ਮੈਦਾਨ ‘ਚ ਖੜ੍ਹ ਮਿੱਤਰਾ, ਚੱਲ ਚਲੀਏ ਬਰਗਾੜੀ ‘ਚ ਧਰਨਾ ਦੇਣ, ਮੈਂ ਤੇਰੇ ਨਾਲ ਬੈਠੂੰ : ਸਿੱਧੂ
ਚੰਡੀਗੜ੍ਹ : ਕੈਬਨਿਟ ਮੰਤਰੀ ਨਵਜੋਤ ਸਿੰਘ ਸਿੱਧੂ ਨੇ ਸੁਖਬੀਰ ਬਾਦਲ ਵੱਲੋਂ ਲਾਏ ਜਾ ਰਹੇ ਧਰਨਿਆਂ ਨੂੰ ਡਰਾਮਾ ਕਰਾਰ ਦਿੰਦੇ ਹੋਏ ਉਨ੍ਹਾਂ ਤੇ ਖੂਬ ਸਿਆਸੀ ਨਿਸ਼ਾਨੇ ਲਗਾਏ। ਉਨ੍ਹਾਂ ਕਿਹਾ ਕਿ ਇੱਕ ਭਗਵੰਤ ਮਾਨ ਵਲੋਂ ਧਰਨਾ ਲਾਇਆ ਜਾ ਰਿਹਾ ਸੀ ਤਾਂ ਮਾਨ ਦੇ ਧਰਨੇ ਬਾਰੇ ਸੁਖਬੀਰ ਦਾ ਜੁਆਬ ਸੀ ਕਿ ਧਰਨੇ ਉਹ ਲਾਉਂਦੇ ਹੁੰਦੇ ਐ ਜਿਹੜੇ ਵਿਹਲੇ ਹੁੰਦੇ ਨੇ ਤੇ ਘਰੋਂ ਕੱਢੇ ਹੁੰਦੇ ਨੇ। ਮੈਂ ਤੁਹਾਨੂੰ ਤੁਹਾਡੇ ਇਹੀ ਲਫਜ਼ ਯਾਦ ਕਰਵਾਉਂਦਿਆਂ ਦੱਸ ਰਿਹਾ ਹਾਂ ਕਿ ਹੁਣ ਪੰਜਾਬ ਦੇ ਲੋਕਾਂ ਨੇ ਤੁਹਾਨੂੰ ਵੀ ਵਿਹਲੇ ਕਰ ਦਿੱਤਾ ਹੈ। ਉਨ੍ਹਾਂ ਟਕਸਾਲੀ ਆਗੂਆਂ ਬਾਰੇ ਕਿਹਾ ਕਿ ਟਕਸਾਲੀ ਆਗੂਆਂ ਨੇ ਟਕਸਾਲੀ ਆਗੂਆਂ ਨੂੰ ਅਕਾਲੀ ਦਲ ਤੋਂ ਕੋਈ ਪ੍ਰਾਬਲਮ ਨਹੀਂ ਬਲਕਿ ਉਨ੍ਹਾਂ ਨੂੰ ਸੁਖਬੀਰ ਅਤੇ ਮਜੀਠੀਆ ਤੋਂ ਪ੍ਰਾਬਲਮ ਹੈ।
ਉਨ੍ਹਾਂ ਇੱਥੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸੁਖਬੀਰ ਬਾਦਲ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਜੇਕਰ ਤੁਹਾਨੂੰ ਧਰਨੇ ਲਾਉਣ ਦਾ ਇੰਨਾ ਹੀ ਸ਼ੌਂਕ ਹੈ ਤਾਂ ਮੇਰੇ ਨਾਲ ਬਰਗਾੜੀ ਚੱਲੋ ਉਥੇ ਜਾ ਕੇ ਧਰਨਾ ਦਿਉ, ਮੈਂ ਵੀ ਤੁਹਾਡੇ ਨਾਲ ਬੈਠਾਂਗਾ। ਕਿਉਂਕਿ ਪੰਥ ਦਾ ਸਭ ਤੋਂ ਵੱਡਾ ਮੁੱਦਾ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀਆਂ ਹੋਈਆਂ ਬੇਅਦਬੀਆਂ ਦੇ ਸਬੰਧ ਵਿੱਚ ਹੈ, ਤੁਸੀ ਉੱਥੇ ਧਰਨਾ ਕਿਉਂ ਨਹੀਂ ਦਿੰਦੇ। ਤੁਸੀਂ ਪੰਜਾਬ ਦੇ ਲੋਕਾਂ ਨੂੰ ਇਹ ਕਿਉਂ ਨਹੀਂ ਦੱਸਦੇ ਕਿ ਐਮ.ਐਸ.ਜੀ. ਫਿਲਮ ਕਿਵੇਂ ਰਿਲੀਜ਼ ਹੋਈ ਤੇ ਕਿਵੇਂ ਇਸ ਫਿਲਮ ਨੇ 100 ਕਰੋੜ ਰੁਪਏ ਕਮਾ ਲਏ, ਡੇਰਾ ਸਾਧ ਨੂੰ ਮਾਫ਼ੀ ਕਿਵੇਂ ਮਿਲੀ, ਇਸ ਦਾ ਜਿੰਮੇਵਾਰ ਕੌਣ ਹੈ? ਉਨ੍ਹਾਂ ਇਹ ਵੀ ਕਿਹਾ ਕਿ ਉਸ ਸਮੇਂ ਅਕਾਲੀ ਦਲ ਦੀ ਹੀ ਸਰਕਾਰ ਸੀ, ਉਸ ਵੇਲੇ ਲੋਕਾਂ ਨੂੰ ਇਨਸਾਫ਼ ਕਿਉਂ ਨਹੀਂ ਦਿੱਤਾ ਗਿਆ? ਕਿਉਂ ਇਨਸਾਫ਼ ਮੰਗਣ ਵਾਲਿਆਂ ਉੱਤੇ ਗੋਲੀਆਂ ਚਲਾ ਦਿੱਤੀਆਂ ਗਈਆਂ?
