West Tarneit Station ਖੁੱਲ੍ਹਣ ਨਾਲ ਵਿੰਡਮ ਦੇ ਲੋਕਾਂ ਲਈ ਯਾਤਰਾ ਆਸਾਨ ਹੋਈ

ਵਿੰਡਮ ਇਲਾਕੇ ਦੇ ਵਸਨੀਕਾਂ ਨੂੰ ਬੱਸ ਸੇਵਾਵਾਂ ਵਿੱਚ ਨਵੇਂ ਸੁਧਾਰਾਂ ਦਾ ਲਾਭ ਮਿਲਣਾ ਸ਼ੁਰੂ ਹੋ ਗਿਆ ਹੈ। ਨਵੀਂ West Tarneit Station ਦੇ ਖੁੱਲ੍ਹਣ ਦੇ ਨਾਲ ਹੀ ਇਲਾਕੇ ਦੀਆਂ ਕੁਝ ਮਹੱਤਵਪੂਰਨ ਬੱਸ ਸੇਵਾਵਾਂ ਨੂੰ ਵੀ ਅਪਗ੍ਰੇਡ ਕੀਤਾ ਗਿਆ ਹੈ। ਸਰਕਾਰ ਨੇ ਪਿਛਲੇ ਐਤਵਾਰ ਨਵਾਂ West Tarneit Station ਲੋਕਾਂ ਲਈ ਖੋਲ੍ਹਿਆ। ਇਸ ਨਾਲ ਵਿੰਡਮ ਤੋਂ ਮੈਲਬੌਰਨ ਸਿਟੀ, Footscray ਅਤੇ Sunshine ਵੱਲ ਤੇਜ਼ ਯਾਤਰਾ ਲਈ ਲੋਕਾਂ ਦੀ ਪਹੁੰਚ ਹੋਰ ਆਸਾਨ ਹੋਵੇਗੀ।
ਨਵੇਂ ਸਟੇਸ਼ਨ ਦੇ ਨਾਲ ਹੀ ਬੱਸ ਨੈੱਟਵਰਕ ਵਿੱਚ ਵੀ ਤਬਦੀਲੀਆਂ ਕੀਤੀਆਂ ਗਈਆਂ ਹਨ। ਬੱਸ ਰੂਟ 182, ਜੋ Davis Road ਤੋਂ ਲੰਘਦੀ ਹੈ, ਹੁਣ ਪੂਰੇ ਹਫ਼ਤੇ ਹਰ 20 ਮਿੰਟ ਬਾਅਦ ਚੱਲੇਗੀ। ਇਹ ਬੱਸ ਸਿੱਧੇ West Tarneit Station ਨਾਲ ਜੁੜੇਗੀ। ਇਸ ਤੋਂ ਇਲਾਵਾ ਨਵਾਂ ਰੂਟ 186 ਸ਼ੁਰੂ ਕੀਤਾ ਗਿਆ ਹੈ। ਇਹ ਸੇਵਾ West Tarneit ਨੂੰ North Tarneit ਰਾਹੀਂ Tarneit Station ਨਾਲ ਜੋੜੇਗੀ ਅਤੇ ਇਹ ਵੀ ਹਰ 20 ਮਿੰਟ ਬਾਅਦ ਚੱਲੇਗੀ। ਵਿੰਡਮ ਵਿੱਚ ਹੀ ਰੂਟ 194 ਨੂੰ ਵੀ ਵਧਾਇਆ ਗਿਆ ਹੈ। ਇਹ ਸੇਵਾ Mambourin ਅਤੇ Harpley ਰਾਹੀਂ ਨਵੇਂ Ison Road Bridge ਤੋਂ ਲੰਘੇਗੀ। ਇਹ ਬਦਲਾਅ ਪਿਛਲੇ ਹਫ਼ਤੇ ਦੀ ਸ਼ੁਰੂਆਤ ਵਿੱਚ ਖੁੱਲ੍ਹੇ ਨਵੇਂ ਪੁਲ ਦੇ ਨਾਲ ਲਾਗੂ ਹੋਇਆ। ਰੂਟ 194 ਹਫ਼ਤੇ ਦੇ ਕੰਮਕਾਜੀ ਦਿਨਾਂ ਵਿੱਚ ਹਰ 20 ਮਿੰਟ ਬਾਅਦ ਚੱਲੇਗੀ। ਹਾਲਾਂਕਿ, ਵੀਕਐਂਡ ’ਤੇ ਇਸ ਦੀ ਸੇਵਾ ਹਰ 40 ਮਿੰਟ ਬਾਅਦ ਰਹੇਗੀ।
