ਮੱਧ ਪ੍ਰਦੇਸ਼ ’ਚ ਕੋਲਡ੍ਰਿਫ ਸੀਰਪ ਨਿਰਮਾਤਾ ਕੰਪਨੀ ’ਤੇ ਐੱਫਆਈਆਰ, ਸਰਕਾਰੀ ਡਾਕਟਰ ਚਲਾ ਰਿਹਾ ਸੀ ਨਿੱਜੀ ਕਲੀਨਿਕ, ਗ੍ਰਿਫ਼ਤਾਰ

ਹਾਨੀਕਾਰਕ ਡਾਈ ਇਥੀਲੀਨ ਗਲਾਈਕੋਲ (ਡੀਈਜੀ) ਮਿਲੇ ਗ਼ੈਰ-ਮਿਆਰੀ ਕਫ ਸੀਰਪ ਕੋਲਡ੍ਰਿਫ ਪੀਣ ਕਾਰਨ ਕਿਡਨੀ ਫੇਲ੍ਹ ਹੋਣ ਤੋਂ ਬਾਅਦ ਮੱਧ ਪ੍ਰਦੇਸ਼ ਦੇ ਛਿੰਦਵਾੜਾ ਵਿਚ ਪਿਛਲੇ ਇਕ ਮਹੀਨੇ ’ਚ 14 ਬੱਚਿਆਂ ਦੀ ਮੌਤ ਹੋ ਚੁੱਕੀ ਹੈ ਜਦਕਿ 13 ਬੱਚੇ ਹਾਲੇ ਵੀ ਜ਼ੇਰੇ ਇਲਾਜ ਹਨ। ਇਸ ਦੌਰਾਨ ਬੈਤੂਲ ਦੇ ਵੀ ਦੋ ਹੋਰ ਬੱਚਿਆਂ ਦੀ ਸੀਰਪ ਪੀਣ ਤੋਂ ਬਾਅਦ ਕਿਡਨੀ ਫੇਲ੍ਹ ਹੋਣ ਕਾਰਨ ਮੌਤ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਹ ਬੱਚੇ ਵੀ ਛਿੰਦਵਾੜਾ ਵਿਚ ਹੀ ਇਲਾਜ ਕਰਵਾ ਰਹੇ ਸਨ। ਇਸ ਮਾਮਲੇ ’ਚ ਤਾਮਿਲਨਾਡੂ ਦੀ ਸੀਰਪ ਨਿਰਮਾਤਾ ਕੰਪਨੀ ਸ਼੍ਰੀਸਨ ਫਾਰਮਾਸਿਊਟੀਕਲ ਦੇ ਮਾਲਕਾਂ ਅਤੇ ਇਲਾਜ ਦੌਰਾਨ ਬੱਚਿਆਂ ਨੂੰ ਗ਼ੈਰ-ਮਿਆਰੀ ਸੀਰਪ ਪੀਣ ਦੀ ਸਲਾਹ ਦੇਣ ਵਾਲੇ ਡਾਕਟਰ ਪ੍ਰਵੀਨ ਸੋਨੀ ਖ਼ਿਲਾਫ਼ ਸ਼ਨਿਚਰਵਾਰ ਰਾਤ ਐੱਫਆਈਆਰ ਦਰਜ ਕਰਵਾਈ ਗਈ। ਪਰਾਸੀਆ ਥਾਣੇ ਵਿਚ ਦਵਾਈਆਂ ਵਿਚ ਮਿਲਾਵਟ ਅਤੇ ਗ਼ੈਰ-ਇਰਾਦਤਨ ਹੱਤਿਆ ਵਰਗੀਆਂ ਭਾਰਤੀ ਨਿਆਂ ਸੰਹਿਤਾ ਦੀਆਂ ਧਾਰਾਵਾਂ ਤਹਿਤ ਐੱਫਆਈਆਰ ਦਰਜ ਕੀਤੀ ਗਈ ਹੈ। ਇਨ੍ਹਾਂ ਧਾਰਾਵਾਂ ਵਿਚ ਦੋਸ਼ ਸਿੱਧ ਹੋਣ ’ਤੇ ਉਮਰ ਕੈਦ ਤੱਕ ਦੀ ਸਜ਼ਾ ਦੀ ਤਜਵੀਜ਼ ਹੈ। ਪੁਲਿਸ ਨੇ ਡਾ. ਸੋਨੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ, ਉੱਧਰ ਸਿਹਤ ਵਿਭਾਗ ਨੇ ਉਨ੍ਹਾਂ ਨੂੰ ਮੁਅੱਤਲ ਕਰ ਦਿੱਤਾ ਹੈ। ਉਹ ਪਰਾਸੀਆ ਦੇ ਸਰਕਾਰੀ ਹਸਪਤਾਲ ਵਿਚ ਕੰਮ ਕਰ ਰਹੇ ਸਨ ਅਤੇ ਨਿੱਜੀ ਕਲੀਨਿਕ ਵੀ ਚਲਾ ਰਹੇ ਸਨ। ਨਿੱਜੀ ਕਲੀਨਿਕ ’ਤੇ ਹੀ ਉਨ੍ਹਾਂ ਨੇ ਬੱਚਿਆਂ ਦਾ ਇਲਾਜ ਕੀਤਾ ਸੀ।