ਟਰੰਪ ਦੀ ਤਸਵੀਰ ਵਾਲਾ ਇੱਕ ਡਾਲਰ ਦਾ ਨਵਾਂ ਸਿੱਕਾ ਵਿਕਰੀ ਲਈ ਜਾਰੀ

 ਅਮਰੀਕਾ ਦੀ 250ਵੀਂ ਵਰ੍ਹੇਗੰਢ ਮੌਕੇ ਅਮਰੀਕੀ ਟਕਸਾਲ ਵੱਲੋਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਤਸਵੀਰ ਵਾਲਾ ਨਵਾਂ ਇੱਕ ਡਾਲਰ ਦਾ ਸਿੱਕਾ ਵਿਕਰੀ ਲਈ ਜਾਰੀ ਕੀਤਾ ਗਿਆ ਹੈ। ਇਹ ਵਿਸ਼ੇਸ਼ ਸਿੱਕਾ 2 ਸਤੰਬਰ 2026 ਤੋਂ ਖਰੀਦ ਲਈ ਉਪਲਬਧ ਹੋਇਆ ਹੈ ਅਤੇ ਕਲੈਕਟਰਾਂ ਵਿਚ ਇਸਨੂੰ ਲੈ ਕੇ ਕਾਫ਼ੀ ਦਿਲਚਸਪੀ ਦੇਖੀ ਜਾ ਰਹੀ ਹੈ।
ਇਸ ਸਿੱਕੇ ਦੇ ਇੱਕ ਪਾਸੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਤਸਵੀਰ ਬਣਾਈ ਗਈ ਹੈ, ਜਦਕਿ ਦੂਜੇ ਪਾਸੇ ਅਮਰੀਕੀ ਰਾਸ਼ਟਰਪਤੀ ਦੀ ਅਧਿਕਾਰਕ ਮੋਹਰ ਅਤੇ ਦੇਸ਼ ਦੀ 250ਵੀਂ ਵਰ੍ਹੇਗੰਢ ਨਾਲ ਜੁੜੇ ਨਿਸ਼ਾਨ ਦਰਸਾਏ ਗਏ ਹਨ।
ਇੱਕ ਅਹਿਮ ਗੱਲ ਇਹ ਹੈ ਕਿ ਇਸਨੂੰ ਕਈ ਥਾਵਾਂ ‘ਤੇ ”ਗੋਲਡ ਕੌਇਨ” ਕਿਹਾ ਜਾ ਰਿਹਾ ਹੈ, ਪਰ ਇਹ ਅਸਲੀ ਸੋਨੇ ਦਾ ਸਿੱਕਾ ਨਹੀਂ ਹੈ। ਇਸਦੀ ਧਾਤੂ ਬਣਤਰ ਅਜਿਹੀ ਹੈ ਕਿ ਇਸਨੂੰ ਸੁਨਹਿਰੀ ਰੰਗ ਮਿਲਦਾ ਹੈ। ਇਸ ਲਈ ਇਸਨੂੰ ਅਸਲੀ ਸੋਨੇ ਦੀ ਕੀਮਤ ਵਾਲਾ ਸਿੱਕਾ ਸਮਝਣਾ ਗਲਤ ਹੋਵੇਗਾ।ਇਹ ਸਿੱਕੇ ਵੱਖ-ਵੱਖ ਪੈਕਿੰਗ ਵਿਚ ਵੇਚੇ ਜਾ ਰਹੇ ਹਨ। 25 ਸਿੱਕਿਆਂ ਦਾ ਇੱਕ ਰੋਲ 61 ਡਾਲਰ ਵਿਚ ਅਤੇ 100 ਸਿੱਕਿਆਂ ਦਾ ਬੈਗ 154 ਡਾਲਰ 50 ਸੈਂਟ ਵਿਚ ਉਪਲਬਧ ਕਰਵਾਇਆ ਗਿਆ ਹੈ। ਇਸ ਕਰਕੇ ਇਹ ਸਿੱਕੇ ਆਮ ਲੈਣ-ਦੇਣ ਨਾਲੋਂ ਵਧੇਰੇ ਕਲੈਕਟਰਾਂ ਅਤੇ ਯਾਦਗਾਰੀ ਵਸਤੂਆਂ ਇਕੱਠੀਆਂ ਕਰਨ ਵਾਲਿਆਂ ਲਈ ਖਾਸ ਮੰਨੇ ਜਾ ਰਹੇ ਹਨ।
