ਕੈਲਗਰੀ ਦੇ ਜਬਰੀ ਵਸੂਲੀ ਮਾਮਲੇ ‘ਚ ਕਨੂਰੀਤ ਕੌਰ ਉੱਤੇ ਦੋਸ਼; ਤਨਵੀਰ ਸਿੰਘ ਦੀ ਭਾਲ ਜਾਰੀ

ਕੈਲਗਰੀ ਪੁਲਿਸ ਨੇ ਮਾਰਚ 2026 ਦੇ ਜਬਰੀ ਵਸੂਲੀ ਅਤੇ ਗੋਲੀਬਾਰੀ ਮਾਮਲੇ ਵਿਚ ਦੋ ਬਾਲਗਾਂ ਅਤੇ ਇੱਕ 17 ਸਾਲਾ ਨਾਬਾਲਗ ਖ਼ਿਲਾਫ਼ ਕਾਰਵਾਈ ਕੀਤੀ ਹੈ। ਪੁਲਿਸ ਨੇ 23 ਸਾਲਾ ਕਨੂਰੀਤ ਕੌਰ ਉੱਤੇ ਜਬਰੀ ਵਸੂਲੀ ਦਾ ਦੋਸ਼ ਲਾਇਆ ਹੈ, ਜਦਕਿ 21 ਸਾਲਾ ਤਨਵੀਰ ਸਿੰਘ ਦੀ ਭਾਲ ਜਾਰੀ ਹੈ।
ਪੁਲਿਸ ਅਨੁਸਾਰ 25 ਮਾਰਚ ਨੂੰ ਸ਼ਾਮ ਸਾਢੇ ਚਾਰ ਵਜੇ ਇੱਕ ਔਰਤ ਨੂੰ ਅਣਪਛਾਤੇ ਨੰਬਰ ਤੋਂ ਵਟਸਐਪ ਸੁਨੇਹੇ ਮਿਲਣੇ ਸ਼ੁਰੂ ਹੋਏ। ਭੇਜਣ ਵਾਲਿਆਂ ਨੇ ਉਸ ਤੋਂ ਪੈਸੇ ਮੰਗੇ। ਉਨ੍ਹਾਂ ਕੋਲ ਪੀੜਤ ਦਾ ਪੂਰਾ ਨਾਂ, ਘਰ ਦਾ ਪਤਾ, ਕਾਰੋਬਾਰ ਅਤੇ ਪਰਿਵਾਰ ਬਾਰੇ ਜਾਣਕਾਰੀ ਸੀ। ਕਾਲ ਕਰਨ ਵਾਲੇ ਨੇ ਹਿੰਸਾ ਦੀਆਂ ਸਪੱਸ਼ਟ ਧਮਕੀਆਂ ਵੀ ਦਿੱਤੀਆਂ।
ਕਰੀਬ 12 ਘੰਟਿਆਂ ਬਾਅਦ, ਸਵੇਰੇ ਸਾਢੇ ਚਾਰ ਵਜੇ ਤੋਂ ਪਹਿਲਾਂ, ਇੱਕ ਅਣਪਛਾਤੇ ਵਿਅਕਤੀ ਨੇ ਪੀੜਤ ਦੇ ਘਰ ਵੱਲ ਗੋਲੀਆਂ ਚਲਾਈਆਂ ਅਤੇ ਗੱਡੀ ਵਿਚ ਫਰਾਰ ਹੋ ਗਿਆ। ਜਾਂਚਕਾਰਾਂ ਨੇ ਨਿਗਰਾਨੀ ਕੈਮਰਿਆਂ ਦੀ ਰਿਕਾਰਡਿੰਗ ਅਤੇ ਹੋਰ ਸਬੂਤ ਇਕੱਠੇ ਕਰਕੇ ਇੱਕ ਸ਼ੱਕੀ ਗੱਡੀ ਤੇ ਕਈ ਸੰਭਾਵਿਤ ਵਿਅਕਤੀਆਂ ਦੀ ਪਛਾਣ ਕੀਤੀ।
29 ਜੁਲਾਈ ਨੂੰ 17 ਸਾਲਾ ਨੌਜਵਾਨ ਨੂੰ ਪੀੜਤ ਅਤੇ ਧਮਕੀਆਂ ਦੇਣ ਵਾਲਿਆਂ ਵਿਚਕਾਰ ਸੰਪਰਕ ਕਰਵਾਉਣ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ। ਉਸ ਉੱਤੇ ਜਬਰੀ ਵਸੂਲੀ ਦਾ ਦੋਸ਼ ਲੱਗਾ ਅਤੇ ਬਾਅਦ ਵਿਚ ਰਿਹਾਅ ਕਰ ਦਿੱਤਾ ਗਿਆ। ਨਾਬਾਲਗ ਹੋਣ ਕਰਕੇ ਉਸ ਦਾ ਨਾਂ ਜਾਰੀ ਨਹੀਂ ਹੋਇਆ।
