ਅਮਰਜੀਤ ਸਿੰਘ ਵੜੈਚ (94178-01988)
ਨਸ਼ੇ ਦੀ ਓਵਰਡੋਜ਼ ਕਾਰਨ ਮੌਤ, ਕਿਸਾਨ ਖੁਦਕੁਸ਼ੀ, ਸੜਕ ਹਾਦਸੇ ਵਿੱਚ ਮੌਤ, ਗੈਂਗਸਟਰਾਂ ਦੀ ਖਹਿਬਾਜ਼ੀ ਵਿੱਚ ਕਤਲ, ਪ੍ਰੇਮੀ-ਪ੍ਰੇਮਿਕਾ ਦਾ ਕਤਲ, ਜ਼ਮੀਨ ਦੇ ਝਗੜੇ ਕਾਰਨ ਕਤਲ, ਘਰ ‘ਚ ਲੜਾਈ ਕਾਰਨ ਪਤੀ/ਪਤਨੀ ਦਾ ਕਤਲ, ਨਜਾਇਜ਼ ਸਬੰਧਾਂ ਕਾਰਨ ਕਤਲ, ਘਰ ਦੀ ਲੁੱਟਮਾਰ ‘ਚ ਕਤਲ, ਸੜਕ ‘ਤੇ ਝਗੜੇ ‘ਚ ਕਤਲ ….ਅੱਜ-ਕੱਲ੍ਹ ਪੰਜਾਬ ਦੇ ਟੀਵੀ, ਅਖ਼ਬਾਰਾਂ ਅਤੇ ਸੋਸ਼ਲ-ਮੀਡੀਆ ਉਪਰ ਸਾਨੂੰ ਇਹ ਸਭ ਕੁਝ ਵੇਖਣ ਨੂੰ ਮਿਲ ਰਿਹਾ ਹੈ।
ਜੇਕਰ ਸਰਕਾਰੀ ਅੰਕੜੇ ਵੀ ਮੰਨ ਲਈਏ ਤਾਂ ਪੰਜਾਬ ਦੇ ਡੀਜੀਪੀ ਵੀ ਕੇ ਭੰਵਰਾ ਨੇ ਇਸੇ ਸਾਲ ਅਪ੍ਰੈਲ ਮਹੀਨੇ ‘ਚ ਦੱਸਿਆ ਸੀ ਕਿ ਪੰਜਾਬ ਵਿੱਚ ਹਰ ਮਹੀਨੇ 50 ਕਤਲ ਹੋ ਜਾਂਦੇ ਹਨ। ਇਹ ਉਹ ਅੰਕੜੇ ਹਨ ਜੋ ਕਤਲ ਕੇਸ ਪੁਲਿਸ ਕੋਲ ਦਰਜ ਹੋ ਜਾਂਦੇ ਹਨ। ਇਹ ਬੜੇ ਅਫ਼ਸੋਸ ਅਤੇ ਗੰਭੀਰ ਚਿੰਤਾ ਵਾਲੀ ਸਥਿਤੀ ਹੈ। ਪਿਛਲੇ ਵਰ੍ਹੇ ਭਾਵ 2019 ਵਿੱਚ 724 ਕਤਲ ਹੋਏ ਸਨ ਜਿਸ ਦਾ ਮਤਲਬ ਹੈ ਕਿ ਹਰ ਮਹੀਨੇ 60 ਜਾਂ ਕਹਿ ਲਓ ਹਰ ਰੋਜ਼ ਦੋ ਕਤਲ ! ਇਸ ਤੋਂ ਇਲਾਵਾ ਘਰ ਵਿੱਚ ਕੁੱਟਮਾਰ, ਗੁਆਂਢੀ ਨਾਲ ਲੜਾਈ, ਵਿੱਦਿਅਕ ਅਦਾਰਿਆਂ ਵਿੱਚ ਲੜਾਈ, ਸੜਕਾਂ ‘ਤੇ ਹਾਦਸਿਆਂ ਕਾਰਨ ਲੜਾਈ, ਚੋਰੀਆਂ, ਲੁੱਟਾਂ-ਖੋਹਾਂ, ਦਫ਼ਤਰਾਂ ਵਿੱਚ ਝਗੜੇ ਆਦਿ ਦੇ ਜੁਰਮ ਵੱਖਰੇ ਹਨ।
ਪੰਜਾਬ ਵਿੱਚ ਲੱਖਾਂ ਦੀ ਗਿਣਤੀ ਵਿੱਚ ਮੰਦਿਰ, ਮਸਜਿਦ, ਗੁਰਦੁਆਰੇ, ਸ਼ਿਵਾਲੇ, ਖੇੜੇ ਅਤੇ ਸਮਾਧਾਂ ਹਨ। ਇਸ ਤੋਂ ਇਲਾਵਾ ਸਾਰੇ ਧਰਮਾਂ ਦੇ ਵੱਡੇ-ਵੱਡੇ ਹੈੱਡਕੁਅਰਟਰ ਹਨ, ਸਾਰੇ ਧਰਮਾਂ ਅਤੇ ਅੱਗੋਂ ਉਨ੍ਹਾਂ ਦੇ ਵੱਖ ਹੋਏ ਯੂਨਿਟਾਂ ਵੱਲੋਂ ਹਰ ਦਿਨ ਕੋਈ ਨਾ ਕੋਈ ਧਾਰਮਿਕ ਸਮਾਗਮ ਹੁੰਦਾ ਰਹਿੰਦਾ ਹੈ। ਇਥੇ ਹੀ ਬੱਸ ਨਹੀਂ ਲੋਕਾਂ ਨੇ ਆਪਣੇ ਘਰਾਂ ਵਿੱਚ ਵੀ ਆਪਣੇ ਆਪਣੇ ਧਰਮ ਦੇ ਸਥਾਨ ਬਣਾਏ ਹੋਏ ਹਨ। ਹਰ ਸਾਲ ਸਾਰੇ ਹੀ ਧਰਮਾਂ ਦੇ ਦਿਨ ਮਨਾਏ ਜਾਂਦੇ ਹਨ ਚਾਰ ਹਜ਼ਾਰ ਦੇ ਕਰੀਬ ਡੇਰੇ ਹਨ, ਸੈਂਕੜੇ ਹੀ ਸਮਾਜਿਕ ਸੰਸਥਾਵਾਂ, ਸਕੂਲ, ਕਾਲਜ਼ ਅਤੇ ਯੂਨੀਵਰਸਿਟੀਆਂ ਹਨ : ਇਸਦੇ ਬਾਵਜੂਦ ਹਰ ਮਹੀਨੇ 60 ਕਤਲ…।
