ਕੈਲੀਫੋਰਨੀਆ ਦੇ ਵੋਟਰ 3 ਨਵੰਬਰ ਨੂੰ 14 ਵੱਡੇ ਪ੍ਰਸਤਾਵਾਂ ‘ਤੇ ਕਰਨਗੇ ਫ਼ੈਸਲਾ

ਕੈਲੀਫੋਰਨੀਆ ਵਿਚ 3 ਨਵੰਬਰ 2026 ਨੂੰ ਆਮ ਚੋਣਾਂ ਹੋਣ ਜਾ ਰਹੀਆਂ ਹਨ। ਇਸ ਵਾਰ ਵੋਟਰ ਸਿਰਫ਼ ਉਮੀਦਵਾਰਾਂ ਨੂੰ ਹੀ ਵੋਟ ਨਹੀਂ ਪਾਉਣਗੇ, ਸਗੋਂ 14 ਵੱਖ-ਵੱਖ ਪ੍ਰਸਤਾਵਾਂ ਬਾਰੇ ਵੀ ਆਪਣੀ ਰਾਏ ਦੇਣਗੇ। ਇਹ ਪ੍ਰਸਤਾਵ ਘਰਾਂ, ਟੈਕਸਾਂ, ਸਰਕਾਰੀ ਖ਼ਰਚੇ, ਸਿਹਤ, ਚੋਣ ਪ੍ਰਣਾਲੀ ਅਤੇ ਹੋਰ ਲੋਕਾਂ ਨਾਲ ਸਬੰਧਤ ਮੁੱਦਿਆਂ ਬਾਰੇ ਹਨ।
ਇਨ੍ਹਾਂ ਵਿਚੋਂ ਕੁਝ ਪ੍ਰਸਤਾਵ ਘਰ ਖਰੀਦਣ ਅਤੇ ਸਸਤੇ ਮਕਾਨ ਬਣਾਉਣ ਨਾਲ ਜੁੜੇ ਹਨ। ਇੱਕ ਪ੍ਰਸਤਾਵ ਤਹਿਤ ਕਿਫ਼ਾਇਤੀ ਘਰਾਂ ਅਤੇ ਸਾਬਕਾ ਫ਼ੌਜੀਆਂ ਲਈ ਵੱਡੀ ਰਕਮ ਦੇ ਬਾਂਡ ਜਾਰੀ ਕਰਨ ਦੀ ਗੱਲ ਕੀਤੀ ਗਈ ਹੈ। ਇੱਕ ਹੋਰ ਪ੍ਰਸਤਾਵ ਮੱਧ ਵਰਗ ਦੇ ਲੋਕਾਂ ਨੂੰ ਨਵਾਂ ਘਰ ਖਰੀਦਣ ਲਈ ਕਰਜ਼ਾ ਦੇਣ ਵਾਲਾ ਪ੍ਰੋਗਰਾਮ ਬਣਾਉਣ ਨਾਲ ਸਬੰਧਤ ਹੈ।
ਕੁਝ ਪ੍ਰਸਤਾਵ ਟੈਕਸਾਂ ਬਾਰੇ ਹਨ। ਇੱਕ ਪ੍ਰਸਤਾਵ ਉੱਚ ਆਮਦਨ ਵਾਲੇ ਲੋਕਾਂ ਉੱਤੇ ਲੱਗੇ ਵਾਧੂ ਟੈਕਸ ਨੂੰ ਜਾਰੀ ਰੱਖਣ ਦੀ ਗੱਲ ਕਰਦਾ ਹੈ। ਇੱਕ ਹੋਰ ਪ੍ਰਸਤਾਵ ਬਹੁਤ ਜ਼ਿਆਦਾ ਦੌਲਤ ਵਾਲੇ ਲੋਕਾਂ ਉੱਤੇ ਇਕ ਵਾਰ ਲਈ ਵਾਧੂ ਟੈਕਸ ਲਗਾਉਣ ਨਾਲ ਸਬੰਧਤ ਹੈ। ਕੁਝ ਪ੍ਰਸਤਾਵ ਇਹ ਵੀ ਤੈਅ ਕਰਨਗੇ ਕਿ ਸਰਕਾਰ ਨਵੇਂ ਟੈਕਸ ਕਿਵੇਂ ਲਗਾ ਸਕਦੀ ਹੈ ਅਤੇ ਉਹ ਪੈਸਾ ਕਿੱਥੇ ਖ਼ਰਚਿਆ ਜਾਵੇ।