Read Also ਸੁਖਬੀਰ ਬਾਦਲ ਬਰਗਾੜੀ ਧਰਨੇ ‘ਚ ਹੋਣਗੇ ਸ਼ਾਮਿਲ ?
ਕੈਬਨਿਟ ਮੰਤਰੀ ਨੇ ਸੁਖਬੀਰ ਬਾਦਲ ਨੂੰ 84 ਦੇ ਮੁੱਦੇ ’ਤੇ ਘੇਰਦਿਆਂ ਕਿਹਾ ਕਿ ਜਦੋਂ ਤੁਹਾਡੇ ਕੋਲ ਸਾਰੇ ਮੁੱਦੇ ਖਤਮ ਹੋ ਜਾਂਦੇ ਹਨ ਤਾਂ ਤੁਸੀਂ 84 ਦੇ ਮੁੱਦੇ ਵੱਲ ਭੱਜਣ ਲਗਦੇ ਹੋ। ਉਨ੍ਹਾਂ ਕਿਹਾ ਕਿ 84 ਦਾ ਦੁੱਖ ਸਾਰਿਆਂ ਨੂੰ ਹੈ, ਮੈਨੂੰ ਵੀ ਹੈ। ਪਰ ਉਹ ਸੁਖਬੀਰ ਬਾਦਲ ਨੂੰ ਸਵਾਲ ਕਰਦੇ ਹਨ ਕਿ ਤੁਹਾਡਾ ਬੀਜੇਪੀ ਨਾਲ ਨਹੁੰ ਮਾਸ ਦਾ ਰਿਸ਼ਤਾ ਹੈ, ਇਸ ਵਾਰ ਵੀ ਤੁਹਾਡੀ ਮੰਤਰੀ ਸਰਕਾਰ ਦਾ ਹਿੱਸਾ ਹੈ, ਇਸ ਤੋਂ ਪਹਿਲਾਂ ਬੀਜੇਪੀ ਵਾਲੀ ਸਰਕਾਰ ਵਿੱਚ ਤੁਸੀਂ ਮੰਤਰੀ ਰਹਿ ਚੁੱਕੇ ਹੋ। ਤੁਸੀਂ ਉਨ੍ਹਾਂ ਅੱਗੇ ਇਹ ਸ਼ਰਤ ਕਿਉਂ ਨਹੀਂ ਰੱਖੀ ਕਿ ਸਾਨੂੰ 84 ਦਾ ਇਨਸਾਫ਼ ਚਾਹੀਦਾ ਹੈ? ਹੁਣ ਕੇਂਦਰ ਵਿੱਚ ਤੁਹਾਡੀ ਹੀ ਪੁਲਿਸ ਹੈ, ਤੁਹਾਡੀ ਹੀ ਸਰਕਾਰ ਹੈ? ਇਸ ਸਰਕਾਰ ਵਿੱਚ ਕੈਬਨਿਟ ਮੰਤਰੀ ਵੀ ਤੁਹਾਡੀ ਪਤਨੀ ਹੈ, ਫਿਰ ਧਰਨੇ ਦੇਣ ਦੀ ਬਜਾਇ ਤੁਸੀਂ ਉਨ੍ਹਾਂ ਨੂੰ 84 ਦੇ ਇਨਸਾਫ਼ ਬਾਰੇ ਕਿਉਂ ਨਹੀਂ ਕਹਿੰਦੇ? ਉਨ੍ਹਾਂ ਸੁਖਬੀਰ ਬਾਦਲ ਨੂੰ ਕਿਹਾ ਕਿ ਜਦੋਂ ਤੁਸੀਂ ਕਬੱਡੀਆਂ ਦੇ ਮੈਚ ਕਰਵਾਉਂਦੇ ਹੁੰਦੇ ਸੀ ਉਦੋਂ ਤੁਹਾਨੂੰ 84 ਦੀ ਯਾਦ ਕਿਉਂ ਨਹੀਂ ਆਈ?
