ਥਾਈਲੈਂਡ ਨੇ ਅਮਰੀਕਾ ਨੂੰ ਦਿੱਤਾ ਕਰਾਰਾ ਜਵਾਬ : 284 ਟਨ ਨਾਜਾਇਜ਼ ਈ-ਕੂੜਾ ਮੋੜਿਆ ਵਾਪਸ

ਥਾਈਲੈਂਡ ਸਰਕਾਰ ਗੈਰ-ਕਾਨੂੰਨੀ ਤਰੀਕੇ ਨਾਲ ਆਯਾਤ ਕੀਤੇ ਗਏ ਇਲੈਕਟ੍ਰਾਨਿਕ ਕੂੜੇ  ਦੀ ਇੱਕ ਵੱਡੀ ਖੇਪ ਨੂੰ ਵਾਪਸ ਅਮਰੀਕਾ ਭੇਜਣ ਦੀ ਤਿਆਰੀ ਕਰ ਰਹੀ ਹੈ। ਅਧਿਕਾਰੀਆਂ ਨੇ ਇਸ ਖੇਪ ਨੂੰ ਲੇਮ ਚਾਬਾਂਗ ਬੰਦਰਗਾਹ ‘ਤੇ ਜ਼ਬਤ ਕੀਤਾ ਸੀ।
ਲਗਪਗ 284 ਟਨ ਵਜ਼ਨ ਵਾਲੀ ਇਸ ਖੇਪ ਨੂੰ ਡਿਪਾਰਟਮੈਂਟ ਆਫ ਸਪੈਸ਼ਲ ਇਨਵੈਸਟੀਗੇਸ਼ਨ  ਕਸਟਮ ਅਧਿਕਾਰੀਆਂ ਅਤੇ ਪ੍ਰਦੂਸ਼ਣ ਕੰਟਰੋਲ ਵਿਭਾਗ ਦੁਆਰਾ ਕੀਤੀ ਗਈ ਸਾਂਝੀ ਜਾਂਚ ਤੋਂ ਬਾਅਦ ਫੜਿਆ ਗਿਆ।ਉਪ-ਪ੍ਰਧਾਨ ਮੰਤਰੀ ਸੁਚਾਰਟ ਚੋਮਕਲਿਨ ਨੇ ਪੁਸ਼ਟੀ ਕੀਤੀ ਕਿ ਇਸ ਆਪ੍ਰੇਸ਼ਨ ਦੌਰਾਨ ਲਗਪਗ 2,85,000 ਕਿਲੋਗ੍ਰਾਮ ਈ-ਕੂੜਾ ਲੈ ਕੇ ਜਾ ਰਹੇ 12 ਸ਼ਿਪਿੰਗ ਕੰਟੇਨਰ ਜ਼ਬਤ ਕੀਤੇ ਗਏ ਹਨ। ਇਨ੍ਹਾਂ ਸਾਰੇ ਕੰਟੇਨਰਾਂ ਨੂੰ ਹੁਣ ਵਾਪਸ ਅਮਰੀਕਾ ਭੇਜ ਦਿੱਤਾ ਜਾਵੇਗਾ।
ਕਸਟਮ ਵਿਭਾਗ ਦੇ ਡਾਇਰੈਕਟਰ-ਜਨਰਲ ਫਾਨਥੋਂਗ ਲੋਏਸਾਕੁਨਾਨੋਨ ਨੇ ਦੱਸਿਆ ਕਿ ਇਹ ਘਟਨਾ ਡੀ.ਐਸ.ਆਈ ਦੀ ਸਖ਼ਤ ਜਾਂਚ ਤੋਂ ਬਾਅਦ ਸਾਹਮਣੇ ਆਈ ਹੈ। ਤਸਕਰਾਂ ਨੇ ਕਸਟਮ ਅਧਿਕਾਰੀਆਂ ਨੂੰ ਧੋਖਾ ਦੇਣ ਲਈ ਇਸ ਖ਼ਤਰਨਾਕ ਇਲੈਕਟ੍ਰਾਨਿਕ ਕੂੜੇ ਨੂੰ ਹੈਤੀ ਤੋਂ ਆਇਆ ਹੋਇਆ ‘ਸਕ੍ਰੈਪ ਮੈਟਲ’ ਦੱਸ ਕੇ ਲੁਕਾਉਣ ਦੀ ਕੋਸ਼ਿਸ਼ ਕੀਤੀ ਸੀ।100 ਫੀਸਦੀ ਅੰਤਰਰਾਸ਼ਟਰੀ ਪ੍ਰੋਟੋਕੋਲ ਦੀ ਪਾਲਣਾ ਨੂੰ ਯਕੀਨੀ ਬਣਾਉਣ ਲਈ ਥਾਈ ਅਧਿਕਾਰੀ ਹੁਣ 714 ਵਾਧੂ ਕੰਟੇਨਰਾਂ ‘ਤੇ ਵੀ ਨਜ਼ਰ ਰੱਖ ਰਹੇ ਹਨ, ਜੋ ਇਸ ਸਮੇਂ ਰਸਤੇ ਵਿੱਚ ਹਨ। ਥਾਈਲੈਂਡ ਹੁਣ ਆਪਣੇ ਦੇਸ਼ ਨੂੰ ਵਿਦੇਸ਼ੀ ਕੂੜੇ ਦਾ ਡੰਪਿੰਗ ਗਰਾਊਂਡ ਨਹੀਂ ਬਣਨ ਦੇਣਾ ਚਾਹੁੰਦਾ।