ਯੂਰਪੀਅਨ ਸੰਸਦ ਨੇ ਯੂਕਰੇਨ ‘ਤੇ ਹਮਲਿਆਂ ਦਾ ਹਵਾਲਾ ਦਿੰਦੇ ਹੋਏ ਰੂਸ ਨੂੰ ‘ਅੱਤਵਾਦ ਸਪਾਂਸਰ ਕਰਨ ਵਾਲਾ ਦੇਸ਼’ ਕੀਤਾ ਘੋਸ਼ਿਤ

ਯੂਰਪੀਅਨ ਸੰਸਦ (ਈਯੂ) ਨੇ ਰੂਸ ਨੂੰ ‘ਅੱਤਵਾਦ ਦਾ ਰਾਜ ਸਪਾਂਸਰ’ ਘੋਸ਼ਿਤ ਕੀਤਾ ਹੈ। ਇਹ ਖਬਰ ਅੰਤਰਰਾਸ਼ਟਰੀ ਮੀਡੀਆ ਦੀਆਂ ਰਿਪੋਰਟਾਂ ਦੇ ਹਵਾਲੇ ਨਾਲ ਸਾਹਮਣੇ ਆ ਰਹੀ ਹੈ। ਈਯੂ ਨੇ ਦਲੀਲ ਦਿੱਤੀ ਕਿ ਮਾਸਕੋ ਦੇ ਫੌਜੀ ਹਮਲਿਆਂ ਨੇ ਨਾਗਰਿਕ ਟੀਚਿਆਂ ਜਿਵੇਂ ਕਿ ਊਰਜਾ ਬੁਨਿਆਦੀ ਢਾਂਚੇ, ਹਸਪਤਾਲਾਂ, ਸਕੂਲਾਂ ਅਤੇ ਸ਼ੈਲਟਰਾਂ ‘ਤੇ ਅੰਤਰਰਾਸ਼ਟਰੀ ਕਾਨੂੰਨ ਦੀ ਉਲੰਘਣਾ ਕੀਤੀ ਹੈ। ਇਸ ਨੇ ਯੂਕਰੇਨ ‘ਤੇ ਹਮਲਿਆਂ ਨੂੰ ਬੇਰਹਿਮ ਅਤੇ ਅਣਮਨੁੱਖੀ ਕਾਰਵਾਈ ਕਰਾਰ ਦਿੱਤਾ ਹੈ।ਯੂਰਪੀ ਸੰਸਦ ਦੇ ਮੈਂਬਰਾਂ ਨੇ ਕਿਹਾ ਕਿ ਰੂਸ ਨੇ ਜਾਣਬੁੱਝ ਕੇ ਯੂਕਰੇਨ ਦੀ ਨਾਗਰਿਕ ਆਬਾਦੀ ‘ਤੇ ਹਮਲੇ ਅਤੇ ਅੱਤਿਆਚਾਰ ਕੀਤੇ ਹਨ। ਮੈਂਬਰਾਂ ਨੇ ਕਿਹਾ ਕਿ ਮਾਸਕੋ ਨੇ ਨਾਗਰਿਕ ਬੁਨਿਆਦੀ ਢਾਂਚੇ ਨੂੰ ਤਬਾਹ ਕਰਨ, ਮਨੁੱਖੀ ਅਧਿਕਾਰਾਂ ਦੀ ਗੰਭੀਰ ਉਲੰਘਣਾ ਅਤੇ ਅੰਤਰਰਾਸ਼ਟਰੀ ਮਾਨਵਤਾਵਾਦੀ ਕਾਨੂੰਨ ਦੇ ਵਿਰੁੱਧ ਜੰਗੀ ਅਪਰਾਧਾਂ ਨੂੰ ਅੰਜਾਮ ਦਿੱਤਾ ਹੈ, ਜੋ ਕਿ ਅੱਤਵਾਦ ਦੀ ਕਾਰਵਾਈ ਹੈ।ਬੁੱਧਵਾਰ ਦੁਪਹਿਰ ਨੂੰ ਸਟ੍ਰਾਸਬਰਗ (ਫਰਾਂਸ) ਵਿੱਚ ਮਹੀਨਾਵਾਰ ਪਲੈਨਰੀ ਸੈਸ਼ਨ ਦੌਰਾਨ ਮਤੇ ਦੇ ਹੱਕ ਵਿੱਚ 494 ਵੋਟਾਂ ਪਈਆਂ। ਜਦਕਿ 58 ਮੈਂਬਰਾਂ ਨੇ ਇਸ ਪ੍ਰਸਤਾਵ ਦੇ ਵਿਰੋਧ ਵਿਚ ਵੋਟ ਕੀਤਾ।ਦੂਜੇ ਪਾਸੇ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਨਸਕੀ ਨੇ ਟਵੀਟ ਕਰਕੇ ਇਸ ਫੈਸਲੇ ਦਾ ਸਵਾਗਤ ਕੀਤਾ ਹੈ। ਉਨ੍ਹਾਂ ਨੇ ਆਪਣੇ ਟਵੀਟ ‘ਚ ਲਿਖਿਆ- ਮੈਂ ਰੂਸ ਨੂੰ ਅੱਤਵਾਦ ਦਾ ਪ੍ਰਾਯੋਜਕ ਦੇਸ਼ ਘੋਸ਼ਿਤ ਕਰਨ ਦੇ ਯੂਰਪੀ ਸੰਸਦ ਦੇ ਫੈਸਲੇ ਦਾ ਸਵਾਗਤ ਕਰਦਾ ਹਾਂ। ਰੂਸ ਨੂੰ ਹਰ ਪੱਧਰ ‘ਤੇ ਅਲੱਗ-ਥਲੱਗ ਕੀਤਾ ਜਾਣਾ ਚਾਹੀਦਾ ਹੈ ਅਤੇ ਯੂਕਰੇਨ ਅਤੇ ਦੁਨੀਆ ਭਰ ਵਿੱਚ ਅੱਤਵਾਦ ਲਈ ਜਵਾਬਦੇਹ ਹੋਣਾ ਚਾਹੀਦਾ ਹੈ।