ਉਨ੍ਹਾਂ ਸੁਖਬੀਰ ਬਾਦਲ ਨੂੰ ਕਿਹਾ ਕਿ ਤੁਸੀਂ ਸੇਖਵਾਂ ਨੂੰ ਪਾਰਟੀ ’ਚੋਂ ਕੱਢ ਦਿੱਤਾ, ਕਿੰਨਿਆਂ ਕੁ ਨੂੰ ਤੁਸੀਂ ਪਾਰਟੀ ਵਿਚੋਂ ਕੱਢੋਗੇ, ਸਾਰੀ ਦੁਨੀਆਂ ਨੇ ਉਹ ਗਾਲ੍ਹ ਸੁਣੀ ਜਿਹੜੀ ਰਣਜੀਤ ਸਿੰਘ ਬ੍ਰਹਮਪੁਰਾ ਨੇ ਤੁਹਾਨੂੰ ਕੱਢੀ, ਜੇ ਹਿੰਮਤ ਐ ਤਾਂ ਦਿਉ ਜਵਾਬ। ਸਰਦਾਰ ਬ੍ਰਹਮਪੁਰਾ ਅਤੇ ਢੀਂਡਸਾ ਦੇ ਅੱਗੇ ਤੁਹਾਡਾ ਕੱਦ ਕੁਝ ਵੀ ਨਹੀਂ।
ਉਨ੍ਹਾਂ ਸੁਖਬੀਰ ਬਾਦਲ ਨੂੰ ਇਹ ਵੀ ਕਿਹਾ ਕਿ “ਮੈਦਾਨ ਵਿਚ ਖੜ੍ਹ ਮਿੱਤਰਾ, ਚੱਲ ਚਲੀਏ ਬਰਗਾੜੀ ਵਿੱਚ ਧਰਨਾ ਦੇਣ, ਮੈਂ ਤੇਰੇ ਨਾਲ ਬੈਠੂੰ।” ਹੁਣ ਇਹ ਧਰਨੇ ਦੇ ਕੇ ਲੋਕਾਂ ਦਾ ਧਿਆਨ ਵਟਾਇਆ ਜਾ ਰਿਹਾ ਹੈ। ਅਪਣੀ ਸਰਕਾਰ ਵੇਲੇ ਤੁਸੀ ਸੱਤਾ ਦੇ ਨਸ਼ੇ ਵਿਚ ਚੂਰ ਕੀ ਕਰਦੇ ਸੀ, ਤੇ ਅੱਜ ਤੁਸੀਂ ਇਹ ਡਰਾਮੇ ਕਰ ਰਹੇ ਓ।
ਉਨ੍ਹਾਂ ਦੱਸਿਆ ਕਿ ਜਦੋਂ ਅੰਮ੍ਰਿਤਸਰ ਰੇਲ ਹਾਦਸਾ ਹੋਇਆ ਤਾਂ ਸੁਖਬੀਰ ਬਾਦਲ ਨੇ ਮੈਨੂੰ ਕਸੂਰਵਾਰ ਠਹਿਰਾ ਦਿੱਤਾ। ਪਰ ਫਿਰ ਅਦਾਲਤ ਨੇ ਇਨ੍ਹਾਂ ਦੇ ਝੂਠ ਨੂੰ ਬੇਨਕਾਬ ਕਰਕੇ ਰੱਖ ਦਿੱਤਾ। ਕੈਬਨਿਟ ਮੰਤਰੀ ਨੇ ਕਿਹਾ ਕਿ ਮੈਨੂੰ ਤਾਂ ਇਹ ਡਰ ਸੀ ਕਿ ਇੰਡੋਨੇਸ਼ੀਆ ਵਿੱਚ ਜਿਹੜਾ ਦਰਦਨਾਕ ਹਾਦਸਾ ਹੋਇਆ ਸੀ ਸ੍ਰ. ਬਾਦਲ ਕਿਤੇ ਇਹ ਨਾ ਕਹਿ ਦੇਣ ਕਿ ਇਸ ਵਿੱਚ ਵੀ ਸਿੱਧੂ ਸ਼ਾਮਲ ਹੈ ਤੇ ਇਸ ਵਿੱਚ ਉਸਦਾ ਹੱਥ ਹੈ। ਉਨ੍ਹਾਂ ਕਿਹਾ ਕਿ ਉਹ ਮੀਡੀਆ ਰਾਹੀਂ ਸਾਰੀ ਸੱਚਾਈ ਲੋਕਾਂ ਦੇ ਧਿਆਨ ਵਿੱਚ ਲਿਆਉਣਾ ਚਾਹੁੰਦੇ ਸੀ।
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.