ਸਾਡੇ ਦੇਸ਼ ਵਿੱਚ ਐੱਨ ਸੀ ਬੀ ਆਰ (NCRB-National Crime Records Bureau) ਅਨੁਸਾਰ ਯੂਪੀ ‘ਚ ਸਭ ਤੋਂ ਵੱਧ ਅਪਰਾਧ ਹੁੰਦੇ ਹਨ। ਦਿੱਲੀ ਪੰਜਵੇਂ ਅਤੇ ਹਰਿਆਣਾ ਨੌਂਵੇ ਨੰਬਰ ‘ਤੇ ਆਉਂਦਾ ਹੈ। ਭਾਵੇਂ ਅਪਰਾਧ ਦੇ ਮਾਮਲੇ ‘ਚ ਪੰਜਾਬ ਪਹਿਲੇ ਦਸਾਂ ਵਿੱਚ ਨਹੀਂ ਆਉਂਦਾ ਪਰ ਨਸ਼ਿਆਂ ਸਬੰਧੀ ਕੇਸਾਂ ਵਿੱਚ ਪੰਜਾਬ ਦਾ ਨੰਬਰ ਸਭ ਤੋਂ ਉਪਰ ਹੈ। ਬਿਊਰੋ ਵੱਲੋਂ ‘ਕਰਾਈਮ ਇਨ ਇੰਡੀਆ 2020’ ਦੀ ਰਿਪੋਰਟ ਵਿਚ ਦੱਸਿਆ ਗਿਆ ਹੈ ਕਿ ਪੂਰੇ ਦੇਸ਼ ਵਿੱਚ 2019 ਦੇ ਮੁਕਾਬਲੇ 28 ਫ਼ੀਸਦ ਅਪਰਾਧ ਵਧੇ ਹਨ। 2019 ਵਿੱਚ ਦੇਸ਼ ਵਿੱਚ 51 ਲੱਖ 56 ਹਜ਼ਾਰ 158 ਕੇਸ ਹੋਏ ਸਨ ਜਦਕਿ 2020 ਵਿੱਚ 66 ਲੱਖ ਇਕ ਹਜ਼ਾਰ 258 ਕੇਸ ਹੋਏ ਸਨ।
ਇਹ ਵੀ ਬੜੀ ਚਿੰਤਾ ਵਾਲੀ ਸਥਿਤੀ ਹੈ ਕਿ ਪੰਜਾਬ ‘ਚ ਅਪਰਾਧ ਦਰ 2016 ਤੋਂ 2020 ਤੱਕ 34 ਫ਼ੀਸਦ ਵਧੀ ਹੈ। ਇਸ ਵਿੱਚੋਂ ਵੀ ਛੇ ਫ਼ੀਸਦ ਕੇਸ ਔਰਤਾਂ ਖ਼ਿਲਾਫ ਅਪਰਾਧ ਹਨ। 2020 ਵਿੱਚ ਅਪਰਾਧ ਦਰ ਘਟੀ ਹੈ ਕਿਉਂਕਿ ਲੌਕਡਾਊਨ ਕਰਕੇ ਲੋਕਾਂ ਦਾ ਘਰੋਂ ਬਾਹਰ ਨਿਕਲਣਾ ਕਾਫ਼ੀ ਦੇਰ ਬੰਦ ਰਿਹਾ। ਅਪਰਾਧ ਹੋਣ ਨਾਲ ਹਸਪਤਾਲਾ, ਪੁਲਿਸ ਅਤੇ ਬਾਕੀ ਏਜੰਸੀਆਂ ‘ਤੇ ਭਾਰ ਵਧਦਾ ਹੈ ਅਤੇ ਸਭ ਤੋਂ ਵੱਧ ਮਾੜਾ ਅਸਰ ਸਮਾਜ ਦੇ ਬੱਚਿਆਂ ‘ਤੇ ਪੈਦਾ ਹੈ। ਸਰਕਾਰਾਂ ਅਤੇ ਸਮਾਜ ਨੂੰ ਇਸ ਚਿੰਤਾਜਨਕ ਸਥਿਤੀ ‘ਤੇ ਪਹਿਲ ਦੇ ਅਧਾਰ ‘ਤੇ ਨਜਿੱਠਣ ਦੀ ਲੋੜ ਹੈ ਤਾਂ ਕਿ ਸਮਾਜ ਵਿੱਚੋਂ ਅਪਰਾਧ ਜੇ ਖਤਮ ਨਹੀਂ ਕੀਤੇ ਜਾ ਸਕਦੇ ਘੱਟ ਤਾਂ ਜ਼ਰੂਰ ਕੀਤੇ ਜਾ ਸਕਦੇ ਹਨ।
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.
