ਗੁੰਡਾਗਰਦੀ, ਸਮਾਜ ਅਤੇ ਸਰਕਾਰਾਂ

ਅਮਰਜੀਤ ਸਿੰਘ ਵੜੈਚ

ਪੰਜਾਬ ਅੰਦਰ ਗੈਂਗ ਭਾਵ ਗੁੰਡਾਗਰਦੀ ਕੋਈ ਨਵੀਂ ਗੱਲ ਨਹੀਂ ਪਰ ਇਸ ਦੀ ਰਫ਼ਤਾਰ ਨਵੀਂ ਚਿੰਤਾ ਵਾਲੀ ਗੱਲ ਹੈ। ਆਏ ਦਿਨ ਮੀਡੀਆ ਅਜਿਹੀਆਂ ਖ਼ਬਰਾਂ ਨਾਲ ਓਤ-ਪੋਤ ਮਿਲਦਾ ਹੈ। ਜ਼ਮੀਨ ਦੱਬਣੀ, ਸ਼ਰਾਬ ਦੀ ਸਮੱਗਲਿੰਗ ਕਰਨੀ, ਰੇਤਾ, ਬੱਜਰੀ, ਮਿੱਟੀ ਦਾ ਵਪਾਰ, ਟਰਾਂਸਪੋਰਟ, ਰਾਜਨੀਤੀ, ਉਦਯੋਗ, ਵਿਦਿਅਕ ਅਦਾਰੇ, ਕੇਬਲ ਟੀਵੀ ਆਦਿ ਹਰ ਥਾਂ ‘ਤੇ ਇਸ ਕਿਸਮ ਦੇ ਲੋਕ ਗਰੁੱਪਾਂ ਵਿੱਚ ਮਿਲ ਜਾਣਗੇ ਜੋ ਡਾਂਗ ਦੀ ਤਾਕਤ ਭਾਵ ਜਾਨ-ਮਾਲ ਦੀਆਂ ਧਮਕੀਆਂ ਦੇ ਕੇ ਹਰ ਨਾਜਾਇਜ਼ ਕੰਮ ਕਰਨ ਅਤੇ ਕਰਵਾਉਣ ਲਈ ਕੁਝ ਵੀ ਕਰਨ ਲਈ ਤਿਆਰ ਹੁੰਦੇ ਹਨ। ਹਾਲ ਹੀ ਵਿੱਚ ਪੰਜਾਬ ਅੰਦਰ ਕਬੱਡੀ ਖਿਡਾਰੀਆਂ ਦੇ ਕਤਲ, ਜੇਲ੍ਹਾਂ ਵਿੱਚ ਹੋ ਰਹੀ ਗੈਂਗਵਾਰ, ਔਰਤਾਂ/ਲੜਕੀਆਂ ਨਾਲ ਛੇੜਛਾੜ, ਨਸ਼ਿਆਂ ਦੀ ਹੋ ਰਹੀ ਸਮੱਗਲਿੰਗ ਆਦਿ ਕੁਝ ਅਜਿਹੇ ਚਿੰਤਾ ਵਾਲੇ ਵਿਸ਼ੇ ਹਨ। ਮੌਜੂਦਾ ਸਰਕਾਰ ਦਾ ਐਂਟੀ ਗੈਂਗ ਸੁਕੈਡ ਕੀ ਕਾਰਗੁਜ਼ਾਰੀ ਕਰਦਾ ਹੈ ਇਹ ਤਾਂ ਸਮਾਂ ਹੀ ਦੱਸੇਗਾ ਪਰ ਇਸ ਪਹਿਲ ਕਦਮੀ ਦੀ ਸ਼ਲਾਘਾ ਕਰਨੀ ਬਣਦੀ ਹੈ।

ਇਹ ਗੱਲ ਗ਼ੌਰ ਮੰਗਦੀ ਹੈ ਕਿ ਆਖਿਰ ਪੰਜਾਬ ਅੰਦਰ ਇਹ ਰੁਝਾਨ ਖ਼ਤਮ ਹੋਣ ਦਾ ਨਾਂ ਕਿਉਂ ਨਹੀਂ ਲੈਂਦਾ। ਇਸ ਦੇ ਕਈ ਕਾਰਨ ਹਨ ਸਭ ਤੋਂ ਪਹਿਲਾਂ ਤਾਂ ਗੱਲ ਕਰਦੇ ਹਾਂ ਘਰ ਦੀ। ਕਹਿੰਦੇ ਨੇ ਕਿ ਬੰਦਾ ਸਭ ਕੁਝ ਘਰ ਤੋਂ ਹੀ ਸਿੱਖਦਾ ਹੈ ਭਾਵ ਜੇ ਕਰ ਮਾਪੇ ਆਪਣੇ ਬੱਚਿਆਂ ਪ੍ਰਤੀ ਸੁਚੇਤ ਹੋਣ ਤਾਂ ਉਹ ਗ਼ਲਤ ਰਾਹ ‘ਤੇ ਪੈ ਹੀ ਨਹੀਂ ਸਕਦਾ। ਮੈਨੂੰ ਯਾਦ ਹੈ ਕਿ ਦਸਵੀਂ ਜਾਂ ਬੀਏ ਵਿੱਚ ਪ੍ਰਿੰਸੀਪਲ ਤੇਜਾ ਸਿੰਘ ਦਾ ਇਕ ਲੇਖ ਹੁੰਦਾ ਸੀ ‘ਘਰ ਦਾ ਪਿਆਰ’। ਲੇਖਕ ਕਹਿੰਦਾ ਹੈ ਕਿ ਦੇਸ਼ ਪਿਆਰ ਤੋਂ ਪਹਿਲਾਂ ਘਰ ਦਾ ਪਿਆਰ ਆਉਂਦਾ ਹੈ। ਜਿਹੜਾ ਵਿਅਕਤੀ ਘਰ ਨੂੰ ਪਿਆਰ ਕਰਨਾ ਸਿੱਖ ਜਾਂਦਾ ਹੈ ਉਹ ਆਪਣੇ ਆਪ ਹੀ ਆਪਣੇ ਮੁਲਕ ਨੂੰ ਪਿਆਰ ਕਰਨ ਲੱਗ ਪੈਂਦਾ ਹੈ। ਸੋ ਬਹੁਤ ਜ਼ਰੂਰੀ ਹੈ ਕਿ ਮਾਪਿਆਂ ਨੂੰ ਚਾਹੀਦਾ ਹੈ ਕਿ ਉਹ ਆਪਣੇ ਬੱਚਿਆਂ ਵੱਲ ਬਚਪਨ ਤੋਂ ਹੀ ਧਿਆਨ ਦੇਣ ਤਾਂ ਕਿ ਉਨ੍ਹਾਂ ਨੂੰ ਗ਼ਲਤ ਸੰਗਤ ਤੋਂ ਬਚਾਇਆ ਜਾ ਸਕੇ।

ਜਦੋਂ ਬੱਚਾ ਵੱਡਾ ਹੋ ਕੇ ਸਮਾਜ ਵਿੱਚ ਵਿਚਰਦਾ ਹੈ ਤਾਂ ਉਥੇ ਵੀ ਡਰ ਬਣਿਆ ਰਹਿੰਦਾ ਹੈ ਕਿ ਕਿਤੇ ਕੋਈ ਗ਼ਲਤ ਸੰਗਤ ਵਿਚ ਨਾ ਪੈ ਜਾਵੇ। ਸਮਾਜ ਵਿੱਚ ਜੇਕਰ ਗ਼ਲਤ ਅਨਸਰ ਪੈਦਾ ਹੁੰਦੇ ਹਨ ਤਾਂ ਇਸ ਦਾ ਵੱਡਾ ਕਾਰਨ ਇਹ ਹੁੰਦਾ ਹੈ ਕਿ ਸਰਕਾਰਾਂ ਅਤੇ ਕਾਨੂੰਨ ਅਤੇ ਵਿਵਸਥਾ ਨੂੰ ਕਾਇਮ ਰੱਖਣ ਵਾਲੀਆਂ ਸੰਸਥਾਵਾਂ ਵਿੱਚ ਨਿਘਾਰ ਆ ਰਿਹਾ ਹੈ। ਅੱਜ ਪੰਜਾਬ ਵਿੱਚ ਜੋ ਹਾਲਾਤ ਬਣ ਰਹੇ ਹਨ ਇਸ ਦਾ ਕਾਰਨ ਹੈ ਕਿ ਲੰਮੇ ਸਮੇਂ ਤੋਂ ਇਹ ਸੰਸਥਾਵਾਂ ਸੁਸਤ ਹੋ ਗਈਆਂ ਹਨ ਅਤੇ ਆਪਣੇ ਫ਼ਰਜ਼ਾਂ ਤੋਂ ਮੂੰਹ ਮੋੜ ਰਹੀਆਂ ਹਨ। ਅੱਜ ਪੰਜਾਬ ਵਿੱਚ ਨਸ਼ਿਆਂ ਦਾ ਵਪਾਰ ਸ਼ਰੇਆਮ ਹੋ ਰਿਹਾ ਹੈ, ਪੁਲਿਸ ਵਾਲੇ ਕਈ ਅਫ਼ਸਰ ਪੱਧਰ ਦੇ ਲੋਕ ਇਸ ‘ਚ ਫ਼ੜੇ ਗਏ ਹਨ, ਜੇਲ੍ਹਾਂ ਵਿੱਚੋਂ ਹਰ ਰੋਜ਼ ਗ਼ੈਰ-ਕਾਨੂੰਨੀ ਚੀਜ਼ਾਂ ਫੜੀਆਂ ਜਾ ਰਹੀਆਂ ਹਨ, ਬੇਰੁਜ਼ਗਾਰੀ ਦੇ ਅੰਬਾਰ ਲੱਗੇ ਪਏ ਨੇ ਅਤੇ ਭ੍ਰਿਸ਼ਟਾਚਾਰ ਸਿਖਰਾਂ ‘ਤੇ ਹੈ।

