ਫੇਸਬੁੱਕ ਵੀਡੀਓਜ਼ ਹਟਾਉਣ ਤੇ ਖਾਤਾ ਸਸਪੈਂਡ ਕਰਨ ਦੀ ਖਹਿਰਾ ਵੱਲੋਂ ਕੜੀ ਨਿੰਦਾ

ਭਗਵੰਤ ਮਾਨ ਸਰਕਾਰ ਦੇ ਇਸ਼ਾਰਿਆਂ ’ਤੇ ਪੰਜਾਬ ਪੁਲਿਸ ਵੱਲੋਂ ਕੀਤੀ ਕਾਰਵਾਈ ਅਧੀਨ ਆਪਣੇ ਫੇਸਬੁੱਕ ਵੀਡੀਓਜ਼ ਹਟਾਉਣ ਅਤੇ ਖਾਤਾ ਸਸਪੈਂਡ ਕਰਨ ਦੀ ਖਹਿਰਾ ਵੱਲੋਂ ਕੜੀ ਨਿੰਦਾ

ਅੱਜ ਜਾਰੀ ਇੱਕ ਤਿੱਖੇ ਬਿਆਨ ਵਿਚ ਸੁਖਪਾਲ ਸਿੰਘ ਖਹਿਰਾ, ਵਿਧਾਇਕ ਭੁਲੱਥ ਨੇ ਆਪਣੇ ਫੇਸਬੁੱਕ ਖਾਤੇ ਤੋਂ ਵੀਡੀਓਆਂ ਤੇ ਪੋਸਟਾਂ ਹਟਾਉਣ ਅਤੇ ਤਸਦੀਕਸ਼ੁਦਾ ਫੇਸਬੁੱਕ ਆਈ.ਡੀ. ਨੂੰ ਸਸਪੈਂਡ ਕਰਨ ਦੀ ਸਖ਼ਤ ਨਿੰਦਾ ਕੀਤੀ ਹੈ। ਇਹ ਕਾਰਵਾਈ ਭਗਵੰਤ ਮਾਨ ਦੀ ਅਗਵਾਈ ਹੇਠ ਆਮ ਆਦਮੀ ਪਾਰਟੀ ਸਰਕਾਰ ਦੇ ਆਦੇਸ਼ਾਂ ’ਤੇ ਪੰਜਾਬ ਲਾਅ ਇਨਫੋਰਸਮੈਂਟ ਏਜੰਸੀਆਂ ਵੱਲੋਂ ਕੀਤੀ ਗਈ ਸ਼ਿਕਾਇਤ ਤੋਂ ਬਾਅਦ ਕੀਤੀ ਗਈ ਹੈ।

ਖਹਿਰਾ ਨੇ ਦੱਸਿਆ ਕਿ ਫੇਸਬੁੱਕ ਵੱਲੋਂ ਉਸਨੂੰ ਸੂਚਿਤ ਕੀਤਾ ਗਿਆ ਕਿ ਉਸ ਦੀਆਂ ਵੀਡੀਓਜ਼ ਭਾਰਤ ਵਿਚ “ਪੰਜਾਬ ਲਾਅ ਇਨਫੋਰਸਮੈਂਟ ਦੀ ਕਾਨੂੰਨੀ ਅਪੀਲ” ਕਰਕੇ ਹਟਾ ਦਿੱਤੀਆਂ ਗਈਆਂ ਹਨ। ਖਹਿਰਾ ਨੇ ਕਿਹਾ ਕਿ ਇਹ ਹੈਰਾਨੀਜਨਕ ਕਦਮ ਸਾਫ਼ ਦਰਸਾਉਂਦਾ ਹੈ ਕਿ ਮਾਨ ਸਰਕਾਰ ਕਿਸ ਤਰ੍ਹਾਂ ਸਰਕਾਰੀ ਏਜੰਸੀਆਂ ਦਾ ਦੁਰਪਯੋਗ ਕਰਕੇ ਵਿਰੋਧੀ ਆਵਾਜ਼ਾਂ ਨੂੰ ਦਬਾਉਣ ਅਤੇ ਆਪਣੇ ਨਾਕਾਮੀਆਂ ਉੱਤੇ ਨਿਸ਼ਾਨਾ ਸਾਧਣ ਵਾਲੇ ਨੇਤਾਵਾਂ ਨੂੰ ਚੁੱਪ ਕਰਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ।

