ਇਮੀਗ੍ਰੇਸ਼ਨ ਅਰਜ਼ੀਆਂ ਦੇ ਨਾਂ ‘ਤੇ ਧੋਖਾਧੜੀ ਦੇ ਦੋਸ਼ਾਂ ਹੇਠ ਹਿਊਸਟਨ ਦੀ ਵਕੀਲ ਗ੍ਰਿਫ਼ਤਾਰ
ਟੈਕਸਾਸ ਦੇ ਹਿਊਸਟਨ ਸ਼ਹਿਰ ਦੀ 44 ਸਾਲਾ ਇਮੀਗ੍ਰੇਸ਼ਨ ਵਕੀਲ ਅਲਾ ਨੋਵੋਵੀਏਸਕੀ ਨੂੰ ਕਥਿਤ ਧੋਖਾਧੜੀ ਦੇ ਮਾਮਲੇ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਅਮਰੀਕੀ ਨਿਆਂ ਵਿਭਾਗ ਅਨੁਸਾਰ ਉਸ ਵਿਰੁੱਧ ਡਾਕ ਰਾਹੀਂ ਧੋਖਾਧੜੀ ਕਰਨ ਅਤੇ ਸੰਘੀ ਅਧਿਕਾਰੀਆਂ ਸਾਹਮਣੇ ਝੂਠੇ ਬਿਆਨ ਦੇਣ ਦੇ ਦੋਸ਼ ਲਗਾਏ ਗਏ ਹਨ। ਗ੍ਰਿਫ਼ਤਾਰੀ ਤੋਂ ਬਾਅਦ ਉਸਨੂੰ ਅਮਰੀਕੀ ਮੈਜਿਸਟ੍ਰੇਟ ਜੱਜ ਰਿਚਰਡ ਬੈਨੇਟ ਦੀ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ।
ਅਦਾਲਤ ਵਿਚ ਦਾਖ਼ਲ ਦੋਸ਼-ਪੱਤਰ ਮੁਤਾਬਕ ਨੋਵੋਵੀਏਸਕੀ ਨੇ ਕਥਿਤ ਤੌਰ ‘ਤੇ ਕਈ ਮੁਵੱਕਲਾਂ ਤੋਂ ਉਨ੍ਹਾਂ ਦਾ ਰੁਜ਼ਗਾਰ ਦਰਜਾ ਸਥਾਪਤ ਜਾਂ ਤਬਦੀਲ ਕਰਵਾਉਣ ਅਤੇ ਕੰਮਕਾਜੀ ਵੀਜ਼ਿਆਂ ਲਈ ਅਰਜ਼ੀਆਂ ਦਾਖ਼ਲ ਕਰਨ ਦੇ ਨਾਂ ਉੱਤੇ ਪੈਸੇ ਲਏ। ਦੋਸ਼ ਹੈ ਕਿ ਰਕਮ ਲੈਣ ਦੇ ਬਾਵਜੂਦ ਉਸਨੇ ਕੁਝ ਅਰਜ਼ੀਆਂ ਜਮ੍ਹਾਂ ਹੀ ਨਹੀਂ ਕਰਵਾਈਆਂ, ਜਦਕਿ ਕੁਝ ਅਰਜ਼ੀਆਂ ਸਿਰਫ਼ ਅਧੂਰੀਆਂ ਦਾਖ਼ਲ ਕੀਤੀਆਂ ਗਈਆਂ।
ਦੋਸ਼-ਪੱਤਰ ਵਿਚ ਇਹ ਵੀ ਕਿਹਾ ਗਿਆ ਹੈ ਕਿ ਵਕੀਲ ਨੇ ਆਪਣੇ ਮੁਵੱਕਲਾਂ ਨੂੰ ਕਥਿਤ ਤੌਰ ‘ਤੇ ਜਾਅਲੀ ਦਸਤਾਵੇਜ਼ ਜਾਂ ਅਜਿਹੇ ਹਵਾਲਾ ਨੰਬਰ ਦਿੱਤੇ, ਜਿਹੜੇ ਉਨ੍ਹਾਂ ਦੀ ਬਜਾਏ ਹੋਰਨਾਂ ਸਰਗਰਮ ਇਮੀਗ੍ਰੇਸ਼ਨ ਮਾਮਲਿਆਂ ਨਾਲ ਸਬੰਧਤ ਸਨ। ਇਨ੍ਹਾਂ ਦਸਤਾਵੇਜ਼ਾਂ ਅਤੇ ਨੰਬਰਾਂ ਰਾਹੀਂ ਮੁਵੱਕਲਾਂ ਨੂੰ ਇਹ ਵਿਸ਼ਵਾਸ ਦਿਵਾਇਆ ਗਿਆ ਕਿ ਇਮੀਗ੍ਰੇਸ਼ਨ ਅਧਿਕਾਰੀ ਉਨ੍ਹਾਂ ਦੀਆਂ ਅਰਜ਼ੀਆਂ ਉੱਤੇ ਕਾਰਵਾਈ ਕਰ ਰਹੇ ਹਨ।
ਜੇਕਰ ਨੋਵੋਵੀਏਸਕੀ ਦੋਸ਼ੀ ਕਰਾਰ ਦਿੱਤੀ ਜਾਂਦੀ ਹੈ, ਤਾਂ ਉਸਨੂੰ ਵੱਧ ਤੋਂ ਵੱਧ 20 ਸਾਲ ਸੰਘੀ ਜੇਲ੍ਹ ਅਤੇ ਢਾਈ ਲੱਖ ਡਾਲਰ ਤੱਕ ਦੇ ਜੁਰਮਾਨੇ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਹਾਲਾਂਕਿ ਦੋਸ਼-ਪੱਤਰ ਵਿਚ ਲਗਾਏ ਗਏ ਦੋਸ਼ ਅਜੇ ਸਿਰਫ਼ ਇਲਜ਼ਾਮ ਹਨ ਅਤੇ ਅਦਾਲਤ ਵਿਚ ਦੋਸ਼ ਸਾਬਤ ਹੋਣ ਤੱਕ ਉਸਨੂੰ ਬੇਕਸੂਰ ਮੰਨਿਆ ਜਾਵੇਗਾ।ਇਸ ਮਾਮਲੇ ਦੀ ਜਾਂਚ ਹੋਮਲੈਂਡ ਸਕਿਓਰਿਟੀ ਵਿਭਾਗ ਦੇ ਇੰਸਪੈਕਟਰ ਜਨਰਲ ਦਫ਼ਤਰ ਅਤੇ ਅਮਰੀਕੀ ਡਾਕ ਸੇਵਾ ਦੇ ਇੰਸਪੈਕਟਰ ਜਨਰਲ ਦਫ਼ਤਰ ਨੇ ਕੀਤੀ। ਜਾਂਚ ਵਿਚ ਅਮਰੀਕੀ ਨਾਗਰਿਕਤਾ ਅਤੇ ਇਮੀਗ੍ਰੇਸ਼ਨ ਸੇਵਾਵਾਂ ਅਤੇ ਹੈਰਿਸ ਕਾਊਂਟੀ ਕਾਂਸਟੇਬਲ ਦਫ਼ਤਰ ਨੇ ਵੀ ਸਹਿਯੋਗ ਦਿੱਤਾ। ਸਹਾਇਕ ਅਮਰੀਕੀ ਅਟਾਰਨੀ ਥਾਮਸ ਕਾਰਟਰ ਵੱਲੋਂ ਇਸ ਮਾਮਲੇ ਦੀ ਪੈਰਵੀ ਕੀਤੀ ਜਾ ਰਹੀ ਹੈ।
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.