Sustainable Cities – Better Buses Campaign ਨਾਲ ਜੁੜੇ ਲੋਕਾਂ ਨੇ ਇਨ੍ਹਾਂ ਨਵੇਂ ਬਦਲਾਵਾਂ ਦਾ ਸਵਾਗਤ ਕੀਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਨਵੇਂ ਰੇਲਵੇ ਸਟੇਸ਼ਨ ਅਤੇ ਸੜਕੀ ਢਾਂਚੇ ਦੇ ਨਾਲ ਹੀ ਬੱਸ ਸੇਵਾਵਾਂ ਵਿੱਚ ਸੁਧਾਰ ਕਰਨਾ ਇੱਕ ਚੰਗਾ ਕਦਮ ਹੈ। ਪਿਛਲੇ ਲਗਭਗ ਇੱਕ ਦਹਾਕੇ ਦੌਰਾਨ ਵੱਡੇ ਬੁਨਿਆਦੀ ਢਾਂਚੇ ਦੇ ਕਈ ਪ੍ਰਾਜੈਕਟ ਪੂਰੇ ਹੋਏ, ਪਰ ਉਨ੍ਹਾਂ ਦੇ ਨਾਲ ਬੱਸ ਸੇਵਾਵਾਂ ਵਿੱਚ ਲੋੜੀਂਦਾ ਸੁਧਾਰ ਨਹੀਂ ਹੋਇਆ। ਇਸ ਲਈ ਨਵੇਂ ਢਾਂਚੇ ਦੇ ਨਾਲ-ਨਾਲ ਜਨਤਕ ਆਵਾਜਾਈ ਸੇਵਾਵਾਂ ਸ਼ੁਰੂ ਕਰਨਾ ਇੱਕ ਸਕਾਰਾਤਮਕ ਤਬਦੀਲੀ ਮੰਨੀ ਜਾ ਰਹੀ ਹੈ। ਮੁਹਿੰਮ ਨਾਲ ਜੁੜੇ ਲੋਕਾਂ ਦਾ ਮੰਨਣਾ ਹੈ ਕਿ ਇਹ ਤਿੰਨ ਨਵੇਂ ਲਗਭਗ-ਫ੍ਰੀਕਵੈਂਟ ਬੱਸ ਰੂਟ ਮੈਲਬੌਰਨ ਵਿੱਚ ਸਭ ਤੋਂ ਵੱਧ ਵਰਤੇ ਜਾਣ ਵਾਲੇ ਰੂਟਾਂ ਵਿੱਚ ਸ਼ਾਮਲ ਹੋ ਸਕਦੇ ਹਨ। ਇਸ ਦਾ ਕਾਰਨ ਵਿੰਡਮ ਦੇ ਮੌਜੂਦਾ ਲਗਭਗ-ਫ੍ਰੀਕਵੈਂਟ ਬੱਸ ਰੂਟਾਂ ਦੀ ਚੰਗੀ ਵਰਤੋਂ ਅਤੇ ਮੰਗ ਹੈ।ਇਨ੍ਹਾਂ ਬੱਸ ਸੇਵਾਵਾਂ ਨਾਲ ਮੈਲਬੌਰਨ ਦੇ ਤੇਜ਼ੀ ਨਾਲ ਵਧ ਰਹੇ ਪਰ ਅਕਸਰ ਨਜ਼ਰਅੰਦਾਜ਼ ਕੀਤੇ ਜਾਂਦੇ ਇਲਾਕਿਆਂ ਦੇ ਵਸਨੀਕਾਂ ਨੂੰ ਰੁਜ਼ਗਾਰ ਅਤੇ ਹੋਰ ਜ਼ਰੂਰੀ ਸੇਵਾਵਾਂ ਤੱਕ ਪਹੁੰਚਣ ਵਿੱਚ ਮਦਦ ਮਿਲ ਸਕਦੀ ਹੈ। ਲੋਕ ਹੁਣ ਸਿਟੀ ਦੇ ਨਾਲ-ਨਾਲ Tarneit ਅਤੇ Werribee ਵਰਗੇ ਸਥਾਨਕ ਕੇਂਦਰਾਂ ਤੱਕ ਵੀ ਆਸਾਨੀ ਨਾਲ ਪਹੁੰਚ ਸਕਣਗੇ।
ਹੁਣ ਮੁਹਿੰਮ ਨਾਲ ਜੁੜੇ ਲੋਕਾਂ ਨੇ ਵਿੰਡਮ ਅਤੇ ਪੱਛਮੀ ਮੈਲਬੌਰਨ ਦੇ ਹੋਰ ਇਲਾਕਿਆਂ ਵਿੱਚ ਵੀ ਬੱਸ ਸੇਵਾਵਾਂ ਨੂੰ ਸੁਧਾਰਨ ਦੀ ਮੰਗ ਕੀਤੀ ਹੈ। Point Cook ਅਤੇ Melton ਵਰਗੇ ਇਲਾਕਿਆਂ ਵਿੱਚ ਵੀ ਵਧੇਰੇ ਅਤੇ ਨਿਯਮਤ ਬੱਸ ਸੇਵਾਵਾਂ ਦੀ ਲੋੜ ਦੱਸੀ ਗਈ ਹੈ।Werribee ਵਾਸੀ ਅਤੇ Sustainable Cities ਦੀ ਬੁਲਾਰਾ ਗ੍ਰੇਸ ਐਅਰ ਨੇ ਕਿਹਾ, “ਇਹ ਨਵੀਆਂ ਸੇਵਾਵਾਂ ਦਿਖਾਉਂਦੀਆਂ ਹਨ ਕਿ ਸਰਕਾਰ ਹੁਣ ਭਾਈਚਾਰੇ ਦੀ ਗੱਲ ਸੁਣਨੀ ਸ਼ੁਰੂ ਕਰ ਰਹੀ ਹੈ। ਹੁਣ ਸਮਾਂ ਆ ਗਿਆ ਹੈ ਕਿ ਪੱਛਮੀ ਮੈਲਬੌਰਨ ਦੇ ਸਾਰੇ MP ਅਤੇ ਚੋਣ ਉਮੀਦਵਾਰ ਮਿਲ ਕੇ ਪੂਰੇ ਪੱਛਮੀ ਇਲਾਕੇ ਲਈ ਇੱਕ ਨਿਯਮਤ ਅਤੇ ਵਧੀਆ ਬੱਸ ਨੈੱਟਵਰਕ ਦੀ ਹਮਾਇਤ ਕਰਨ।