ਮਾਈਕ੍ਰੋਸਾਫਟ ਦੀਆਂ ਈਮੇਲ ਸੇਵਾਵਾਂ ਠੱਪ, ਆਊਟਲੁੱਕ ਤੇ ਮਾਈਕ੍ਰੋਸਾਫਟ 365 ਨੇ ਦੁਨੀਆ ਭਰ ਦੇ ਕਰੋੜਾਂ ਯੂਜ਼ਰਾਂ ਨੂੰ ਪਾਇਆ ਮੁਸ਼ਕਲਾਂ ’ਚ
ਦੁਨੀਆ ਦੀ ਪ੍ਰਮੁੱਖ ਸਾਫਟਵੇਅਰ ਕੰਪਨੀ ਮਾਈਕ੍ਰੋਸਾਫਟ ਦੀਆਂ ਈਮੇਲ ਸੇਵਾਵਾਂ ਵਿੱਚ ਆਈ ਅਚਾਨਕ ਤਕਨੀਕੀ ਖਰਾਬੀ ਕਾਰਨ ਦੁਨੀਆ ਭਰ ਵਿੱਚ ਹੜਕੰਪ ਮਚ ਗਿਆ। ਵੀਰਵਾਰ ਦੇਰ ਰਾਤ ਤੋਂ ਆਊਟਲੁੱਕ (Outlook) ਅਤੇ ਮਾਈਕ੍ਰੋਸਾਫਟ 365 (Microsoft 365) ਦੀਆਂ ਸੇਵਾਵਾਂ ਪ੍ਰਭਾਵਿਤ ਹੋਣ ਕਾਰਨ ਭਾਰਤ ਸਮੇਤ ਕਈ ਦੇਸ਼ਾਂ ਦੇ ਕਰੋੜਾਂ ਯੂਜ਼ਰਾਂ ਨੂੰ ਭਾਰੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ। ਇਸ ਦਾ ਅਸਰ ਆਮ ਯੂਜ਼ਰਾਂ ਤੋਂ ਲੈ ਕੇ ਵੱਡੀਆਂ ਕੰਪਨੀਆਂ ਅਤੇ ਦਫ਼ਤਰੀ ਕੰਮਕਾਜ ’ਤੇ ਵੀ ਦੇਖਣ ਨੂੰ ਮਿਲਿਆ।ਜਾਣਕਾਰੀ ਅਨੁਸਾਰ, ਸਰਵਰ ਵਿੱਚ ਖਰਾਬੀ ਆਉਣ ਕਾਰਨ ਬਹੁਤ ਸਾਰੇ ਲੋਕ ਆਪਣੇ ਈਮੇਲ ਅਕਾਊਂਟ ਖੋਲ੍ਹਣ ਵਿੱਚ ਅਸਮਰੱਥ ਰਹੇ। ਕਈ ਯੂਜ਼ਰਾਂ ਨੂੰ ਇਨਬਾਕਸ ਤੱਕ ਪਹੁੰਚ ਨਹੀਂ ਮਿਲੀ, ਜਦਕਿ ਨਵੇਂ ਈਮੇਲ ਭੇਜਣ ਅਤੇ ਪ੍ਰਾਪਤ ਕਰਨ ਦੀ ਸਹੂਲਤ ਵੀ ਪ੍ਰਭਾਵਿਤ ਹੋਈ। ਇਸ ਕਾਰਨ ਕਈ ਜ਼ਰੂਰੀ ਦਸਤਾਵੇਜ਼, ਕਾਰੋਬਾਰੀ ਸੁਨੇਹੇ ਅਤੇ ਦਫ਼ਤਰੀ ਸੰਚਾਰ ਰੁਕ ਗਏ। ਜਿਹੜੀਆਂ ਕੰਪਨੀਆਂ ਆਪਣੇ ਰੋਜ਼ਾਨਾ ਕੰਮਕਾਜ ਲਈ ਮਾਈਕ੍ਰੋਸਾਫਟ ਦੀਆਂ ਸੇਵਾਵਾਂ ’ਤੇ ਨਿਰਭਰ ਹਨ, ਉਨ੍ਹਾਂ ਨੂੰ ਵਿਸ਼ੇਸ਼ ਤੌਰ ’ਤੇ ਮੁਸ਼ਕਲਾਂ ਆਈਆਂ।
ਮਾਈਕ੍ਰੋਸਾਫਟ ਵੱਲੋਂ ਇਸ ਸਮੱਸਿਆ ਨੂੰ ਤਕਨੀਕੀ ਖਰਾਬੀ ਦੱਸਿਆ ਗਿਆ ਹੈ। ਕੰਪਨੀ ਅਨੁਸਾਰ, ਕੁਝ ਖੇਤਰਾਂ ਵਿੱਚ ਸਰਵਰ ਕਨੈਕਟੀਵਿਟੀ ਪ੍ਰਭਾਵਿਤ ਹੋਈ ਹੈ, ਜਿਸ ਕਾਰਨ ਯੂਜ਼ਰਾਂ ਨੂੰ ਸੇਵਾਵਾਂ ਤੱਕ ਪਹੁੰਚ ਬਣਾਉਣ ਵਿੱਚ ਮੁਸ਼ਕਲ ਆ ਰਹੀ ਹੈ। ਕੰਪਨੀ ਦੀ ਤਕਨੀਕੀ ਟੀਮ ਇਸ ਸਮੱਸਿਆ ਦੀ ਜਾਂਚ ਕਰ ਰਹੀ ਹੈ ਅਤੇ ਸੇਵਾਵਾਂ ਨੂੰ ਮੁੜ ਆਮ ਵਾਂਗ ਕਰਨ ਲਈ ਕੰਮ ਕਰ ਰਹੀ ਹੈ।
