ਪਿੰਡ ਜੀਦਾ ’ਚ 10 ਸਤੰਬਰ ਨੂੰ ਬੰਬ ਬਣਾਉਂਦੇ ਸਮੇਂ ਹੋਏ ਧਮਾਕੇ ’ਚ ਜ਼ਖ਼ਮੀ ਗੁਰਪ੍ਰੀਤ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਉਸ ਤੋਂ ਪੁੱਛਗਿੱਛ ’ਚ ਹੈਰਾਨੀਜਨਕ ਖ਼ੁਲਾਸੇ ਹੋ ਰਹੇ ਹਨ। ਗੁਰਪ੍ਰੀਤ ਨੇ ਬੰਬ ਬਣਾਉਣ ਲਈ ਸਮੱਗਰੀ ਰਾਜਸਥਾਨ ਦੇ ਜੋਧਪੁਰ ਦੀ ਇਕ ਨਿੱਜੀ ਕੰਪਨੀ ਤੋਂ ਮੰਗਵਾਈ ਸੀ। ਹੁਣ ਜਾਂਚ ਏਜੰਸੀਆਂ ਸਪਲਾਈ ਚੇਨ ਦਾ ਪਤਾ ਲਗਾਉਣ ’ਚ ਜੁਟ ਗਈਆਂ ਹਨ। ਪੁਲਿਸ ਉਸ ਕੰਪਨੀ ਨੂੰ ਨੋਟਿਸ ਜਾਰੀ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਓਧਰ ਫ਼ੌਜ ਤੇ ਬੰਬ ਨਿਰੋਧਕ ਟੀਮਾਂ (ਈਡੀਓ) ਨੇ ਗੁਰਪ੍ਰੀਤ ਦੇ ਘਰ ਪੁੱਜ ਕੇ ਧਮਾਕਾਖੇਜ਼ ਸਮੱਗਰੀ ਨਸ਼ਟ ਕਰਨ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਨੇ ਗੁਰਪ੍ਰੀਤ ਖ਼ਿਲਾਫ਼ ਧਮਾਕਾਖੇਜ਼ ਸਮੱਗਰੀ ਦੀ ਦਰਾਮਤ ਤੇ ਨਿਰਮਾਣ ਦਾ ਮਾਮਲਾ ਦਰਜ ਕਰ ਕੇ ਕੋਰਟ ਤੋਂ ਉਸ ਦਾ ਸੱਤ ਦਿਨਾਂ ਦਾ ਰਿਮਾਂਡ ਹਾਸਲ ਕੀਤਾ ਹੈ।
ਪੁਲਿਸ ਤੇ ਸੁਰੱਖਿਆ ਏਜੰਸੀਆਂ ਵੱਲੋਂ ਕੀਤੀ ਪੁੱਛਗਿੱਛ ’ਚ ਗੁਰਪ੍ਰੀਤ ਨੇ ਖ਼ੁਲਾਸਾ ਕੀਤਾ ਹੈ ਕਿ ਉਸ ਨੇ ਬੰਬ ਬਣਾਉਣ ਦੀ ਸਾਰੀ ਜਾਣਕਾਰੀ ਆਨਲਾਈਨ ਇਕੱਠੀ ਕੀਤੀ ਤੇ ਫਿਰ ਜੋਧਪੁਰ ਦੀ ਇਕ ਕੰਪਨੀ ਤੋਂ ਕੈਮੀਕਲ ਖ਼ਰੀਦੇ। ਪੁਲਿਸ ਦਾ ਮੰਨਣਾ ਹੈ ਕਿ ਬਗ਼ੈਰ ਕਿਸੇ ਵੱਡੇ ਨੈੱਟਵਰਕ ਜਾਂ ਤਕਨੀਕੀ ਮਾਰਗਦਰਸ਼ਨ ਦੇ ਏਨੇ ਖ਼ਤਰਨਾਕ ਕੈਮੀਕਲ ਇਕੱਠੇ ਕਰਨਾ ਤੇ ਇਨ੍ਹਾਂ ਦਾ ਇਸਤੇਮਾਲ ਕਰਨਾ ਸੰਭਵ ਨਹੀਂ ਹੈ। ਮੁਲਜ਼ਮ ਨੇ ਜਿਹੜੇ ਕੈਮੀਕਲ ਮੰਗਵਾਏ ਸਨ, ਉਨ੍ਹਾਂ ’ਚੋਂ ਕੁਝ ਦਾ ਇਸਤੇਮਾਲ ਆਮ ਤੌਰ ’ਤੇ ਸਨਅਤੀ ਕਾਰਜਾਂ ਤੇ ਲੈਬ ’ਚ ਕੀਤਾ ਜਾਂਦਾ ਹੈ। ਪਰ ਜੇਕਰ ਉਨ੍ਹਾਂ ਨੂੰ ਮਿਲਾ ਕੇ ਇਸਤੇਮਾਲ ਕੀਤਾ ਜਾਵੇ ਤਾਂ ਬੰਬ ਦਾ ਰੂਪ ਲੈ ਸਕਦੇ ਹਨ। ਪੁਲਿਸ ਹੁਣ ਫੋਰੈਂਸਿਕ ਮਾਹਰਾਂ ਦੀ ਮਦਦ ਨਾਲ ਬਰਾਮਦ ਸਮੱਗਰੀ ਦੀ ਜਾਂਚ ਕਰਵਾ ਰਹੀ ਹੈ। ਪੁਲਿਸ ਇਹ ਵੀ ਜਾਂਚ ਕਰ ਰਹੀ ਹੈ ਕਿ ਕੰਪਨੀ ਨੇ ਬਗ਼ੈਰ ਇਹ ਜਾਣੇ ਕਿ ਇਹ ਸਮੱਗਰੀ ਕਿਸ ਕੰਮ ਲਈ ਇਸਤੇਮਾਲ ਹੋਈ ਹੈ, ਸਪਲਾਈ ਕਰ ਦਿੱਤੀ ਹੈ ਜਾਂ ਫਿਰ ਮੁਲਜ਼ਮ ਨੇ ਜਾਅਲੀ ਪਛਾਣ ਤੇ ਗ਼ਲਤ ਜਾਣਕਾਰੀ ਦੇ ਕੇ ਸਮੱਗਰੀ ਪ੍ਰਾਪਤ ਕੀਤੀ ਹੈ? ਪੁਲਿਸ ਇਸ ਮਾਮਲੇ ’ਚ ਕੰਪਨੀ ਨੂੰ ਨੋਟਿਸ ਭੇਜ ਸਕਦੀ ਹੈ।
ਓਧਰ ਪੰਜਾਬ ਪੁਲਿਸ ਦੀ ਮੰਗ ’ਤੇ ਮੇਜਰ ਰੈਂਕ ਦੇ ਇਕ ਅਧਿਕਾਰੀ ਦੀ ਅਗਵਾਈ ’ਚ ਫ਼ੌਜ ਦੀ ਟੀਮ ਨੇ ਪਿੰਡ ਪਹੁੰਚ ਕੇ ਧਮਾਕਾਖੇਜ ਸਮੱਗਰੀ ਨੂੰ ਨਸ਼ਟ ਕਰਨ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਫ਼ੌਜ ਤੇ ਬੰਬ ਨਿਰੋਧਕ ਦਸਤੇ ਨੇ ਪਹਿਲਾਂ ਗੁਰਪ੍ਰੀਤ ਦੇ ਘਰ ਦੇ ਬਾਹਰ ਮਿੱਟੀ ਨਾਲ ਭਰੇ ਗੱਟੇ ਲਗਾਏ ਤੇ ਫਿਰ ਖੇਤਾਂ ’ਚ ਡੂੰਘਾ ਟੋਆ ਪੁੱਟਿਆ। ਇਸ ਤੋਂ ਬਾਅਦ ਫ਼ੌਜ ਤੇ ਬੰਬ ਨਿਰੋਧਕ ਟੀਮਾਂ ਨੇ ਸਮੱਗਰੀ ਨਸ਼ਟ ਕਰਨ ਲਈ ਕਾਰਵਾਈ ਸ਼ੁਰੂ ਕਰ ਦਿੱਤੀ। ਅਧਿਕਾਰੀਆਂ ਨੇ ਦੱਸਿਆ, ਅੱਤ ਆਧੁਨਿਕ ਖ਼ਤਰਨਾਮਕ ਕੈਮੀਕਲ ਨੂੰ ਨਸ਼ਟ ਕਰਨ ਲਈ ਰੋਬੋਟਿਕ ਯੰਤਰਾਂ ਤੇ ਕੰਟਰੋਲ ਵਿਧੀਆਂ ਦਾ ਸਹਾਰਾ ਲਿਆ ਜਾ ਰਿਹਾ ਹੈ। ਇਸ ਦੌਰਾਨ ਕਈ ਵਾਰ ਘੱਟ ਤੀਬਰਤਾ ਵਾਲੇ ਕੰਟਰੋਲਡ ਧਮਾਕੇ ਵੀ ਕੀਤੇ ਗਏ। ਕਿਸੇ ਵੀ ਅਣਸੁਖਾਵੀਂ ਘਟਨਾ ਤੋਂ ਬਚਣ ਲਈ ਲੋਕਾਂ ਨੂੰ ਸੁੱਰਖਿਅਤ ਥਾਵਾਂ ’ਤੇ ਸ਼ਿਫਟ ਕਰਕੇ ਕੇ ਪੂਰੇ ਇਲਾਕੇ ਦੇ ਆਲੇ ਦੁਆਲੇ ਬਹੁ-ਪਰਤੀ ਸੁਰੱਖਿਆ ਘੇਰਾ ਬਣਾ ਦਿੱਤਾ। ਅਧਿਕਾਰੀਆਂ ਨੇ ਕਿਹਾ ਕਿ ਫ਼ੌਜ ਤੇ ਪੁਲਿਸ ਦੀ ਰਿਪੋਰਟ ਆਉਣ ਤੱਕ ਘਟਨਾ ਸਥਾਨ ਨੂੰ ਸੈਨੇਟਾਈਜ਼ਡ ਨਹੀਂ ਐਲਾਨਿਆ ਜਾਵੇਗਾ।
ਪੁਲਿਸ ਨੂੰ ਉਮੀਦ ਹੈ ਕਿ ਜਦੋਂ ਘਰ ਅੰਦਰ ਰੱਖੀ ਧਮਾਕਾਖੇਜ ਸਮੱਗਰੀ ਨਸ਼ਟ ਹੋ ਜਾਵੇਗੀ ਤਾਂ ਘਰ ’ਚੋਂ ਕਈ ਸਬੂਤ ਮਿਲ ਸਕਦੇ ਹਨ, ਜਿਸ ਨਾਲ ਇਸ ਕੇਸ ਦੀ ਜੜ੍ਹ ਤਕ ਜਾਇਆ ਜਾ ਸਕਦਾ ਹੈ। ਕਿਉਂਕਿ ਅਜੇ ਤਕ ਪੁਲਿਸ ਘਰ ਅੰਦਰ ਦਾਖ਼ਲ ਨਹੀਂ ਹੋ ਸਕੀ। ਇਸੇ ਦੌਰਾਨ ਪੁਲਿਸ ਨੇ ਸਥਾਨਕ ਲੋਕਾਂ ਨੂੰ ਵੀ ਅਪੀਲ ਕੀਤੀ ਹੈ ਕਿ ਜੇਕਰ ਉਨ੍ਹਾਂ ਨੂੰ ਕੋਈ ਸ਼ੱਕੀ ਗਤੀਵਿਧੀ ਨਜ਼ਰ ਆਉਂਦੀ ਹੈ ਤਾਂ ਤੁਰੰਤ ਪ੍ਰਸ਼ਾਸਨ ਨੂੰ ਸੂਚਿਤ ਕੀਤਾ ਜਾਵੇ।
ਪੁੱਛਗਿੱਛ ਤੋਂ ਪਤਾ ਲੱਗਦਾ ਹੈ ਕਿ ਗੁਰਪ੍ਰੀਤ ਨੂੰ ਧਮਾਕੇ ’ਚ ਆਪਣਾ ਹੱਥ ਗੁਆਉਣ ਦਾ ਪਛਤਾਵਾ ਨਹੀਂ ਹੈ। ਉਹ ਪੁਲਿਸ ਨੂੰ ਹੱਸਦੇ ਹੋਏ ਦੱਸਦਾ ਹੈ ਕਿ ਉਸਦਾ ਹੱਥ ਵੱਢਿਆ ਗਿਆ ਹੈ। ਪੁਲਿਸ ਨੂੰ ਸ਼ੱਕ ਹੈ ਕਿ ਬ੍ਰੇਨ ਵਾਸ਼ ਹੋਣ ਕਾਰਨ ਉਹ ਮਾਨਸਿਕ ਤੌਰ ’ਤੇ ਬਿਮਾਰ ਹੋ ਸਕਦਾ ਹੈ। ਇਸ ਤੋਂ ਇਲਾਵਾ ਗੁਰਪ੍ਰੀਤ ਨੇ ਮੰਨਿਆ ਹੈ ਕਿ ਉਹ ਅਕਸਰ ਇੰਟਰਨੈੱਟ ’ਤੇ ਪਾਕਿਸਤਾਨੀ ਅੱਤਵਾਦੀ ਮੌਲਾਨਾ ਮਸੂਦ ਅਜ਼ਹਰ ਤੇ ਬੰਬ ਬਣਾਉਣ ਵਾਲੀ ਸਮੱਗਰੀ ਦੀਆਂ ਵੀਡੀਓਜ਼ ਦੇਖਦਾ ਸੀ। ਹਾਲਾਂਕਿ ਇਹ ਸਪੱਸ਼ਟ ਨਹੀਂ ਹੈ ਕਿ ਉਸਦਾ ਕਿਸੇ ਅੱਤਵਾਦੀ ਸੰਗਠਨ ਨਾਲ ਸਿੱਧਾ ਸਬੰਧ ਸੀ ਜਾਂ ਕਿਸੇ ਦੇ ਬਹਿਕਾਵੇ ਹੇਠ ਇਹ ਕੰਮ ਕਰ ਰਿਹਾ ਸੀ।
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.
