ਵਿੱਤ ਮੰਤਰੀ ਵੱਲੋਂ ਐਲਾਨੇ ਗਏ ਪੈਕੇਜ ਦਾ ਹਰਿਆਣਾ ਤੇ ਪੰਜਾਬ ਰਾਜਾਂ ਦੇ ਉਦਯੋਗਪਤੀਆਂ ਅਤੇ ਨਾਗਰਿਕਾਂ ਨੇ ਕੀਤਾ ਸਮਰਥਨ

ਚੰਡੀਗੜ੍ਹ : ਸੂਖਮ, ਲਘੂ ਤੇ ਦਰਮਿਆਨੇ ਉੱਦਮਾਂ ਲਈ ਆਰਥਿਕ ਪੈਕੇਜ ਨਾਲ ਵਿਕਾਸ ਤੇ ਰੋਜ਼ਗਾਰ ਪੈਦਾ ਹੋਣ ਦੀਆਂ ਸੰਭਾਵਨਾਵਾਂ ਹਨ। ਇਹ ਪ੍ਰਗਟਾਵਾ ਹਰਿਆਣਾ ਤੇ ਪੰਜਾਬ ਰਾਜਾਂ ਦੇ ਉਦਯੋਗਪਤੀਆਂ ਅਤੇ ਨਾਗਰਿਕਾਂ ਨੇ ਬੁੱਧਵਾਰ ਨੂੰ ਵਿੱਤ ਮੰਤਰੀ ਦੁਆਰਾ ਐਲਾਨੇ ਗਏ ਪੈਕੇਜ ਦਾ ਸਮਰਥਨ ਕਰਦਿਆਂ ਕੀਤਾ। ‘ਆਤਮ ਨਿਰਭਰ ਭਾਰਤ ਅਭਿਯਾਨ’ ਅਧੀਨ 20 ਲੱਖ ਕਰੋੜ ਰੁਪਏ ਦੇ ਰਾਹਤ ਪੈਕੇਜ ਦੇ ਹਵਾਲੇ ਨਾਲ ਇੱਕ ਉਦਯੋਗਪਤੀ ਅਮਿਤ ਕੁਮਾਰ ਸ਼ਰਮਾ ਨੇ ਕਿਹਾ ਕਿ ਇਸ ਨਾਲ ਸਿਰਫ਼ ਐੱਮਐੱਸਐੱਮਈ ਹੀ ਨਹੀਂ, ਸਗੋਂ ਅਰਥਵਿਵਸਥਾ ਦੇ ਸਾਰੇ ਖੇਤਰਾਂ ਨੂੰ ਪ੍ਰੋਤਸਾਹਨ ਮਿਲੇਗਾ।

ਐੱਮਐੱਸਐੱਮਈ ਖੇਤਰ ਬਾਰੇ ਖਾਸ ਤੌਰ ’ਤੇ ਗੱਲ ਕਰਦਿਆਂ ਉਨ੍ਹਾਂ ਕਿਹਾ ਕਿ ਲੌਕਡਾਊਨ ਕਾਰਨ ਛੋਟੇ ਕਾਰੋਬਾਰਾਂ ਨੂੰ ਔਕੜਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ ਤੇ ਇਹ ਪੈਕੇਜ ਭਵਿੱਖ ’ਚ ਇਸ ਖੇਤਰ ਵਿੱਚ ਨਵੀਂ ਰੂਹ ਫੂਕੇਗਾ।ਮੋਹਾਲੀ ਇੰਡਸਟ੍ਰੀਜ਼ ਐਸੋਸੀਏਸ਼ਨ ਦੇ ਸਾਬਕਾ ਪ੍ਰਧਾਨ ਅਨੁਰਾਗ ਅਗਰਵਾਲ ਨੇ ਮਾਣਯੋਗ ਪ੍ਰਧਾਨ ਮੰਤਰੀ ਦੁਆਰਾ ‘ਆਤਮ ਨਿਰਭਰ ਭਾਰਤ ਅਭਿਯਾਨ’ ਅਧੀਨ ਐਲਾਨੇ ਪੈਕੇਜ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਇਹ ਬਿਲਕੁਲ ਵਿਕਸਿਤ ਦੇਸ਼ਾਂ ਵਾਂਗ ਹੈ ਅਤੇ ਵਿੱਤ ਮੰਤਰੀ ਦੁਆਰਾ ਐੱਮਐੱਸਐੱਮਈ ਜ਼ਲਈ ਦੱਸੀਆਂ ਯੋਜਨਾਵਾਂ ਬਹੁਤ ਸੋਚ–ਸਮਝਕੇ ਉਲੀਕੀਆਂ ਗਈਆਂ ਹਨ।

