ਪਤੀ ਦੀ ਹੈਵਾਨੀਅਤ! ਪਤਨੀ ਨੂੰ ਨਸ਼ਾ ਦੇ ਕੇ ਅਜਨਬੀਆਂ ਤੋਂ ਕਰਵਾਉਂਦਾ ਰਿਹਾ ਜਬਰ-ਜਨਾਹ

ਯੂਕੇ ਦੀ ਵਿਨਚੈਸਟਰ ਕ੍ਰਾਊਨ ਕੋਰਟ ਵਿੱਚ ਇੱਕ ਔਰਤ ਨਾਲ ਕਥਿਤ ਜਬਰ-ਜਨਾਹ ਅਤੇ ਜਿਨਸੀ ਸ਼ੋਸ਼ਣ ਦੇ ਮਾਮਲੇ ਵਿੱਚ ਚਾਰ ਵਿਅਕਤੀਆਂ ਵਿਰੁੱਧ ਮੁਕੱਦਮਾ ਚੱਲ ਰਿਹਾ ਹੈ।
ਦੋਸ਼ ਹੈ ਕਿ ਔਰਤ ਦੇ ਸਾਬਕਾ ਪਤੀ ਨੇ ਉਸ ਨੂੰ ਨਸ਼ੀਲਾ ਪਦਾਰਥ ਦਿੱਤਾ, ਉਸ ਨਾਲ ਹੋਏ ਕਥਿਤ ਜਿਨਸੀ ਸ਼ੋਸ਼ਣ ਦੀ ਵੀਡੀਓ ਬਣਾਈ ਅਤੇ ਉਸ ਦੀ ਜਾਣਕਾਰੀ ਤੋਂ ਬਿਨਾਂ ਇਹ ਵੀਡੀਓ ਆਨਲਾਈਨ ਪਲੇਟਫਾਰਮ ’ਤੇ ਪਾ ਦਿੱਤੀ। 48 ਸਾਲਾ ਨੌਰਮਨ ਮੈਕਸੋਨੀ, 62 ਸਾਲਾ ਰਿਚਰਡ ਵਿਲਕਿਨਜ਼, 32 ਸਾਲਾ ਕੋਨਰ ਸੈਂਡਰਸਨ-ਡੋਇਲ ਅਤੇ 38 ਸਾਲਾ ਮੁਹੰਮਦ ਹਸਨ ਨੇ ਆਪਣੇ ’ਤੇ ਲੱਗੇ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ।
ਬੀਬੀਸੀ ਦੀ ਰਿਪੋਰਟ ਮੁਤਾਬਕ, ਇਹ ਕਥਿਤ ਅਪਰਾਧ ਸਾਲ 2016 ਤੋਂ 2023 ਦਰਮਿਆਨ ਹੋਏ। ਮੁਕੱਦਮੇ ਦੀ ਸ਼ੁਰੂਆਤ ’ਤੇ ਸਰਕਾਰੀ ਵਕੀਲ ਸਾਰਾ ਜੋਨਜ਼ ਕੇਸੀ ਨੇ ਜਿਊਰੀ ਨੂੰ ਦੱਸਿਆ ਕਿ ਮਾਮਲੇ ਦਾ ਮੁੱਖ ਸਵਾਲ ਇਹ ਹੈ ਕਿ ਕੀ ਕਿਸੇ ਅਣਜਾਣ ਔਰਤ ਦੀ ਸਹਿਮਤੀ ਤੋਂ ਬਿਨਾਂ ਉਸ ਨਾਲ ਜਿਨਸੀ ਸਬੰਧ ਬਣਾਉਣਾ ਜਾਇਜ਼ ਹੋ ਸਕਦਾ ਹੈ
