ਲਾਅ ਗ੍ਰੈਜੂਏਟ ਹੈ ਜਸਪਾਲ ਸਿੰਘ

ਸੁਖਬੀਰ ਸਿੰਘ ਬਾਦਲ ’ਤੇ ਵੀਰਵਾਰ ਨੂੰ ਹੋਇਆ ਹਮਲਾ ਸਿਆਸੀ ਗਲਿਆਰਿਆਂ ਵਿੱਚ ਚਰਚਾ ਦਾ ਵਿਸ਼ਾ ਬਣ ਗਿਆ ਹੈ। ਇਸ ਦੌਰਾਨ ਹੁਣ ਪੂਣੇ ਪੁਲਿਸ ਨੇ 62 ਸਾਲਾ ਹਮਲਾਵਰ ਜਸਪਾਲ ਸਿੰਘ ਨੂੰ ਲੈ ਕੇ ਹੈਰਾਨ ਕਰਨ ਵਾਲੇ ਖੁਲਾਸੇ ਕੀਤੇ ਹਨ।

ਪੁਲਿਸ ਦੀ ਜਾਂਚ ਵਿੱਚ ਇਸ ਗੱਲ ਦਾ ਖੁਲਾਸਾ ਹੋਇਆ ਹੈ ਕਿ  ਜਸਪਾਲ ਮੂਲ ਰੂਪ ਤੋਂ ਮਹਾਰਾਸ਼ਟਰ ਦੇ ਪੂਣੇ ਸ਼ਹਿਰ ਦਾ ਰਹਿਣ ਵਾਲਾ ਹੈ। ਅਜਿਹੇ ਵਿੱਚ ਹੁਣ ਸਵਾਲ ਇਹ ਪੁੱਛੇ ਜਾ ਰਹੇ ਹਨ ਕਿ ਕਦੇ ਪੂਣੇ ਵਿੱਚ ਵਕਾਲਤ ਦੀ ਪੜ੍ਹਾਈ ਕਰਨ ਵਾਲਾ ਅਤੇ ਸਨੈਕਸ ਦੀ ਦੁਕਾਨ ਚਲਾਉਣ ਵਾਲਾ ਇਹ ਸ਼ਖ਼ਸ ਅਚਾਨਕ ਗੁਰਦੁਆਰੇ ਤੱਕ ਕਿਵੇਂ ਪਹੁੰਚਿਆ?
ਹਮਲਾਵਰ ਦਾ ਨਾਂ ਜਸਪਾਲ ਸਿੰਘ ਤੇਜਾ ਸਿੰਘ ਐਦਲ (62 ਸਾਲ) ਹੈ, ਜੋ ਮੂਲ ਰੂਪ ਤੋਂ ਮਹਾਰਾਸ਼ਟਰ ਦੇ ਪੂਣੇ ਸ਼ਹਿਰ ਦਾ ਰਹਿਣ ਵਾਲਾ ਹੈ। ਹਮਲਾਵਰ ਨੇ ਆਪਣੀ ਜ਼ਿੰਦਗੀ ਦਾ ਜ਼ਿਆਦਾਤਰ ਸਮਾਂ ਪੂਣੇ ਦੇ ‘ਕੈਂਪ’ ਇਲਾਕੇ ਵਿੱਚ ਬਿਤਾਇਆ ਸੀ। ਉਹ ਦੋ ਸਾਲ ਪਹਿਲਾਂ ਹੀ ਧਾਰਮਿਕ ਸੇਵਾ ਦੇ ਸਿਲਸਿਲੇ ਵਿੱਚ ਨਾਂਦੇੜ ਸ਼ਿਫਟ ਹੋਇਆ ਸੀ।
ਪੁਲਿਸ ਜਾਂਚ ਵਿੱਚ ਇਹ ਗੱਲ ਸਾਹਮਣੇ ਆਈ ਹੈ ਕਿ ਜਸਪਾਲ ਸਿੰਘ ਨੇ ਕਾਨੂੰਨ (ਲਾਅ) ਦੀ ਪੜ੍ਹਾਈ ਕੀਤੀ ਸੀ। ਪੂਣੇ ਵਿੱਚ ਰਹਿਣ ਦੌਰਾਨ ਉਸ ਨੇ ਕਈ ਤਰ੍ਹਾਂ ਦੇ ਕੰਮ ਕੀਤੇ। ਕੁਝ ਸਮਾਂ ਵਕਾਲਤ ਕੀਤੀ, ਇੱਕ ਛੋਟਾ ਅਖ਼ਬਾਰ ਚਲਾਇਆ ਅਤੇ ਕੈਂਪ ਇਲਾਕੇ ਵਿੱਚ ਲਗਭਗ ਤਿੰਨ ਸਾਲ ਤੱਕ ਸਨੈਕਸ ਦੀ ਦੁਕਾਨ ਵੀ ਚਲਾਈ, ਜਿਸਨੂੰ ਬਾਅਦ ਵਿੱਚ ਬੰਦ ਕਰਨਾ ਪਿਆ।
