ਕੋਚ ਨੇ ਐਥਲੀਟ ਨਾਲ ਜ਼ਬਰਦਸਤੀ ਕਰਨ ਦੀ ਕੀਤੀ ਕੋਸ਼ਿਸ਼

ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ‘ਚ ਖੇਡ ਕੋਟੇ ਤਹਿਤ ਪੜ੍ਹ ਰਹੀ ਇਕ ਐਥਲੀਟ ਨਾਲ ਜ਼ਬਰਦਸਤੀ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ। ਪੀੜਤ ਲੁਧਿਆਣਾ ਦੀ ਰਹਿਣ ਵਾਲੀ ਹੈ। ਕੋਚ ਨੇ ਨੈਸ਼ਨਲ ਲੈਵਲ ਟੂਰਨਾਮੈਂਟ ਦੇ ਟਰਾਇਲ ਦੇ ਬਹਾਨੇ ਉਸਨੂੰ ਸੋਲਨ ਲੈ ਜਾ ਕੇ ਇਕ ਹੋਟਲ ਵਿੱਚ ਰੁਕਵਾਇਆ, ਜਿੱਥੇ ਉਸਨੇ ਖੁਦ ਸ਼ਰਾਬ ਪੀਤੀ ਅਤੇ ਖਿਡਾਰੀ ਨੂੰ ਵੀ ਸ਼ਰਾਬ ਪਿਆ ਕੇ ਜ਼ਬਰਦਸਤੀ ਕਰਨ ਦੀ ਕੋਸ਼ਿਸ਼ ਕੀਤੀ। ਜਦੋਂ ਐਥਲੀਟ ਨੇ ਖ਼ਤਰੇ ਦਾ ਅਹਿਸਾਸ ਕੀਤਾ, ਤਾਂ ਉਹ ਹੋਟਲ ਦੀ ਖਿੜਕੀ ਤੋਂ ਛਾਲ ਮਾਕੇ ਕੇ ਭੱਜ ਗਈ ਅਤੇ ਖਰੜ ਪੁੱਜ ਕੇ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ। ਖਰੜ ਪੁਲਿਸ ਅਨੁਸਾਰ ਉਨ੍ਹਾਂ ਪੀੜਤ ਦੀ ਸ਼ਿਕਾਇਤ ‘ਤੇ ਜ਼ੀਰੋ ਐੱਫਆਈਆਰ ਦਰਜ ਕਰਕੇ ਮਾਮਲੇ ਨੂੰ ਸੋਲਨ ਪੁਲਿਸ ਨੂੰ ਭੇਜ ਦਿੱਤਾ ਹੈ। ਜਾਣਕਾਰੀ ਮੁਤਾਬਕ ਕੋਚ ਗੁਰਦੇਵ ਸਿੰਘ ਹਾਲੇ ਵੀ ਫ਼ਰਾਰ ਹੈ, ਜਿਸ ਦੀ ਤਲਾਸ਼ ਜਾਰੀ ਹੈ।ਪੰਜਾਬੀ

ਪੀੜਤ ਖਿਡਾਰੀ ਨੇ ਦੱਸਿਆ ਕਿ ਕੋਚ ਗੁਰਦੇਵ ਸਿੰਘ ਇਕ ਰਿਟਾਇਰਡ ਸਰਕਾਰੀ ਅਧਿਕਾਰੀ ਹੈ, ਜੋ ਹੁਣ ਯੂਨੀਵਰਸਿਟੀ ਵਿੱਚ ਖੇਡ ਕੋਟੇ ਤਹਿਤ ਕੋਚ ਵਜੋਂ ਕੰਮ ਕਰ ਰਿਹਾ ਹੈ। ਉਹ ਲੜਕੀਆਂ ਨੂੰ ਸਰਕਾਰੀ ਨੌਕਰੀ ਲਗਵਾਉਣ ਦਾ ਝਾਂਸਾ ਦਿੰਦਾ ਹੈ। ਉਸਦੇ ਪਹਿਲਾਂ ਵੀ ਕੁਝ ਖਿਡਾਰੀਆਂ ਨਾਲ ਗ਼ਲਤ ਕਾਰਵਾਈਆਂ ਕਰਨ ਦੇ ਦੋਸ਼ ਲੱਗੇ ਹਨ। ਸੋਲਨ ਹੋਟਲ ਵਿੱਚ ਵੀ ਉਹ ਇਕ ਔਰਤ ਨੂੰ ਵੀਡੀਓ ਕਾਲ ਕਰਕੇ ਪੀੜਤ ਦੀ ਤਸਵੀਰ ਦਿਖਾ ਰਿਹਾ ਸੀ, ਜਿਸ ਕਾਰਨ ਖਿਡਾਰੀ ਨੂੰ ਸ਼ੱਕ ਹੋ ਗਿਆ ਅਤੇ ਉਹ ਹੋਟਲ ਤੋਂ ਭੱਜ ਗਈ।ਪੀੜਤ ਨੇ ਦੱਸਿਆ ਕਿ ਸ਼ਰਾਬ ਦੇ ਨਸ਼ੇ ਵਿੱਚ ਹੋਟਲ ਤੋਂ ਨਿਕਲਣ ਦੇ ਬਾਅਦ ਰਾਹ ਵਿਚ ਇਕ ਕਾਰ ਵਿੱਚ ਬੈਠੇ ਜੋੜੇ ਨੇ ਉਸਦੀ ਮਦਦ ਕੀਤੀ। ਉਨ੍ਹਾਂ ਨੇ ਉਸਨੂੰ ਕਾਲਕਾ ਬੱਸ ਸਟੈਂਡ ਛੱਡਿਆ ਅਤੇ 500 ਰੁਪਏ ਵੀ ਆਨਲਾਈਨ ਭੇਜੇ, ਜਿਸ ਨਾਲ ਉਹ ਚੰਡੀਗੜ੍ਹ ਦੇ 43 ਬੱਸ ਸਟੈਂਡ ਤਕ ਪੁੱਜੀ। ਜਿਥੋਂ ਉਸਨੇ ਲੁਧਿਆਣਾ ਲਈ ਬੱਸ ਲੈ ਲਈ। ਇਸ ਦੌਰਾਨ ਉਸਨੇ 112 ਹੈਲਪਲਾਈਨ ’ਤੇ ਕਾਲ ਕਰਕੇ ਮਦਦ ਮੰਗੀ, ਜਿਥੋਂ ਉਸਨੂੰ ਹੈਲ਼ਪਲਾਈਨ ਵਲੋਂ ਖਰੜ ਬੱਸ ਸਟੈਂਡ ’ਤੇ ਉਤਰਨ ਲਈ ਕਿਹਾ ਗਿਆ। ਖਰੜ ਬੱਸ ਸਟੈਂਡ ‘ਤੇ ਪੁੱਜ ਕੇ ਉਸਨੇ ਪੁਲਿਸ ਦੀ ਮਦਦ ਹਾਸਿਲ ਕੀਤੀ। ਸੋਲਨ ਪੁਲਿਸ ਹੁਣ ਇਸ ਮਾਮਲੇ ਦੀ ਅੱਗੇ ਜਾਂਚ ਕਰ ਰਹੀ ਹੈ।