ਔਰਤ ਦੇ ਸਾਬਕਾ ਪਤੀ, 50 ਸਾਲਾ ਫਿਲਿਪ ਯੰਗ ਨੇ ਇਸ ਸਾਲ ਦੀ ਸ਼ੁਰੂਆਤ ਵਿੱਚ ਇਹ ਮੰਨ ਲਿਆ ਸੀ ਕਿ ਉਸ ਨੇ 10 ਸਾਲ ਤੋਂ ਵੀ ਵੱਧ ਸਮੇਂ ਦੌਰਾਨ ਔਰਤ ਵਿਰੁੱਧ ਕਈ ਜਿਨਸੀ ਅਪਰਾਧ ਕੀਤੇ ਸਨ।ਸਰਕਾਰੀ ਪੱਖ ਨੇ ਅਦਾਲਤ ਨੂੰ ਦੱਸਿਆ ਕਿ ਫਿਲਿਪ ਯੰਗ ਆਪਣੀ ਉਸ ਸਮੇਂ ਦੀ ਪਤਨੀ ਨੂੰ ਨਸ਼ੀਲੀ ਦਵਾਈ ਦਿੰਦਾ ਸੀ ਅਤੇ ਅਜਨਬੀ ਮਰਦਾਂ ਨੂੰ ਉਸ ਨਾਲ ਜਿਨਸੀ ਸਬੰਧ ਬਣਾਉਣ ਲਈ ਕਹਿੰਦਾ ਸੀ। ਔਰਤ ਨੂੰ ਇਸ ਗੱਲ ਦਾ ਪਤਾ ਨਹੀਂ ਹੁੰਦਾ ਸੀ ਕਿ ਉਹ ਕਿਸੇ ਹੋਰ ਮਰਦ ਨਾਲ ਜਿਨਸੀ ਸਬੰਧ ਬਣਾ ਰਹੀ ਹੈ।
ਦੋਸ਼ ਹੈ ਕਿ ਯੰਗ ਨੇ ਹੋਰ ਮਰਦਾਂ ਨੂੰ ਆਕਰਸ਼ਿਤ ਕਰਨ ਲਈ ਔਰਤ ਦੀਆਂ ਇਤਰਾਜ਼ਯੋਗ ਤਸਵੀਰਾਂ ਵੱਖ-ਵੱਖ ਵੈੱਬਸਾਈਟਾਂ ’ਤੇ ਵੀ ਪਾਈਆਂ ਸਨ।
ਅਦਾਲਤ ਵਿੱਚ ਇਹ ਵੀ ਦੱਸਿਆ ਗਿਆ ਕਿ ਯੰਗ ਸਾਲ 2015 ਤੋਂ ਅਜਿਹੀਆਂ ਦਵਾਈਆਂ ਦੀ ਭਾਲ ਕਰ ਰਿਹਾ ਸੀ, ਜਿਨ੍ਹਾਂ ਨਾਲ ਉਸ ਦੀ ਪਤਨੀ ਡੂੰਘੀ ਨੀਂਦ ਵਿੱਚ ਚਲੀ ਜਾਵੇ ਜਾਂ ਉਸ ਦੀ ਸੋਚਣ-ਸਮਝਣ ਦੀ ਸਮਰੱਥਾ ਪ੍ਰਭਾਵਿਤ ਹੋਵੇ। ਸਰਕਾਰੀ ਪੱਖ ਮੁਤਾਬਕ, ਯੰਗ ਇਨ੍ਹਾਂ ਘਟਨਾਵਾਂ ਨੂੰ ਦੇਖਦਾ ਅਤੇ ਉਨ੍ਹਾਂ ਦੀਆਂ ਵੀਡੀਓ ਬਣਾਉਂਦਾ ਸੀ।
ਅਦਾਲਤ ਨੂੰ ਦੱਸਿਆ ਗਿਆ ਕਿ ਔਰਤ ਆਪਣੇ ਪਤੀ ਨਾਲ ਜਿਨਸੀ ਸਬੰਧ ਬਣਾਉਣ ਸਮੇਂ ਅੱਖਾਂ ’ਤੇ ਪੱਟੀ ਬੰਨ੍ਹਣ ਅਤੇ ਆਪਣੇ ਆਪ ਨੂੰ ਬੰਨ੍ਹਣ ਲਈ ਸਹਿਮਤ ਹੋ ਜਾਂਦੀ ਸੀ। ਹਾਲਾਂਕਿ, ਸਰਕਾਰੀ ਪੱਖ ਦਾ ਕਹਿਣਾ ਹੈ ਕਿ ਇਸ ਗੱਲ ਦਾ ਕੋਈ ਸਬੂਤ ਨਹੀਂ ਹੈ ਕਿ ਔਰਤ ਨੇ ਅਣਜਾਣ ਮਰਦਾਂ ਨਾਲ ਜਿਨਸੀ ਸਬੰਧ ਬਣਾਉਣ ਲਈ ਸਹਿਮਤੀ ਦਿੱਤੀ ਸੀ।
