AI ਕੈਮਰੇ ਦੀ ਗਲਤੀ… ਬੈਂਗਲੁਰੂ ‘ਚ ਗਿਟਾਰ ਨੂੰ ਸਮਝ ਲਿਆ ਵਿਅਕਤੀ, ਕੱਟ ਦਿੱਤਾ ਚਲਾਨ

ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਨੂੰ ਲੈ ਕੇ ਦੁਨੀਆ ਭਰ ਵਿੱਚ ਚੱਲ ਰਹੀ ਬਹਿਸ ਵਿਚਕਾਰ ਇੱਕ ਵਾਰ ਫਿਰ AI ਦੀ ਵੱਡੀ ਗਲਤੀ ਸਾਹਮਣੇ ਆਈ ਹੈ। ਬੈਂਗਲੁਰੂ ਵਿੱਚ AI ਨਾਲ ਲੈਸ ਕੈਮਰੇ ਨੇ ਇੱਕ ਗਿਟਾਰ ਨੂੰ ਬਿਨਾਂ ਹੈਲਮੈਟ ਪਹਿਨੇ ਵਿਅਕਤੀ ਸਮਝ ਲਿਆ, ਜਿਸ ਕਾਰਨ ਚਲਾਨ ਕੱਟ ਦਿੱਤਾ ਗਿਆ।ਸੌਵਿਕ ਦੱਤਾ ਸ਼ਹਿਰ ਵਿੱਚ ਆਪਣੀ ਪਤਨੀ ਦਾ ਸਕੂਟਰ ਚਲਾ ਰਹੇ ਸਨ ਅਤੇ ਉਨ੍ਹਾਂ ਦੀ ਪਿੱਠ ’ਤੇ ਇੱਕ ਗਿਟਾਰ ਬੰਨ੍ਹਿਆ ਹੋਇਆ ਸੀ। ਹਾਲਾਂਕਿ, ਟ੍ਰੈਫਿਕ ਸਰਵਿਲਾਂਸ ਸਿਸਟਮ ਨੂੰ ਕੁਝ ਹੋਰ ਹੀ ਨਜ਼ਰ ਆਇਆ। ਸਿਸਟਮ ਨੇ ਇਸ ਨੂੰ ਬਿਨਾਂ ਹੈਲਮੈਟ ਦੇ ਪਿੱਛੇ ਬੈਠੀ ਸਵਾਰੀ (ਪਿਲੀਅਨ ਰਾਈਡਰ) ਸਮਝ ਲਿਆ। ਦੱਤਾ ਨੇ ਦੱਸਿਆ ਕਿ ਉਨ੍ਹਾਂ ’ਤੇ ਪਿੱਛੇ ਬੈਠੀ ਸਵਾਰੀ ਵੱਲੋਂ ਸੁਰੱਖਿਆ ਹੈਲਮੈਟ ਨਾ ਪਹਿਨਣ ਦੇ ਦੋਸ਼ ਵਿੱਚ ₹500 ਦਾ ਜੁਰਮਾਨਾ ਲਗਾਇਆ ਗਿਆ।
ਆਊਟਰ ਰਿੰਗ ਰੋਡ ’ਤੇ ਲੱਗੇ AI ਕੈਮਰਿਆਂ ਵਿੱਚੋਂ ਇੱਕ ਨੇ 15 ਸਤੰਬਰ ਦੀ ਦੁਪਹਿਰ ਉਨ੍ਹਾਂ ਦੀ ਤਸਵੀਰ ਕੈਦ ਕੀਤੀ ਸੀ। ਅਗਲੇ ਦਿਨ ਫੋਟੋ ਦੇ ਸਬੂਤ ਦੇ ਨਾਲ ਚਲਾਨ ਜਾਰੀ ਕਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਦੱਤਾ ਨੇ ਸੋਸ਼ਲ ਮੀਡੀਆ ਦਾ ਸਹਾਰਾ ਲੈਂਦਿਆਂ ਬੈਂਗਲੁਰੂ ਟ੍ਰੈਫਿਕ ਪੁਲਿਸ ਨੂੰ ਚਲਾਨ ਰੱਦ ਕਰਨ ਦੀ ਅਪੀਲ ਕੀਤੀ।