ਖਹਿਰਾ ਨੇ ਕਿਹਾ — “ਭਗਵੰਤ ਮਾਨ ਸਰਕਾਰ, ਅਰਵਿੰਦ ਕੇਜਰੀਵਾਲ ਦੀ ਤਾਨਾਸ਼ਾਹੀ ਹਦਾਇਤਾਂ ਹੇਠ ਕੰਮ ਕਰਦੇ ਹੋਏ, ਪੰਜਾਬ ਨੂੰ ਇੱਕ ਪੁਲਿਸ ਸਟੇਟ ਚ ਬਦਲ ਚੁੱਕੀ ਹੈ, ਜਿੱਥੇ ਵਿਰੋਧ ਜਾਂ ਅਸਹਿਮਤੀ ਲਈ ਕੋਈ ਜਗ੍ਹਾ ਨਹੀਂ ਰਹੀ।” ਖਹਿਰਾ ਨੇ ਕਿਹਾ ਕਿ “ਪੁਲਿਸ ਰਾਹੀਂ ਮੇਰੀ ਫੇਸਬੁੱਕ ਆਈ.ਡੀ. ਅਤੇ ਵੀਡੀਓਜ਼ ਮਿਟਵਾਉਣਾ, ਸਰਕਾਰ ਦੀ ਅਸੁਰੱਖਿਆ ਤੇ ਆਲੋਚਨਾ ਪ੍ਰਤੀ ਅਸਹਿਣਸ਼ੀਲਤਾ ਦਾ ਸਪਸ਼ਟ ਸਬੂਤ ਹੈ।”

ਖਹਿਰਾ ਨੇ ਕਿਹਾ ਕਿ ਇਹ ਕਦਮ ਭਾਰਤ ਦੇ ਸੰਵਿਧਾਨ ਅਧੀਨ ਦਿੱਤੇ ਗਏ ਬੋਲਣ ਅਤੇ ਅਭਿਵਿਅਕਤੀ ਦੀ ਆਜ਼ਾਦੀ ਦੇ ਮੂਲ ਅਧਿਕਾਰ ਉੱਤੇ ਸਿੱਧਾ ਹਮਲਾ ਹੈ। ਖਹਿਰਾ ਨੇ ਫੇਸਬੁੱਕ ਨੂੰ ਅਪੀਲ ਕੀਤੀ ਕਿ ਉਸਦਾ ਖਾਤਾ ਅਤੇ ਸਮੱਗਰੀ ਤੁਰੰਤ ਬਹਾਲ ਕੀਤੀ ਜਾਵੇ ਕਿਉਂਕਿ ਰਾਜਨੀਤਿਕ ਦਬਾਅ ਹੇਠ ਹੋਈ ਇਹ ਸੈਂਸਰਸ਼ਿਪ ਲੋਕਤਾਂਤਰਿਕ ਮੂਲ ਸੰਕਲਪਾਂ ਨੂੰ ਕਮਜ਼ੋਰ ਕਰਦੀ ਹੈ।

ਖਹਿਰਾ ਨੇ ਸਾਰੇ ਲੋਕਤਾਂਤਰਿਕ ਧੜਿਆਂ, ਸਿਵਲ ਸਮਾਜ ਅਤੇ ਮੀਡੀਆ ਸੰਸਥਾਵਾਂ ਨੂੰ ਅਪੀਲ ਕੀਤੀ ਕਿ ਉਹ ਪੰਜਾਬ ਵਿੱਚ ਵਿਰੋਧੀ ਆਵਾਜ਼ਾਂ ਨੂੰ ਚੁੱਪ ਕਰਾਉਣ ਲਈ ਵਰਤੇ ਜਾ ਰਹੇ ਇਨ੍ਹਾਂ ਤਾਨਾਸ਼ਾਹੀ ਹਥਕੰਡਿਆਂ ਦੇ ਖ਼ਿਲਾਫ਼ ਇਕੱਠੇ ਹੋਣ।

“ਮੇਰੀ ਆਵਾਜ਼ ਪੰਜਾਬ ਦੇ ਲੋਕਾਂ ਦੀ ਆਵਾਜ਼ ਹੈ, ਅਤੇ ਕੋਈ ਵੀ ਸਰਕਾਰ ਧਮਕੀਆਂ ਜਾਂ ਡਿਜ਼ਿਟਲ ਸੈਂਸਰਸ਼ਿਪ ਰਾਹੀਂ ਸੱਚ ਨੂੰ ਚੁੱਪ ਨਹੀਂ ਕਰਵਾ ਸਕਦੀ,” ਖਹਿਰਾ ਨੇ ਕਿਹਾ।