ਉਡਾਣ ਭਰਦੇ ਹੀ ਲਾਪਤਾ ਹੋਇਆ ਹਰਿਦੁਆਰ ਅਰਧਕੁੰਭ ਦੀਆਂ ਤਿਆਰੀਆਂ ਲਈ ਮੰਗਵਾਇਆ ਡਰੋਨ, ਕੀਮਤ 40 ਲੱਖ ਰੁਪਏ

ਅਰਧਕੁੰਭ ਦੀਆਂ ਤਿਆਰੀਆਂ ਲਈ ਮੰਗਵਾਇਆ ਗਿਆ ਡਰੋਨ ਉਡਾਣ ਭਰਨ ਤੋਂ ਬਾਅਦ ਲਾਪਤਾ ਹੋ ਗਿਆ। ਡਰੋਨ ਦੀ ਕੀਮਤ 40 ਲੱਖ ਰੁਪਏ ਦੱਸੀ ਜਾ ਰਹੀ ਹੈ। ਇਸ ਸਬੰਧੀ ਸ਼ਹਿਰ ਕੋਤਵਾਲੀ ’ਚ ਮਾਮਲਾ ਦਰਜ ਕੀਤਾ ਗਿਆ ਹੈ। ਆਈਆਈਟੀ ਰੁੜਕੀ ਦੇ ਕਰਮਚਾਰੀ ਸ਼ਿਵਮ ਨੌਟਿਆਲ ਵੱਲੋਂ ਡਰੋਨ ਦੇ ਲਾਪਤਾ ਹੋਣ ਦੀ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ। ਅਰਧਕੁੰਭ ਲਈ ਮੈਪਿੰਗ ਵਰਗੇ ਕੰਮਾਂ ਵਾਸਤੇ ਆਈਆਈਟੀ ਰੁੜਕੀ ਤੋਂ ਇੱਕ ਡਰੋਨ ਹਰਿਦੁਆਰ ਮੰਗਵਾਇਆ ਗਿਆ ਸੀ। ਉਡਾਣ ਭਰਨ ਤੋਂ ਬਾਅਦ ਡਰੋਨ ਲਾਪਤਾ ਹੋ ਗਿਆ। ਡਰੋਨ ਦੀ ਆਖ਼ਰੀ ਲੋਕੇਸ਼ਨ ਉੱਤਰੀ ਹਰਿਦੁਆਰ ਦੇ ਭੂਪਤਵਾਲਾ ਇਲਾਕੇ ’ਚ ਮਿਲੀ। ਕਾਫ਼ੀ ਭਾਲ ਕਰਨ ਦੇ ਬਾਵਜੂਦ ਵੀ ਉਸ ਦਾ ਕੋਈ ਸੁਰਾਗ ਨਹੀਂ ਮਿਲ ਸਕਿਆ।
ਹੁਣ ਸ਼ਹਿਰ ਕੋਤਵਾਲੀ ’ਚ ਮਾਮਲਾ ਦਰਜ ਕਰਵਾਇਆ ਗਿਆ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਡਰੋਨ ਜਾਂ ਤਾਂ ਜੰਗਲ ’ਚ ਕਿਤੇ ਡਿੱਗ ਗਿਆ ਹੈ ਜਾਂ ਫਿਰ ਜੰਗਲ ਨਾਲ ਲੱਗਦੇ ਰਿਹਾਇਸ਼ੀ ਇਲਾਕੇ ’ਚ ਡਿੱਗਣ ਤੋਂ ਬਾਅਦ ਕਿਸੇ ਨੇ ਉਸ ਨੂੰ ਚੋਰੀ ਕਰ ਲਿਆ ਹੈ। ਪੁਲਿਸ ਨੇ ਡਰੋਨ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਪਿਛਲੇ ਕੁਝ ਸਮੇਂ ਤੋਂ ਮੈਪਿੰਗ ਤੇ ਹੋਰ ਕੰਮਾਂ ਲਈ ਲਗਭਗ 40 ਲੱਖ ਰੁਪਏ ਦੀ ਕੀਮਤ ਵਾਲੇ ਇਸ ਡਰੋਨ ਦੀ ਵਰਤੋਂ ਕੀਤੀ ਜਾ ਰਹੀ ਸੀ। ਵੀਰਵਾਰ ਨੂੰ ਭੂਪਤਵਾਲਾ ਇਲਾਕੇ ’ਚ ਡਰੋਨ ਲਗਭਗ 100 ਮੀਟਰ ਦੀ ਉਚਾਈ ’ਤੇ ਉੱਡ ਰਿਹਾ ਸੀ। ਇਸ ਦੌਰਾਨ ਉਸ ਦਾ ਕੰਟਰੋਲ ਸਿਸਟਮ ਨਾਲ ਸੰਪਰਕ ਟੁੱਟ ਗਿਆ, ਜਿਸ ਕਾਰਨ ਹੜਕੰਪ ਮਚ ਗਿਆ।
ਦੱਸਿਆ ਜਾ ਰਿਹਾ ਹੈ ਕਿ ਇਹ ਡਰੋਨ ਪੇਲੋਡ ਤੇ ਅਤਿ-ਆਧੁਨਿਕ ਕੈਮਰਿਆਂ ਨਾਲ ਲੈਸ ਸੀ। ਇਹ ਚਰਚਾ ਵੀ ਹੈ ਕਿ ਇਸ ਦੀ ਵਰਤੋਂ ਅਰਧਕੁੰਭ ਨਾਲ ਸਬੰਧਤ ਕੰਮਾਂ ਲਈ ਕੀਤੀ ਜਾ ਰਹੀ ਸੀ। ਹਾਲਾਂਕਿ, ਮੇਲਾ ਪ੍ਰਸ਼ਾਸਨ ਨੇ ਇਸ ਗੱਲ ਦਾ ਖੰਡਨ ਕੀਤਾ ਹੈ। ਅਪਰ ਮੇਲਾ ਅਧਿਕਾਰੀ ਦਯਾਨੰਦ ਸਰਸਵਤੀ ਨੇ ਦੱਸਿਆ ਕਿ ਅਰਧਕੁੰਭ ਨਾਲ ਸਬੰਧਤ ਕੰਮਾਂ ਲਈ ਕਿਸੇ ਵੀ ਤਰ੍ਹਾਂ ਦੇ ਡਰੋਨ ਦੀ ਵਰਤੋਂ ਨਹੀਂ ਕੀਤੀ ਜਾ ਰਹੀ। ਉਨ੍ਹਾਂ ਨੂੰ ਇਸ ਬਾਰੇ ਵੀ ਜਾਣਕਾਰੀ ਨਹੀਂ ਹੈ ਕਿ ਇਹ ਡਰੋਨ ਕਿਸ ਦਾ ਸੀ।