ਅਮਰੀਕੀ ਟਰੱਕ ਡਰਾਈਵਰਾਂ ਲਈ ਵੱਡੀ ਚੇਤਾਵਨੀ!

ਅਮਰੀਕਾ ਵਿਚ ਟਰੱਕ ਚਲਾਉਣ ਵਾਲੇ ਡਰਾਈਵਰਾਂ ਅਤੇ ਟਰੱਕਿੰਗ ਕੰਪਨੀਆਂ ਲਈ ਫੈਡਰਲ ਮੋਟਰ ਕੈਰੀਅਰ ਸੇਫਟੀ ਐਡਮਿਨਿਸਟ੍ਰੇਸ਼ਨ ਨੇ ਇੱਕ ਮਹੱਤਵਪੂਰਨ ਚੇਤਾਵਨੀ ਜਾਰੀ ਕੀਤੀ ਹੈ। TRUCKSTAFF ਈ.ਐੱਲ.ਡੀ. ਨੂੰ ਐੱਫ.ਐੱਮ.ਸੀ.ਐੱਸ.ਏ. ਦੀ ਮਨਜ਼ੂਰਸ਼ੁਦਾ ਇਲੈਕਟ੍ਰਾਨਿਕ ਲੌਗਿੰਗ ਡਿਵਾਈਸਿਸ ਦੀ ਸੂਚੀ ਵਿਚੋਂ ਹਟਾਇਆ ਜਾ ਚੁੱਕਾ ਹੈ ਅਤੇ ਇਸ ਡਿਵਾਈਸ ਨੂੰ ਵਰਤਣ ਵਾਲਿਆਂ ਨੂੰ 23 ਅਗਸਤ 2026 ਤੋਂ ਪਹਿਲਾਂ ਇਸ ਦੀ ਥਾਂ ਇੱਕ ਮਨਜ਼ੂਰਸ਼ੁਦਾ ਈ.ਐੱਲ.ਡੀ. ਲਗਾਉਣਾ ਪਵੇਗਾ।
ਐੱਫ.ਐੱਮ.ਸੀ.ਐੱਸ.ਏ. ਨੇ 23 ਜੂਨ 2026 ਨੂੰ TRUCKSTAFF ਈ.ਐੱਲ.ਡੀ. ਨੂੰ ਆਪਣੀ ਰਜਿਸਟਰਡ ਈ.ਐੱਲ.ਡੀ. ਲਿਸਟ ਵਿਚੋਂ ਹਟਾਇਆ ਸੀ। ਏਜੰਸੀ ਮੁਤਾਬਕ ਇਹ ਡਿਵਾਈਸ ਫੈਡਰਲ ਈ.ਐੱਲ.ਡੀ. ਲੋੜਾਂ ਦੀਆਂ ਘੱਟੋ-ਘੱਟ ਤਕਨੀਕੀ ਸ਼ਰਤਾਂ ਪੂਰੀਆਂ ਕਰਨ ਵਿਚ ਨਾਕਾਮ ਰਹੀ। ਪ੍ਰਭਾਵਿਤ ਡਿਵਾਈਸ ਦਾ ਮਾਡਲ ਟੀ.ਆਰ.ਕੇ.ਐੱਸ.ਐੱਫ. ਅਤੇ ਈ.ਐੱਲ.ਡੀ. ਪਛਾਣਕਰਤਾ ਟੀ.ਆਰ.ਐੱਸ.227 ਹੈ।
ਈ.ਐੱਲ.ਡੀ. ਟਰੱਕ ਡਰਾਈਵਰ ਦੇ ਡਰਾਈਵਿੰਗ ਘੰਟੇ, ਔਨ-ਡਿਊਟੀ ਅਤੇ ਆਫ-ਡਿਊਟੀ ਸਮੇਂ ਦਾ ਇਲੈਕਟ੍ਰਾਨਿਕ ਰਿਕਾਰਡ ਰੱਖਦਾ ਹੈ। ਇਸ ਦਾ ਮਕਸਦ ਸਮਾਂ-ਸਰਵਿਸ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣਾ ਅਤੇ ਡਰਾਈਵਰ ਦੀ ਥਕਾਵਟ ਨਾਲ ਜੁੜੇ ਖ਼ਤਰਿਆਂ ਨੂੰ ਘਟਾਉਣਾ ਹੈ।
