ਨੇਪਾਲ ‘ਚ ਆਦਿਪੁਰਸ਼ (Adipurush) ਤੇ ਹੋਰਨਾਂ ਹਿੰਦੀ ਫ਼ਿਲਮਾਂ ਦੇ ਰਲੀਜ਼ ਕਰਨ ਤੇ ਰੋਕ

Adipurush Banned in Nepal :  ਨੇਪਾਲ ਦੀ ਰਾਜਧਾਨੀ ਕਾਠਮੰਡੂ ਦੇ ਨਗਰ ਨਿਗਮ ਨੇ ਆਦਿਪੁਰਸ਼ (Adipurush) ਫਿਲਮ ਨੂੰ ਲੈ ਕੇ ਸ਼ੁਰੂ ਹੋਏ ਵਿਵਾਦ ਨੂੰ ਦੇਖਦੇ ਹੋਏ ਕਾਠਮੰਡੂ ‘ਚ ਹਿੰਦੀ ਫਿਲਮਾਂ ‘ਤੇ ਰੋਕ ਲਗਾਉਣ ਦੇ ਹੁਕਮ ਦਿੱਤੇ ਹਨ। ਦੂਜੇ ਪਾਸੇ ਇਸ ਫਿਲਮ ਦੇ ਨਿਰਮਾਤਾਵਾਂ ਨੇ ਇਸ ਦੇ ਵਿਵਾਦਿਤ ਡਾਇਲਾਗ ਦੇ ਵਧਦੇ ਵਿਰੋਧ ਨੂੰ ਦੇਖਦੇ ਹੋਏ ਫਿਲਮ ਦੇ ਡਾਇਲਾਗ ਬਦਲਣ ਦਾ ਫੈਸਲਾ ਕੀਤਾ ਹੈ। ਕਾਠਮੰਡੂ ਦੇ ਮੇਅਰ ਨੇ ਘਾਟੀ ਚ ਸਥਿਤ ਸਾਰੇ ਸਿਨੇਮਾਘਰਾਂ ਨੂੰ ਆਦੇਸ਼ ਦਿੱਤਾ ਕਿ ਸੋਮਵਾਰ ਤੋਂ ਉੱਥੇ ਕੋਈ ਵੀ ਹਿੰਦੀ ਫਿਲਮ ਰਿਲੀਜ਼ ਨਾ ਕੀਤੀ ਜਾਵੇ। ਇਸ ਬਾਰੇ ਅਧਿਕਾਰਤ ਐਲਾਨ ਕਰਦੇ ਹੋਏ ਉਨ੍ਹਾਂ ਨੇ ਇੱਕ ਟਵੀਟ ਵੀ ਸਾਂਝਾ ਕੀਤਾ ਹੈ। ਇਸ ਦੇ ਨਾਲ ਹੀ ਸਾਰੇ ਸਿਨੇਮਾਘਰਾਂ ਨੂੰ ਇਸ ਸਬੰਧੀ ਪੱਤਰ ਵੀ ਭੇਜੇ ਗਏ ਹਨ।

ਫਿਲਮ ‘ਚ ਸੀਤਾ ਨੂੰ ਭਾਰਤ ਦੀ ਬੇਟੀ ਦੱਸਣ ‘ਤੇ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਨੇਪਾਲੀ ਸੈਂਸਰ ਬੋਰਡ ਨੇ ਇਸ ‘ਤੇ ਇਤਰਾਜ਼ ਜਤਾਇਆ ਸੀ। ਉਨ੍ਹਾਂ ਕਿਹਾ ਕਿ ਸੀਤਾ ਜੀ ਦਾ ਜਨਮ ਭਾਰਤ ‘ਚ ਨਹੀਂ ਸਗੋਂ ਨੇਪਾਲ ਦੇ ਜਨਕਪੁਰ ‘ਚ ਹੋਇਆ ਸੀ ਪਰ ਇਸ ਵਿਵਾਦ ਤੋਂ ਬਾਅਦ ਨਿਰਮਾਤਾਵਾਂ ਨੇ ਫਿਲਮ ‘ਚੋਂ ਉਸ ਡਾਇਲਾਗ ਨੂੰ ਹਟਾ ਦਿੱਤਾ ਸੀ, ਜਿਸ ਤੋਂ ਬਾਅਦ ਫਿਲਮ ਨੂੰ ਉਥੇ ਰਿਲੀਜ਼ ਕਰਨ ਦੀ ਇਜਾਜ਼ਤ ਦਿੱਤੀ ਗਈ ਸੀ ਪਰ ਸੀਤਾ ਦੇ ਜਨਮ ਸਥਾਨ ਨੂੰ ਲੈ ਕੇ ਬਹਿਸ ਜਾਰੀ ਹੈ। ਕੁਝ ਲੋਕਾਂ ਦਾ ਮੰਨਣਾ ਹੈ ਕਿ ਸੀਤਾ ਦਾ ਜਨਮ ਨੇਪਾਲ ਵਿੱਚ ਨਹੀਂ ਸਗੋਂ ਬਿਹਾਰ ਵਿੱਚ ਸਥਿਤ ਸੀਤਾਮੜੀ ਵਿੱਚ ਹੋਇਆ ਸੀ।