ਸਵੀਡਨ ਦੇ ਸਕੂਲ ‘ਚ ਗੋਲੀਬਾਰੀ, 10 ਦੀ ਮੌਤ, ਹਮਲਾਵਰ ਵੀ ਮਾਰਿਆ ਗਿਆ

ਸਵੀਡਨ ਦੇ ਸ਼ਹਿਰ ਓਰੇਬਰੋ ਦੇ ਇੱਕ ਸਕੂਲ ਵਿੱਚ ਹੋਈ ਗੋਲੀਬਾਰੀ ਵਿੱਚ ਘੱਟੋ ਘੱਟ 10 ਲੋਕਾਂ ਦੀ ਮੌਤ ਹੋ ਗਈ। ਗੋਲੀਬਾਰੀ ਵਿੱਚ ਹਮਲਾਵਰ ਵੀ ਮਾਰਿਆ ਗਿਆ। ਪੁਲਿਸ ਦਾ ਕਹਿਣਾ ਹੈ ਕਿ ਹਮਲਾ ਇਕੱਲੇ ਸ਼ੂਟਰ ਦੁਆਰਾ ਕੀਤਾ ਗਿਆ ਸੀ, ਪਰ ਉਦੇਸ਼ ਅਜੇ ਵੀ ਅਸਪਸ਼ਟ ਹੈ।ਇਹ ਘਟਨਾ ਰਾਜਧਾਨੀ ਸਟਾਕਹੋਮ ਤੋਂ ਲਗਭਗ 200 ਕਿਲੋਮੀਟਰ ਪੱਛਮ ਵਿੱਚ ਓਰੇਬਰੋ ਦੇ ਇੱਕ ਕੈਂਪਸ ਰਿਸਬਰਗਸਕਾ ਵਿੱਚ ਵਾਪਰੀ,  ਇਹ ਸੰਸਥਾ ਉਨ੍ਹਾਂ ਲਈ ਹੈ ਜੋ ਆਪਣੀ ਸਕੂਲ ਦੀ ਪਡ਼੍ਹਾਈ ਸਮੇਂ ਸਿਰ ਪੂਰੀ ਨਹੀਂ ਕਰ ਸਕੇ। ਨੇਡ਼ੇ ਹੀ ਇੱਕ ਬੱਚਿਆਂ ਦਾ ਸਕੂਲ ਵੀ ਹੈ।

ਸਵੀਡਨ ਦੇ ਪ੍ਰਧਾਨ ਮੰਤਰੀ ਉਲਫ ਕ੍ਰਿਸਟਰਸਨ ਨੇ ਇਸ ਘਟਨਾ ਨੂੰ ਦੇਸ਼ ਦੀ ਹੁਣ ਤੱਕ ਦੀ ਸਭ ਤੋਂ ਭਿਆਨਕ ਸਮੂਹਿਕ ਗੋਲੀਬਾਰੀ ਦੱਸਿਆ। “ਅੱਜ ਅਸੀਂ ਨਿਰਦੋਸ਼ ਲੋਕਾਂ ਵਿਰੁੱਧ ਭਿਆਨਕ ਅਤੇ ਘਾਤਕ ਹਿੰਸਾ ਵੇਖੀ ਹੈ। ਇਸ ਹਮਲੇ ਨੇ ਪੂਰੇ ਦੇਸ਼ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਪੁਲਿਸ ਮੁਖੀ ਰੌਬਰਟੋ ਈਡ ਫਾਰੈਸਟ ਦੇ ਅਨੁਸਾਰ, ਅਪਰਾਧ ਵਾਲੀ ਥਾਂ ‘ਤੇ ਨੁਕਸਾਨ ਇੰਨਾ ਗੰਭੀਰ ਸੀ ਕਿ ਮਰਨ ਵਾਲਿਆਂ ਦੀ ਸਹੀ ਗਿਣਤੀ ਦਾ ਤੁਰੰਤ ਪਤਾ ਨਹੀਂ ਲੱਗ ਸਕਿਆ। ਉਨ੍ਹਾਂ ਕਿਹਾ ਕਿ ਮਰਨ ਵਾਲਿਆਂ ਦੀ ਗਿਣਤੀ ਵਧ ਸਕਦੀ ਹੈ ਕਿਉਂਕਿ ਕਈ ਜ਼ਖਮੀਆਂ ਦੀ ਹਾਲਤ ਗੰਭੀਰ ਹੈ।
ਪੁਲਿਸ ਨੇ ਕਿਹਾ ਕਿ ਇਸ ਹਮਲੇ ਦਾ ਅੱਤਵਾਦ ਨਾਲ ਕੋਈ ਸਬੰਧ ਨਹੀਂ ਹੈ। ਹਾਲਾਂਕਿ ਹਮਲਾਵਰ ਦੇ ਉਦੇਸ਼ ਦਾ ਹਾਲੇ ਪਤਾ ਨਹੀਂ ਲੱਗ ਸਕਿਆ ਹੈ।