ਇਹ ਸਭ ਕੁਝ ਸੋਚਣ ਲਈ ਮਜ਼ਬੂਰ ਕਰਦਾ ਹੈ ਕਿ ਆਖਿਰ ਗੁਰੂਆਂ, ਪੀਰਾਂ, ਫ਼ਕੀਰਾਂ ਦੀ ਇਹ ਧਰਤੀ ਕਿਉਂ ਬਦਨਾਮ ਹੋਣ ਲੱਗ ਪਈ ਹੈ ? ਇਸ ਦਾ ਸਭ ਤੋਂ ਵੱਡਾ ਕਾਰਨ ਹੈ ਕਿ ਸਾਡੇ ਵਿੱਚੋਂ ਸਮਾਜ ਪ੍ਰਤੀ ਜ਼ਿੰਮੇਵਾਰੀ ਦੀ ਭਾਵਨਾ ਪਰ ਲਾ ਕੇ ਉਡ ਗਈ ਹੈ। ਅਸੀਂ ਪੈਸਾ ਇਕੱਠਾ ਕਰਨ ਲਈ ਕੁਝ ਵੀ ਕਰਨ ਨੂੰ ਤਿਆਰ ਹਾਂ। ਦੂਸਰਾ ਸਾਡੀਆਂ ਸਰਕਾਰਾਂ ਵੀ ਇਹ ਚਾਹੁੰਦੀਆਂ ਰਹੀਆਂ ਹਨ ਕਿ ਜਵਾਨੀ ਨਸ਼ਿਆਂ ‘ਤੇ ਲੱਗ ਜਾਵੇ ਅਤੇ ਲੋਕ ਸਿਰਫ਼ ਸਰਕਾਰ ਤੋਂ ਰੋਟੀ ਮੰਗਣ ਯੋਗੇ ਹੀ ਰਹਿ ਜਾਣ।

ਕਈ ਵਾਰ ਸ਼ਿਕਾਰੀ ਆਪਣੇ ਜਾਲ ਵਿੱਚ ਆਪ ਹੀ ਫ਼ਸ ਜਾਂਦਾ ਹੈ ਜਿਸ ਦੀ ਮਿਸਾਲ ਪੰਜਾਬ ਦੀਆਂ ਇਸ ਵਰ੍ਹੇ ਹੋਈਆਂ ਵਿਧਾਨ ਸਭਾ ਦੀਆਂ ਚੋਣਾਂ ਦੇ ਨਤੀਜੇ ਹਨ। ਜਿਹੜੇ ਲੀਡਰ ਤਾਉਮਰ ਪੰਜਾਬ ‘ਤੇ ਰਾਜ ਕਰਨ ਦੇ ਸੁਪਨੇ ਲੈ ਰਹੇ ਸੀ ਅੱਜ ਵਿਧਾਨ ਸਭਾ ‘ਚ ਉਹ ਲੱਭਿਆ ਵੀ ਨਹੀਂ ਲੱਭਦੇ। ਜੇਕਰ ਹੁਣ ਤੱਕ ਦੀਆਂ ਸਰਕਾਰਾਂ ਨੇ ਰਾਜ ਧਰਮ ਨਿਭਾਇਆ ਹੁੰਦਾ ਤਾਂ ਅੱਜ ਉਨ੍ਹਾਂ ਦੀ ਏਨੀ ਜ਼ਲਾਲਤ ਨਾ ਹੁੰਦੀ । ਮੌਜੂਦਾ ਹਾਲਾਤ ਵਰਤਮਾਨ ਆਪ ਦੀ ਸਰਕਾਰ ਅਤੇ ਭਵਿਖ ਵਿੱਚ ਆਉਣ ਵਾਲੀਆ ਸਰਕਾਰਾਂ ਲਈ ਇੱਕ ਬਹੁਤ ਵੱਡਾ ਸਬਕ ਹੈ ਜੋ ਪੰਜਾਬ ਦੇ ਲੋਕਾਂ ਨੇ ਹਰ ਕੰਧ ‘ਤੇ ਚਿਪਕਾ ਦਿੱਤਾ ਹੈ ਤਾਂ ਕੇ ਪੰਜਾਬ ‘ਤੇ ਰਾਜ ਕਰਨ ਵਾਲੇ ਅਤੇ ਰਾਜ ਕਰਨ ਦੇ ਸੁਪਨੇ ਲੈਣ ਵਾਲੇ ਹਮੇਸ਼ਾ ਪੜ੍ਹਦੇ ਰਹਿਣ।