮਹਿਲਾ ਐਥਲੀਟ ਨੂੰ ਮਿਲੀ ਸੁਰੱਖਿਆ, ਪੇਸ਼ੀ ਦੌਰਾਨ ਨਾਲ ਰਹੇਗੀ ਮਹਿਲਾ ਪੁਲਿਸ

ਹਰਿਆਣਾ ਦੇ ਸਾਬਕਾ ਖੇਡ ਮੰਤਰੀ ਸੰਦੀਪ ਸਿੰਘ ਵਿਰੁੱਧ ਛੇੜਛਾੜ ਦਾ ਕੇਸ ਲੜ ਰਹੀ ਮਹਿਲਾ ਐਥਲੀਟ ਨੂੰ ਚੰਡੀਗੜ੍ਹ ਅਦਾਲਤ ’ਚ ਪੇਸ਼ੀ ਦੌਰਾਨ ਮਹਿਲਾ ਕਾਂਸਟੇਬਲ ਦੀ ਸੁਰੱਖਿਆ ਮਿਲ ਗਈ ਹੈ।ਐਥਲੀਟ ਨੇ ਕਈ ਮਹੀਨਿਆਂ ਤੋਂ ਧਮਕੀਆਂ ਮਿਲਣ, ਸੁਣਵਾਈ ਵਾਲੇ ਦਿਨ ਪਿੱਛਾ ਕਰਨ ਅਤੇ ਹੱਥੋਪਾਈ ਹੋਣ ਦਾ ਸ਼ੱਕ ਪ੍ਰਗਟਾਉਂਦਿਆਂ ਸੁਰੱਖਿਆ ਦੀ ਮੰਗ ਕੀਤੀ ਸੀ। ਉਸ ਨੇ ਪਹਿਲਾਂ ਆਪਣੀ ਕਾਰ ਦੇ ਸ਼ੀਸ਼ੇ ਤੋੜੇ ਜਾਣ ਦਾ ਦੋਸ਼ ਵੀ ਲਾਇਆ ਸੀ।
ਮਹਿਲਾ ਐਥਲੀਟ ਨੇ ਸੁਰੱਖਿਆ ਲਈ ਡੀਜੀਪੀ, ਏਡੀਜੀਪੀ (ਸੀਆਈਡੀ), ਚੰਡੀਗੜ੍ਹ ਦੇ ਮੁੱਖ ਜੁਡੀਸ਼ੀਅਲ ਮਜਿਸਟਰੇਟ ਅਤੇ ਪੰਚਕੂਲਾ ਦੇ ਡੀਸੀਪੀ ਨੂੰ ਸ਼ਿਕਾਇਤ ਦਿੱਤੀ ਸੀ। ਉਸ ਨੇ ਮੁੱਖ ਮੰਤਰੀ ਨੂੰ ਪੱਤਰ ਲਿਖਣ ਦੇ ਨਾਲ-ਨਾਲ ਸੋਸ਼ਲ ਮੀਡੀਆ ‘ਤੇ ਵੀਡੀਓ ਵੀ ਸਾਂਝੀ ਕੀਤੀ ਸੀ।
ਅੱਠ ਅਗਸਤ ਨੂੰ ਪੰਚਕੂਲਾ ਦੇ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਸੰਜੇ ਸੰਧੀਰ ਨੂੰ ਈਮੇਲ ਨਾਲ ਵੀਡੀਓ ਭੇਜ ਕੇ ਸੁਰੱਖਿਆ ਮੰਗੀ ਗਈ ਸੀ। ਇਸ ਤੋਂ ਪਹਿਲਾਂ 2 ਜੁਲਾਈ ਨੂੰ ਪੰਚਕੂਲਾ ਸਥਿਤ ਰਿਹਾਇਸ਼ ਤੋਂ ਚੰਡੀਗੜ੍ਹ ਅਦਾਲਤ ਤੱਕ ਪੁਲਿਸ ਐਸਕਾਰਟ ਮੁਹੱਈਆ ਕਰਵਾਉਣ ਦਾ ਹੁਕਮ ਹੋਇਆ ਸੀ।
24 ਜੁਲਾਈ ਨੂੰ ਡੀਸੀਪੀ ਤੋਂ ਥ੍ਰੇਟ ਅਸੈੱਸਮੈਂਟ ਰਿਪੋਰਟ ਮੰਗੀ ਗਈ ਸੀ ਪਰ 31 ਜੁਲਾਈ ਨੂੰ ਪੁਲਿਸ ਵੱਲੋਂ ਫ਼ੋਨ ਨਾ ਚੁੱਕਣ ਦੀ ਗੱਲ ਕਹੀ ਗਈ ਸੀ।