ਮਾਈਕ੍ਰੋਸਾਫਟ 365 ਵੱਲੋਂ ਆਪਣੇ ਅਧਿਕਾਰਤ ਐਕਸ (X) ਹੈਂਡਲ ਰਾਹੀਂ ਵੀ ਇਸ ਸਬੰਧੀ ਜਾਣਕਾਰੀ ਸਾਂਝੀ ਕੀਤੀ ਗਈ। ਕੰਪਨੀ ਨੇ ਮੰਨਿਆ ਕਿ ਈਮੇਲ ਸੇਵਾ ਵਿੱਚ ਆਈ ਤਕਨੀਕੀ ਦਿੱਕਤ ਕਾਰਨ ਕਈ ਖੇਤਰਾਂ ਦੇ ਯੂਜ਼ਰ ਪ੍ਰਭਾਵਿਤ ਹੋਏ ਹਨ।
ਸੇਵਾਵਾਂ ਵਿੱਚ ਆਈ ਰੁਕਾਵਟ ਦੀਆਂ ਸ਼ਿਕਾਇਤਾਂ ਦੀ ਗਿਣਤੀ ਲਗਾਤਾਰ ਵਧਦੀ ਗਈ। ਡਾਊਨਡਿਟੈਕਟਰ ਦੇ ਅੰਕੜਿਆਂ ਮੁਤਾਬਕ, ਅਮਰੀਕਾ ਦੇ ਪੂਰਬੀ ਸਮੇਂ ਅਨੁਸਾਰ ਦੁਪਹਿਰ ਕਰੀਬ 1 ਵਜੇ ਆਊਟਲੁੱਕ ਨਾਲ ਸਬੰਧਤ ਸਮੱਸਿਆਵਾਂ ਦੀਆਂ ਰਿਪੋਰਟਾਂ ਸਾਹਮਣੇ ਆਉਣੀਆਂ ਸ਼ੁਰੂ ਹੋਈਆਂ। ਕੁਝ ਹੀ ਸਮੇਂ ਵਿੱਚ ਇਹ ਸ਼ਿਕਾਇਤਾਂ ਵੱਡੀ ਗਿਣਤੀ ਵਿੱਚ ਪਹੁੰਚ ਗਈਆਂ। ਰਿਪੋਰਟ ਮੁਤਾਬਕ, ਆਊਟਲੁੱਕ ਸਬੰਧੀ ਇੱਕ ਲੱਖ ਤੋਂ ਵੱਧ ਸ਼ਿਕਾਇਤਾਂ ਦਰਜ ਹੋਈਆਂ, ਜਦਕਿ ਮਾਈਕ੍ਰੋਸਾਫਟ 365 ਦੇ ਹਜ਼ਾਰਾਂ ਯੂਜ਼ਰਾਂ ਨੇ ਵੀ ਸੇਵਾਵਾਂ ਵਿੱਚ ਵਿਘਨ ਦੀ ਜਾਣਕਾਰੀ ਦਿੱਤੀ।
ਸ਼ੁਰੂਆਤ ਵਿੱਚ ਕੰਪਨੀ ਨੂੰ ਲੱਗਿਆ ਕਿ ਇਹ ਸਮੱਸਿਆ ਮੁੱਖ ਤੌਰ ’ਤੇ ਅਮਰੀਕਾ ਤੱਕ ਸੀਮਤ ਹੈ, ਪਰ ਬਾਅਦ ਵਿੱਚ ਇਸ ਦੇ ਕਈ ਦੇਸ਼ਾਂ ਵਿੱਚ ਫੈਲਣ ਦੇ ਸੰਕੇਤ ਮਿਲੇ। ਭਾਰਤ ਸਮੇਤ ਦੁਨੀਆ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਯੂਜ਼ਰਾਂ ਨੇ ਪਰੇਸ਼ਾਨੀ ਦੀਆਂ ਸ਼ਿਕਾਇਤਾਂ ਕੀਤੀਆਂ। ਫਿਲਹਾਲ ਯੂਜ਼ਰਾਂ ਦੀ ਨਜ਼ਰ ਮਾਈਕ੍ਰੋਸਾਫਟ ਦੀ ਤਕਨੀਕੀ ਟੀਮ ਵੱਲੋਂ ਸਮੱਸਿਆ ਦੇ ਹੱਲ ਅਤੇ ਸੇਵਾਵਾਂ ਪੂਰੀ ਤਰ੍ਹਾਂ ਬਹਾਲ ਹੋਣ ’ਤੇ ਟਿਕੀ ਹੋਈ ਹੈ।
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.
