ਬਾਬੇ ਤੋਂ ਪੀੜਤ ਵਿਅਕਤੀ ਨੇ ਥਾਣੇ ’ਚ ਅੱਗ ਲਾ ਕੇ ਦਿੱਤੀ ਜਾਨ, ਗ਼ਰੀਬੀ ਹਟਾਉਣ ਦੇ ਉਪਾਅ ਵਜੋਂ ਲਏ ਸਨ 53000 ਰੁਪਏ

ਬਾਬੇ ਤੋਂ ਪੀੜਤ ਵਿਅਕਤੀ ਨੇ ਖੰਨਾ ਦੇ ਸਿਟੀ ਇਕ ਪੁਲਿਸ ਥਾਣੇ ਦੇ ਬਾਥਰੂਮ ’ਚ ਖੁਦ ਨੂੰ ਅੱਗ ਲਗਾ ਆਤਮ ਹੱਤਿਆ ਕਰ ਲਈ ਹੈ। ਮ੍ਰਿਤਕ ਦੀ ਪਛਾਣ ਲੁਧਿਆਣਾ ਦੇ ਈਸ਼ਵਰ ਨਗਰ ਦੇ ਬਲਾਕ ਸੀ ਦੇ ਨਿਵਾਸੀ ਗੋਬਿੰਦ ਸਿੰਘ ਵਜੋਂ ਹੋਈ ਹੈ। ਗੋਬਿੰਦ ਸਿੰਘ  ਗਰੀਬੀ ਹਟਾਉਣ ਦੇ ਉਪਾਅ ਦੀ ਆੜ ਵਿੱਚ 53,000 ਰੁਪਏ ਦੀ ਧੋਖਾਧੜੀ ਤੋਂ ਪਰੇਸ਼ਾਨ ਸੀ। ਉਸ ਨੇ ਅੱਜ ਪੁਲਿਸ ਨੂੰ ਸ਼ਿਕਾਇਤ ਦੇਣ ਤੋ ਬਾਅਦ ਘਟਨਾ ਨੂੰ ਅੰਜਾਮ ਦਿੱਤਾ। ਉਸ ਦੀ ਖੁਦਕੁਸ਼ੀ ਦਾ ਕਾਫੀ ਸਮੇਂ ਤੱਕ ਪਤਾ ਹੀ ਨਹੀਂ ਲੱਗਿਆ, ਲਗਪਗ ਡੇਢ ਘੰਟੇ ਬਾਅਦ ਜਦੋਂ ਲੋਕ ਬਾਥਰੂਮ ਗਏ ਤਾਂ ਇਹ ਖੁਲਾਸਾ ਹੋਇਆ।ਬਾਥਰੂਮ ਖੋਲ੍ਹਣ ‘ਤੇ, ਵਿਅਕਤੀ ਦੀ ਸੜੀ ਹੋਈ ਲਾਸ਼ ਮਿਲੀ। ਮਾਮਲਾ ਸੀਨੀਅਰ ਅਧਿਕਾਰੀਆਂ ਦੇ ਧਿਆਨ ਵਿੱਚ ਲਿਆਉਣ ਤੋਂ ਬਾਅਦ, ਮੈਜਿਸਟ੍ਰੇਟ ਨੂੰ ਮਾਮਲੇ ਦੀ ਜਾਣਕਾਰੀ ਦਿੱਤੀ ਗਈ। ਮੈਜਿਸਟ੍ਰੇਟ ਜਾਂਚ ਲਈ ਪੁਲਿਸ ਸਟੇਸ਼ਨ ਪਹੁੰਚੇ। ਪੁਲਿਸ ਨੇ ਕਥਿਤ ਬਾਬਾ ਚਰਨ ਦਾਸ ਵਾਸੀ ਲਲਹੇੜੀ ਰੋਡ ਖੰਨਾ, ਉਸਦੇ ਸਾਥੀਆਂ ਮੱਖਣ ਸਿੰਘ, ਜੁਗਰਾਜ ਸਿੰਘ ਜਿੰਮੀ ਅਤੇ ਇੰਦਰਪ੍ਰੀਤ ਸਿੰਘ ਸਾਰੇ ਵਾਸੀ ਖੰਨਾ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ
ਐੱਸਐੱਸਪੀ ਡਾ. ਦਰਪਣ ਆਹਲੂਵਾਲੀਆ ਨੇ ਦੱਸਿਆ ਕਿ ਮ੍ਰਿਤਕ ਅੱਜ ਖੰਨਾ ਸਿਟੀ 1 ਪੁਲਿਸ ਸਟੇਸ਼ਨ ਵਿਖੇ ਕਥਿਤ ਬਾਬਾ ਅਤੇ ਉਸਦੇ ਤਿੰਨ ਸਾਥੀਆਂ ਵਿਰੁੱਧ ਸ਼ਿਕਾਇਤ ਦਰਜ ਕਰਵਾਉਣ ਲਈ ਪਹੁੰਚਿਆ ਸੀ। ਉਨ੍ਹਾਂ ਕਿਹਾ ਕਿ ਚਰਨ ਦਾਸ, ਜੋ ਕਿ ਆਪਣੇ ਆਪ ਨੂੰ ਬਾਬਾ ਹੋਣ ਦਾ ਦਾਅਵਾ ਕਰਦਾ ਸੀ, ਨੇ ਉਸ ਤੋਂ 53,000 ਰੁਪਏ ਲਏ ਸਨ। ਬਾਬੇ ਨੇ ਕੁਝ ਉਪਾਵਾਂ ਰਾਹੀਂ ਉਸਦੀ ਗਰੀਬੀ ਅਤੇ ਵਿੱਤੀ ਮੁਸ਼ਕਲਾਂ ਨੂੰ ਦੂਰ ਕਰਨ ਦਾ ਵਾਅਦਾ ਕੀਤਾ ਸੀ। ਜਦੋਂ ਕੁਝ ਨਹੀਂ ਹੋਇਆ, ਤਾਂ ਮ੍ਰਿਤਕ ਦੀ ਵਿੱਤੀ ਸਥਿਤੀ ਵਿਗੜ ਗਈ ਉਸਨੇ ਆਪਣੇ ਪੈਸੇ ਵਾਪਸ ਮੰਗੇ, ਪਰ ਮੁਲਜ਼ਮ ਨੇ ਇਨਕਾਰ ਕਰ ਦਿੱਤਾ। ਗੋਬਿੰਦ ਸਿੰਘ ਅੱਜ ਖੰਨਾ ਸਿਟੀ-1 ਪੁਲਿਸ ਸਟੇਸ਼ਨ ਗਿਆ ਅਤੇ ਸ਼ਿਕਾਇਤ ਦਰਜ ਕਰਵਾਈ ਜਿਸ ਵਿੱਚ ਮ੍ਰਿਤਕ ਨੇ ਕਿਹਾ ਕਿ ਜੇਕਰ ਉਸਨੂੰ ਕੁਝ ਹੋਇਆ ਤਾਂ ਚਾਰੇ ਵਿਅਕਤੀ ਜ਼ਿੰਮੇਵਾਰ ਹੋਣਗੇ। ਐੱਸਐੱਸਪੀ ਨੇ ਕਿਹਾ ਕਿ ਪੀੜਤ ਨੇ ਫਿਰ ਪੁਲਿਸ ਸਟੇਸ਼ਨ ਦੇ ਬਾਥਰੂਮ ਵਿੱਚ ਜਾ ਕੇ ਆਪਣੇ ਆਪ ਨੂੰ ਅੱਗ ਲਗਾ ਲਈ।