ਚੋਣ ਪ੍ਰਣਾਲੀ ਨਾਲ ਜੁੜੇ ਪ੍ਰਸਤਾਵ ਵੀ ਵੋਟਰਾਂ ਦੇ ਸਾਹਮਣੇ ਹੋਣਗੇ। ਇੱਕ ਪ੍ਰਸਤਾਵ ਵੋਟ ਪਾਉਣ ਵੇਲੇ ਪਛਾਣ ਅਤੇ ਨਾਗਰਿਕਤਾ ਦੀ ਜਾਂਚ ਨੂੰ ਹੋਰ ਸਖ਼ਤ ਕਰਨ ਦੀ ਗੱਲ ਕਰਦਾ ਹੈ। ਇੱਕ ਹੋਰ ਪ੍ਰਸਤਾਵ ਚੋਣ ਮੁਹਿੰਮਾਂ ਵਿੱਚ ਸਰਕਾਰੀ ਪੈਸੇ ਦੀ ਵਰਤੋਂ ਨਾਲ ਸਬੰਧਤ ਹੈ।
ਸਿਹਤ ਦੇ ਖੇਤਰ ਵਿਚ ਵੀ ਕੁਝ ਪ੍ਰਸਤਾਵ ਹਨ। ਇੱਕ ਪ੍ਰਸਤਾਵ ਮੈਡੀਕਲ ਖੋਜ ਲਈ ਵੱਡੀ ਰਕਮ ਦੇ ਬਾਂਡ ਜਾਰੀ ਕਰਨ ਬਾਰੇ ਹੈ, ਜਦਕਿ ਇੱਕ ਹੋਰ ਪ੍ਰਸਤਾਵ ਕਮਿਊਨਿਟੀ ਸਿਹਤ ਕਲੀਨਿਕਾਂ ਦੇ ਪੈਸੇ ਦੀ ਵਰਤੋਂ ਲਈ ਨਵੇਂ ਨਿਯਮ ਲਿਆ ਸਕਦਾ ਹੈ।
ਵੋਟਰਾਂ ਲਈ ਸਭ ਤੋਂ ਜ਼ਰੂਰੀ ਗੱਲ ਇਹ ਹੈ ਕਿ ਉਹ ਹਰ ਪ੍ਰਸਤਾਵ ਨੂੰ ਸਮਝ ਕੇ ਵੋਟ ਪਾਉਣ। ਡਾਕ ਰਾਹੀਂ ਬੈਲਟ ਅਕਤੂਬਰ ਦੀ ਸ਼ੁਰੂਆਤ ਵਿਚ ਭੇਜੇ ਜਾਣਗੇ ਅਤੇ 3 ਨਵੰਬਰ ਨੂੰ ਚੋਣ ਦਿਵਸ ਹੋਵੇਗਾ। ਉਸ ਦਿਨ ਵੋਟ ਕੇਂਦਰ ਸਵੇਰੇ 7 ਵਜੇ ਤੋਂ ਰਾਤ 8 ਵਜੇ ਤੱਕ ਖੁੱਲ੍ਹੇ ਰਹਿਣਗੇ।
ਇਸ ਵਾਰ ਦੀ ਚੋਣ ਵਿਚ ਇਹ 14 ਪ੍ਰਸਤਾਵ ਕੈਲੀਫੋਰਨੀਆ ਦੇ ਲੋਕਾਂ ਦੀ ਜ਼ਿੰਦਗੀ, ਟੈਕਸਾਂ, ਘਰਾਂ ਅਤੇ ਸਰਕਾਰੀ ਸੇਵਾਵਾਂ ਉੱਤੇ ਲੰਬੇ ਸਮੇਂ ਦਾ ਅਸਰ ਪਾ ਸਕਦੇ ਹਨ।