ਪੁਲਿਸ ਨੇ 8 ਸਤੰਬਰ ਨੂੰ ਚੈਸਟਰਮੀਅਰ ਵਾਸੀ ਕਨੂਰੀਤ ਕੌਰ ਨੂੰ ਗ੍ਰਿਫ਼ਤਾਰ ਕੀਤਾ। ਦੋਸ਼ ਹੈ ਕਿ ਉਸ ਨੇ ਪੀੜਤ ਦੀ ਨਿੱਜੀ ਜਾਣਕਾਰੀ ਦਿੱਤੀ, ਜਿਸ ਨਾਲ ਮੁਲਜ਼ਮਾਂ ਨੂੰ ਪੀੜਤ ਅਤੇ ਉਸ ਦੇ ਪਰਿਵਾਰ ਨੂੰ ਲੱਭਣ ਤੇ ਡਰਾਉਣ ਵਿਚ ਮਦਦ ਮਿਲੀ। ਕੌਰ ਰਿਹਾਅ ਹੋ ਚੁੱਕੀ ਹੈ ਅਤੇ ਉਸ ਦੀ ਅਦਾਲਤੀ ਪੇਸ਼ੀ 6 ਅਕਤੂਬਰ ਨੂੰ ਹੋਵੇਗੀ।
ਕੈਲਗਰੀ ਵਾਸੀ ਤਨਵੀਰ ਸਿੰਘ ਖ਼ਿਲਾਫ਼ ਗੋਲੀਬਾਰੀ ਵਿਚ ਵਰਤੀ ਚੋਰੀ ਦੀ ਗੱਡੀ ਨਾਲ ਸਬੰਧਤ, ਪੰਜ ਹਜ਼ਾਰ ਡਾਲਰ ਤੋਂ ਵੱਧ ਮੁੱਲ ਦੀ ਚੋਰੀਸ਼ੁਦਾ ਜਾਇਦਾਦ ਰੱਖਣ ਦਾ ਵਾਰੰਟ ਹੈ। ਉਹ ਪੰਜ ਫੁੱਟ ਅੱਠ ਇੰਚ ਲੰਮਾ, ਕਰੀਬ 130 ਪੌਂਡ ਭਾਰ ਵਾਲਾ ਹੈ। ਉਸ ਦੇ ਵਾਲ ਕਾਲੇ ਅਤੇ ਅੱਖਾਂ ਭੂਰੀਆਂ ਹਨ।
ਅਪ੍ਰੈਲ 2025 ਤੋਂ ਕੈਲਗਰੀ ਵਿਚ ਜਬਰੀ ਵਸੂਲੀ ਦੀਆਂ 51 ਘਟਨਾਵਾਂ ਸਾਹਮਣੇ ਆਈਆਂ ਹਨ, ਜਿਨ੍ਹਾਂ ਵਿਚ 19 ਗੋਲੀਬਾਰੀਆਂ ਸ਼ਾਮਲ ਹਨ। ਹੁਣ ਤੱਕ 19 ਵਿਅਕਤੀਆਂ ਉੱਤੇ 59 ਦੋਸ਼ ਲੱਗੇ ਹਨ। ਪੁਲਿਸ ਨੇ ਪੀੜਤਾਂ ਨੂੰ ਪੈਸਾ ਨਾ ਦੇਣ ਅਤੇ ਤੁਰੰਤ ਸ਼ਿਕਾਇਤ ਕਰਨ ਲਈ ਕਿਹਾ ਹੈ। ਜਾਣਕਾਰੀ ਲਈ 403-266-1234 ਜਾਂ ਕ੍ਰਾਈਮ ਸਟਾਪਰਜ਼ ਨਾਲ ਗੁਪਤ ਸੰਪਰਕ ਕੀਤਾ ਜਾ ਸਕਦਾ ਹੈ। ਸਾਰੇ ਦੋਸ਼ ਅਜੇ ਅਦਾਲਤ ਵਿਚ ਸਾਬਤ ਹੋਣੇ ਬਾਕੀ ਹਨ।