ਕ੍ਰਾਈਮ ਬ੍ਰਾਂਚ ਮੁਤਾਬਕ ਦੋਸ਼ੀ ਦੀ ਪਤਨੀ ਪੂਣੇ ਦੇ ਕੈਂਪ ਇਲਾਕੇ ਦੇ ਇੱਕ ਅੰਗਰੇਜ਼ੀ ਮਾਧਿਅਮ ਸਕੂਲ ਵਿੱਚ ਅਧਿਆਪਕਾ ਹੈ ਅਤੇ ਉੱਥੇ ਆਪਣੇ ਭਤੀਜੇ ਨਾਲ ਰਹਿੰਦੀ ਹੈ। ਦੋਸ਼ੀ ਦੀ ਵਿਆਹੁਤਾ ਧੀ ਵੀ ਪੂਣੇ ਵਿੱਚ ਰਹਿੰਦੀ ਹੈ।
ਕ੍ਰਾਈਮ ਬ੍ਰਾਂਚ ਮੁਤਾਬਕ, ਹਮਲਾਵਰ  ਦੀ ਪਤਨੀ ਅਤੇ ਹੋਰ ਪਰਿਵਾਰਕ ਮੈਂਬਰਾਂ ਨੇ ਪੁੱਛਗਿੱਛ ਵਿੱਚ ਦੱਸਿਆ ਕਿ ਉਹ ਪਰਿਵਾਰ ਦੇ ਸੰਪਰਕ ਵਿੱਚ ਬਹੁਤ ਘੱਟ ਰਹਿੰਦਾ ਸੀ ਅਤੇ ਉਨ੍ਹਾਂ ਨਾਲ ਮੁਸ਼ਕਿਲ ਨਾਲ ਹੀ ਗੱਲ ਕਰਦਾ ਸੀ। ਘਟਨਾ ਤੋਂ ਬਾਅਦ ਮਹਾਰਾਸ਼ਟਰ ਅੱਤਵਾਦ ਰੋਕੂ ਦਸਤੇ (ATS) ਦੀ ਟੀਮ ਨੇ ਕੈਂਪ ਦੇ ਸੋਲਾਪੁਰ ਬਾਜ਼ਾਰ ਇਲਾਕੇ ਵਿੱਚ ਉਸਦੇ ਘਰ ਦੀ ਤਲਾਸ਼ੀ ਲਈ। ਪੁਲਿਸ ਨੂੰ ਦੇਰ ਰਾਤ ਤੱਕ ਕੀਤੀ ਗਈ ਤਲਾਸ਼ੀ ਵਿੱਚ ਕੋਈ ਵੀ ਸ਼ੱਕੀ ਦਸਤਾਵੇਜ਼ ਜਾਂ ਸਾਹਿਤ ਨਹੀਂ ਮਿਲਿਆ।
ਪੁਲਿਸ ਅਧਿਕਾਰੀਆਂ ਅਨੁਸਾਰ, ਦੋਸ਼ੀ ਸਾਲ 2024 ਵਿੱਚ ਨਾਂਦੇੜ ਦੇ ਤਖ਼ਤ ਸੱਚਖੰਡ ਸ੍ਰੀ ਹਜ਼ੂਰ ਸਾਹਿਬ ਗੁਰਦੁਆਰੇ ਵਿੱਚ ਸੇਵਾ ਕਰਨ ਲਈ ਗਿਆ ਸੀ। ਗੌਰਤਲਬ ਹੈ ਕਿ ਸੁਖਬੀਰ ਸਿੰਘ ਬਾਦਲ ਆਪਣੀ ਪਤਨੀ ਅਤੇ ਸੰਸਦ ਮੈਂਬਰ ਹਰਸਿਮਰਤ ਕੌਰ ਬਾਦਲ ਨਾਲ ਸੱਚਖੰਡ ਗੁਰਦੁਆਰੇ ਵਿੱਚ ਮੱਥਾ ਟੇਕਣ ਤੋਂ ਬਾਅਦ ਮਾਤਾ ਸਾਹਿਬ ਦੇਵਾ ਜੀ ਗੁਰਦੁਆਰੇ ਗਏ ਸਨ, ਜਿੱਥੇ ਉਨ੍ਹਾਂ ’ਤੇ ਇਹ ਹਮਲਾ ਹੋਇਆ। ਅਜਿਹੇ ਵਿੱਚ ਫਿਲਹਾਲ ਪੁਲਿਸ ਪੂਣੇ ਤੋਂ ਨਾਂਦੇੜ ਜਾਣ ਤੋਂ ਬਾਅਦ ਦੋਸ਼ੀ ਦੀਆਂ ਸਰਗਰਮੀਆਂ ਅਤੇ ਇਸ ਹਮਲੇ ਦੇ ਪਿੱਛੇ ਦੇ ਅਸਲ ਮਕਸਦ ਦਾ ਪਤਾ ਲਗਾਉਣ ਵਿੱਚ ਜੁਟੀ ਹੈ।