ਹੜ੍ਹ ਵਿੱਚ ਰਾਹਤ ਤੇ ਬਚਾਅ ਲਈ ਵਿਦੇਸ਼ੀ ਮਦਦ ਲੈਣ ਲਈ ਤਿਆਰ ਹੋਇਆ ਨੇਪਾਲ, ਭਾਰਤ ਤੋਂ ਟੀਮਾਂ ਰਵਾਨਗੀ ਲਈ ਤਿਆਰ

 ਨੇਪਾਲ ਵਿੱਚ ਭਿਆਨਕ ਹੜ੍ਹ ਨੇ ਭਾਰੀ ਤਬਾਹੀ ਮਚਾਈ ਹੈ। ਇਸ ਦੌਰਾਨ ਕਾਠਮੰਡੂ ਸਰਕਾਰ ਨੇ ਪਹਿਲਾਂ ਵਿਦੇਸ਼ੀ ਰਾਹਤ ਟੀਮਾਂ ਤੋਂ ਮਦਦ ਲੈਣ ਤੋਂ ਇਨਕਾਰ ਕਰ ਦਿੱਤਾ ਸੀ। ਹੁਣ ਬਾਲੇਨ ਸ਼ਾਹ ਨੇ ਇਹ ਫੈਸਲਾ ਪਲਟ ਦਿੱਤਾ ਹੈ।ਅੰਤਰਰਾਸ਼ਟਰੀ ਦਬਾਅ ਤੋਂ ਬਾਅਦ ਹੁਣ ਨੇਪਾਲ ਸਰਕਾਰ ਸੀਮਤ ਗਿਣਤੀ ਵਿੱਚ ਵਿਦੇਸ਼ੀ ਮਾਹਿਰਾਂ ਅਤੇ ਖੋਜ ਤੇ ਬਚਾਅ ਟੀਮਾਂ ਨੂੰ ਆਉਣ ਦੀ ਇਜਾਜ਼ਤ ਦੇ ਰਹੀ ਹੈ। ਭਾਰਤ ਨੇ ਨੇਪਾਲ ਦੀ ਬੇਨਤੀ ’ਤੇ ਤੁਰੰਤ ਜਵਾਬ ਦਿੱਤਾ ਹੈ।ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਰਣਧੀਰ ਜੈਸਵਾਲ ਨੇ ਕਿਹਾ ਕਿ ਨੇਪਾਲ ਦੀ ਬੇਨਤੀ ’ਤੇ ਭਾਰਤ ਟਨਲ ਰੈਸਕਿਊ ਟੀਮ ਭੇਜਣ ਦੀ ਤਿਆਰੀ ਕਰ ਰਿਹਾ ਹੈ। ਪਹਿਲਾਂ ਇੱਕ ਸਰਵੇ ਟੀਮ ਭੇਜੀ ਜਾ ਰਹੀ ਹੈ, ਜੋ ਹਾਲਾਤ ਦਾ ਜਾਇਜ਼ਾ ਲਵੇਗੀ ਅਤੇ ਲੋੜੀਂਦੇ ਉਪਕਰਣਾਂ ਦੀ ਪਛਾਣ ਕਰੇਗੀ। ਇਸ ਤੋਂ ਇਲਾਵਾ ਮੈਡੀਕਲ ਟੀਮ ਵੀ ਭੇਜੀ ਜਾ ਰਹੀ ਹੈ।
ਭਾਰਤ ਨੇ ਬੇਲੀ ਬ੍ਰਿਜ ਅਤੇ ਤਕਨੀਕੀ ਟੀਮਾਂ ਦੀ ਮਦਦ ਦੀ ਵੀ ਪੇਸ਼ਕਸ਼ ਕੀਤੀ ਹੈ, ਤਾਂ ਜੋ ਪ੍ਰਭਾਵਿਤ ਇਲਾਕਿਆਂ ਵਿੱਚ ਸੰਪਰਕ ਅਤੇ ਆਵਾਜਾਈ ਦੀ ਸਹੂਲਤ ਜਲਦੀ ਬਹਾਲ ਕੀਤੀ ਜਾ ਸਕੇ। ਇੱਕ ਬੇਲੀ ਬ੍ਰਿਜ ਪਹਿਲਾਂ ਹੀ ਨੇਪਾਲ ਵਿੱਚ ਉਪਲਬਧ ਹੈ।ਕਾਠਮੰਡੂ ਪੋਸਟ ਦੇ ਅਨੁਸਾਰ, ਹੜ੍ਹ ਪ੍ਰਭਾਵਿਤ ਇਲਾਕਿਆਂ ਵਿੱਚ ਆਪਣੇ ਨਾਗਰਿਕਾਂ ਦੇ ਲਾਪਤਾ ਹੋਣ ਕਾਰਨ ਵੱਖ-ਵੱਖ ਦੇਸ਼ਾਂ ਵੱਲੋਂ ਦਬਾਅ ਬਣਾਇਆ ਗਿਆ ਸੀ।
ਇੱਕ ਸੀਨੀਅਰ ਅਧਿਕਾਰੀ ਨੇ ਕਿਹਾ ਕਿ ਅੰਤਰਰਾਸ਼ਟਰੀ ਭਾਈਚਾਰੇ ਵੱਲੋਂ ਕਾਫ਼ੀ ਦਬਾਅ ਆਇਆ ਕਿ ਘੱਟੋ-ਘੱਟ ਖੋਜ ਤੇ ਬਚਾਅ ਟੀਮਾਂ ਅਤੇ ਮਾਹਿਰਾਂ ਨੂੰ ਆਉਣ ਦੀ ਇਜਾਜ਼ਤ ਦਿੱਤੀ ਜਾਵੇ, ਕਿਉਂਕਿ ਉਨ੍ਹਾਂ ਦੇ ਨਾਗਰਿਕ ਵੀ ਲਾਪਤਾ ਹਨ। ਹੁਣ ਕੁਝ ਇਲਾਕਿਆਂ ਵਿੱਚ ਸੀਮਤ ਗਿਣਤੀ ਵਿੱਚ ਮਾਹਿਰਾਂ ਨੂੰ ਇਜਾਜ਼ਤ ਦਿੱਤੀ ਜਾ ਰਹੀ ਹੈ।