ਐੱਫ.ਐੱਮ.ਸੀ.ਐੱਸ.ਏ. ਨੇ TRUCKSTAFF ਵਰਤ ਰਹੀਆਂ ਟਰੱਕਿੰਗ ਕੰਪਨੀਆਂ ਅਤੇ ਡਰਾਈਵਰਾਂ ਨੂੰ ਕਿਹਾ ਹੈ ਕਿ ਉਹ ਇਸ ਰੱਦ ਕੀਤੇ ਜੰਤਰ ਦੀ ਵਰਤੋਂ ਬੰਦ ਕਰਕੇ ਅਸਥਾਈ ਤੌਰ ‘ਤੇ ਪੇਪਰ ਲੌਗਸ ਜਾਂ ਅਨੁਕੂਲ ਲਾਗਿੰਗ ਸਾਫਟਵੇਅਰ ਰਾਹੀਂ ਆਪਣਾ ਸੇਵਾ ਦੇ ਘੰਟੇ ਦਾ ਰਿਕਾਰਡ ਰੱਖਣ ਅਤੇ 23 ਅਗਸਤ ਤੋਂ ਪਹਿਲਾਂ ਐੱਫ.ਐੱਮ.ਸੀ.ਐੱਸ.ਏ. ਦੀ ਰਜਿਸਟਰਡ ਲਿਸਟ ਵਿਚ ਮੌਜੂਦ ਕੋਈ ਹੋਰ ਅਨੁਕੂਲ ਈ.ਐੱਲ.ਡੀ. ਲਗਾ ਲੈਣ।
23 ਅਗਸਤ ਤੋਂ ਬਾਅਦ ਮਾਮਲਾ ਗੰਭੀਰ ਹੋ ਸਕਦਾ ਹੈ। ਐੱਫ.ਐੱਮ.ਸੀ.ਐੱਸ.ਏ. ਦੀ ਅਧਿਕਾਰਤ ਈ.ਐੱਲ.ਡੀ. ਜਾਣਕਾਰੀ ਮੁਤਾਬਕ ਜੇ ਕੋਈ ਮੋਟਰ ਕੈਰੀਅਰ ਇਸ ਰੱਦ ਈ.ਐੱਲ.ਡੀ. ਨੂੰ ਵਰਤਦਾ ਰਹਿੰਦਾ ਹੈ, ਤਾਂ ਉਸ ਨੂੰ ਬਿਨਾਂ ਮਨਜ਼ੂਰਸ਼ੁਦਾ ਈ.ਐੱਲ.ਡੀ. ਦੇ ਕੰਮ ਕਰਦਾ ਮੰਨਿਆ ਜਾ ਸਕਦਾ ਹੈ। ਡਰਾਈਵਰ ਨੂੰ ”ਡਿਊਟੀ ਸਥਿਤੀ ਦਾ ਕੋਈ ਰਿਕਾਰਡ ਨਹੀਂ” ਉਲੰਘਣਾ ਦਿੱਤੀ ਜਾ ਸਕਦੀ ਹੈ ਅਤੇ ਕਮਰਸ਼ੀਅਲ ਵਹੀਕਲ ਸੇਫਟੀ ਅਲਾਇੰਸ ਦੇ ਨਿਯਮਾਂ ਤਹਿਤ ਆਊਟ-ਆਫ-ਸਰਵਿਸ ਵੀ ਕੀਤਾ ਜਾ ਸਕਦਾ ਹੈ।
ਇਸ ਲਈ TRUCKSTAFF ਈ.ਐੱਲ.ਡੀ. ਵਰਤਣ ਵਾਲੇ ਪੰਜਾਬੀ ਟਰੱਕ ਡਰਾਈਵਰਾਂ ਲਈ ਸਭ ਤੋਂ ਜ਼ਰੂਰੀ ਗੱਲ ਇਹ ਹੈ ਕਿ ਉਹ ਆਪਣੇ ਕੈਰੀਅਰ ਜਾਂ ਸੇਫਟੀ ਡਿਪਾਰਟਮੈਂਟ ਨਾਲ ਹੁਣੇ ਜਾਂਚ ਕਰਨ। ਸਿਰਫ਼ ਡਿਵਾਈਸ ਜਾਂ ਐਪ ਦਾ ਨਾਂ ਦੇਖਣ ਦੀ ਬਜਾਏ ਮਾਡਲ ਟੀ.ਆਰ.ਕੇ.ਐੱਸ.ਐੱਫ. ਅਤੇ ਪਛਾਣਕਰਤਾ ਟੀ.ਆਰ.ਐੱਸ.227 ਵੀ ਮਿਲਾਇਆ ਜਾਵੇ। ਜੇ ਇਹੀ ਡਿਵਾਈਸ ਹੈ, ਤਾਂ 23 ਅਗਸਤ ਦੀ ਡੈਡਲਾਈਨ ਤੋਂ ਪਹਿਲਾਂ ਅਨੁਕੂਲ ਈ.ਐੱਲ.ਡੀ. ਲਗਾਉਣਾ ਜ਼ਰੂਰੀ ਹੈ।਼