ਡਿਪੋਰਟ ਕੀਤੇ ਵਿਅਕਤੀ ਦੀ ਅਸਾਇਲਮ ਫਾਈਲ ਜਨਤਕ ਹੋਣ ‘ਤੇ ਵਿਵਾਦ

 ਅਮਰੀਕੀ ਇਮੀਗ੍ਰੇਸ਼ਨ ਅਧਿਕਾਰੀਆਂ ਵੱਲੋਂ ਇੱਕ ਡਿਪੋਰਟ ਕੀਤੇ ਵਿਅਕਤੀ ਦੀ ਅਸਾਇਲਮ ਅਰਜ਼ੀ ਨਾਲ ਜੁੜੀ ਨਿੱਜੀ ਜਾਣਕਾਰੀ ਸੋਸ਼ਲ ਮੀਡੀਆ ‘ਤੇ ਸਾਂਝੀ ਕੀਤੇ ਜਾਣ ਮਗਰੋਂ ਗੋਪਨੀਯਤਾ ਕਾਨੂੰਨਾਂ ਬਾਰੇ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਇਹ ਮਾਮਲਾ ਟੈਕਸਾਸ ਵਿਚ ਰਹਿੰਦੇ 57 ਸਾਲਾ ਮੂਸਾ ਦਿਵਾਰਾ ਨਾਲ ਸਬੰਧਤ ਹੈ।
ਦਿਵਾਰਾ ਮੂਲ ਰੂਪ ਵਿਚ ਮਾਲੀ ਦਾ ਨਾਗਰਿਕ ਹੈ ਅਤੇ ਲਗਭਗ 25 ਸਾਲ ਅਮਰੀਕਾ ਵਿਚ ਰਿਹਾ। ਉਸ ਦੀ ਪਤਨੀ ਅਤੇ ਦੋ ਬੱਚੇ ਅਮਰੀਕੀ ਨਾਗਰਿਕ ਹਨ। ਉਸ ਦਾ ਕੋਈ ਅਪਰਾਧਿਕ ਰਿਕਾਰਡ ਨਹੀਂ ਦੱਸਿਆ ਗਿਆ। ਸਾਲ 2012 ਵਿਚ ਇੱਕ ਇਮੀਗ੍ਰੇਸ਼ਨ ਜੱਜ ਨੇ ਫ਼ੈਸਲਾ ਦਿੱਤਾ ਸੀ ਕਿ ਉਸ ਨੂੰ ਮਾਲੀ ਵਾਪਸ ਨਹੀਂ ਭੇਜਿਆ ਜਾ ਸਕਦਾ, ਕਿਉਂਕਿ ਉੱਥੇ ਉਸ ਨਾਲ ਜ਼ੁਲਮ ਹੋਣ ਦਾ ਖ਼ਤਰਾ ਸੀ। ਸਰਕਾਰ ਨੂੰ ਉਸ ਨੂੰ ਕਿਸੇ ਸੁਰੱਖਿਅਤ ਤੀਜੇ ਦੇਸ਼ ਭੇਜਣ ਦੀ ਆਗਿਆ ਸੀ।
ਆਈਸ ਨੇ ਜੁਲਾਈ ਵਿਚ ਦਿਵਾਰਾ ਨੂੰ ਹਿਰਾਸਤ ਵਿਚ ਲੈ ਕੇ ਘਾਨਾ ਭੇਜ ਦਿੱਤਾ। ਦਿਵਾਰਾ ਦਾ ਕਹਿਣਾ ਹੈ ਕਿ ਘਾਨਾ ਦੇ ਅਧਿਕਾਰੀਆਂ ਨੇ ਕੁਝ ਦਿਨਾਂ ਬਾਅਦ ਉਸ ਨੂੰ ਜ਼ਬਰਦਸਤੀ ਮਾਲੀ ਭੇਜ ਦਿੱਤਾ। ਉਹ ਉੱਥੋਂ ਨਿਕਲ ਕੇ ਕਿਸੇ ਹੋਰ ਦੇਸ਼ ਪਹੁੰਚ ਗਿਆ ਅਤੇ ਸੁਰੱਖਿਆ ਕਾਰਨਾਂ ਕਰਕੇ ਆਪਣਾ ਮੌਜੂਦਾ ਟਿਕਾਣਾ ਗੁਪਤ ਰੱਖਿਆ ਹੋਇਆ ਹੈ। ਡੀ.ਐੱਚ.ਐੱਸ ਦਾ ਕਹਿਣਾ ਹੈ ਕਿ ਘਾਨਾ ਨੇ ਉਸ ਦੀ ਸੁਰੱਖਿਆ ਬਾਰੇ ਭਰੋਸਾ ਦਿੱਤਾ ਸੀ ਅਤੇ ਸਰਕਾਰ ਨੇ ਉਸ ਨੂੰ ਸਿੱਧਾ ਮਾਲੀ ਨਹੀਂ ਭੇਜਿਆ।
ਨਵਾਂ ਵਿਵਾਦ ਉਸ ਵੇਲੇ ਸ਼ੁਰੂ ਹੋਇਆ, ਜਦੋਂ ਦਿਵਾਰਾ ਦੀ ਅਸਾਇਲਮ ਫਾਈਲ ਵਿਚਲੇ ਉਸ ਦੀ ਨਿੱਜੀ ਜ਼ਿੰਦਗੀ ਅਤੇ ਜਿਨਸੀ ਪਛਾਣ ਨਾਲ ਸਬੰਧਤ ਵੇਰਵੇ ਆਨਲਾਈਨ ਸਾਹਮਣੇ ਆਏ। ਡੀ.ਐੱਚ.ਐੱਸ ਦੇ ਇੱਕ ਉੱਚ ਅਧਿਕਾਰੀ ਅਤੇ ਆਈਸ ਦੇ ਅਧਿਕਾਰਤ ਸੋਸ਼ਲ ਮੀਡੀਆ ਖਾਤੇ ਨੇ ਵੀ ਇਨ੍ਹਾਂ ਵੇਰਵਿਆਂ ਦਾ ਹਵਾਲਾ ਦੇ ਕੇ ਉਸ ਦੇ ਦਾਅਵੇ ‘ਤੇ ਸਵਾਲ ਚੁੱਕੇ।
ਇਮੀਗ੍ਰੇਸ਼ਨ ਮਾਹਿਰਾਂ ਦਾ ਕਹਿਣਾ ਹੈ ਕਿ ਅਸਾਇਲਮ ਅਰਜ਼ੀਆਂ ਦੀ ਜਾਣਕਾਰੀ ਆਮ ਤੌਰ ‘ਤੇ ਗੁਪਤ ਹੁੰਦੀ ਹੈ। ਹਾਲੇ ਇਹ ਸਪੱਸ਼ਟ ਨਹੀਂ ਕਿ ਇਸ ਜਾਣਕਾਰੀ ਨੂੰ ਜਾਰੀ ਕਰਨ ਲਈ ਡੀ.ਐੱਚ.ਐੱਸ ਦੀ ਰਸਮੀ ਮਨਜ਼ੂਰੀ ਸੀ ਜਾਂ ਦਿਵਾਰਾ ਦੀ ਸਹਿਮਤੀ ਲਈ ਗਈ ਸੀ। ਉਸ ਦੇ ਵਕੀਲ ਨੇ ਅਮਰੀਕੀ ਅਦਾਲਤ ਕੋਲ ਉਸ ਨੂੰ ਵਾਪਸ ਲਿਆਉਣ ਦੀ ਮੰਗ ਕੀਤੀ ਹੈ।