ਏਡੀਐੱਮ ਧੀਰੇਂਦਰ ਸਿੰਘ ਨੇ ਦੱਸਿਆ ਕਿ ਮੁੱਖ ਮੰਤਰੀ ਦੇ ਨਿਰਦੇਸ਼ ’ਤੇ ਮ੍ਰਿਤਕ ਬੱਚਿਆਂ ਦੇ ਪਰਿਵਾਰਾਂ ਨੂੰ ਚਾਰ-ਚਾਰ ਲੱਖ ਰੁਪਏ ਦਾ ਮੁਆਵਜ਼ਾ ਦਿੱਤਾ ਜਾ ਰਿਹਾ ਹੈ। ਬਲਾਕ ਮੈਡੀਕਲ ਅਫ਼ਸਰ (ਬੀਐੱਮਓ) ਡਾ. ਅੰਕਿਤ ਸਹਿਲਾਮ ਨੇ ਦੱਸਿਆ ਕਿ ਡਰੱਗ ਟੈਸਟਿੰਗ ਲੈਬਾਰਟਰੀ ਤਾਮਿਲਨਾਡੂ ਦੀ ਜਾਂਚ ਰਿਪੋਰਟ ਵਿਚ ਸੀਰਪ ’ਚ 48.06 ਫ਼ੀਸਦੀ ਡਾਈ ਇਥੀਲੀਨ ਗਲਾਈਕੋਲ ਮਿਲਿਆ ਹੈ। ਇਹ ਸਿਹਤ ਲਈ ਹਾਨੀਕਾਰਕ ਹੈ ਅਤੇ ਇਸੇ ਕਾਰਨ ਕਿਡਨੀ ਫੇਲ੍ਹ ਹੋ ਸਕਦੀ ਹੈ। ਡਾਈ ਇਥੀਲੀਨ ਗਲਾਈਕੋਲ ਸੀਰਪ ਵਿਚ ਪਾਬੰਦੀਸ਼ੁਦਾ ਪਦਾਰਥ ਹੈ। ਇਸ ਲਈ ਸੀਰਪ ਬਣਾਉਣ ਵਾਲੀ ਕੰਪਨੀ ਅਤੇ ਬੱਚਿਆਂ ਦਾ ਇਲਾਜ ਕਰਨ ਵਾਲੇ ਡਾਕਟਰ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕੀਤੀ ਗਈ ਹੈ। ਦੂਜੇ ਪਾਸੇ, ਬੈਤੂਲ ਦੇ ਮੁੱਖ ਮੈਡੀਕਲ ਤੇ ਸਿਹਤ ਅਧਿਕਾਰੀ ਡਾ. ਮਨੋਜ ਹੁਰਮਾੜੇ ਨੇ ਦੱਸਿਆ ਕਿ ਆਮਲਾ ਦੇ ਪਿੰਡ ਕਲਮੇਸ਼ਵਰਾ ਵਾਸੀ ਚਾਰ ਸਾਲਾ ਕਬੀਰ ਤੇ ਪਿੰਡ ਜਾਮੁਨ ਬਿਛੁਆ ਵਾਸੀ ਢਾਈ ਸਾਲ ਦੇ ਨਿਹਾਲ ਨੂੰ ਬੁਖਾਰ ਹੋਣ ’ਤੇ ਪਲਾਸੀਆ ਵਿਚ ਡਾ. ਪ੍ਰਵੀਨ ਸੋਨੀ ਤੋਂ ਇਲਾਜ ਕਰਵਾਇਆ ਗਿਆ ਸੀ। ਬੈਤੂਲ ਦੇ ਕੁਲੈਕਟਰ ਨਰੇਂਦਰ ਕੁਮਾਰ ਸੂਰਜਵੰਸ਼ੀ ਨੇ ਦੱਸਿਆ ਕਿ ਦੋਵਾਂ ਬੱਚਿਆਂ ਦੀ ਮੌਤ ਦੀ ਜਾਂਚ ਕੀਤੀ ਜਾ ਰਹੀ ਹੈ।