ਇਸ ਨਾਲ ਲੌਕਡਾਊਨ ਦੇ ਇਸ ਸਮੇਂ ਦੌਰਾਨ ਐੱਮਐੱਸਐੱਮਈਜ਼ ਦਾ ਵਿਕਾਸ ਸੰਭਵ ਹੋਵੇਗਾ।ਸ਼੍ਰੀ ਅਗਰਵਾਲ ਨੇ ਸੁਝਾਅ ਦਿੱਤਾ ਕਿ ਰਸਮੀ ਕ੍ਰੈਡਿਟ ਸਿਸਟਮ ਵਿੱਚ ਹੋਰ ਸੂਖਮ ਉਦਯੋਗ ਲਿਆਉਣ ਨਾਲ ਇਹ ਸੈਕਟਰ ਹੋਰ ਵੀ ਪ੍ਰਫ਼ੁੱਲਤ ਹੋਵੇਗਾ। ਹਰਿਆਣਾ ਦੇ ਰੇਵਾੜੀ ਤੋਂ ਦਿਨੇਸ਼ ਕੁਮਾਰ ਨੇ ਕਿਹਾ ਕਿ ਇਸ ਆਰਥਿਕ ਪੈਕੇਜ ਨਾਲ ਸੂਖਮ ਤੇ ਲਘੂ ਪੱਧਰ ਦੇ ਉਦਯੋਗਾਂ ਨੂੰ ਹੁਲਾਰਾ ਮਿਲੇਗਾ ਅਤੇ ਬੇਰੋਜ਼ਗਾਰ ਨੌਜਵਾਨਾਂ ਲਈ ਰੋਜ਼ਗਾਰ ਦੇ ਮੌਕੇ ਯਕੀਨੀ ਬਣਨਗੇ।ਰੇਵਾੜੀ ਦੇ ਹੀ ਪਿੰਡ ਲੁਹਾਹਾ ਨਿਵਾਸੀ ਦੀਪਕ ਯਾਦਵ ਨੇ ਕਿਹਾ ਕਿ ਇਸ ਨਾਲ ਉਦਯੋਗਿਕ ਗਤੀਵਿਧੀਆਂ ਮੁੜ ਸ਼ੁਰੂ ਕਰਨ ਵਿੱਚ ਮਦਦ ਮਿਲੇਗੀ, ਜੋ ਕੋਵਿਡ–19 ਨੂੰ ਫੈਲਣ ਤੋਂ ਰੋਕਣ ਲਈ ਲਾਗੂ ਕੀਤੇ ਲੌਕਡਾਊਨ ਕਾਰਨ ਮੱਠੀਆਂ ਪੈ ਚੁੱਕੀਆਂ ਹਨ।

ਕੋਵਿਡ–19 ਵਿਰੁੱਧ ਭਾਰਤੀ ਅਰਥਵਿਵਸਥਾ ਦੀ ਜੰਗ ਵਿੱਚ ਮਦਦ ਲਈ ‘ਆਤਮ ਨਿਰਭਰ ਭਾਰਤ ਅਭਿਯਾਨ’ ਅਧੀਨ ਖਾਸ ਤੌਰ ’ਤੇ ਐੱਮਐੱਸਐੱਮਈਜ਼ ਕਾਰੋਬਾਰਾਂ ਵਾਸਤੇ ਰਾਹਤ ਤੇ ਰਿਣ ਸਹਾਇਤਾ ਹਿਤ ਉਪਾਅ ਹੀ ਬੁੱਧਵਾਰ ਨੂੰ ਵਿੱਤ ਮੰਤਰੀ ਦੁਆਰਾ ਕੀਤੇ ਐਲਾਨ ਦਾ ਮੁੱਖ ਕੇਂਦਰ ਸਨ।ਮਾਣਯੋਗ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਦੁਆਰਾ ਪਿੱਛੇ ਜਿਹੇ ‘ਆਤਮ ਨਿਰਭਰ ਭਾਰਤ ਅਭਿਯਾਨ’ ਅਧੀਨ ਐਲਾਨੇ ਗਏ 20 ਲੱਖ ਕਰੋੜ ਰੁਪਏ ਦੇ ਆਰਥਿਕ ਪੈਕੇਜ ਵਿੱਚ ਅਰਥ ਵਿਵਸਥਾ, ਬੁਨਿਆਦੀ ਢਾਂਚੇ, ਪ੍ਰਣਾਲੀ/ਸਿਸਟਮ, ਜੀਵੰਤ ਡੈਮੋਗ੍ਰਾਫੀ ਅਤੇ ਮੰਗ ਉੱਤੇ ਧਿਆਨ ਕੇਂਦ੍ਰਿਤ ਕੀਤਾ ਗਿਆ ਹੈ।