ਇਹ ਕਥਿਤ ਸ਼ੋਸ਼ਣ ਉਸ ਸਮੇਂ ਸਾਹਮਣੇ ਆਇਆ, ਜਦੋਂ ਸਾਲ 2023 ਵਿੱਚ ਫਿਲਿਪ ਯੰਗ ਨਾਲ ਜੁੜੇ ਇੱਕ ਆਨਲਾਈਨ ਖਾਤੇ ’ਤੇ ਜਾਨਵਰਾਂ ਨਾਲ ਜਿਨਸੀ ਗਤੀਵਿਧੀਆਂ ਦੀਆਂ ਤਸਵੀਰਾਂ ਪੋਸਟ ਕੀਤੀਆਂ ਗਈਆਂ। ਇਸ ਤੋਂ ਬਾਅਦ ਪੁਲਿਸ ਨੇ ਉਸ ਦੇ ਇਲੈਕਟ੍ਰਾਨਿਕ ਉਪਕਰਣ ਜ਼ਬਤ ਕਰ ਲਏ।
ਜਾਂਚ ਦੌਰਾਨ ਪੁਲਿਸ ਨੂੰ ਅਜਿਹੀਆਂ ਵੀਡੀਓ ਮਿਲੀਆਂ, ਜਿਨ੍ਹਾਂ ਵਿੱਚ ਕੁਝ ਮਰਦ ਕਥਿਤ ਤੌਰ ’ਤੇ ਔਰਤ ਨਾਲ ਜਬਰ-ਜਨਾਹ ਜਾਂ ਜਿਨਸੀ ਸ਼ੋਸ਼ਣ ਕਰਦੇ ਦਿਖਾਈ ਦਿੱਤੇ। ਰਿਪੋਰਟ ਮੁਤਾਬਕ, ਔਰਤ ਨੂੰ ਉਸ ਸਮੇਂ ਕਿਸੇ ਹੋਰ ਵਿਅਕਤੀ ਦੀ ਮੌਜੂਦਗੀ ਦਾ ਪਤਾ ਨਹੀਂ ਲੱਗਿਆ ਅਤੇ ਉਸ ਨੂੰ ਲੱਗਦਾ ਰਿਹਾ ਕਿ ਉਹ ਆਪਣੇ ਪਤੀ ਨਾਲ ਹੈ।
ਸਾਬਕਾ ਕੌਂਸਲਰ ਫਿਲਿਪ ਯੰਗ ਨੇ 13 ਸਾਲਾਂ ਦੇ ਅਰਸੇ ਦੌਰਾਨ ਕਈ ਅਪਰਾਧ ਕਰਨ ਦੀ ਗੱਲ ਕਬੂਲ ਕੀਤੀ ਹੈ। ਅਦਾਲਤ ਨੂੰ ਇਹ ਵੀ ਦੱਸਿਆ ਗਿਆ ਕਿ ਸਾਲ 2010 ਤੋਂ 2024 ਦਰਮਿਆਨ ਉਸ ਨੇ ਔਰਤ ਦੀਆਂ 500 ਤੋਂ ਵੱਧ ਨਿੱਜੀ ਤਸਵੀਰਾਂ ਅਤੇ ਵੀਡੀਓ ਉਸ ਦੀ ਸਹਿਮਤੀ ਤੋਂ ਬਿਨਾਂ ਪ੍ਰਕਾਸ਼ਿਤ ਕੀਤੀਆਂ ਅਤੇ ਉਸ ਦੀਆਂ ਨਿੱਜੀ ਗਤੀਵਿਧੀਆਂ ਦੀ ਰਿਕਾਰਡਿੰਗ ਵੀ ਕੀਤੀ।
ਯੰਗ ਪਹਿਲਾਂ ਸਵਿੰਡਨ ਵਿੱਚ ਰਹਿੰਦਾ ਸੀ ਅਤੇ ਹੁਣ ਲੰਡਨ ਦੇ ਐਨਫੀਲਡ ਵਿੱਚ ਰਹਿੰਦਾ ਹੈ। ਉਸ ’ਤੇ ਬੱਚਿਆਂ ਨਾਲ ਸਬੰਧਤ ਅਪਰਾਧਾਂ ਦੇ ਦੋਸ਼ ਵੀ ਹਨ।