ਇਨ੍ਹਾਂ ਵਿਚੋਂ ਕਰੀਬ 2 ਲੱਖ 50 ਹਜ਼ਾਰ ਸਿੱਕੇ 4 ਜੁਲਾਈ 2026 ਨੂੰ ਵਿਸ਼ੇਸ਼ ਤੌਰ ‘ਤੇ ਤਿਆਰ ਕੀਤੇ ਗਏ ਸਨ। ਇਨ੍ਹਾਂ ਉੱਤੇ 4 ਜੁਲਾਈ ਨਾਲ ਸਬੰਧਤ ਖਾਸ ਨਿਸ਼ਾਨ ਵੀ ਲਗਾਇਆ ਗਿਆ ਹੈ। ਇਹ ਵਿਸ਼ੇਸ਼ ਸਿੱਕੇ ਆਮ ਰੋਲਾਂ ਅਤੇ ਬੈਗਾਂ ਵਿਚ ਮਿਲ ਸਕਦੇ ਹਨ, ਜਿਸ ਕਾਰਨ ਉਨ੍ਹਾਂ ਦੀ ਕਲੈਕਟਰ ਕੀਮਤ ਭਵਿੱਖ ਵਿਚ ਵਧਣ ਦੀ ਸੰਭਾਵਨਾ ਵੀ ਮੰਨੀ ਜਾ ਰਹੀ ਹੈ।
ਹਾਲਾਂਕਿ, ਮੌਜੂਦਾ ਰਾਸ਼ਟਰਪਤੀ ਦੀ ਤਸਵੀਰ ਅਮਰੀਕੀ ਕਰੰਸੀ ਉੱਤੇ ਲਗਾਉਣ ਨੂੰ ਲੈ ਕੇ ਵਿਵਾਦ ਵੀ ਖੜ੍ਹਾ ਹੋਇਆ ਹੈ। ਕੁਝ ਡੈਮੋਕ੍ਰੇਟ ਨੇਤਾਵਾਂ ਅਤੇ ਸਿੱਕਾ ਮਾਹਿਰਾਂ ਨੇ ਇਸਦੀ ਕਾਨੂੰਨੀਤਾ ‘ਤੇ ਸਵਾਲ ਉਠਾਏ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਅਮਰੀਕੀ ਪ੍ਰੰਪਰਾ ਅਨੁਸਾਰ ਜੀਊਂਦੇ ਵਿਅਕਤੀਆਂ ਦੀ ਤਸਵੀਰ ਕਰੰਸੀ ਉੱਤੇ ਲਗਾਉਣ ਤੋਂ ਆਮ ਤੌਰ ‘ਤੇ ਪਰਹੇਜ਼ ਕੀਤਾ ਗਿਆ ਹੈ।
ਦੂਜੇ ਪਾਸੇ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਦੇਸ਼ ਦੀ 250ਵੀਂ ਵਰ੍ਹੇਗੰਢ ਮਨਾਉਣ ਲਈ ਵਿਸ਼ੇਸ਼ ਇੱਕ ਡਾਲਰ ਦੇ ਸਿੱਕੇ ਜਾਰੀ ਕਰਨ ਦੀ ਕਾਨੂੰਨੀ ਵਿਵਸਥਾ ਪਹਿਲਾਂ ਹੀ ਕੀਤੀ ਗਈ ਸੀ।
ਇਤਿਹਾਸਕ ਤੌਰ ‘ਤੇ ਇਹ ਘਟਨਾ ਇਸ ਲਈ ਵੀ ਖਾਸ ਹੈ ਕਿਉਂਕਿ 1926 ਵਿਚ ਰਾਸ਼ਟਰਪਤੀ ਕੈਲਵਿਨ ਕੂਲਿਜ ਦੀ ਤਸਵੀਰ ਵੀ ਇੱਕ ਯਾਦਗਾਰੀ ਅਮਰੀਕੀ ਸਿੱਕੇ ਉੱਤੇ ਲਗਾਈ ਗਈ ਸੀ। ਹੁਣ ਲਗਭਗ ਇੱਕ ਸਦੀ ਬਾਅਦ ਇੱਕ ਮੌਜੂਦਾ ਰਾਸ਼ਟਰਪਤੀ ਦੀ ਤਸਵੀਰ ਮੁੜ ਅਮਰੀਕੀ ਸਿੱਕੇ ਉੱਤੇ ਸਾਹਮਣੇ ਆਈ ਹੈ।ਇਸ ਨਵੇਂ ਸਿੱਕੇ ਨੇ ਇੱਕ ਪਾਸੇ ਕਲੈਕਟਰਾਂ ਵਿਚ ਉਤਸ਼ਾਹ ਪੈਦਾ ਕੀਤਾ ਹੈ, ਜਦਕਿ ਦੂਜੇ ਪਾਸੇ ਇਸਦੀ ਕਾਨੂੰਨੀਤਾ ਅਤੇ ਅਮਰੀਕੀ ਰਾਜਨੀਤਿਕ ਪ੍ਰੰਪਰਾਵਾਂ ਨੂੰ ਲੈ ਕੇ ਚਰਚਾ ਵੀ ਤੇਜ਼ ਹੋ ਗਈ ਹੈ।